درجہ بندی: (1 votes - 5.00 average)

حدثنا اسماعيل بن اويس قال: حدثني مالك، عن ھشام بن عروہ، عن ابيہ، عن عبد الل بن عمرو بن العاص قال:
سمعت رسول اللہ صلى اللہ عليہ وسلم يقول: (إن الله لا يقبض العلم انتزاعا ينتزعه من العباد، ولكن يقبض العلم بقبض العلماء، حتى اذا لم يبق عالما، اتخذ الناس رؤوسا جھالا، فسئلوا، فافتوا بغير علم، فضلوا واضلوا). (صحیح البخاری کتاب العلم، باب کیف یقبض العلم۔صحیح البخاری کی حدیث نمبر 100)

عبد اللہ بن عمرو بن العاص رضی اللہ عنہ فرماتے ہیں کہ میں نے رسول اللہ صلی اللہ علیہ و آلہ وسلم کو فرماتے ہوئے سنا:
"اللہ علم کو اس طرح نہیں اٹھا لے گا کہ اس کو بندوں سے چھین لے۔ بلکہ وہ علماء کو موت دے کر علم کو اٹھائے گا۔ حتیٰ کہ جب کوئی عالم باقی نہیں رہے گا تو لوگ جاہلوں کو سردار بنا لیں گے۔ ان سے سوالات کیے جائیں گے اور وہ بغیر علم کے جواب دیں گے۔ اس لیے خود بھی گمراہ ہوں گے اور لوگوں کو بھی گمراہ کریں گے"۔
]رسول اللہ صلی اللہ علیہ و آلہ وسلم نے ہمیں جو آگاہی دی ہے اس کا تقاضا ہے کہ ہم اپنے دینی معاملات ان لوگوں کے حوالے کریں جو واقعی قرآن و حدیث‌کا گہرا علم رکھتے ہوں۔ عام مشاہدے کی بات ہے کہ ہر آدمی کا اپنا میدان کار ہوتا ہے جس کی نزاکتوں اور باریکیوں سے صرف وہی واقف ہو سکتا ہے۔ ایک ڈاکٹر کتنا ہی قابل کیوں نہ ہو لیکن انجینرنگ کے میدان میں بے کار ہے۔ ایک پروفیسر چاہے ہزاروں مقالے لکھ ڈالے لیکن ایک چھوٹا سا آپریشن نہیں کر سکتا۔ بعینہ قرآن و حدیث کی بنیاد پر مسائل بیان کرنااور فتویٰ دینا ایک عظیم ذمے داری ہے جس کے کچھ اصول و ضوابط ہیں۔ ہم میں سے بہت سے لوگ اس حقیقت کو فراموش کیے بیٹھے ہیں۔ جس کا نتیجہ بہت سی جگہوں پر یہ ہے کہ دینی معاملات کی راہنمائی کی ذمے داری ایسے اشخاص کے حوالے کر دی جاتی ہے جن کے لیے عربی زبان کی ایک سادہ عبارت کو سمجھنا بھی مشکل ہے۔ اور اس کی لازمی نتیجہ امت میں تفریق اور "ضلوا و اضلوا" کی صورت میں نکل رہا ہے۔