یاسر عمران مرزا

میرا ایک کزن نے آج سے قریبا دو سال قبل مجھ سے رابطہ کیا اور کہا کہ اس نے میٹرک کے بعد الیکٹرانکس کا تین سالہ ڈپلومہ جو ایف ایس سی کے برابر ہوتا ہے کر لیا ہے اور اب اس کا سعودی عرب آنے کا پروگرام ہے تا کہ جاب تلاش کر سکے۔ لیکن چونکہ ابھی عمر کم ہے اس لیے اس کے پاس تقریبا ایک ڈیڑھ سال کا وقت ہے جس میں وہ کمپیوٹر کے کچھ ایسے کورس کرنا چاہتا ہے جو جاب حاصل کرنے میں اس کے مدد گار ہوں۔ میں نے اسے ایم سی ایس ای سرٹیفکیشن اورسسکو کی نیٹ ورک سے متعلقہ چند سرٹیفکیشنز کرنے کا مشورہ دیا اور بعد ازاں اسے بہتر انسٹی ٹیوٹس منتخب کرنے کے متعلق بھی مشورہ دیا۔ کیوں کہ نیٹ ورکنگ ایک ایسا شعبہ ہے جس میں سعودی عرب میں کافی آسانی سے جاب مل جاتی ہے۔ چنانچہ اس نے وہ کورس شروع کیے اور پڑھنے لگ گیا۔

وقتا فوقتا وہ مجھ سے رابطہ کرتا رہا، جس کا مقصد مزید رہنمائی اور آئی ٹی سے متعلقہ ٹیکنیکل ٹرمز کی وضاحت ہوتا تھا۔ اس دوران میں پاکستان چھٹی پر بھی گیا تو اسے کافی گائیڈینس دے کر آیا۔ اس کے والد صاحب یہیں سعودی عرب میں مقیم تھے، وہ جب بھی مجھ سے ملتے تو کہتے کہ تمھارا چھوٹا بھائی ہے اس کی مدد کرو تا کہ وہ یہاں آ کر کام حاصل کر سکے۔ میں نے اس سلسلے میں اپنی طرف سے بھرپور کوشش کی اور اسے ان تمام مشکلات کے متعلق بتایا جو یہاں آ کر کسی بھی بندے کو درپیش ہوتی ہیں اور ان کا سدباب کرنے کے لیے کیا ابتدائی اقدامات مناسب رہیں گے وہ بھی بتاتا رہا۔

بالاخر ویزے کے لیے مطلوبہ عمر پوری ہو جانے کے بعد وہ یہاں آ گیا اور جاب حاصل کرنے کے لیے اس نے میرے سمیت تمام رابطے والے بندوں سے جاب کے متعلق بات چیت کی۔ میں نے اسے کہا کہ اپنی تازہ ترین سی وی مجھے دے دو میں اپنے جاننے والوں ملازمت پیشہ لوگوں اور کمپنیوں کو بجھوا دوں گا۔ اس نے کہا کہ میری سی وی نہیں ہے، آپ ہی بنا دیں اور اپنے دفتر سے اسے درجن بھر کے قریب پرنٹ کر کے لادیں۔

میں نے اچھی طرح محنت کر کے اس کی سی وی بنائی، اسے پرنٹ کیا اور اسے بجھوا دی۔ اس کے بعد اپنے جاننے والے افراد کو اس کی سی وی ای میل کر دی۔ مزید مدد کے لیے میں نے انٹرنیٹ پر ویب سائٹس bayt.com اور linkedin.com پر بھی اس کے پروفائل بنا کر سی وی انٹرنیٹ پر قابل رسائی بنا دی۔ انٹرنیٹ پر پروفائل بنانے کے لیے بعض ویب سائٹس کی طرف سے یہ شرط ہوتی ہے کہ آپ اپنی کم سے کم تنخواہ کی حد لکھ دیں۔ تاہم اسے ایک طرز کی خانہ پری کہا جا سکتا ہے کیوں کہ اگر اپنی کم سے کم تنخواہ دس لاکھ لکھ دیں تو کوئی بھی کمپنی آپ کو دس لاکھ تنخواہ نہیں دے گی، بلکہ اس جاب کے معیار اور آپکی قابلیت و تجربے کے مطابق ہی دے گی۔ تاہم اگر یہ حد کم رکھی جائے تو کمپنی کا آپ کو کال کرنے کا تناسب قدرے بڑھ سکتا ہے۔ میں نے اسی چیز کو مد نظر رکھتے ہوے کم از کم تنخواہ کی مقدار 500 ڈالر ماہانہ لکھ دی۔ اگرچہ یہ تنخواہ "کم" بالکل نہیں کہی جا سکتی۔ اور سوچا کہ بعد میں اس سے مشورہ کر کے اسے تبدیل کر لیں گے۔ تاہم مجھے اندازہ نہیں تھا کہ یہی چیز بعد میں میرا جرم بن جائے گی۔ پھر میں نے اسے فون کر کے کہا کہ چند معلومات جو میرے پاس نہیں ہیں انہیں اپ ڈیٹ کرنا ضروری ہے چنانچہ وہ میرے پاس آئے تا کہ ہم دونوں مل کر اس کی تازہ ترین معلومات انٹرنیٹ پر اپ ڈیٹ کر دیں۔ اس نے دو دن بعد آنے کا وعدہ کیا۔

اس سے اگلے دن انٹرنیٹ پر تلاش کے دوران میرے کزن کو اپنا پروفائل نظر آیا۔ جس میں بقیہ تمام معلومات کے ساتھ ساتھ اسے کم از کم تنخواہ 500 ڈالر جو 1875 ریال بنتی ہے بھی نظر آئی، یہ دیکھتے ہوے اس نے جھٹ سے اپنے والد کو یہ بات بتا دی۔پھر اس کے والد نے فون کر کے میرے بڑے بھائی، دیگر کزنز اور پاکستان میں گھر والوں کو بھی بتا دی اور کہا کہ یاسر چاہتا ہے کہ میرے بیٹے کی تنخواہ کم سے کم ہو۔ نہ صرف اتنا بلکہ جہاں وہ کام کرتے ہیں اور جہاں میں پہلے کام کرتا رہا ہوں وہاں جو بھی بندہ ملتا ہے اسے یہی بات بتاتے ہیں کہ یاسر نے ہمارے ساتھ دشمنی اور دھوکہ کیا ہے۔ یہاں یہ بات قابل غور ہے کہ پاکستان سے نئے آنے والے غیر پیشہ ورانہ افراد کی تنخواہ 1500 سے 1700 تک ہوتی ہے ۔ جب کہ بغیر تجربے کے فنی علم رکھنے والے افراد کی تنخواہ 1800 سے 2000 ریال تک ہوتی ہے جو بعد میں قابلیت، کمپنی کے معیار اور وقت کے ساتھ ساتھ بڑھتی رہتی ہے۔ پھر اس کے والد صاحب نے مجھے فون کیا اور کہا کہ تم نے زیادتی کی ہے، جان بوجھ کر کم تنخواہ لکھی ہے، وغیرہ وغیرہ اور پھر فون بند کر دیا۔ اس دن کے بعد ان لوگوں نے مجھ سے اپنا رابطہ ختم کر دیا ہے۔ اگر کبھی ملیں تو بے دلی سے مصحافہ کر لیتے ہیں مگر بات چیت نہیں کرتے۔

ابھی سنا ہے کہ اس کی جاب لگ گئی ہے، جس میں پہلے دو ماہ کوئی تنخواہ نہیں دی جائے گی فقط ٹریننگ ہو گی، اس کے بعد تنخواہ 2000 ریال ہو گی۔جس پر وہ دونوں باپ بیٹا کافی خوش ہیں۔

سوال یہ ہے کہ دو سال جس بندے کی تعلیمی رہنمائی کی جائے، پھر بغیر کسی منفی ارادے اور بھرپور خلوص کے ساتھ اس کے لیے جاب ڈھونڈنے میں بھی مدد کی جائے، اس کے دوران اگر کوئی چھوٹی سی کوتاہی ہو جائے تو اس کا صلہ اس طرز کا ہونا چاہیے ؟
اور کیا یہ کوتاہی اس قدر بڑی ہے کہ اس کا صلہ رابطہ توڑنے کے صورت میں دیا جائے؟
اور کیا 125 ریال کا فرق اتنا ہوتا ہے کہ اس کے لیے ایک انسان کی ہر جگہ منفی تشہیر اور بے عزتی کی جائے اور اس کی دو سالہ محنت، دوستی اور خلوص پر پانی پھیر دیا جائے ؟

__________________
عرفی تومیندیش ذغوغائے رقیباں - آواز سگاں کم نہ کند رزق گدارا
میرا بلاگ | yasirimran.wordpress.com

عدنان دانی

میری مانوں تو کھبی بھی کسی رشتہ دار کیلے ویزہ نہیں کرو۔۔۔۔۔ بعد میں پچھتاوں گے، آپ کے ساتھ تو بہت کم ہوا ہے، ہماری سنوں گے تو اپنی بھول جاوں گے۔

__________________

اور اس نے میرے ساغر میں
مئے سرخ انڈیلی ۔۔۔ تو کہا
مت سوچو !

زارا

السلامُ علیکم!!

حدیث نبوی ہے، "فرائض کی نگہداشت رکھو، یعنی اس بات کا خیال رکھو کہ فرائض بہتر سے بہترشکل میں اداہوں، یہ سب سے بڑا جہاد ہے"۔
یاسربھائی آپ نے ایمانداری اورسچائی سے اپنا کام کیا، خلوصِ دِل سے نہ صرف اُسکو مشورہ دیا بلکہ حتیٰ المکان رہنمائی بھی کی جسکااجرآپکو اللہ کی ذات دے گی۔ دراصل اِنسان ناشکرااورخودغرض واقع ہوا ہے ہماری خود غرضی کا عالم یہ ہے کہ ہم مصیبت کے وقت ہی اللہ کویاد کرتے ہیں۔کوئی بڑی خوشی ملے تواُسکاشکرادا کرنے کا وقت بھی نہ ہوتا۔ یہاں تو پھر ایک اِنسان ہے جواپنافائدہ دیکھتا ہے۔ جب اُنہوں نے دیکھا کہ فائدہ کم ہوا ہے تو اُنہوں نے آپ کے خلوص اورایمانداری پرشک کیا۔ اس میں قصورآپکا نہیں اُنکی ناقص سوچ کا ہے۔

رہی بات بے عزتی اورمنفی باتوں کی تشہیرکی تو عزت اورذلت دینے والی اللہ کی ذات ہے۔ آپ اُنکی اِن باتوں کو نظراندازکریں اوراللہ پر بھروسہ رکھیں۔ اِنشاء اللہ اُسکی طر سے کبھی آپکے لئے غلط یا برا نہیں ہوگا۔

__________________

ننھا بچہ

میرے خیال سے تو بھائی آپ کا ہی قصور ہے جو انسانوں سے اچھے صلہ کی امید رکھ لی

اور بھائی جب آپ کا ضمیر مطمئن ہے تو چھوڑ دیں فکر اور بس دیکھ لیجئے گا ایک بار پھر اُنکو آپ کی ضرورت پڑھنے والی ہے

__________________

اب تو اتنی بھی میسر نہیں مے خانے میں

عبیدرضا

بھائی آپ نے یہ سب کچھ نیک نیتی سے کیا تھا اس لئے آپ کو پریشان ہونے کی چنداں ضرورت نہیں ہے ان شاء اللہ اس کا اجر آپ کو اللہ پاک دے گا۔

__________________
دنیا ایک تماشاہ گاہ ہے اور میں اس کا ایک تماشائی

کنعان

السلام علیکم

کبھی موقع ملے تو اپنے اس کزن کو یہ پیغام بھی پہنچا دینا جب وقت ملے۔

اقتباس:

ابھی سنا ہے کہ اس کی جاب لگ گئی ہے، جس میں پہلے دو ماہ کوئی تنخواہ نہیں دی جائے گی فقط ٹریننگ ہو گی، اس کے بعد تنخواہ 2000 ریال ہو گی۔ جس پر وہ دونوں باپ بیٹا کافی خوش ہیں۔

125 ریال ایرر

سعودیہ ورکنگ ویزہ شائد 2 سال کا ہوتا ھے۔

2000 ریال تنخواہ
2 مہینے فری

2000X2= 4000SRL
2 سال میں 24 ماہ
4000÷24=66۔166 سعودی ریال

پھر بھی 66۔41 سعودی ریال کم ہیں

یہ نقصان بھی اسے بتا دیں۔

اور معلوم نہیں دو سال بھی پورے ہوں یا ٹریننگ کے بعد تنخواہ کم ہو جائے، ایسا بھی ہوتا ھے۔

والسلام

__________________

پاکستانی

اپنےہمیشہ ہی ایسا کرتے ہیں - نیکی کا صلہ اللہ تبارک و تعالٰی کی برکت ذات کے سوا کوئی نہیں دیتا ۔ یہ تو ہر گھر کی مثال ہے خاص‌کر سعودیہ والوں کی

__________________

عبداللہ آدم

زارا اور ننھے کا مشورہ بالکل فٹ ہے، اپ ٹینشن نا لیں اجر اوپر والے نے دینا ہے ، بس زیادہ کچھ نہیں کہوں گا.

والسلام

نبیل خان

جناب نیکی کر دریا میں ڈال ۔ ۔ ۔ اس بات کا بھی خیال رکھیں جی

dxbgraphics

آپ نے اپنی طرف سے اچھائی کی ہے ۔ دل ہلکا نہ کریں۔ آپ نے جو اچھائی کی ہے اس کی قدر اگر انہوں نے نہیں کی تو اس کا مطلب نہیں کہ آپ اپنا طرز عمل کسی کے منفی رویے یا پروپیگنڈے کی وجہ سے ترک کر دیں۔

__________________

طاھر

سب سے اچھا مشورہ ہے

اچھے کاموں میں اپنا حصہ جاری رکھیں
کسی کے رزق کا انتظام اگر آپ کے توسط سے ہو تو اس سے اچھی بات اورکیا ہے؟

__________________
ہمیں خبر ہے لٹیروں کے سب ٹھکانوں کی
شریک جرم نہ ہوتے تو مخبری کرتے

کاشف جمیل

السلام علیکم
بھائی ایسے کافی واقعات یہاں وقوع پذیر ہوتے رہتے ہیں آپ کاضمیر مطمئن ہے تو آپ کو فکر نہیں کرنی چائیے۔

میں نے تو 2 سال 1000 ریال راتب پہ کام کیا ہے۔ لیکن کسی سے گلہ نہیں کیا کیونکہ میرے نصیب میں رزق ہی اتنا لکھا تھا۔

عبدالقدوس

نیکی کرو اور اُس کے شر سے بچنے کے لئے تیار رہو۔۔
ابھی نوکری لگی نہیں تو یہ کھپ ڈال دی۔۔۔ خیر کوئی بات نہیں آپ دل چھوٹا نہیں کریں آپ کو اُن سے اجر نہیں ملنا۔ اللہ اجر دینے والا ہے

__________________

کنعان

السلام علیکم

یاسر بھائی، میرا ایک فرسٹ کزن اس کا نام ع سے شروع ہوتا ھے، اس کا ویزہ نکلوانے سے لے کر میرا امارات چھوڑنے تک اگر میں چاہوں تو اس پر ایک کتاب یہاں لکھ سکتا ہوں۔ ہر مرتبہ گہری چوٹ پہنچانے کے بعد بھی میں اسے اکیلا نہیں چھوڑتا تھا ترس آ جاتا تھا، اسے دو گورنمنٹ کی جاب بھی لگوائی تھیں ابھی کچھ عرصہ پہلے معلوم ہوا وہ الامارات چھوڑ کر جدہ چلا گیا ہوا ھے اس میں بھی ایرر ھے۔

اس کے لئے پہلی مرتبہ ائرفورس پر جاب کے حوالہ سے ایک واقعہ لکھتا ہوں۔

میں ان دنوں ائرفورس میں تھا اور پوری بیس میں میرا رتبہ کے برابر بڑے بڑے شیخ آفیسرز سے گہرے تعلقات تھے۔ سی130 میں ایک کرنل کا پرسنل ایرانی بلوچی تھا اور یہ لوگوں کو کچھ فیس لے کر نوکریاں دلواتا تھا میری ڈپارٹمنٹ میں بہت سے پاکستانی اسی نے بھرتی کروائے ہوئے تھے، میں نے اس سے اپنے کزن کی بات کی 6ہزار درھم پر ڈن ہوا ایڈوانس 2 ہزار، مگر شرط یہ تھی کہ جو جاب آفر ہو گی وہ کام بھی آتا ہونا چاہئے کیونکہ اس کا ریٹن ٹیسٹ بھی پاس کرنا ھے ورنہ ایڈوانس واپس دے دیا جائے گا۔

میں نے اپنے کزن سے بات کی اس نے کہا مجھے لگوا دیں۔ کچھ مہینے انتظار کے بعد بلوچی بھائی نے بتایا کہ کنٹرول پینل کی جاب ھے اگر بھائی یہ کام جانتا ھے تو اس کے پیپر کے ساتھ ایڈوانس لے آنا۔

میں نے اس کے پیپر تیار کئے اور کزن نے 2000 جو اس کے پاس تھے وہ ریڈی کئے، دوسرے دن بلوچی بھائی سے آفس میں بات ہوئی تو اس نے کہا کہ شام 5 بجے میں اسے موبائل پر فون کروں۔

شام 5 بجے بلوچی بھائی کو فون کیا جو شارع المرور میں رہتا تھا، اپنے کزن کو ساتھ لیا اور اس کے گھر پہنچ گیا، وہاں میں نے بلوچی بھائی کو اس کے کاغذات کی کاپیاں دیں اور کزن نے اپنے ہاتھ سے اسے 2 ہزار درھم دئے اور اس سے جو باتیں کزن نے کرنی تھیں وہ پوچھیں۔

پھر روزانہ بلوچی بھائی آفس میں رابطہ میں تھا اور ایک دن اس نے کہا کہ فلاں بیس میں اپنے بھائی کو فلاں ملازم/ کیپٹن کے پاس لے جاؤ آج اس کا ٹیسٹ ہو گا۔

میں نے اندر سے اجازت نامہ بنوایا کسی کام کے لئے ایک بیس سے دوسری بیس میں جانے کا، گھر آیا کزن کو لیا اور اس بیس میں اس کے داخلہ کے لئے بلوچی بھائی کو فون کیا، پھر اس نے اندر ملازم کو فون کیا کہ بندہ گیٹ پر ھے، پھر ملازم نے گیٹ پر اس کا اندر جانے کا ورقہ بھیجا اور میں اسے لے کر ھندسہ میں چلا گیا وہاں بھی کچھ دوست تھے ان سے بات کی کہ اس کا ٹیسٹ دلوانے کے لئے کون کمرہ امتحان میں بیٹھے گا، ایک دوست جو وہاں کے طریقہ کار سے واقف تھا وہ ساتھ آیا، ملازم کے کمرے میں بھائی کو سب سمجھا کر بھیجا، کچھ دیر بعد بھائی کے ساتھ ایک بندہ اسے اپنے ساتھ لے کر کسی دوسرے کمرے میں چلا گیا جہاں ریٹن ٹیسٹ ہونا تھا، اب یہاں دوست نے ساری کمانڈ کی وہ بھی اندر گیا اور اس بندہ کو وہ جانتا تھا اسے کہا کہ یہ میرا بھائی ھے اور اس کا ٹیسٹ میں دوں گا باقی تم ڈور پر سب سنھبالو کوئی اندر آئے تو مجھے بتا دینا، خیر اس نے اس کو پورا پرچہ حل کیا اور وہ بندہ بھائی کو بمعہ پرچہ ملازم کے کمرے میں لے گیا۔ وہیں پرچہ چیک ہوا اور اسے بتایا گیا کہ 3 ہفتہ تک تمہیں میڈیکل پیپر مل جائے گا۔ ڈن۔

قدرت کو اس پر منظور کچھ اور تھا اتنا پرانا اپملائی بلوچی بھائی کچھ دن بعد کسی کیس میں پکڑا گیا اب معلوم نہیں تھا کہ وہ پکڑا کس کیس میں گیا ھے، سب کو اپنی جاب پر خطرہ ہو گیا اور ایک سناٹا سا چھا گیا، خیر بلوچی بھائی کو چند ہی دنوں میں الامارات سے ڈپورٹ کر دیا گیا۔ کہانی ختم۔

کزن برادر کو اس پورے معاملے پر حالات سے آگاہی کی تو کزن برادر نے کہا بھائی میرا 2 ہزار دو گیا مگر وہ آپ مجھے دیں گے۔ خیر مجھے اسے اپنے سے 2 ہزار دینا پڑا، ایسا ہوتا ھے، اس کے بعد میں نے ابوطہبئی الیکٹرسٹی جوئن کی اور وہاں فری میں ہاتھ پڑتا تھا تو اسے بھی وہاں جاب دلوائی پھر جب الامارات چھوڑنا تھا اس وقت این۔ایم۔ڈی۔سی ایڈنوک میں فری میں ہاتھ پڑتا تھا تو اسے وہاں بھی جاب لگوائی یہاں اس کی تنخواہ 8 ہزار لگی تھی۔ وقتی طور پر اس کی حرکتوں/ عادتوں سے پریشانی ہوتی تھی مگر پھر میں بھول جاتا تھا۔

والسلام

یاسر عمران مرزا

کنعان بھائی آپ کا تو جگرا ہی بہت بڑا ہے۔ ویسے میرا یہ واقعہ بیان کرنے کا مقصد یہ نہیں تھا کہ مجھے کوئی صلہ چاہیے، فقط یہ کہ آپ کے جاننے والوں یا رشتے داروں کی نفسیات بعض اوقات بڑی عجیب ہوتی ہے۔