آج ہم اپنی مصروفیات میں اتنا گم ہیں کہ اپنے آپ کو بھی خوش رکھنے کیلئے وقت نہیں ہے تو یہ کس طرح ممکن ہے کہ ہم دوسروں کو خوش رکھنے کیلئے اپنی زندگی کا کچھ حصہ وقف کرسکیں،!!!!!

ایک وقت ہم نے بھی اپنے بچپن میں دیکھا تھا، لوگوں کے پاس بہت وقت تھا،ہر ایک دوسرے کو خوشی کی خبر سنانے میں پہل کرنے کی کوشش کرتا تھا،!!!! اور یہ بات بھی سو فی صد درست ہے کہ کسی کو اگر کوئی خوشی کا ایک لمحہ بھی مئیسر آجائے تو اس کی خوشی ہی دوسرے کیلئے دعاء بن جاتی ہے، جس کی بدولت یہ خوشی حاصل ہوئی ہے،!!!!

اس پرانے وقت میں اکثریت تو یہ سوچتی تھی کہ کونسا طریقہ اپنایا جائے کہ زیادہ سے زیادہ دوسروں کو خوشیاں بانٹ سکیں، لوگ اس وقت ضرورت سے زیادہ کمانے کیلئے زیادہ بے چین نہیں تھے، مگر بلامعاوضہ خدمات میں پیش پیش رہتے تھے،!!!! میں نے یہ بھی دیکھا کہ اس ہمارے محلے میں ہر پیشے سے منسلک افراد اپنی فیملیوں کے ساتھ رہتے تھے، کچھ بغیر فیملی کے بھی تھے، لیکن وہ تمام، چھوٹے بڑے بچوں اور بزرگوں، خاص طور سے بچیوں اور عورتوں کا بہت احترام کرتے تھے، اس لئے ان کے وہاں رہنے پر کسی کو کوئی اعتراض نہ تھا، ضرورت پڑنے پر تمام ہنر مند حضرات اپنی خدمات اس محلے میں بلامعاوضہ انجام دیتے تھے، وہاں پر دو تین ڈاکٹر بھی تھے اور وقت پڑنے پر اپنی طبی خدمات وہاں کے لوگوں کیلئے مفت ہی انجام دیتے تھے،!!!!!

اس وقت سائیکل رکشہ چلا کرتے تھے، وہاں پر بھی صبح صبح وہاں کے رہائشی جاتے ہوئے محلے کے بچوں کو اسکول پہنچاتے ہوئے اپنے روزگار کی تلاش میں نکل جاتے، حتی کہ پانی بھرنے والے بھی ضرورت مندوں کو بغیر کسی مزدوری کے پانی اور ضرورت کی دوسری اشیاء پہنچانے میں اپنی خدمات پیش کرتے تھے،!!!!!

ہمارے گھر کا صحن کچھ زیادہ ہی بڑا تھا، جہاں پر محلے بھر کی تمام تقریبات کیلئے ہمارے والد صاحب وہاں پر لوگوں کیلئے ہر وقت تیار رہتے، اور اس وقت کے لحاظ سے شاندار سے شاندار سجاوٹ کے ساتھ اس تقریب کا ایک حصہ بھی بن جاتے تھے، میں نے اپنے گھر کے صحن میں کئی شادیوں کی تقریبات کے علاوہ دوسرے مذہبی تہوار اور محلے کی اجتماعی بیٹھک کا بھی انتظام دیکھا،!!!!

جہاں جہاں وہاں کے بچوں کی تعلیم کا مسئلہ تھا، ہر پڑھا لکھا شخص اپنے فارغ اوقات میں وہاں کے بچوں کو مفت ٹیوشن پڑھانے میں اپنی خوشی سمجھتا تھا، آپس میں گھروں میں ایک دوسرے کے یہاں عیدین کے علاوہ بھی اکثر کھانے پینے کی چیزوں اور تحفے تحائف کا تبادلہ ھوتا تھا، ہر چھٹی والے دن سب محلے کے لوگ چھوٹے بڑے مل کر تمام محلے کی صفائی خاک روبوں کے ساتھ مل کر کرتے تھے، گلیوں اور نالیوں کی صفائی سے لے کر ایک دوسرے کے گھروں کی مرمت بھی بہت شوق سے کرتے ہوئے دیکھا،!!!!!

محلے کی مسجد میں صبح فجر کے وقت بھی اگر کوئی کسی وجہ سے نماز میں نہ پہنچ سکا تو اسے بہت ہی شرمندگی ہوتی، ہم بچے بھی کوشش یہی کرتے تھے کہ محلے کی مسجد میں پانچوں وقت نماز ادا کریں، کیونکہ ہمارا اکثر آپس میں ہی مقابلہ رہتا تھا کہ کون پہلے مسجد میں پہنچا، ویسے بھی عصر سے مغرب تک سپارہ پڑھنے کیلئے ہم محلے کے تمام بچے موجود رہتے تھے،!!!!!

اس وقت شرارتیں کرنے میں پیچھے نہیں تھے لیکن بزرگوں کا احترام اور تعظیم کو اولین فوقیت دیتے تھے اور وہ بھی ہمارے ساتھ بہت ہی شفقت اور محبت سے پیش آتے تھے،!!!!

مجھے لکھنے میں اتنی مہارت حاصل نہیں ہے، لیکن بس جو مجھے اچھا لگتا ہے اپنی عام فہم زبان میں لکھتا چلا جاتا ہوں، کہیں اگر کچھ غلطی ہوجائے تو معذرت خواہ ہوں اور اصلاح کی بھی گزارش ہے،!!!!

جاری ہے،!!!!

__________________
اپنے حصے کی خوشیاں دوسروں میں بانٹنے سے دیکھیں کتنا سکون ملتا ہے،!!!!