السلام علیکم و رحمۃ اللہ و برکاتہ!
اللہ ہمارے حال پر رحم کرے کہ ہمارے کرتا دھرتا وہ لوگ بن گئے ہیں جو بنیادی انسانی اخلاقیات سے بھی عاری ہیں۔ قوم کا اہم سیاسی راہنما کہتا ہے کہ معاہدے قرآن و حدیث تو نہیں‌ہیں‌کہ ان میں‌تبدیلی نہ کی جا سکے۔
حیراں ہوں دل کو روؤں یا پیٹوں جگر کو میں
اپنی خباثت چھپانے کے لیے قرآن و حدیث‌کو بھی ساتھ گھسیٹ لیا حالانکہ اسلام کے یہ دونوں مصارد وعدے کی پابندی کا حکم دیتے ہیں:
وَلاَ تَقْرَبُواْ مَالَ الْيَتِيمِ إِلاَّ بِالَّتِي هِيَ أَحْسَنُ حَتَّى يَبْلُغَ أَشُدَّهُ وَأَوْفُواْ بِالْعَهْدِ إِنَّ الْعَهْدَ كَانَ مَسْؤُولاً
"اور تم یتیم کے مال کے (بھی) قریب تک نہ جانا مگر ایسے طریقہ سے جو (یتیم کے لئے) بہتر ہو یہاں تک کہ وہ اپنی جوانی کو پہنچ جائے, اور وعدہ پورا کیا کرو، بیشک وعدہ کی ضرور پوچھ گچھ ہوگی"
انسانیت کے لیے بہترین نمونے نبی اور رسول ہوتے ہیں۔ اسماعیل علیہ السلام کی تعریف کرتے ہوئے فرمایا:
وَاذْكُرْ فِي الْكِتَابِ إِسْمَاعِيلَ إِنَّهُ كَانَ صَادِقَ الْوَعْدِ وَكَانَ رَسُولاً نَّبِيًّا
" اور آپ (اس) کتاب میں اسماعیل (علیہ السلام) کا ذکر کریں، بیشک وہ وعدہ کے سچے تھے اور صاحبِ رسالت نبی تھے"
وعدہ سے مکرنا منافق کی نشانی ہے:
فَأَعْقَبَهُمْ نِفَاقًا فِي قُلُوبِهِمْ إِلَى يَوْمِ يَلْقَوْنَهُ بِمَا أَخْلَفُواْ اللّهَ مَا وَعَدُوهُ وَبِمَا كَانُواْ يَكْذِبُونَ
"پس اس نے ان کے دلوں میں نفاق کو (ان کے اپنے بخل کا) انجام بنا دیا اس دن تک کہ جب وہ اس سے ملیں گے اس وجہ سے کہ انہوں نے اللہ سے اپنے کئے ہوئے عہد کی خلاف ورزی کی اور اس وجہ سے (بھی) کہ وہ کذب بیانی کیا کرتے تھے" (التوبۃ 77)
وعدہ خلافی کرنا بے ایمانوں کا کام ہے:
أَوَكُلَّمَا عَاهَدُواْ عَهْداً نَّبَذَهُ فَرِيقٌ مِّنْهُم بَلْ أَكْثَرُهُمْ لاَ يُؤْمِنُونَ (البقرۃ 100)
"اور کیا (ایسا نہیں کہ) جب بھی انہوں نے کوئی عہد کیا تو ان میں سے ایک گروہ نے اسے توڑ کر پھینک دیا، بلکہ ان میں سے اکثر ایمان ہی نہیں رکھتے"
اور مشہور صحیح حدیث میں ہے کہ منافق کی چار علامتیں ہیں‌جن میں سے ایک یہ ہے کہ جب وعدہ کرے تو پورا نہ کرے۔ (یہ صحیح بخاری کی حدیث‌کا مفہوم ہے نہ کہ اصل متن)
مجھے تو ڈر ہے کہ ہمارے سیاسی بڑوں کے یہ کرتوت پورے ملک کی تباہی کا سبب نہ بن جائیں اللہ نہ کرے۔ لیکن یہ آیت مجھے ڈرا دے رہی ہے:
وَإِذَا أَرَدْنَا أَن نُّهْلِكَ قَرْيَةً أَمَرْنَا مُتْرَفِيهَا فَفَسَقُواْ فِيهَا فَحَقَّ عَلَيْهَا الْقَوْلُ فَدَمَّرْنَاهَا تَدْمِيرًا (الاسراء 16)
"اور جب ہم کسی بستی کو ہلاک کرنا چاہتے ہیں تو وہاں کے دولتمندوں کو کوئی حکم دیتے ہیں پھر وہ وہاں نافرمانی کرتے ہیں تب ان پر حجت تمام ہوجاتی ہے اور ہم اسے برباد کر دیتے ہیں"
اللہ ہمارے حال پر رحم کرے۔