باسیان ِ شہر ِ خموشاں
ع ۔۔۔۔۔ خاک میں کیا صورتیں ہوں گی کہ پنہاں ہو گئیں


جن کی خوش گفتاریوں کا ایک عالم تھا اسیر
آج ہیں اک شہر ِ بے صوت و صدا کے وہ مکیں

دوستو یہاں ہم وطن عزیز میں آسودہ خاک چند نامور شعرا ئے کرام کے سنگ ہائے مزار پر کندہ اشعار پیش کر رہے ہیں ۔۔۔۔۔ اس استدعا کے ساتھ کہ جس بھی دوست کے پاس ایسی معلومات ہوں وہ ضرور ہمیں اس سے نوازیں تاکہ ہماری معلومات میں اضافہ ہو سکے ۔۔۔۔۔ پیشگی شکریہ

تو آغاز کرتے ہیں ہم اپنے فکری امام حضرت علامہ اقبال علیہ رحمۃ سے

ڈاکٹر علامہ سر محمد اقبال ( 1877 - 1938 )

حکیم الامت ، شاعر مشرق ، مفکر اسلام ، مصور پاکستان ، محرم راز ِ درون ِ کائنات حضرت علامہ اقبال پاکستان کے دل لاہور شہر میں بادشاہی مسجد کے زیر ِ سایہ آسودہ ء خاک ہیں ۔ ان کے سنگ مزار پر ان کی مشہور فارسی رباعی کندہ ہے جو انہوں نے اپنی وفات سے کچھ پہلے کہی تھی ۔ اس رباعی کے تیور اور مفہوم سے یہ بات کُلی طور پر عیاں ہے کہ حضرت ِ علامہ شعورِ ذات کی حدوں سے نکل کر شعورِ حق کی منزلوں تک پہنچے ہوئے تھے ۔

نسیم ِ از حجاز آید کہ نہ آید
سرود ِ رفتہ باز آید کہ نہ آید
سر آمد روزگارے ایں فقیرے
دگر دانائے راز آید کہ نہ آید

سادہ اردو ترجمہ : حجاز ِ مقدس سے چلنے والی باد ِ نسیم اس جانب آتی یا نہیں
وہ گیت جو کہ گایا جا چکا ہے ، پھر سنائی دے گا یا کہ نہیں
یہ فقیر تو اپنے اس دنیاوی سفر کے اختتام تک آ پہنچا
اس کے بعد فطرت کے رازوں کو جاننے والا کوئی اور آئے گا یا کہ نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔

احسان دانش ( 1914 - 1982 )

اردو کے معروف محنت کش شاعر جناب احسان دانش لاہور میں میانی صاحب کے قبرستان میں ابدی نیند سو رہے ہیں ۔ ان کی لوح مزار پر ان ہی کا یہ شعر کندہ ہے ۔۔۔۔۔

دانش میں خوف ِ مرگ سے مطلق ہوں بے نیاز
میں جانتا ہوں موت سے سنت حضور ٍٕٕ کی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔

استاد قمر جلالوی ( اصل نام سید محمد حسین 1887 - 1968 )

استاد قمر جلالوی کا شمار اردو غزل کے نامور شعرا میں ہوتا ہے ۔ وہ کلاسیکی رنگ میں شعر کہنے کے فن میں استاد کا درجہ رکھتے تھے ۔ ان کا ایسا ہی ایک شعر ان کے سنگ مزار پر کندہ ہے ، جو کہ کراچی میں علی باغ کے قبرستان میں واقع ہے ۔

ابھی باقی ہیں پتوں پر جلے تنکوں کی تحریریں
یہ وہ تاریخ ہے بجلی گری تھی جب گلستاں پر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔

حفیظ ہوشیار پوری ( 1914 - 1973 )

اردو کے نامور شاعر جناب حفیظ ہوشیارپوری کراچی کے پی ای سی ایچ سو سائیٹی کے قبرستان میں آسودہ ء خاک ہیں ۔۔۔۔۔ ان کی لوح ِ مزار پر ان کا یہ شعر کندہ ہے

سوئیں گے حشر تک کہ سبک دوش ہو گئے
بار ِ امانت ِ غم ِ ہستی اتار کر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔

اطہر نفیس

اطہر نفیس جدید غزل کے نامور شعرا میں شمار ہوتے ہیں ۔ وہ کراچی میں سخی حسن کے قبرستان میں دفن ہیں ۔۔۔۔۔ ان کے سنگ ِ مزار پر ان کا یہ مشہور شعر تحریر ہے

وہ عشق جو ہم سے روٹھ گیا ، اب اس کا حال سنائیں کیا
کوئی مہر نہیں ، کوئی قہر نہیں ، پھر سچا شعر سنائیں کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔