Ajmal Anjum

انسان بندھنوں میں جکڑا ہے اور حصاروں میں گھرا ہے ۔۔۔۔۔ بہت سے بندھن ہیں ، بہت سے حصار ہیں ۔۔۔۔۔ جب درونِ خانہ نظر جاتی ہے تو بہت سے نفسیاتی حصار دکھائی دیتے ہیں ۔۔۔۔۔ بشری حصار ۔۔۔ نسلی حصار ۔۔۔ لسانی حصار ۔۔۔ لَونی حصار ۔۔۔ فکری حصار
اور درونِ خانہ سے نظر پلٹتی ہے تو باہر بہت سے حصار نظر آتے ہیں ۔۔۔۔۔ خانگی حصار ۔۔۔ شہری حصار ۔۔۔ صوبائی حصار ۔۔۔ وطنی حصار ۔۔۔ کہیں مفر مقر نہیں ، جائے تو جائے کہاں !
ان سارے حصاروں سے نکلنا ، ان سارے بندھنوں کو توڑنا بڑی ہمت کی بات ہے ۔۔۔ اور بڑی اولوالعزمی کا کام ہے ۔۔۔ اور ۔۔۔ جب نگاہ اوپر جاتی ہے تو ناسوتی حصاروں سے نکل کر آفاقی اور ماورائے آفاق نظارے نظر آتے ہیں ۔۔۔۔۔ ایک عجب روح پرور منظر ہوتا ہے ۔۔۔ سمٹا ہوا وجود پھیلتا ہوا معلوم ہوتا ہے ۔۔۔ رنگ و نسل کی گھٹائیں چھٹ رہی ہیں ۔۔۔ زبان و بیاں کے نقوش مٹ رہے ہیں ۔۔۔ ماہ و سال طیور کی مانند اُڑ رہے ہیں ۔۔۔ فضا کی گرد صاف ہو رہی ہے ۔۔۔ عجب منظر ہے ۔۔۔ ہر بلندی پستی محسوس ہو رہی ہے ۔
آیزک نیوٹن نے ایک مُدت کے بعد نظریہ ء کشش ِ ثقل قائم کیا ۔۔۔ اور آئن سٹائن نے ایک عرصے کے بعد نظریہ ء اضافیت پیش کیا ، جس کے بعد زمین کے حصار سے نکلنے کی تدبیریں سوچی جانے لگیں ۔۔۔۔۔ لیکن یہ سب تو بہت بعد کی باتیں ہیں ۔۔۔ صدیوں پہلے انبیاء اور اولیا ء نے اک نئے جہان کی خبر دی تھی ۔۔۔۔۔ یہ بھی بتایا تھا کہ کشش ِ ثقل حصارِ مُلک و وطن تک ہی باقی رہتی ہے ۔۔۔ جب انسان اس بندھن سے نکلتا ہے تو خود بخود اوپر اُٹھنے لگتا ہے ۔۔۔۔۔ پھر عالم ِ ناسوت سے چل کر عالم ِ ملکوت میں ۔۔۔ عالم ِ ملکوت سے چل کر عالم ِ جبروت میں ۔۔۔ اور عالم ِ جبروت سے چل کر عالم ِ لاہوت میں قدم رکھتا ہے اور نہیں معلوم کہاں کہاں کی سیریں کرتا ہے ۔۔۔۔۔
اندھیری راتوں میں ذرا دم بھر کے لئے اوپر تو دیکھو ۔۔۔ آسمان ِ نیلگوں پر ستاروں کا اک جہان آباد ہے ۔۔۔ ان گنت ستارے ۔۔۔ لا تعداد ۔۔۔ بے شمار !!! ان ستاروں کے سامنے چاند کی کیا حقیقت ؟ ذرہ بھر بھی تو نہیں ۔۔۔ پھر یہ کتنا نیچے اور وہ کتنے اوپر !!! کہ اُن کی روشنی بھی سالوں میں پہنچتی ہے ۔۔۔۔۔ اللہ اکبر !!!
مگر نظر کی تنگ دامانی تو دیکھو ۔۔۔ صدیوں بعد جب انسان نے چاند پر قدم رکھا تو اک شور مچ گیا ۔۔۔ کیا ہوا ؟ اک بے کیف سر زمین پر قدم رکھا ۔۔۔۔۔
سبحان اللہ !!! یہی تو وہ زمین ہے جس کو ایک انسان ِ کامل ﷺ نے اشارے سے پارہ پارہ کر دیا تھا ۔۔۔ یہی تو وہ زمین ہے جسے روندتا ہوا وہ ﷺ عرش بریں تک پہنچا ۔۔۔ یہی تو وہ زمین ہے جس کا ذرہ ذرہ اس ﷺ کی عظمت و رفعت کے گیت گا رہا ہے ۔
اے اسیرو !!! ہاں ہاں ۔۔۔ اے رنگ و نسل کے اسیرو ۔۔۔ اے حصارِ ملک و وطن کے اسیرو ۔۔۔ دیکھو ۔۔۔ دیکھو !!! اسلام تمہیں پکارتا ہے ۔۔۔۔۔ ہادی ء برحق ﷺ تمہیں بلا رہا ہے ۔۔۔ وہ آفاق کی خبریں لا رہا ہے ۔۔۔ وہ حصار ِ زماں و مکاں سے نکل کر ماورا ءِ عالم میں قدم رکھ رہا ہے ۔۔۔۔۔

wajee

بہت خوب ۔۔۔۔۔۔
۔۔۔۔