Ajmal Anjum

السلام ُ علیکم ۔۔۔۔۔
دوستو موسمِ سرما کی پہلی بارش اور برف باری کے ساتھ ہی سردی اپنے جوبن پر آ گئی ہے ۔۔۔۔۔ پنجاب اور بالخصوص شمالی پنجاب شدید سردی اور دھند کی لپیٹ میں ہے ۔۔۔۔۔ ایسے میں ہمیں مشتاق یوسفی یاد آ گئے ۔۔۔۔۔ سالِ نو کی ٹھنڈی ٹھنڈی مبارکباد کے ساتھ ۔۔۔۔۔
مشتاق احمد یوسفی کا یہ اقتباس آپ سب کی نذر ۔۔۔۔۔ بالخصوص اہل کراچی کے لئے ۔۔۔۔۔۔


کراچی میں سردی اتنی ہی پرتی ہے جتنی مری میں گرمی ۔۔۔۔۔ اس سے ساکنانِ مری کی دل آزاری نہیں بلکہ عروس البلاد کراچی کی دلداری مقصود ہے ۔۔۔۔۔ کبھی کبھار شہرِ خوباں کا درجہ حرارت جسم کے نارمل ٹمپریچر یعنی 98.4 سے دو تین ڈگری نیچے پھسل جائے تو خوبانِ شہر لحاف اوڑھ کر ائر کنڈیشنر تیز کر دیتے ہیں ۔۔۔۔۔ اس حُسنِ تضاد کو کراچی کے محکمہ موسمیات کی اصطلاح میں " کولڈ ویو " یعنی سردی کی لہر کہتے ہیں ۔۔۔۔۔۔ یہ خوبی صرف کراچی کے متلون موسم میں دیکھی کہ گھر سے جو لباس بھی پہن کر نکلو ، دو گھنٹے میں غلط معلوم ہوتا ہے ۔۔۔۔۔۔ لوگ جب اخبار میں لاہور اور پنڈی کی شدید سردی کی خبریں پڑھتے ہیں تو اُن سے بچاو کے لئے بالُو کی بُھنی مونگ پھلی اور گزک کے پھنکے مارتے ہیں ۔۔۔
اُن کے بچے بھی انہی پر گئے ہیں ۔۔۔۔۔ بادِ شمالی اور گوشمالی سے بچنے کے لئے کنٹوپ پہن کر آیس کریم کھاتے اور بڑوں کے سامنے بتیسی بجاتے ہیں ۔
کراچی میں پنڈی سے تین لحاف کم سردی پڑتی ہے ۔۔۔۔۔ نو وارد حیران ہوتا ہے کہ اگر یہ جاڑا ہے تو اللہ جانے گرمی کیسی ہوتی ہو گی ۔۔۔۔۔۔
بیس سال کراچی کے گرم و سرد جھیلنے کے بعد ہمیں اب معلوم ہوا ہے کہ کراچی کے جاڑے اور گرمی میں تو اتنا واضح فرق ہے کہ بچہ بھی بتا سکتا ہے ۔
۔۔۔۔۔۔۔ 90 ڈگری ٹمپریچر اگر مئی میں ہو تو یہ موسمِ گرما کی علامت ہے ۔۔۔۔۔۔ اگر دسمبر میں ہو تو ظاہر ہے کہ جاڑا پڑ رہا ہے ۔۔۔۔۔۔۔
البتہ جولائی میں 90 ڈگری ٹمپریچر ہو اور شام کو گرج چمک کے ساتھ بیوی برس پڑے تو برسات کا موسم کہلاتا ہے ۔۔۔۔۔۔ غالبا کیا یقینا ایسے ہی کسی نیم گرم ، کنکنے ، کراچوی جاڑے سے اکتا کر نظیر اکبر آبادی نے تمنا کی تھی کہ :


تین چار سال بعد دو تین دن کے لئے سردی کا موسم آ جائے تو اہلِ کراچی اس کا الزام " کوئٹہ وِنڈ " پر دھرتے ہیں ۔۔۔۔۔۔ کراچی کی سردی بیوہ کی جوانی کی طرح ہوتی ہے ۔۔۔۔۔۔ ہر ایک کی نظر پڑتی ہے اور وہیں ٹھہر بلکہ ٹھٹھر کر رہ جاتی ہے ۔۔۔۔۔۔۔
ادھر کوئٹہ میں جب دستانے ، کمبل مفلر اور سمور کے انبار میں سے صرف چمکتی آنکھیں دیکھ کر یہ فیصلہ کرنا ناممکن ہو جاتا ہے کہ ان کے جنوب میں مُونچھ ہے یا پنکھڑی اک گلاب کی سی ہے ، تو کوئٹہ والے اس گھپلے کا ذمہ دار قندھاری ہوا کو ٹھہراتے ہیں ۔۔۔۔۔۔۔
اور جب کوئٹہ میں سائبیریا کی زمہریری ہواوں سے درختوں پر اناروں کی بجائے برف کے لڈو لٹکتے ہیں ، گوالے گائے کے تھنوں سے آیس کریم دوہتے ہیں، اور سردی سے کانپتے انسان کے دل میں خود کو واصلِ جہنم کرنے کی شدید خواہش ہوتی ہے ، اہالیانِ قندھار کمبل سے چمٹ کر ہمسایہ مُلک کی جانب غضب ناک نگاہوں سے دیکھتے ہیں ۔۔۔۔۔۔

ARHAM

وعلیکم السلام !
اجمل بھائی ۔۔۔
مشتاق یوسف کی خوبصورت اور دلچسپ تحریر اور آپ کے انتخاب نے ہم اہل کراچی کے سردی سے ماؤف ہوتےجسم و جاں میں حرارت پیدا کر دی ۔۔۔
آجکل واقعی ۔۔۔۔۔۔۔۔۔۔۔ کوئٹہ کی برفانی سردی پڑ رہی ہے یہاں ۔۔۔

__________________

دختراسلام ڈاکٹر عافیہ صدیقی اور ان کے اہل خانہ کی عظمتوں کو سلام۔
مدہوش حکمرانو! ہوش میں آؤ۔۔۔

ڈاکٹرنور

بہت خوب اجمل بھائی
کیا شیئرنگ ہے۔۔
مزہ آگیا ۔۔
جاری رکھئے گا۔۔۔

نیلم خان

اچھی شئیرنگ ہے ۔

زارا