چاچا کمال

چاندنی چوک پر اشارے کی روشنی سرخ تھی۔ میں نے بھی گاڑیوں کی لمبی قطاروں میں سے ایک کے پیچھے گاڑی روک لی۔

چند سال پہلے چاندنی چوک پر ٹریفک کے یہ اشارے موجود نہیں تھے۔ صرف ایک گول چکر تھا اور اُس گول چکر کے درمیان میں چلتا ہوا ایک فوارہ، جو رات کے وقت جگمگاتی روشنیوں میں کافی خوبصورت لگا کرتا تھا۔ یہ اور بات ہے کہ ایک مصروف چوک ہونے کی وجہ سے نئے نئے ڈرائیورز کے لیے اس فوارے اور چکر کی موجودگی اچھا خاصا ہوّا تھی۔ خود میں نے پہلی بار اس چوک میں ڈرائیونگ کرتے ہوئے گاڑی کو چکر ہی پر چڑھا ڈالا تھا۔

“سِکستھ روڈ جانا ہے جی، سِکستھ روڈ جانا ہے جی۔” ایک کمسِن آواز نے مجھے چونکایا۔ ایک چھوٹا سا لڑکا، کمر پر بستہ لٹکائے اور سادہ سی شلوار قمیص میں ملبوس میری طرف دیکھ رہا تھا اور ہاتھ کے انگوٹھے سے آگے کی طرف اشارہ کر رہا تھا۔ میں نے چوک میں جلتی سرخ روشنی کو دیکھا، ” بیٹھ جاؤ۔” وہ لڑکا تیزی سے اگلی سائیڈ سیٹ کا دروازہ کھول کر بیٹھ گیا، ” مہربانی جی۔”

اشارہ سبز ہونے پر میں نے گاڑی بڑھائی اور کچھ دور آگے جا کر اُس لڑکے کی طرف دیکھا۔ اُس کی عمر بمشکل بارہ تیرہ سال رہی ہو گی۔ گاڑی کے فرش پر نگاہیں جمائے وہ اتنے مؤدبانہ انداز میں بیٹھا ہوا تھا کہ مجھے ہنسی آ گئی۔

“پڑھتے ہو؟ ” میں نے پوچھا۔

“جی؟ ” وہ چونکا۔

“پڑھتے ہو؟ “

“نہیں جی۔ کام کرتا ہوں۔”

“کیا کام کرتے ہو؟ “

“جوتے پالش کرتا ہوں جی۔ صبح قرآن مجید پڑھتا ہوں۔”

میں اس کے لہجے میں چھلکتے فخر کو محسوس کیے بغیر نہ رہ سکا۔

“حفظ کر رہے ہو یا صرف پڑھتے ہو؟ “

“صرف پڑھتا ہوں جی۔” اس نے میرے جوتوں کی طرف دیکھا۔

“مسجد میں؟ “

“ہاں جی۔” وہ رکا۔ ” آپ کے جوتے پالش کر دوں جی؟ “

” آں ۔۔۔ نہیں یار۔ خیر ہے۔”

وہ دوبارہ خاموش ہوا، پھر کہنے لگا، “بڑی مہربانی جی آپ کی، آپ نے بٹھا لیا۔” میری سمجھ میں نہیں آیا کہ کیا کہوں۔ وہ کہتا رہا، “ابھی میرے پاس چپل نہیں ہے جی، ورنہ پیدل ہی چلا جاتا۔”

میں نے پہلی بار اس کے پیروں کی طرف دیکھا۔ مٹی اور گرد سے اَٹے ہوئے، چھوٹے مگر سخت جان، برہنہ پیر۔

“سِکستھ روڈ پر کہیں بیٹھتے ہو یا ۔۔۔ “

“نہیں جی۔ ” وہ میرا جملہ ختم ہونے سے پہلے بول پڑا۔ ” پھِر ٹُر (گھوم پھِر) کے کام کرتا ہوں۔ وہ موچیوں والا ڈبہ ہو نا جی تو بیٹھ کے کام ہو جاتا ہے۔” اس نے ہاتھوں کے اشارے سے مجھے ڈبے کا سائز سمجھانے کی کوشش کی۔

“تو دکانوں میں پھِرتے ہو؟ “

“ہاں جی۔ آوازیں لگاتا ہوں جی۔ سارا دن چل کر ٹانگیں تھک جاتی ہیں جی۔”

ہم سِکستھ روڈ کے قریب آ گئے تھے۔ “بڑی مہربانی جی آپ کی۔” وہ پھر بولا۔ اس مرتبہ میں نے ہنسنے کی کوشش کی۔ “کوئی بات نہیں یار۔ میں نہ ہوتا تو کوئی اور بٹھا لیتا۔”

اترنے سے پہلے ایک بار پھر اس نے میری “مہربانی” کا شکریہ ادا کیا۔ گاڑی آگے بڑھانے سے پہلے میں نے دیکھا، وہ ھاتھ اٹھا کر مجھے سلام کر رہا تھا۔

گھر کی طرف واپس آتے ہوئے میں اسی لڑکے کے متعلق سوچ رہا تھا جب ایک مال بردار ٹرک موڑ کاٹ کر گاڑی کے سامنے آ گیا۔ اُس ٹرک کی پُشت پر، نمبر پلیٹ کے نیچے ایک بڑا سا مڈ فلیپ لہرا رہا تھا اور اس پر لکھا تھا،

“سب مایا ہے۔”

میں نے ایک طویل سانس لی اور اُس ٹرک کو اوور ٹیک کرتا ہوا آگے نکل گیا۔

سورس الٹرا سیدھا