saraah

خمری … سیّد علی محسن

................................................
جوگی کا ایک پھیرا سُنار کا ساراسونا پیتل کر گیا ۔
خُمری یوں کھاٹ پر پڑی کہ پھر کبھی اپنے پیروں پر کھڑی نہ ہوئی ۔بناؤ سنگھار چُھوٹا ، زیور گہنا اُترا ، نجانے کیا روگ لگا دنوں میں سُوکھ کر کانٹا ہو گئی ۔بہتیرے علاج ، دوا دارو ، گنڈے تعویذ ، منتیں مرادیں مگر مرض نہ ٹلا ۔جان کے لالے پڑ گئے ۔کھاٹ پر پڑی دروازے کو تکتی رہتی نجانے کس کی آس ، کس کے انتظار میں آنکھیں ٹھہر گئیں ۔
جوگی پر کیا تہمت ؟ اُس نے کونسا جادو پھونک دیا تھا جو سُنار کی بیٹی پتھر کی ہو گئی ۔وہ تو دروازے پر آیا ، صدا لگائی نہ دستِ سوال دراز کیا ، ایک نظر خُمری کو دیکھا تھا اور چُپ چاپ لمبے لمبے ڈگ بھرتا ۔۔۔ اگلے دروازے ۔۔۔ پھر اُس سے اگلے ۔۔۔ پھر نظروں سے اوجھل ہو گیا ۔
وہ کیا مانگتا ؟ اُس کی حاجت پوری ہو جاتی اُس در سے ؟
ایک نظر !صرف ایک نظر! جوگی نے خُمری کو دیکھا تھا اور لمبے لمبے ڈگ بھرتا ۔۔۔
وہی ایک نظر !خُمری کو بسمل کی طرح گھائل کر گیا ۔ سُنار کا سارا سونا پیتل ہو گیا ۔
پھر سال بعد جوگی کا پھیرا ہوا۔
چولے والے نے صدا لگائی نہ دستِ سوال دراز کیا ۔ دروازے پر کھڑا رہا ۔خُمری یوں اُٹھی جیسے دیے میں تیل جلنے سے شعلہ ۔جوگی نے ایک نظر اُسے دیکھا ۔۔۔ چُپ چاپ لمبے لمبے ڈگ بھرتا اگلے دروازے پر ۔۔۔
اِس بار وہ پتھر نہیں ہوئی ، ننگے پاؤں جوگی کے پیچھے پیچھے ۔پیتل سے سونا بن گئی ۔
’’ ایک سال سے کھاٹ پر پڑی درشن کو ترس رہی ہوں سائیں !‘‘خُمری نے بھٹیارن کے سامنے اُس بے پروا کا چولا پکڑ لیا ۔
گنجل بالوں ، سوجے پیروں والے نے مُڑے بغیر لاچار سے چولا چھڑایا ، اُسی بے نیازی سے چلتا رہا ۔۔۔ چلتا رہا۔
پیچھے سونا پیتل رہ گیا ۔
خُمری پتھر کی ہو گئی ۔
’’ ہونہہ ! ایک سال ! وہ چودہ سال سے درشن واسطے گلی گلی ، در بدر پھر رہا ہے ‘‘بھٹیارن نے تمسخر سے خُمری کو دیکھا اور تپتی ریت میں مکئی پھینکی ۔
خُمری ہوش میں آئی تو پلٹی نہیں ۔۔۔ چولے والے کی طرح گلی گلی ۔۔۔ دربدر-

زارا

السلامُ علیکم

اچھی تحریرہے سارہ سسٹر۔ شیئرنگ کا شُکریہ