عبدالقدوس

اجنبی رات اور صحرا

شہر سے چلتے چلتے اسے احساس ہی نہ ہوا کہ وہ کتنا دور جا چکا ہے۔ رات کا اندھیرا اور صحرا مگر جانے کہاں جانا چاہتا تھا۔ شاید اپنی منزل کھو چکا تھا۔ اس کی آنکھوں میں وحشت اور گالوں پر آنسو کب کے خشک ہو چکے تھے۔ سردی بڑھتی جا رہی تھی اور سامنے صرف صحرا ، درخت پودے سب بہت پیچھے رہ گئے تھے۔شاید وہ اپنی ویران زندگی کو ویرانے میں ہی لانا چاہتا تھا۔ کچھ یادیں آتے ہی اس کی آنکھیں پھر بھیگنے لگیں ۔ ڈبڈبائی آنکھوں میں اسے آگ نظر آئی اور بے خیالی میں اس کے قدم اسی طرف اٹھنے لگے۔ اس نے اپنی آنکھیں خشک کیں سردی کا احساس اسے آگ کی طرف کھینچ لایا تھا۔

آگ کے سامنے دو آدمی خاموش بیٹھے تھے۔ وہ چپ چاپ آگ کے پاس بیٹھ گیا۔ ان دونوں سے نظریں ملیں اور سر کی ہلکی جنبش اور ناکام مسکراہٹ کے ساتھ وہ سر جھکا کر بیٹھ گیا۔ اسے ایک عجب احساس ہوا کہ یہ دونوں بہت اداس ہیں۔
کافی دیر تک خاموشی رہی۔ آگ کی حدت تھوڑا سکون دے رہی تھی مگر دل کی بے سکونی کا کیا مرہم۔
تینوں ایسے گم سم تھے جیسے پتھر کے بت ہوں ادھیڑ عمر شخص کے کھنکارنے پر وہ اس کی طرف دیکھنے لگا مگر دوبارہ خاموشی چھا گئی۔
ہمیشہ یہی لگا کہ زندگی کی سمجھ آ گئی ہے مگر کچھ نہ کچھ رہ جاتا۔ ادھیڑ عمر شخص کی آواز نے دونوں کو اس کی طرف دیکھنے پر مجبور کر دیا۔ مگر وہ جیسے اپنے آپ سے ھی باتیں کر رہا ہو۔
زیب صاحب کوئی بھی شخص مکمل نہیں ہوتا اسی لئے کہیں نہ کہیں ہم سمجھ نہیں پاتے۔
زیب ۔ ٹھیک کہتے ہو جمیل مگر جب اپنے ہی ہم پر اعتماد نہ کریں تو دل خون ہونے لگتا ہے۔
جمیل ۔ مجھے تو اپنوں نے ہی دھوکہ دیا اب تو اعتماد کسی پر کرنے کو دل ہی نہیں چاہتا

ادھیڑ عمر شخص نے اس کی طرف رخ کیا اور نام پوچھا۔
احسن
زیب ۔ تم اتنے اداس کیوں ہو۔ آنسو تو خشک کر لئے ہیں مگر نشان رہ گئے ہیں۔
احسن کچھ نہ بولا۔ جمیل نے بسکٹ کا پیکٹ کھولا اور زیب کی طرف پہلے بڑھایا پھر احسن کی طرف۔ دونوں نے چند بسکٹ لے لئے۔

آسمان پر تاروں کی چمک اور نیچے روشن آگ اور اس کے پاس بیٹھے تین افراد لگتا تھا شاید دنیا کے کسی اور کونے میں بیٹھے ہوں یہ لوگ ، سب سے الگ تھلگ ۔
جمیل نے ایک ٹھنڈی سانس لیتے ہوئے کہا کیا ہم اس رات کے اجنبی لوگ کیا اپنا درد کم نہیں کر سکتے؟
زیب ۔ اگر آپ نے بات کر لی ہے تو آپ بتائیں اس رات میں صحرا کا رخ کیوں؟
جمیل ۔ (کچھ دیر خاموشی کے بعد) اعتماد کبھی کبھی انسان کا دشمن بن جاتا ہے۔ میرے بچپن کا دوست لقمان اور میں نے ایک کاروبار شروع کیا تھا سب کچھ ٹھیک چل رہا تھا۔ اسے میں بچپن سے جانتا ہوں میں ایک ماہ کے لئے کاروباری سلسلے میں سنگاپور گیا واپسی پر وہ سب کچھ بیچ کر غائب ہو چکا تھا۔ اس کا کوئی عزیز کوئی رشتہ دار بھی نہیں ہے جس سے پتا کرتا۔ ایک پل میں انسان کتنا بدل جاتا ہے۔ پانچ سال کی محنت پل میں برباد ہو گئی۔ شادی بھی کرنی تھی مگر اب شمائلہ کے گھر والوں کے سامنے خالی ہاتھ کیسے جا کر رشتہ مانگوں۔
کچھ دیر خاموشی کے بعد جمیل نے ایک ٹھنڈی آہ بھر کر کہا۔ خواب کیسے ٹوٹتے ہیں پتا بھی نہیں چلتا۔
زیب ۔ بہت افسوس ہوا سن کر زندگی بھی عجب ہے ہر جگہ کچھ اور رنگ لئے ہوئے ہے۔ میری اپنی اولاد میرا کہنا نہیں مانتی۔ میری بیٹی جس سے شادی کرنا چاہتی ہے وہاں میں نہیں چاہتا کہ وہ شادی کرے۔ آج اس نے رو رو کر جھگڑا کیا مجھ سے اور زہر کھانے کی دھمکی دی ۔ میری محبت شفقت کا یہ صلہ ملا ہے۔
احسن ۔ محبت نام ہی درد کا ہے۔ ایک سال سے جسے اتنا جانتا تھا آج وہی مجھ سے انجان ہو گئی۔ بس فون پہ کہ دیا کہ ا س کے گھر والے نہیں مان رہے۔ مجھے بھول جاؤ۔ کیا کوئی اپنی زندگی کو بھول سکتا ہے۔ آج اپنے آپ کو تنہا محسوس کر رہا ہوں۔ بچپن سے لیکر اب تک ڈیڈی کی توجہ نہیں مل سکی۔ کاش امی زندہ ہوتیں۔ اب جب مجھے کسی کی چاہت اور توجہ ملی۔ وہ بھی قسمت کے ہاتھوں کا کھلونا بن گئی۔ اس کے گھر والے کاش ایک بار مجھ سے مل لیں مگر وہ مجھ سے ملنا ہی نہیں چاہتے۔ کچھ سمجھ نہیں آرہا کیا کروں۔
احسن نے چہرہ دوسری طرف موڑ لیا شاید وہ اپنے آنسو ظاہر نہیں ہونے دینا چاہتا تھا۔
جمیل ۔ بہت افسوس ہوا دوست۔ کاش ہمارے بزرگ ہمیشہ ہم سے اعتماد کا تقاضہ کرنے کی بجائے کبھی کبھی ھم پر بھی اعتماد کرنا سیکھ لیں۔
تین اجنبی ساری رات بیٹھے رہے آگ جلتی رہی سوچ کے بھنور میں جکڑے
ہوئے بے بس لوگ۔صبح ہونے کو تھی تینوں اجنبی اپنے راستوں پر نکل پڑے۔
تین دن بعد احسن تیار ہو رہا تھا۔ آج اس کی خوشی کی جہاں انتہا تھی وہاں ایک ڈر بھی۔ وہ افشاں کے گھر جا رہا تھا اس کے رشتے کے لئے ۔ اس کے ڈیڈی نے آواز دی احسن جلدی کرو۔
گاڑی روانہ ہوتے ہی اس کے دل کی دھڑکنیں تیز ہونے لگیں۔ اگر انہوں نے رشتہ منظور نہ کیا یہ سوچ کر ہی دل اداس ہونے لگتا۔ عجیب کشمکش تھی۔ گاڑی رکی تو احسن چونکا۔ ایک لڑکا انہیں ڈرائینگ روم میں بٹھا کر چلا گیا۔ اتنے میں ایک جم غفیر امڈنے لگا مختلف دروازوں سے۔ سب سے آگے زیب صاحب اور جمیل کو دیکھ کر احسن کو حیرت ہوئی۔ یہ تو صحرا کی رات کے ساتھی ہیں۔ احسن بڑے تپاک سے ان سے ملا اور حیرانگی سے پوچھا آپ یہاں کیسے۔
جمیل ( قہقہہ لگاتے ہوئے) زیب صاحب افشاں کے ڈیڈی ہیں۔ اور مجھے فنانس کر رہے ہیں میرے آئیڈیاز ان کو پسند آئے ہیں اب ہم مل کر کاروبار شروع کرینگے۔ انہوں نے مجھے بلایا کہ آج ضرور آؤں۔
احسن ۔ معافی چاہتا ہوں اگر مجھ سے کبھی کوئی گستاخی ہوئی ہو۔
زیب ۔ نہیں بیٹا اس رات مجھے احساس ہوا کہ اولاد کی پسند کو ایک بار دیکھنا اور پرکھنا ضرور چاہیے۔ اپنے فیصلے ان پر لاگو کرنے کی بجائے ان کی خواہشات کا احترام بھی کرنا چاہیے۔ اس رات مجھے دو بیٹے مل گئے ایک جمیل اور ایک تم۔ تمہاری باتیں سن کر مجھے یاد آیا کہ افشاں نے کسی احسن مشتاق کا کہا تھا۔ سب سمجھ آنے لگا۔
جمیل احسن کو باغیچے کی طرف لے گیا اور باقی سب لوگ آپس میں گھل مل گئے۔ دونوں باتیں کرتے ہوئے چہل قدمی کرنے لگے۔ احسن کی نگاہ بالکنی پر پڑی۔ جہاں شیشے کے پار اسے ایک مسکراتا چہرا نظر آیا۔ وہ اس کی افشاں تھی۔ جس کے چہرے کو خوشی نے چاند کی طرح روشن بنا دیا تھا۔ احسن کے ہونٹوں پر ایک اطمینان بھری مسکان تھی۔

__________________

Real_Light

__________________