::::::: جِنّات ، قُران کریم اور صحیح احادیث مبارکہ کی روشنی میں ::::::: پیش لفظ (مُقدمہ) :::::::

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔
اللہ سُبحانہ ُ و تعالیٰ کی مخلوقات کے بارے میں اللہ ہی کے علاوہ کوئی بھی یقینی عِلم نہیں رکھتا کہ وہ کتنی ہیں ؟ اور کیسی ہیں ؟ اور کس مخلوق کو اللہ نے کیا کیا صِفات یا قوات عطاء کی ہیں ؟
اللہ تبارک و تعالیٰ نے اپنے مخلوقات کے بارے میں جِس مخلوق کو جتنا چاہا اتنا عِلم عطاء کیا ، اور سب سے زیادہ یقینی اور سچا عِلم وہ ہے جو خود اللہ تبارک و تعالیٰ کے کلام پاک یعنی قران کریم میں نازل فرمایا گیا اور جو اللہ نے اپنے آخری رسول محمد صلی اللہ علیہ وعلی آلہ وسلم کی ز ُبان مبارک سے ادا کروایا ،
انسانی تاریخ میں ہمیشہ سے ایک ایسی مخلوق کا ذِکر ملتا ہے جس کے بارے میں دُرُسُت اور نا دُرُسُت دونوں کی قِسم کی بہت سی باتیں سننے پڑھنے میں آتی ہیں ، انسانی معاشرت میں سے کوئی معاشرہ ایسا نہیں جِس میں قدیم ترین اوقات سے لے کر آج تک اُ س مخلوق کے بارے میں باتیں نہ ہو رہی ہوں ، قدیم ترین عُلوم اور جدید ترین عُلوم دونوں میں ہی اُس مخلوق کے بارے میں باتیں اور تحقیقات جاری و ساری چلتی آ رہی ہیں ،
اُس مخلوق کو ہم """جِن """ کے نام سے جانتے ہیں ،
کچھ لوگوں کا خیال ہے کہ """جِن """ اور """ فرشتے """ کوئی مخلوق ہیں ہی نہیں ، جبکہ ایسا صریح کُفر ہے کیونکہ اللہ تبارک و تعالیٰ کے بہت سے فرامین کا اور رسول اللہ صلی اللہ علیہ و علی آلہ وسلم کی صحیح ثابت شُدہ احادیث شریفہ کا انکار ہے، یہاں میں اُن لوگوں کے اس باطل خیال کی تردید کرنے کے لیے بات نہیں کروں گا ، صرف اتنا کہوں گا کہ جِنّات کے بارے میں مختلف احوال و صِفات کی خبروں پر مشتمل آیات کریمہ اور صحیح ثابت شدہ احادیث شریفہ کی باطل تاویلات کرنے والے ، یا اُن کا انکار کرنے والے ، اُن کا تمسخر اُڑانے والے ، اُن احادیث شریفہ پر اپنی عقل کی خامی کی وجہ سے اعتراض کرنے والے غور کریں اور اُن احادیث کو خِلاف قران کہنے والے بھی غور کریں کہ نہ تو اُن احادیث شریفہ میں کوئی خامی ہے اور نہ ہی وہ خِلاف قران ہیں بلکہ خودد اُن لوگوں کا معاملہ یہ ہے کہ ((((( مَا لَهُمْ بِهِ مِنْ عِلْمٍ وَلَا لِآبَائِهِمْ كَبُرَتْ كَلِمَةً تَخْرُجُ مِنْ أَفْوَاهِهِمْ إِنْ يَقُولُونَ إِلَّا كَذِبًا ::: اُن لوگوں کو اِس بات کا کوئی عِلم نہیں اور نہ ہی اُن کے باپ دادؤں کو تھا ، یہ جو بات اِن کے منہوں سے نکلتی ہے بہت بڑی ہے کہ وہ صِرف جھوٹ ہی بولتے ہیں))))) سُورت الکھف /آیت5، اور،
((((( وَمَا لَهُمْ بِهِ مِنْ عِلْمٍ إِنْ يَتَّبِعُونَ إِلَّا الظَّنَّ وَإِنَّ الظَّنَّ لَا يُغْنِي مِنَ الْحَقِّ شَيْئًا::: اور اُن کے پاس اِس بات کا کوئی عِلم نہیں بلکہ وہ تو صِرف اپنے گمان کے پیچھے چلتے ہیں اور بے شک گُمان حق سے غنی نہیں کر سکتا ))))) سُورت النجم/آیت28، اور ،
((((( بَلِ اتَّبَعَ الَّذِينَ ظَلَمُوا أَهْوَاءَهُمْ بِغَيْرِ عِلْمٍ فَمَنْ يَهْدِي مَنْ أَضَلَّ اللَّهُ وَمَا لَهُمْ مِنْ نَاصِرِينَ::: بلکہ ظُلم کرنے والوں نے بغیر عِلم کے اپنی خواھشات کی پیروی کی، پس جسے اللہ ہی گمراہ کردے اُسے بھلا کون ہدایت دے سکتا اور ایسے لوگوں کے لیے کوئی بھی مددگار نہیں ہوتا)))))سُورت الروم/آیت29، اور
((((( وَكَذَّبُوا وَاتَّبَعُوا أَهْوَاءَهُمْ وَكُلُّ أَمْرٍ مُسْتَقِرٌّ:::اور اُن لوگوں نے جھوٹ بولے اور اپنی خواھشات کی پیروی کی ، اور ہر کام ایک کے لیے ایک مقرر کردہ ٹھکانا ہے))))) سُورت القمر/آیت3، اور اُن کا معاملہ یہ ہے کہ ،
((((( أَفَمَنْ كَانَ عَلَى بَيِّنَةٍ مِنْ رَبِّهِ كَمَنْ زُيِّنَ لَهُ سُوءُ عَمَلِهِ وَاتَّبَعُوا أَهْوَاءَهُمْ::: کیا وہ جو اپنے رب کی طرف سے واضح نشانی پر قائم ہے اُس کے جیسا ہوتا ہے جس کے لیے اُس کے بُرے کام سجا سنوار دیے جاتے ہوں اور وہ لوگ (پھر صِرف)اپنی خواھشات کی ہی پیروی کرتے ہوں))))) سُورت مُحمد/آیت14،
اور جو لوگ اللہ اور اُس کے رسول کریم صلی اللہ علیہ وعلی آلہ وسلم کے فرامین سُن کر اُن کو نہیں مانتے ، اپنی عقلیں اور فلسفوں کے مطابق اُن کو قبول و رد کرتے ہیں ، یا اُن کی باطل تاویالت کرتے ہیں اُن کا معاملہ اللہ کے ہاں یہ ہے کہ ((((( فَإِنْ لَمْ يَسْتَجِيبُوا لَكَ فَاعْلَمْ أَنَّمَا يَتَّبِعُونَ أَهْوَاءَهُمْ وَمَنْ أَضَلُّ مِمَّنِ اتَّبَعَ هَوَاهُ بِغَيْرِ هُدًى مِنَ اللَّهِ إِنَّ اللَّهَ لَا يَهْدِي الْقَوْمَ الظَّالِمِينَ::: اور (اے محمد)اگر یہ لوگ آپ کی بات قبول نہیں کرتے تو آپ جان رکھیے کہ یہ لوگ تو صِرف اُن کی اپنی خواھشات کی پیروی کرتے ہیں اور اُس سے زیادہ گمراہ اور کون ہو سکتا ہے جو اللہ کی ہدایت چھوڑ کر اپنی خواھشات کی پیروی کرے اور اللہ ایسے ظالموں کو ہدایت نہیں دیتا)))))سُورت القصص/آیت50،
اس وقت بات کرنے کا مقصد صِرف یہ ہے کہ ہم اللہ کی اِس مخلوق یعنی """ جِنّات """ کے وجود اور اُن کو دی گئی صِفات اور قوات کی سچی خبریں جان سکیں ،
جیسا کہ پہلے کہا ہے کہ سب سے زیادہ سچی خبر وہ ہے جو اللہ نے اپنے نبی پاک صلی اللہ علیہ وعلی آلہ وسلم کی ز ُبان مبارک کے ذریعے اپنے کلام پاک یعنی قران کریم کی صُورت میں بیان فرمائی اور جو اللہ نے اپنے رسول کریم محمد صلی اللہ علیہ وعلی آلہ وسلم کی ز ُبان مُبارک سے قُران کریم کے عِلاوہ ادا کروائی ،
لہذا ہم اللہ کی اِس مخلوق کے بارے میں ملنے والی اُن خبروں کا مطالعہ کریں گے جو اللہ سُبحانہ ُ و تعالیٰ کے کلام قران کریم میں اور اللہ کی وحی کے مُطابق اللہ کے رسول کریم صلی اللہ علیہ وعلی آلہ وسلم کی صحیح ثابت شدہ احادیث شریفہ میں موجود ہیں ، اور بلا شک و شبہ حق ہیں ، کسی کی ذاتی عقل ، سوچ ، منطق یا فسلفے کی دُھندلاہٹ ان خبروں کی حقانیت کی آب وتاب کو متاثر نہ کر سکی ہے اور نہ ہی اِن شاء اللہ کبھی کر سکے گی،
یاد رکھیے اور خُوب اچھی طرح سے یاد رکھیے کہ جِنّوں کا وجود اللہ تبارک و تعالیٰ کی طرف سے ثابت شدہ ایک اٹل حقیقت ہے ، اوراللہ جلّ و عزّ نے اپنی اس مخلوق کی چند ایک صِفات اپنی کتاب قران حکیم میں ذِکر فرمائی ہیں اورپھر اپنی سُنّت شریفہ کے مطابق اپنی اس مخلوق کے بارے میں بہت سی تفصیلات اپنے رسول صلی اللہ علیہ علی آلہ وسلم کی سُنّت مبارکہ کے ذریعے بیان فرمائی ہیں ، لہذا اس مخلوق کے بارے میں کسی خبر پر مشتمل کوئی بھی صحیح ثابت شدہ حدیث شریف کسی بھی طور قران کریم کے خلاف نہیں ، اور نہ ہی کوئی بھی اور صحیح ثابت شدہ حدیث شریف قران حکیم کے خلاف ہے ، خِلاف صِرف اور صِرف اور سمجھنے والوں کی اپنی ذاتی سمجھ میں ہے ، پس جِس کسی کو کسی صحیح ثابت شدہ حدیث کے سمجھنے میں کوئی اشکال پیش آتا ہو تو اُسے چاہیے کہ وہ ایک مؤدب مُسلمان کی طرح قرانی اخلاق کا مظاہرہ کرتے ہوئے ایک طالب عِلم کی حیثیت سے اپنا اشکال پیش کرے نہ کہ حدیث شریف ، روایان ء حدیث ، ائمہ کرام ، عُلما اور اُمت کے دیگر افراد کا مذاق اڑا کر اپنی آخرت کا خسارہ جمع کرے ،
اللہ ہی ہے جو ہر کسی کو جِنّاتی اور انسانی شیاطین کے شر سے محفوظ رکھ سکتا ہے ،
اِن شاء اللہ میں اس مضمون میں جِنّات کی تخلیق ، تخلیق کے مواد ، تخلیق کی حِکمت ، اُن کا شریعتء الہی کی پابندی کے مُکلف ہونے ، جِنّوں کی اِقسام ، اُن کے موجود ہونے کے مُقامات کی نشاندہی ، اور اُنہیں دی گئی صِفات اور قوتوں کو اللہ اور اس کے رسول صلی اللہ علیہ وعلی آلہ وسلم کی صحیح ثابت شدہ احادیث مبارکہ کی روشنی میں ، لیکن مختصراً بیان کروں گا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔
اگلا حصہ اِن شاء اللہ :::::: جِنّات کی تخلیق ، مواد ، اور حِکمت :::::: ہو گا ، ، قارئین کرام سے گذارش ء مکرر ہے کہ بات مکمل ہونے تک اپنے سوالات یا اپنی آراء کو تھامے رکھیں ، اِن شاء اللہ اس میں زیادہ خیر ہوگی۔

جِنّات،قُران کریم اورصحیح احادیث مبارکہ کی روشنی میں :پانچواں حصہ ::::::: جِنّات کی اِقسام ::::::

جِنّوں میں بھی انسانوں کی طرح قِسم قِسم کے جِنّات ہوتے ہیں ، جِن میں اِیمان لانے والے بھی ہیں ، اور کافر بھی ، اللہ اور اس کے رسول صلی اللہ علیہ وعلی آلہ وسلم کے تابع فرمان بھی ہیں اور نا فرمان و فاسق بھی ، اِن فاسقوں میں سب سے پہلا اور اُن سب کا سردار ، اعلیٰ حضرت ، ولی پیر و مُرشد ، قبلہ و کعبہ، لیڈر ، کمانڈر ، ڈائریکٹر، اِبلیس ، المعروف شیطان ہے جس پر اللہ کی لعنت ہو چکی ہے ، اور اِبلیس کے پیروکار شیاطین بھی ہیں،
جِنّات میں بہت بڑے بڑے طاقتور، مضبوط اور عظیم جسموں والے عفریت جِن بھی ہیں ،
اِن سب اقسام کی خبریں اللہ تعالیٰ نے اپنی کتاب میں فرمائی ہیں ،
::::: (1) ::::: ابلیس ، جو شیطان کے نام سے معروف ہے بھی ایک جِن ہی ہے﴿﴿﴿﴿﴿وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ كَانَ مِنَ الْجِنِّ فَفَسَقَ عَنْ أَمْرِ رَبِّهِ أَفَتَتَّخِذُونَهُ وَذُرِّيَّتَهُ أَوْلِيَاءَ مِنْ دُونِي وَهُمْ لَكُمْ عَدُوٌّ بِئْسَ لِلظَّالِمِينَ بَدَلًا::: اور جب ہم نے فرشتوں سے کہا کہ آدم کو سجدہ کرو تو اُنہوں نے سجدہ کیا ، سوائے اِبلیس کے جو کہ جِنّات میں سے تھا ، تو اُس نے اپنے رب کے حکم کی نافرمانی کی ، تو کیا پھر بھی تُم لوگ اِبلیس اور اُس کی اولاد کو میرے عِلاوہ اپنے ولی اختیار کرتے ہو جب کہ وہ سب ہی تُم لوگوں کے دُشمن ہیں، ظلم کرنے والوں کے لیے بہت ہی بُرا بدلہ ہے﴾﴾﴾﴾﴾ سُورت الکھف /آیت50،
اور دیگر جِنّات کی طرح اسے بھی اللہ تعالیٰ نے آگ کے شعلے سے ہی تخلیق فرمایا ، جِس کا اعتراف خود اُس نے اپنے اللہ کے سامنے کیا ، اور اس اعتراف کو اللہ تعالیٰ نے اپنی کتاب میں ذِکر فرمایا کہ کرتے ہوئے کہا ﴿﴿﴿﴿﴿ قَالَ أَنَا خَيْرٌ مِنْهُ خَلَقْتَنِي مِنْ نَارٍ وَخَلَقْتَهُ مِنْ طِينٍ :::اِبلیس نے کہا (اے اللہ)میں آدم سے زیادہ بہتر ہوں کیونکہ تُو نے مجھے آگ سے تخلیق فرمایا اور آدم کو گُندھی ہوئی مٹی سے﴾﴾﴾﴾﴾ سُورت الاعراف/آیت12،اور سُورت ص/آیت 76،
::::: (2) ::::: جِنّات میں اِیمان والے بھی ہیں جو اللہ اور اس کے رسول صلی اللہ علیہ وعلی آلہ وسلم کے مطیع اور تابع فرمان ہیں ، اوراِسلام کے علاوہ دوسرےمُخلتف ادیان اور مذاھب کو ماننے والے کافر بھی جو بلا شک و شبہ اللہ اور اس کے تمام رسولوں کےنافرمان ہیں ، اور کافروں کا ٹھکانہ جہنم ہی ہے خواہ وہ انسانوں میں سے ہوں یا جِنّات میں سے ﴿﴿﴿﴿﴿ وَأَنَّا مِنَّا الصَّالِحُونَ وَمِنَّا دُونَ ذَلِكَ كُنَّا طَرَائِقَ قِدَدًا ::: اور بے شک ہم لوگوں میں سے نیک بھی ہیں اور اس کے عِلاوہ (یعنی بداور برے )بھی ،ہم بہت سے مختلف(دینی اور مذھبی) راستوں پر چلنے والے تھے﴾﴾﴾﴾﴾ سُورت الجن/آیت 11،
﴿﴿﴿﴿﴿ وَأَنَّا مِنَّا الْمُسْلِمُونَ وَمِنَّا الْقَاسِطُونَ فَمَنْ أَسْلَمَ فَأُولَئِكَ تَحَرَّوْا رَشَدًاOوَأَمَّا الْقَاسِطُونَ فَكَانُوا لِجَهَنَّمَ حَطَبًا :::اور یہ کہ "ہم میں سے کچھ تو مسلمان (یعنی اللہ کے اطاعت گذار)ہیں اور کچھ نافرمان ہیں ، تو جنہوں نے اسلام (اللہ کی تابع فرمانی والا راستہ)اختیار کر لیا انہوں نے (اپنے لیے)نجات کی راہ ڈھونڈ لیO اور جو نافرمان ہیں تو وہ یقیناً جھنم کا ایندھن (بننے والے )ہیں ﴾﴾﴾﴾﴾ سُورت الجِن /آیات14،15،
اور اپنے رسول صلی اللہ علیہ وعلی آلہ وسلم کی ز ُبان مُبارک سے یہ خبر بھی کروائی ہے کہ اُن شیاطین جِنّات میں بعض تو بہت ہی زیادہ سرکش اور شریر بھی ہوتے ہیں،
﴿﴿﴿﴿﴿ اِذا کانَت أَوَّلُ لَیلَۃٍ مِن رَمضَانِ ، صُفِّدَتِ الشَّیَاطِینُ وَ مَردَۃَ الجِنِّ ، وَ غُلِّقت أَبوابُ النَّارِ ، فَلَم یُفتَحَ مِنھَا بابٌ وَ فُتِّحت أبوابُ الجَنَّۃِ ، فَلَم یُغلَقُ مِنھَا بابٌ ، وَ نَادَی مُنَادٍ ، یَا باغی الخَیرِ أقبل ، یَا باغی الشَّرِّ أَقصِر ، وَ لِلَّہِ عُتَقَاءُ مِن النَّارِ ، وَ ذَلِکَ فِی کُلِّ لَیلَۃٍ :::جب رمضان کی پہلی رات ہوتی ہے تو شیطانوں اور انتہائی شریر اورسر کشّ جنّوں کو باندھ دِیا جاتا ہے ، اور آگ (یعنی جہنم )کے دروازے بند کر دیئے جاتے ہیں پھر اُن میں سے کوئی دروازہ کھولا نہیں جاتا ( یعنی رمضان میں ) اور جنّت کے دروازے کھول دئیے جاتے ہیں ، پھر اُن میں سے کوئی دروازہ بند نہیں کیا جاتا ، اور آواز دینے والا آواز دیتا ہے ( یعنی اللہ کی طرف سے کِسی فرشتے کے ذریعے آواز دی جاتی ہے ) اے خیر کے چاہنے والے آگے بڑھ ، اے شر کے چاہنے والے باز آ ، اور اللہ ہر رات میں لوگوں کو آگ سے آزاد کرتا ہے ﴾﴾﴾﴾﴾ سُنن ابن ماجہ / کتاب الصیام /باب2،سُنن الترمذی /کتاب الصوم/ پہلا باب، اِمام الألبانی رحمہ ُ اللہ نے اِس حدیث کو صحیح قرار دِیا ۔
::::: (3) ::::: جِنّوں میں سے نیک اِیمان والے بھی نیک اِیمان والے انسانوں کی طرح جَنّت میں داخل ہوں گے اور جِنّت کی لذتوں سے لفط اندوز ہوں گے،
::::: (4) ::::: شیاطین یعنی اللہ اور اس کے رسولوں علیھم السلام اور اللہ کے دِین کے دُشمن ، اور گناھوں کی طرف لے جانے والے ، جِنّات میں بھی ہیں اور انسانوں میں بھی ﴿﴿﴿﴿﴿ وَكَذَلِكَ جَعَلْنَا لِكُلِّ نِبِيٍّ عَدُوًّا شَيَاطِينَ الإِنسِ وَالْجِنِّ يُوحِي بَعْضُهُمْ إِلَى بَعْضٍ زُخْرُفَ الْقَوْلِ غُرُورًا وَلَوْ شَاء رَبُّكَ مَا فَعَلُوهُ فَذَرْهُمْ وَمَا يَفْتَرُونَ :::اور اِس طرح ہم نے ہر ایک نبی کے لیے انسانوں اور جِنّوں کے شیاطین کو دُشمن بنایا ، یہ شیاطین ایک دوسرے کی طرف وحی کرتے ہیں ، باتوں کو دھوکہ دہی کے لیے خُوب سجاتے سنوارتے ہیں ﴾﴾﴾﴾﴾ سُورت الانعام/آیت 112،
::::: (5) ::::: جِنّات میں بڑے بڑے طاقتور ، مضبوط اور عظیم جسموں والے عفریت بھی ہیں ﴿﴿﴿﴿﴿ قَالَ يَا أَيُّهَا الْمَلَأُ أَيُّكُمْ يَأْتِينِي بِعَرْشِهَا قَبْلَ أَنْ يَأْتُونِي مُسْلِمِينَ O قَالَ عِفْريتٌ مِنَ الْجِنِّ أَنَا آَتِيكَ بِهِ قَبْلَ أَنْ تَقُومَ مِنْ مَقَامِكَ وَإِنِّي عَلَيْهِ لَقَوِيٌّ أَمِينٌ ::: سلیمان نے کہا، اے ﴾﴾﴾﴾﴾ سُورت النمل/آیات38،39،
اپنے رسول صلی اللہ علیہ وعلی آلہ وسلم کی ز ُبان مُبارک سے جِنّوں کی جسمانی ساخت کے اعتبار سے بھی اقسام کی خبر فرمائی ہے ﴿﴿﴿﴿﴿ الْجِنُّ ثَلاثَةُ أَصْنَافٍ،صِنْفُ لَهُمْ أَجْنِحَةٌ يَطِيرُونَ فِي الْهَوَاءِ ، وَ صِنْفٌ حَيَّاتٌ وَكِلابٌ ، وَصِنْفٌ يَحِلُّونَ وَيَظْعَنُونَ:::جِنّوں کی تین اَقسام ہیں ایک قِسم وہ ہے جِس کے پر ہیں اور وہ ہوا میں اُڑتے ہیں ، اور ایک قِسم سانپوں اور کتوں کی صُورت میں ہے ، اور ایک قِسم وہ ہے جو کبھی کہیں قیام کرتے ہیں اور کبھی سفر ( یعنی گھومتے پھرتے رہتے ہیں ) ﴾﴾﴾﴾﴾ الاسماء و الصفات للبہیقی/ حدیث795/کتاب بدءالخلق/باب29،المستدرک الحاکم/حدیث3702/ کتاب التفسیر/تفسیرسورۃ الاحقاف،اِمام الالبانی رحمہُ اللہ نے صحیح قرار دیا ہے ، صحیح الجامع الصغیر و زیادتہ/حدیث3114،
کتاب اللہ کی مذکورہ بالا آیات کریمہ میں بیان کی گئی جِنّوں کی اقسام اس حدیث شریف میں بیان کردہ جمسانی ساخت کی اقسام میں سےپہلے قِسم کے جِنّات کے بارے میں ہیں ، دوسری جسمانی ساخت رکھنے والے جِنّوں کے بارے میں ہمیں اور بہت سی صحیح ثابت شدہ احادیث مبارکہ میں کافی خبریں میسر ہیں، اگر میں اُن سب کو یہاں لکھنے لگوں تو یہ مضمون ایک بہت بڑی کتاب بن جائے گا، لہذا اختصار کے مد نظر میں اُن احادیث شریفہ کو نقل نہیں کر رہا ،
اس کے بعد اِن شاء اللہ اگلے موضوع کا مطالعہ کیا جائے گا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔
مضمون جاری ہے ،،،،،