السلام علیکم و رحمۃُ اللہ و برکاتہ
بہت سی عجیب و غریب عادات میں سے ایک یہ بھی ہم مسلمانوں میں داخل ہو چکی ہے کہ دِین کے معاملات اپنی اپنی طرف سے مقرر کی گئی کسوٹیوں پر پرکھ کر اپنا لیتے ہیں ، اپنے اپنے طریقے ، اپنے اپنے قوانین ، اپنے اپنے ڈھب و مسلک ، کے مطابق شریعت کے حکم لیے جاتے ہیں ، عقائد اور عِبادات بنا لی جاتی ہیں ،
اور بظاہر ہر کسی کا عنوان ، """ قران و سنّت """ ہوتا ہے ،اور اپنی بات ، اپنے عقیدے ، و عبادات کی دلیل بھی وہاں سے نکال لی جاتی ہے ،
اگر ہر کسی کی بات کی دلیل قران و سنت میں ہے تو پھر کہیں کوئی غلط نہیں ! اور یہ نا مکمن ہے کیونکہ حق دو کے پاس نہیں ہو سکتا ، پس قران و سنّت کو سمجھنے اور جاننے کے لیے ایک اور کسوٹی بھی اللہ کی طرف سے مقرر کی گئی ہے جِسے چھوڑنے کی وجہ سے ہم لوگ بالکل بنیادی ، عقائد ، اور عِبادات میں بھی اِختلاف کرتے ہوئے نظر آتے ہیں ،
میں پہلے بھی کئ دفعہ عرض کر چکا ہوں کہ ، قُران اورسُنّت کو سمجھنے کے لیے صحابہ رضی اللہ عنہم اجمعین کے اقوال و افعال کی حدود میں رہنا لازم ہے ، خاص طور پر عقیدے اور عِبادات میں ، اللہ سُبحانہُ و تعالیٰ نے ہم سب کے لیے اِیمان اور فہمِ دِین کے لیے ایک کسوٹی اور ایک معیار مقرر فرمایا ، اور یہود و نصاریٰ کو جواب دِلواتے ہوئے اپنے رسول صلی اللہ علیہ وسلم اور اُن کے اصحاب کو حُکم دِیا :::
( قُولُوا آمَنَّا بِاللّہِ وَمَا اُنزِلَ اِلَیْْنَا وَمَا اُنزِلَ اِلَی اِبرَاہِیمَ وَاِسمَاعِیلَ وَاِسحَاقَ وَیَعقُوبَ وَالاَسبَاطِ وَمَا اُوتِیَ مُوسَی وَعِیسَی وَمَا اُوتِیَ النَّبِیُّونَ مِن رَّبِّہِم لاَ نُفَرِّقُ بَیْْنَ اَحَدٍ مِّنہُم وَنَحنُ لَہُ مُسلِمُونَ O فَاِن آمَنُوا بِمِثلِ مَا آمَنتُم بِہِ فَقَدِ اہتَدَوا وَّاِن تَوَلَّوا فَاِنَّمَا ہُم فِی شِقَاقٍ فَسَیَکفِیکَہُمُ اللّہُ وَہُوَ السَّمِیعُ العَلِیمُ ) ( تُم سب (رسول صلی اللہ علیہ وسلم اور اُن کے ساتھی) کہو ہم اِیمان لائے اللہ پر اور جو ہماری طرف اُتارا گیا اُس پر ، اور جو اِبراہیم اور اِسماعیل اور اِسحاق اور یعقوب (علیہم السلام )اور اپنے پوتوں پر اُتارا گیا اُس پر ، اور جو کچھ دِیا گیا موسی اور عیسی اور (دوسرے) نبیوں ( علیہم السلام اجمعین) کو اُن کے رب کی طرف سے دِیا گیا اُس پر ، ہم نبیوں میں سے کِسی میں فرق نہیں کرتے (یعنی سب کی نبوت پر اِیمان رکھتے ہیں) اور ہم اللہ (اور اُسکے احکام ) کے لیے سر نگوں ہیں O اور اگر (اِس پیغام کے بعد ) یہ تُم لوگوں کی طرح اِیمان لاتے ہیں تو پھر یہ ہدایت پائے ہوئے ہیں اور اگر منہ پھیرتے ہیں تو وہ کھُلے اِختلاف میں ہیں اور جلد ہی اللہ آپ (یعنی رسول اللہ صلی اللہ علیہ وسلم )کو اِس سے کفایت فرما دے گا اور اللہ سب کچھ سننے والا اور مکمل عِلم رکھنے والا ہے ) البقرۃ / آیت ١٣٦،١٣٧
اور مزید فرمایا ( وَمَن یُشَاقِقِ الرَّسُولَ مِن بَعْدِ مَا تَبَیَّنَ لَہُ الہُدَی وَیَتَّبِع غَیرَ سَبِیلِ المُؤمِنِینَ نُوَلِّہِ مَا تَوَلَّی وَنُصلِہِ جَہَنَّمَ وَسَاء ت مَصِیراً ) ( اور ہدایت (یعنی اللہ کی طرف سے ارسال کردہ احکامات و ہدایت )واضح ہو جانے کے بعد بھی جو کوئی رسول (صلی اللہ علیہ وسلم ) کو الگ کرے گا اور ''' المؤمنین''' ( اہل سنت و الجماعت کے تمام مسلکوں کا اِس پر اتفاق ہے کہ ''' المؤمنین''' صحابہ رضوان اللہ علیہم ہیں تو جو کوئی اُن ) کے راستے کے عِلاوہ کِسی بھی اور کی اتباع (پیروی) کرے گا تو ہم اُسے اُسی طرف چلا دیں گے جِس طرف اُس نے رخ کیا ہے اور ہم اُسے جہنم میں داخل کریں گے ( کیونکہ یہ ہی اُسکے اپنائے ہوئے راستے کی منزل ہے ) اور جہنم کیا ہی بُرا ٹھکانہ ہے ) سورت النساء /آیت ١١٥ ،
( آگے چلنے سے پہلے ، بھائی عرفان حیدر صاحب سے گذارش ہے کہ اِس دوسری مذکورہ بالا آیت کی طرف ذرا خصوصی توجہ فرمائیں کہ اِس میں اللہ تعالیٰ نے اپنے لیے دو دفعہ جمع کا صیغہ اِستعمال فرمایا ہے ، اِس لیے اگر کوئی اور اللہ تعالیٰ کا ذِکر جمع کے صیغے میں کرتا ہے تو وہ خِلاف توحید نہیں ، بلکہ اللہ کی کبریائی اور قوت و قدرت کی بڑائی اور عظمت کے لیے ہے اور اللہ کی طرف سے اجازت شدہ ہے ، جی ہاں قُران میں تو اللہ نے یہ ہی سکھایا ہے ، اب اپنی ذاتی ارا یا غیر مسلم مستشرقین کے فلسفے کو کسوٹی بنا کر یا اُس کی مدد سے قران کو سمجھا جائے تو پھر دِین میں کچھ بھی کہا اور بنایا جا سکتا ہے )
اللہ تعالیٰ نے رسول اللہ صلی اللہ علیہ وسلم کے ساتھ ساتھ اُن کے صحابہ رضی اللہ عنہم کا کسوٹی مقرر فرمایا ، اور یہ نہیں کہا جا سکتا کہ یہ یہود و نصاریٰ کے لیے ہے ، بلکہ ہر ایک اِنسان کے لیے کہ اگر اُس کا اِیمان و عمل رسول اللہ صلی اللہ علیہ وسلم اور اُن کے اصحاب رضی اللہ عنہم اجمعین کی اتباع میں ہو گا تو وہ ہدایت والا ہوگا اور اگر نہیں تو وہ گمراہی والا ہوگا ، اور یہ ہوتا ہوا نظر آ رہا ہے ، ہر فرقہ مذہب و مسلک ظاہری طور پر قُران و حدیث کا نام لیوا ہوتا ہے ، لیکن جب اِن دنوں کو وہ اپنی عقل کے مُطابق سمجھتا اور سمجھاتا ہے ، صحابہ رضی اللہ عنہم کے اقوال و افعال کو ترک کر دیتا ہے تو پھر وہیں پہنچتا ہے جہاں کی خبر اللہ نے اِس مندرجہ بالا آیات مُبارکہ میں فرمائی ،
مزید وضاحت رسول اللہ صلی اللہ علیہ وسلم کی اِس معروف حدیث میں ملتی ہے کہ (اِنَّ بَنِی اِسرَائِیلَ افتَرَقَت علی اِحدَی وَسَبعِینَ فِرقَۃً وَاِنَّ اُمَّتِی سَتَفتَرِق ُ علی ثِنتَینِ وَسَبعِینَ فِرقَۃً کُلُّہَا فی النَّارِ اِلا وَاحِدَۃً وہی الجَمَاعَۃُ ) ( یقینا بنی اِسرائیل (یہودی) ٧١ فرقوں میں بٹے اور میری اُمت٧٢ فرقوں میں بٹے گی ، سب کے سب فرقے جہنم میں جائیں گے سوائے ایک کے ، اور وہ فرقہ ( جو جنّت میں جائے گا ) الجماعت ہے ) حدیث صحیح ہے اور سنن ابن ماجہ ، سنن ابی دواؤد ، المستدرک الحاکم ، مُسند احمد ، سنن البیہقی الکبریٰ اور حدیث کی دیگر کتابوں میں ابو ہُریرہ ، انس ابن مالک ، عبداللہ ابن مسعود ، عوف بن مالک ، معاویہ بن ابی سُفیان ، ابو اُمامہ ، عبداللہ ابن عباس ، رضی اللہ عنہم اجمعین سے روایت کی گئی ہے ،
اور مستدرک الحاکم اور سنن الترمذی کی ایک روایت میں نجات پانے والے کامیاب ہونے والے فرقے کے بارے میں فرمایا ( مَا اَنا عَلیہِ و اَصحَابی الیَوم ) ( جِس پر میں اور میرے صحابہ آج کے دِن ہیں ) ، حدیث کا درجہ صحت ''' حسن '''
پس ، اپنے عقائد اور عبادات کو قران اور صحیح ثابت شدہ سُنّت کی کسوٹی پر ، صحابہ رضوان اللہ علیہم اجمعین کی جماعت کے اقوال و افعال کی حدود میں رہتے ہوئے سمجھیئے ، کوئی عقیدہ ، کوئی عِبادت اپنی مرضی سے نکالے گئے معنیٰ و مفہوم کی بنیاد پر نہیں بنائی ، اپنائی جا سکتی ، بلکہ مکمل طور پر حرفاً حرفاً اللہ اور رسول اللہ صلی اللہ علیہ وسلم کی مقرر کردہ حدود میںرہتے ہوئے اپنانا ہے ، اور اگر ایسا نہیں تو کوئی بھی اپنی کِسی بات کو صحیح ثابت کرنے لے لیے کِسی آیت یا حدیث کو اپنے معنیٰ اور مفہوم دے کر کچھ بھی جائز اور ناجائز بنا سکتا ہے ، سوچنے اور سمجھنے کی بات تو یہ ہے کہ ''''''' اگر اُن آیات اور احادیث کا معنیٰ و مفہوم ، مطلوب و مقصود وہ ہی ہو ، جو کوئی بھی اپنے کسی عقیدے یا عِبادت کی دلیل کے طور پر پیش کرتا ہے ، تو رسول اللہ صلی اللہ علیہ وسلم نے ، یا صحابہ رضی اللہ عنہم کی جماعت نے اُس پر کیا اُسی طرح عمل کیا تھا جِس طرح یہ حضرات بیان کرتے ہیں ؟؟؟ اگر ہاں تو اُن کی بات ٹھیک ہوئی ، اور اگر نہیں تو کیا وہ رسول اللہ صلی اللہ علیہ وسلم اور صحابہ رضی اللہ عنہم اجمعین کی جماعت سے زیادہ قُران و حدیث کو سمجھنے والے ، اور رسول اللہ صلی اللہ علیہ وسلم سے محبت کرنے والے ہیں ؟؟؟ '''''''
یہ تو کوئی معیار نہیں اور نہ ہی حق گوئی ، اور نہ ہی انصاف پسندی کہ جو بات اپنے مسلک و مذہب کے مطابق نہ ہو ، یا جس بات کا عِلمی جواب ، یعنی قران اور صحیح ثابت شدہ سنّت ، صحابہ رضی اللہ عنہم کی جماعت کے اقوال و افعال کی روشنی میں نہ دیا جا سکے ، اُسے فرقہ واریت کے کھاتے میں ڈال دِیا جائے ،
مسلمانو ، کچھ تو خیال کیجیئے ، جو کام اللہ کے رسول صلی اللہ علیہ وسلم نے، صحابہ رضی اللہ عنہم اجمعین کی جماعت نے نہیں کیا، جو عقیدہ اُن لوگوں نے نہیں اپنایا ، بلکہ صدیوں تک اُمت میں اُس کا نام و نشان نہیں ملتا ، اُسے اپنانا تو درست ہوا اورقران اور صحیح ثابت شدہ سنّت ، صحابہ رضی اللہ عنہم کی جماعت کے اقوال و افعال کی روشنی میں اپنانا غلط ہوا ، اور غلط قرار دینے کے کوئی ثابت شدہ علمی دلیل نہیں بلکہ ''' دو سو سال پہلے کے کسی فرقے''' کی روش قرار دے کر بات گول کر دی جاتی ہے ، اور اپنے خود ساختہ عقائد اور عِبادات کی تاریخ پر نظر کی جاتی ہے اور نہ ہی دلائل کے فہم پر،
اللہ ہم سب کو حق جاننے ماننے اور اُس پر عمل کرنے کی توفیق عطا فرمائے ،
السلام علیکم و رحمۃُ اللہ و برکاتہُ

__________________
اب نہ ہو گا کہیں کوئی نزول کتاب ::: بند کر دیا رب العالمین نے یہ باب
ہے جو بھی صحیح سنت رسالت مآب ::: بے شک ہے وحیء رب الارباب