داڑھی کے بارے میں اکثر مسلمانوں کےسوچنے کا انداز یہ ہے کہ داڑھی صرف علماء حضرات کو زیب دیتی ہے۔ نبی اکرم صلی اللہ علیہ و علی آلہ وسلم کے زمانے میں عام طور پر داڑھی رکھی جاتی تھی اس لیے اکثریت داڑھی رکھنے میں عار نہ سمجھتی تھی مگر اب انسان کے لباس اور آراستگی میں کافی فرق واقع ہو چکا ہے۔ چہرے بغیر داڑھی کے پر رونق و بارعب نظر آتے ہیں۔ کیا ایسے حالات میں ہر مسلمان کے لیے داڑھی رکھنا لازم ہے؟
جواب:
داڑھی رکھنا نہ صرف یہ کہ فعلی سنت ہے بلکہ نبی صلی اللہ علیہ و علی آلہ وسلم نے اس کے رکھنے کا حکم دیا ہے اور مونڈنے سے منع کیا ہے۔ اس لیے یہ سمجھنا کہ داڑھی صرف علماء یا مولویوں کا کام ہے اور عام مسلمان مختار ہیں کہ چاہیں رکھیں یا نہ رکھیں، بالکل غیر اسلامی اور غلط طرز فکر ہے۔ خصوصا اگر آدمی داڑھی مونڈنے کو پسند اور رکھنے کو ناپسند کرتا ہے تو اس کے صاف معنی یہ ہے کہ اس کے اندر اسلامی ذوق کے بجائے کافرانہ ذوق پرورش پا رہا ہے۔
یہ بڑی عجیب اور افسوسناک بات ہے کہ جس طرح مسلمانوں کو رسول اللہ صلی اللہ علیہ و علی آلہ وسلم نے داڑھی رکھنے کا حکم دیا ہے اسی طرح سکھوں کو بھی ان کے پیشوا نے اس کا حکم دیا تھا۔ دونوں انگریزی حکومت کے تحت رہے ، دونوں نے مغربی تعلیم پائی لیکن سکھوں نے اپنے پیشوا کے حکم کی وہ بے احترامی نہیں کی جو مسلمانوں نے اپنے سچے رسول صلی اللہ علیہ و علی آلہ وسلم کے فرمان کی کی۔ درحقیقت یہ ایک بد ترین حالت ہے جس پر مسلمانوں کو شرم آنی چاہیے کجا کہ وہ بلا تکلف ان خیالات کا اظہار کریں کہ داڑھی کے بغیر چہرے بارونق ہوتے ہیں اور داڑھی رکھنے سے بے رونق ہو جاتے ہیں۔ آج فرنگیت زدہ مسلمان محض داڑھی مونڈنے ہی پر اکتفا نہیں کرتے بلکہ داڑھی کو برا سمجھتے ہیں، اس کا مذاق اڑاتے ہیں، اس کے رکھنے والوں کی تضحیک کرتے ہیں، ہر ممکن طریقے سے ان کی حوصلہ شکنی کرتے ہیں، بعض ملازمتوں مثلا فوج وغیرہ میں داڑھی کو نااہلی کا سرٹیفکیٹ دے رکھا ہے۔ ان لوگوں کا دعوٰی ہے کہ داڑھی رکھنے سے آدمی چست اور جامہ زیب (Smart) نہیں رہتا۔ یہ سب کچھ ایک مسلم سوسائٹی اور مسلم ریاست میں ہو رہا ہے لیکن سکھوں نے انگریزی حکومت کے زمانے میں اپنا یہ حق تسلیم کرا کے چھوڑا کہ وہ داڑھی رکھ کر ہر شعبہ حیات میں داخل ہو سکتے ہیں اور بڑے سے بڑے مناصب تک پہنچ سکتے ہیں۔ فوج، ایئر فورس اور سول کے کس شعبے میں وہ نہیں پہنچے اور کون سا بڑا عہدہ رہ گیا جو محض داڑھی رکھنے کی وجہ سے ان کو نہ ملا ہو۔ کس میں یہ جرات تھی کہ ان کو نااہل قرار دے سکے یا ان پر سمارٹ نہ ہونے کا فیصلہ صادر کر سکے یا ان کو یہ حکم دے کہ پہلے داڑھی منڈواؤ پھر تمہیں فلاں منصب پر ترقی مل سکے گی۔ آج کتنے مسلمان ہیں جو مختلف ممالک میں کسی سکھ افسر کی ماتحتی میں کام کر چکے ہیں ، ان میں سے کوئی شخص کبھی یہ ہمت نہ کر سکا کہ سکھوں کی داڑھی کا مذاق اڑانا تو درکنار اس پر اعتراض تک کر سکے۔ یہ سب کچھ اس بات کا کھلا ثبوت ہے کہ سکھ مسلمانوں سے زیادہ کیریکٹر رکھتے ہیں، ان سے زیادہ اپنے شعائر کا احترام کرتے ہیں، ان سے زیادہ اپنے پیشوائے دین کی اطاعت کرتے ہیں، اور ان سے کم ذہنی غلامی میں مبتلا ہوتے ہیں۔ کیا اس صریح علامت کم تری پر مسلمانوں کو کبھی شرم نہ آئے گی؟
(رسائل و مسائل حصہ دوم، مودودی صاحب)