سوئٹزرلینڈ میں مذہبی نشانیوں کے حوالے سے تنازعہ بڑھتا جا رہا ہے اور اب سوئس پارلیمان کی اکثریتی جماعت سوئس پیپلز پارٹی نے مساجد کے میناروں کی تعمیر پر پابندی کے لیے ایک مہم شروع کر دی ہے۔
جماعت کا کہنا ہے کہ عبادت کے لیے مینار کی تعمیر ضروری نہیں بلکہ بنیادی طور پر یہ اسلامی قانون کی نشانی ہے اور اس کی سوئس قانونی نظام میں کوئی جگہ نہیں۔اب اس معاملے پر ریفرنڈم کروانے کے لیے ملکی سطح پر ایک دستخطی مہم چلائی جا رہی ہے اور اس ریفرنڈم تک ملک میں کسی مینار کی تعمیر کی اجازت نہیں۔

اس مہم سے سوئٹزرلینڈ کے ان پینتیس ہزار مسلمانوں کو دھچکا پہنچا ہے جو کئی عشروں سے اپنے مذہب کی پہچان بنانے کے لیے کوششوں میں مصروف ہیں۔

سوئٹزرلینڈ ایک سیکولر ریاست ہے جس کا آئین تمام مذاہب پر عمل کرنے کی اجازت دیتا ہے لیکن درحقیقت سوئس مسلمان متروک گوداموں اور کارخانوں میں نماز ادا کرتے ہیں۔ اس وقت پورے سوئٹزرلینڈ میں دو مینار موجود ہیں ایک زیورچ میں اور ایک جینیوا میں لیکن ان دونوں میناروں سے بھی اذان دینے کی اجازت نہیں جبکہ برن میں واقع سوئٹزرلینڈ کی سب سے بڑی مسجد ایک سابقہ زیرِ زمین کار پارک میں بنائی گئی ہے۔

برن کے نواحی قصبے لینگن تھل کی انتظامیہ نے بھی میناروں کی تعمیر کے خلاف مہم کے بعد علاقے کی ایک رنگ فیکٹری میں قائم مسجد کے مینار کی تعمیر کی اجازت دینے کا فیصلہ غیر معینہ مدت کے لیے مؤخر کر دیا ہے۔
مینار کی تعمیر کے لیے درخواست دینے والے البانوی نژاد مسلمان متالپ کرادیمی کا کہنا ہے’ ہم اس فیصلے سے بہت مایوس ہوئے ہیں۔ ہم اپنی مسجد کو ایک مینار اور ایک چائے کے کمرے کے تعمیر کے ساتھ تھوڑا بہتر بنانا چاہتے تھے اور ہمیں لگتا تھا کہ اس سے بہتری آئےگی‘۔

متالپ کرادیمی کے مطابق انہوں نے اس بات کی یقین دہانی کروائی تھی کہ اس مینار کو اذان دینے کے لیے استعمال نہیں کیا جائے گا۔ ان کا کہنا تھا’ شاید وہ ہم سب کو مجرم اور دہشتگرد سمجھتے ہیں لیکن یہ ایسے ہی ہے جیسے کہا جائے کہ سارے اطالوی مافیا میں ہیں‘۔

تاہم میناروں پر پابندی کے حامیوں کو کہنا ہے کہ کسی کو اس کے مذہب پر عمل کرنے سے روکنا ان کا مقصد نہیں۔ سوئس پیپلز پارٹی کے رکن پارلیمان آسکر فریسنگر کا کہنا ہے’ ہمیں مسلمانوں سے کوئی پرخاش نہیں لیکن ہم مینار نہیں چاہتے کیونکہ یہ سیاسی اور قانونی اسلام کی نشانی ہے۔ اگر یورپ میں میناروں کی تعمیر شروع ہو گئی تو سمجھیں کہ اسلام نے یورپ پر غلبہ پا لیا‘۔

تاہم اب یہ بھی مانا جا رہا ہے کہ میناروں پر پابندی کی بحث سے سوئٹزرلینڈ اور عرب مسلم دنیا کے خوشگوار تعلقات بھی متاثر ہو سکتے ہیں۔

بشکریہ بی بی سی