عبدالقدوس

شکوہ بھی وفا کا کیسے کریں اک نازک سی دشواری ہے
آغازِ وفا خود ہم نے کیا تھا پہلی بھول ہماری ہے
دکھ تم کو جب جب پہنچا ہے خود ہم نے آنسو پونچھے ہیں
اب دل پہ ہمارے چوٹ لگی ہےاب کے تمھاری باری ہے
بے کھیلے بازی جیت کے بھی تم ہم سے شاکی رہتے ہو
اور ہم کو دیکھو ہم نے تو خود جان کے بازی ہاری ہے
وہ عہد تھا عیش و جوانی کا، اب عُمر ہے سعی تلافی کی
پہلے بھی نیند پرائی تھی اور اب بھی شب بیداری ہے
کچھ دردِ نہاں،کچھ فکرِجہاں،کچھ شرمِ خطا، کچھ خوفِ سزا
اک بوجھ اٹھائے پھرتا ہوں اور بوجھ بھی کتنا بھاری ہے
جو کاری زخم لگا دل پر پہلے اس کی فکر کرو
یہ بعد میں دیکھا جائے گا،یہ کس کی کارگزاری ہے
جو صاحب گھر گھر میری بابت زہر اگلتے پھرتے ہیں
وہ صرف مرے ہمسائے نہیں ہیں ان سے قرابت داری ہے
اس راہ سے ہوکر گزرے ہیں کچھ رہبر بھی کچھ رہزن بھی
اب نقشِ قدم پہچان کہ چلنا آپ کی ذمہّ داری ہے

__________________

محمدعدنان

بہت اچھی شاعری ہے
شئیر کرنے کا شکریہ