درجہ بندی: (2 votes - 4.50 average)

ایک بات کی وضاحت کرنا مناسب سمجھتا ہوں کہ میں آج کل کے نام نہاد پیران کرام کا ہرگز ہرگز دفاع نہیں کر رہا ۔ میں خود ان سے سخت متنفر ہوں، میں جن اولیاء و صلحاء کے مقام و مرتبہ کا ذکر کروں‌ گا وہ، ایسے لوگ ہیں جو " والذین آمنوا اشد حبا للہ " (“اور وہ لوگ جو ایمان لائے وہ اللہ تعالی سے شدید محبت کرنے ہیں‘‘۔کے مصداق ہیں۔ جن کے شب و روز " الذین یذکرون اللہ قیاما و قعودا و علی جنوبھم" ”و ہ لوگ جو اٹھتے بیٹھتے پہلو بدلتے اللہ کا ذکر کرتے ہیں۔”کرتے ہوئے گزرتے ہیں جن کے بارے میں اللہ تعالی فرماتا ہے " رضی اللہ عنھم ورضوا عنہ"۔ اللہ ان سے راضی ہوا اور وہ اللہ سے راضی ہوئے۔

سب سے پہلے اولیاء اللہ کی شان کے حوالے سے حدیث نقل کرتا ہوں:
حضرت ابو ھریرہ سے مروی ہے کہ رسول اللہ صلی اللہ علیہ وآلہ وسلم نے ارشاد فرمایا اللہ تعالی فرماتا ہے:
من عادی لی ولیا فقد اٰذنتہ بالحرب وما تقرب الی عبدی بشیئ احب الی مما افترضت علیہ، وما یزال عبدی یتقرب الی بالنوافل حتی احبہ، فاذا احببتہ: کنت سمعہ الذی یسمع بہ، وبصرہ الذی یبصربہ، ویدہ التی یبطش بھا، ورجلہ التی یمشی بھا، وان سالنی لاعطینہ، ولانستعاذنی لاعیذنہ، وما ترددت عن شیئ انا فاعلہ ترددی عن النفس المومن یکرہ الموت وانا اکرہ مساءتہ۔ او کما قال رسول اللہ صلی اللہ علیہ وسلم
(بخاری، ابن حبان، بیہقی(
ترجمہ: جو میرے کسی ولی سے دشمنی رکھے میں اس سے اعلان جنگ کرتا ہوں اور میرا بندہ کسی ایسی چیز کے ذریعے میرا قرب نہیں پاتا جو مجھے فرائض سے زیادہ محبوب ہو،اور میرا بندہ مسلسل میری نفلی عبادات کے ذریعے میرا قرب حاصل کرتا رہتا ہے یہاں تک کہ میں اس سے محبت کرنے لگتا ہوں اور جب میں اس سے محبت کرتا ہوں تو اس کے کان کی سماعت بن جاتا ہوں جن سے وہ سنتا ہے اور اس کی آنکھ کا نور بن جاتا ہوں جس سے وہ دیکھتا ہے اور اس کے ہاتھ کی گرفت بن جاتا ہو جس سے وہ پکڑتا ہے اور اس کے پاءوں کی توانائی بن جاتا جس سے وہ چلتا ہےاگر وہ مجھ سے سوال کرتا ہے تو میں اسے ضرور بر ضرور عطا کرتا ہوں اور اگر وہ میری پناہ مانگتا ہے تو میں اسے ضرور بر ضرور پناہ دیتا ہوں ۔ میں نے جو کام کرنا ہوتا ہے اس میں کبھی متردد نہیں ہوتا جیسے بندہءمومن کی جان لینے میں ہوتا ہوں ایسے میں کہ اسے موت پسند نہیں اور مجھے اس کی تکلیف پسند نہیں۔"

میرا خیال ہے کہ کافی سارے مسائل تو اس ایک حدیث مبارکہ نے ہی حل کر دیے ہوں گے۔
اب آگے میں اصل موضوع کی طرف آتا ہوں:

حضرت شریح بن عبید بیان کرتے ہیں‌کہ حضرت علی بن ابی طالب کے ہاں اہل شام کا ذکر کیا گیا جبکہ وہ عراق میں مقیم تھے، تو اہل عراق نے کہا: اے امیر المومنین ان کو برا بھلا کہیے، تو آپ نے فرمایا: نہیں میں نے حضور نبی اکرم صلی اللہ علیہ وآلہ وسلم کو فرماتے سنا کہ ابدال شام میں ہوں گے اور وہ چالیس آدمی ہوں گے۔ جب ان میں سے کوئی آدمی چل بسے گا تو اللہ تعالی ا س کی جگہ دوسرے آدمی لے آئے گا اور یہی وہ لوگ ہیں جن کے ذریعے بادل برستے ہیں اور جن کے توسل سے دشمنوں پر فتح و نصرت طلب کی جاتی ہے اور اہل شام سے ان کے ذریعے عذاب کو ٹالا جاتا ہے۔
اور ایک اور روایت میں ہے: میری امت میں ہمیشہ چالیس آدمی ایسے ہوں گے جن کے دل قلب ابراہیمی کی طرح ہوں گے اور ان کے ذریعے اللہ تعالی عذاب کو ہٹائے گا اور انہیں ابدال کہا جائے گا۔
"اسے امام احمد بن حنبل نے المسند (1/122 میں اور امام طبرانی نے المعجم الکبیر(10/23 میں روایت کیا ہے"