اسلامی حکومت کا لفظ سنتے ہی ہمارے ذہنوں میں کچھ ایسا تصور ابھرتا ہے جیسے چند مولوی داڑھیاں چڑھائے، پیٹ نکالے ،عمامے باندھے ،ثقیل زبانوں میں گفتگو کرتے ۔ ۔ ۔ ہمارے سروں پر آ مسلط ہوں گے۔ اور ہم سے زبردستی نمازیں پڑھوائیں گے، زبردستی داڑھی رکھوئی جائے گی، عورتوں کا باہر آنا ممنوع قرار پا جائے گا، مولویوں کے گماشتے جن مرد عورت کی طرف اشارہ کر دیں گے انکو 80 کوڑے مار دئیے جائیں گے۔ کسی نے پردہ نہیں کیا اس کو بھی زنا کا مرتکب قرار دے کر کوڑوں کی سزا دے دی جائے گی۔ پارکس، تفریحی مراکز، ہنسنا کھیلنا ، وغیرہ سب ختم ہو جائے گا۔ الغرض ایسا تصور آتا ہے ذہن میں جیسے دنیا کی رنگینیوں پر پابندی لگا دی جائے گی اور کسی تاریک دور میں دھکیل دیا جائے گا۔ یہ تصورات پیدا کرنے میں اگر مغربی پروپیگنڈا کا ہاتھ ہے تو اس سے علما کے ایک بڑے طبقے کو بھی بے قصور نہیں ٹھہرایا جا سکتا۔

کیا اسلامی حکومت سے مراد یہ ہے کہ اس حکومت میں ملا سپریم کونسل (جیسے ایران میں انقلابی کونسل) سب سے سپریم ہو گی؟ کیا صرف مُلا کو ہی حکومت کرنے کا حق ہوگا؟ کیا صرف مُلا ہی قانون سازی کرے گا جبکہ باقی کسی کی رائے کی کوئی اہمیت نہیں ہوگی؟ یہ سوالات شاید اکثر جدید دماغوں میں آئے ہوں گے جیسا کہ اس فورم پر بھی اکثر و بیشتر ان سے ملتے جُلتے سوالات یا تنقید ہو رہی ہوتی ہے۔

اس ٹاپک میں ان تمام تو نہیں البتہ کوشش کروں گا کہ اکثر سوالات کا جواب مدلل انداز میں دے سکوں۔
بنیادی طور پر اس ٹاپک میں اسلامی حکومت، اسکے تصورات اور اسلامی قانون سازی پر بات کروں گا تاکہ کچھ غلط فہمیوں کا ازالہ ہو سکے

اسلامی حکومت اور اسکا طریقہ کار کا اختلاف:
اسلامی حکومت کچھ بھی نہیں سوائے اس کے کہ رب کی دھرتی پر رب کا نظام۔ تقرییباََ تمام مسلمانوں کا اس پر اجماع ہے کہ ہماری زندگی بشمول حکومت اللہ کے احکامات کے تابع گزرنی چاہیے۔ یہی وجہ تھی کہ نبئی پاک نے کفار مکہ کے مشروط حکومت کی پیشکش ٹھکرا دی تھی۔ نواسہ رسول حضرت حسین نے اپنی جان کی قربانی دی۔ یہی وہ اجماع ہے جس پر امام اربعہ بھی متفق اور جس کی وجہ سے انکے وقت کی حکومتیں ان پر ظلم و ستم کے پہاڑ گراتی رہیں۔ اسلامی حکومت کے بغیر ہمارا دین بھی مکمل نہیں ہوتا کیونکہ اللہ تعالی فرماتا ہے کہ
"اور دین میں پورے کے پورے داخل ہو جاؤ"
۔ یہ تو عجب معاملہ ہوگا کہ ذاتی حیثیت میں تو ۔ ۔ ۔ میں نماز روزہ کا پابند ہوں ، سود کی حرمت کا قائل اور اسکو اللہ رسول کے ساتھ جنگ متصور کروں مگر حکومتی سطح پر اس کو ناگزیر جان کر اسکی آبیاری کی کوششیں کروں۔ ذاتی حیثیت میں تو ۔ ۔ ۔ اللہ کی حاکمیت کا اقرار کروں مگر اجتماعی حیثیت میں کہوں کہ عوام کی اصل طاقت ہے۔ چناچہ اگر ہم دیکھیں تو واضح طور پر کہہ سکتے ہیں کہ اسلام کی REQUIREMENTدرحقیقت اسلامی حکومت ہی ہے یعنی رب کی دھرتی پر رب کا نظام۔
اور اس پر پوری امت کا اجماع ہے۔ تاہم طریقہ کار میں اختلاف ضرور ہے۔ مثال کے طور پر جماعت اسلامی جو درحقیقت اسلام کی سیاسی تحریک کی سرخیل سمجھی جاتی ہے وہ حکومت کے ذریعے اسلامی انقلاب برپا کرنے کے دلائل رکھتی ہے ۔جبکہ تبلیغی جماعت معاشرے میں انقلاب برپا کر کےحکومت کو اسلامی بنانے کے دلائل رکھتی ہے۔ چناچہ اسلامی حکومت پر اختلاف کسی کو نہیں ۔ ۔ ۔ اختلاف صرف طریقہ کار پر ہے۔ فی الوقت یہ بات بحث سے خآرج ہے کہ کون درست ہے اور کون غلط ۔

نظام اسلامی میں امور کے فیصلہ کا طریقہ :

اس معاملہ میں قرآن اور نبئی پاک صلی اللہ علیہ وسلم کا دور اور اس کے بعد خلافت راشدہ ہمارے لیے راہ عمل ہے۔

پہلے قرآن کی ایات ملاحظہ فرمائیے
"اے ایمان والو ! اطاعت کرو اللہ کی اور رسول کی اور ان لوگوں کی جو تم میں سے صاحب امر ہوں، پھر اگر تمہارے درمیان کسی معاملہ پر نزاع ہو جائے تو اسے اللہ اور رسول کی طرف پھیر دو، اگر تم واقعی اللہ اور روز آخر پر ایمان رکھتے ہو۔ یہی ایک اچھا طریق کار ہے اور انجام کے اعتبار سے بھی بہتر ہے"

"اگر تم علم نہیں رکھتے تو اہل الزکر سے پوچھ لو" (النحل-الانبیا)

"اور جب کبھی امن یا خوف سے تعلق رکھنے والا کوئی اہم معاملہ انکو پیش آتا ہے تو وہ اسکو پھیلا دیتے ہیں۔ حالانکہ اگر وہ اسکو رسول اور اپنے اولی الامر تک پہنچاتے تو اسکا استنباط کر لیتے وہ لوگ جو اسکا استنباط کرنے کی صلاحیت رکھتے ہیں" (النسا)

"انکا کام آپس میں مشورے سے ہوتا ہے" (الشوریٰ)

نہ صرف یہ ایات اس بات کی طرف واضح اشارہ کر رہی ہیں کہ ہم کو اپنے تمام مسائل اللہ و رسول کے احکامات کی روشنی میں حل کرنے ہیں ۔ ۔ ۔ بلکہ ان ایات سے یہ بات بھی واضح ہو جاتی ہے کہ مسلمانوں پر حکومت کرنے کی اجازت کن کو ہے اور وہ لوگ کس طریق سے حکومت کریں گے۔
دوسری آیت اس بات کی طرف اشارہ کر رہی ہے کہ ہم لوگ اپنے مسائل کا حل اہل الزکر لوگوں سے معلوم کریں۔ اور اہل الزکر سے مراد قرآن و حدیث کا علم رکھنے والوں سے ہٹ کر اور کیا ہو سکتی ہے؟ کیونکہ قرآن میں ذکر سے مراد یہ ہوتی ہے کہ وہ سبق جو اللہ اور رسول کی طرف سے اہل ایمان کو دیا گیا اور اور اہل الذکر سے مراد یہ کہ جو اس سبق کو اچھے طریق سے یاد رکھیں۔

تیسری آیت میں اولی الامر اور استنباط کی اصطلاح استعمال کی گئی ہے۔ بہتر ہوگا پہلے اولی الامر کا مطلب سمجھ لیا جائے۔ اولی الامر لوگ وہ ہوتے ہیں جنکو مسلمانوں کے معاملات کی ذمہ داری دی گئ ہو۔ اور استنباط سے مراد یہ ہے کہ وہ پیش آمد معاملے کی حقیقت بھی معلوم کر سکتے ہوں اور کتاب اللہ و سنت رسول سے یہ بھی دریافت کر سکتے ہوں کہ اس معاملے کا کیا حل ہونا چاہیے۔ چناچہ کس طرح ممکن ہے کہ ایک بے دین یا ایسا مسلمان جس کو پہلے کلمے سے علاوہ کسی اور بات کا علم نہ ہو وہ کس طرح کسی معاملے میں اللہ اور رسول کے حکم کے مطابق فیصلہ کر سکتا ہے؟؟

جبکہ آخری آیت یہ بتاتی ہے کہ مسلمانوں کے معاملات میں آخری فیصلہ کس طرح ہونا چاہیے کہ آپس میں مشورہ کر کے۔

چناچہ اگر ہم ان اصولوں کو آپس میں جمع کر کے دیکھیں تو معلوم ہوتا ہے کہ لوگوں کو اپنے مسائل کے حل کے لیے سب سے پہلے اہل الزکر افراد سے رجوع کرنا چاہیے یعنی ایسے افراد جو دین کا علم رکھتے ہوں۔ رہے مملکت اور معاشرے کے لیے امہیت رکھنے والے مسائل تو وہ اعلی الامر کے سامنے لائے جائیں جو کتاب اللہ اور سنت رسول کے ساتھ بخوبی واقف ہو اور وہ باہمی مشاورت کے سے یہ تحقیق کرنے کی کوشش کریں کہ کتاب اللہ اور سنت رسول کی رو سے کیا چیز زیادہ سے زیادہ قرین حق و صواب ہے۔ یہی خلافت راشدہ کی سنت بھی رہی۔ جو آہستہ آہستہ تبدیل ہو کر حکمران کی اپنی مرضی پر منحصر ہوتی گئی۔ ان آیات سے یہ بھی واضح ہوتا ہے کہ علما کوئی موروثی یا الہیٰ حق نہیں لے کر آئے حکومت کرنے کا ۔ ۔ ۔ ۔جیسا کہ اسلامی حکومت کے لفظ سے بد گمانی پیدا ہو جاتی ہے۔ بلکہ کوئی بھی وہ شخص جو قرآن اور حدیث کا کما حقہ علم رکھتا ہو وہ اللہ کے نائب کی حیثیت اختیار کر سکتا ہے۔
اسی وجہ سے اسلام کی سیاسی تحریک کی سرخیل جماعتیں قرآن کو خود پڑھنے، سمجھنے اور عمل کرنے پر زور دیتی ہیں۔ یہ جماعتیں برخلاف چند مدارس کے نقطہ نظر کے اس بات کی حامی ہیں کہ اسلام کو ثقیل اور گنجلگ اصطلاحوں اور مفاہیم میں قید نہیں کر دینا چاہیے۔ یہ جماعتیں باقاعدگی سے دروس قران و حدیث بھی منعقد رواتی ہیں کہ شاید اسی معاشرے میں سے وہ صالح افراد کا ظہور ہو جو رب کی دھرتی پر رب کا نظام لاگر کر سکیں۔