ویسے تو آج تک دہشت گردی کے مفہوم پر کوئی متفق نہیں ہوسکا اسی لیے دہشت گردی کی کوئی متفقہ تعریف نہیں پائی جاتی تاہم Victionaryکے مطابق "دہشت گردی جان بوجھ کر اٹھایا گیا ایک ایسا قدم ہے جس کا مقصد متاثرہ افراد میں ایک ایسا جذباتی رد عمل پیدا کرنا ہوتا ہے جس کے ذریعے اپنا سیاسی یا دیگر ایجنڈا حاصل کیا جا سکے۔"

چناچہ ہم سادہ الفاط میں اپنے مقصد کے لئے دہشت گردی کی یوں تعریف بیان کر سکتے ہیں
"دہشت گردی معاشرے کے اصولوں اور اقدار کے خلاف اٹھایا گیا ایک ایسا اقدام ہوتا ہے جس میں لوگوں میں ایک خاص جذباتی سوچ پیدا کرنی ہوتی ہے تاکہ اپنے مخصوص مقاصد حاصل کیے جا سکیں"

چناچہ ہم دہشت گردی کو کئی اقسام میں بانٹ سکتے ہیں ۔کچھ لوگ اپنے مذموم مقاصد کے حصول کے لیے لوگوں کی جان سے کھیل جاتے ہیں، بم بلاسٹ، خود کش حملے،ٹارگٹ کلنگ وغیرہ اسی کیٹیگری میں آتے ہیں۔کچھ لوگ اپنے مقاصد کے حصول کے لیے دوسروں کی جان سے تو نہیں کھیلتے لیکن اپنے جتھے بنا کر لوگوں کو خوف زدہ کرتے ہیں تاکہ لوگ انکے فرمانبردار رہیں۔

چناچہ معاشرے کے مروجہ اصولوں کے خلاف اٹھایا گیا کوئی بھی اقدام نہ صرف غیر قانونی بلکہ اگر وہ اجتماعی سطح پر ہو (یعنی کافی لوگ مل کر اپنے مخصؤص مقاصد حاصل کرنے کے لیے ایسا کریں ) کو دہشت گردی کے زمرے میں لیا جا سکتا ہے۔

ہمارے پاکستانی معاشرے کی اساس اسلام کے آفاقی اصولوں پر رکھی گئی ہے۔اس معاشرے کے اصولوں و اقدار کی اکثریت اسلام سے اخذ کی گئی یا ان سے متاثر ضرور ہے۔پاکستانی معاشرے یا اسلامی معاشرے کی ایک خاص نشانی "حیا" ہے۔ حیا سوچ کی پاکیزگی کو بھی کہتے ہیں اور جسمانی اخلاقی برائیوں سے دوری کو بھی۔حیا میں نہ صرف ہمارے روز مراہ کے معمولات آ جاتے ہیں بلکہ حیا کے ذمرے میں ہمارے لباس، ہماری زبان ، ہمارے اٹھنے بیٹھنے کے طریقے وغیرہ بھی آتے ہیں۔یہ اقدار ہمارے معاشرے کی پہچان ہیں۔

چناچہ اگر کوئی گروہ ہماری ان اقدار پر حملہ کرے، انکو مزید اچھا کرنے کے بجائے اخلاقی بدتری کی طرف لے جائے، اور ایسا کر کے اپنے کوئی خآص مقاصد حاصل کرنا چاہے تو اُس گروہ کے اس اقدام کر بھی دہشت گردی ہی گنا جائے گا۔ بد قسمتی سے ہم کو طالبان نامی گروہ کی بحث میں الجھا کر ہمارے اوپر ایک دوسری جو دہشت گردی مسلط کر دی گئی ہے اس سے ہم نہ صرف بے خبر ہیں بلکہ تیزی سے اس دہشت گردی کا شکار بھی ہوتے جا رہے ہیں۔
پاکستانی میڈیا پر روز افزوں فحاشی و عریانی کا سیلاب ہماری معاشرتی اقدار کو بہائے لیے جا رہا ہے۔ یہ چینلز نہ صرف بھارت و مغربی تہذیب کو پاکستانی معاشرے پر لاگو کرنے کی کوشش کر رہے ہیں بلکہ ان چینلز پر پیش کیے جانے والے اکثر پروگرام کوئی شریف آدمی تنہا بیٹھ کر بھی نہیں دیکھ سکتا۔ مخرب الخلاق لباس، مخرب الاخلاق گفتگو، معنی خیز واہیات جملے، ایک دوسرے کے گلے لگنا، ایک دوسرے کو چومنا، نیم عریاں ڈانس یہ سب ان چینلز کا خآصہ ہوتے جا رہے ہیں۔

ہمارے گھر میں کوئی بھی انڈین چینل نہیں آتا۔ لیکن حالات سے آگاہی کے لیے پاکستانی نیو چینلز آن ہیں۔ چینلز سکرول کرتے ہوئے اتفاق سے" آج ٹیلی ویژن " سامنے آ گیا۔ اس پر اس وقت ایک انتہائی واہیات شخص عورت کے روپ میں پروگرام پیش کر رہا تھا اور ساتھ میں دو مہمان رونق محفل تھے۔ان لوگوں کی گفتگو تو معیار سے گری ہوئی تھی ہی لیکن ان کے لباس بھی انتہائی بے شرمانہ تھے۔
کیا یہ دہشت گردی نہیں ہے؟ یہی چینلز طالبان کے خلاف ایک طوفان برپا کیے رہے ہیں کیا یہ اپنے کردار پر ایک نظر ڈالیں گے؟
کیا ہمارا فرض نہیں بنتا کہ نہ صرف اس دہشت گردی سے محتاط رہیں بلکہ اس دہشت گردی کے خلاف اس شدت سے بھی زیادہ شدت سے آواز بلند کریں جس شدت سے ہم نے طالبان کی دہشت گردی کے خلاف آواز بلند کی تھی۔ کیونکہ طالبان کی دہشت گردی محض افراد تک محدود تھی لیکن میڈیا کی دہشت گردی ہمارے اذہان اور ہمارے معاشرے کو اس گڑھے کی طرف دھکیل رہی ہیں جو درحقیقت جہنم کا دہانہ ہے۔وہی جہنم جس میں جانے کے بعد کبھی کوئی نہ نکل سکا۔

سوچیے اور عمل کیجیے "آج" سے


بدرالزمان بلوچ