اکتوبر 2009ء افغانستا ن پر امریکی یلغار کی آٹھویں برسی تھی۔ ان آٹھ سالوں میں کیا کھویا کیا پایا یہ ایک لمبی رام کہانی ہے۔البتہ اس عرصہ میں متاثر ہونے والے صرف امریکی یا افغانی نہیں بلکہ خطے کے تمام ممالک کسی نہ کسی حد تک شامل ہیں، اور متاثرین میں سرفہرست پاکستان ہے۔

اس لئے نفع و نقصان کا جائزہ لیتے وقت صرف امریکہ اور افغانستان کو مد نظر رکھنے سے جائزہ مکمل نہیں ہوگا۔ امریکہ کو اس جنگ میں خسارہ ہی خسارہ ہوا ۔معاشی طور پروہ دیوالیہ ہو گیا،اس کی عسکری برتری کے دعوے خاک میں مل گئے، جدید جنگی سازو سامان ناکام ہو گیا، افغانستان میں امن و انصاف قائم کرنے، ترقی کی نئی راہیں دریافت کرنے اور منشیات کو ختم کرنے کے جن بلند بانگ دعووں کے ساتھ وہ آیا تھا ان میں سے ایک بھی حاصل نہیں ہو سکا۔ دوسروں کو امن و امان دینا تو درکنار خود امریکی فوجی خوف کے باعث نفسیاتی مریض بن چکے ہیں۔ اور امریکہ بھاگنے کے لئے بے تاب ہے لیکن عراق کے بعد افغانستان سے اتنی بری شکست برداشت کرنے کی تاب نہیں ۔

الغرض خسارہ ہی خسارہ ہے سوائے اس کے کہ سمندر پار ہونے کی وجہ سے اس کے اپنے بازار ، اپنے عسکری مراکز اور اپنے تعلیمی ادارے بم دھماکوں اور خود کش حملوں سے محفوظ ہیں۔

امریکہ کے حقیقی حریف طالبان کو تو اس جنگ نے فائدہ ہی فائدہ دیا ہے۔ ان کے حوصلے مزید بڑھے ہیں، ایک عالمی طاقت کو شکست دینے کا سہرا ان کے سر سجنے والا ہے، ان کو دنیا سے مٹانے والے خود اپنی بقا کی جنگ لڑرہے ہیں، اور ان کے خلاف جارحیت کے لئے آنے والے اپنے دفاع تک محدود ہو کر رہ گئے ہیں۔

جس وقت اس حملے کی تیاریاں ہو رہی تھیں، تو ماہرین اور اہل تجربہ نے بار بار متنبہ کیا تھا کہ یہ سرزمین اور یہاں کے لوگ غلامی کے خوگر نہ ہونے کی وجہ سے بیرونی طاقتوں کے لئے ”زود ہضم“ نہیں ہیں۔یہاں حکمرانی کے خواب دیکھنا یا طاقت کے نشے میں ان کے ساتھ زور آزمائی کرنا ’آبیل مجھے مار ‘ کے سوا کچھ نہیں۔ برطانیہ اس سے پہلے یہاں سے نامراد لوٹ چکا تھا، لیکن وہ ماضی کو فراموش کر کے آ گیا اور اب ۔۔۔۔

اس کے بعد روس نے گرم پانیوں تک پہنچنے کا ارادہ کیا، اپنے عالمی طاقت ہونے کا زعم اسے بھی بہت تھا، پورے لاؤ لشکر کے ساتھ چل نکلا اک کٹھن راستے کی جانب۔ پھر دنیا نے دیکھا کہ کس طرح اس کا غرور خاک میں ملا، اس کی ساری طاقت کو زمین نگل گئی، آسمان اچک کر لے گیا، ہوا میں تحلیل ہو گئی یا ریت کا گھروندا ثابت ہوئی۔

دنیا پر راج کرنے والا ملک ان گنت ٹکڑوں میں بٹ گیا اور بے شمار آزاد ریاستوں نے جنم لیا۔ آج دنیا کے نقشے پر آزاد ریاستوں کے طور پر پہچانی جانے والی وسطی ایشیا کی ریاستی افغان مجاہدین کی جوانمردی ہی کی مرہون منت ہیں۔ اس تلخ تجربے کے پیش نظر روس نے بطور خاص بار بار متنبہ کیا کہ جناب،” بھڑوں کے چھتے کو پتھر مت ماریں“ لیکن گیدڑ کی موت آئی ہوئی تھی اس لئے شہر کا رخ تو کرنا ہی تھا۔

ستمبر 2001ءکے واقعے کو بنیاد بنا کر اکتوبر 2001ءکو امریکہ نے افغانستان پر حملہ کر دیا، خیال تھا کہ کم از کم مالی و جانی نقصان کے ساتھ طالبان پر قابو پا لیا جائے ، اس لئے انہوں نے زمینی حملے کے بجائے فضائی حملے کو ترجیح دی۔
سب سے پہلے قابل شہر پر حملہ کیا جہاں بجلی کا سارا نظام تھا، پھر ایئر پورٹ، کندھار اور جلال آباد پر حملہ کیا۔ 7 اکتوبر کو شروع ہونے والے یہ حملہ 12 نومبر 2009ءکو قابل سے طالبان حکومت کے سقوط کے بعد ختم ہوئے۔ ان پینتیس دنوں میں ظلم و بربریت کی وہ مثالیں قائم ہوئیں کہ چنگیز خان اور ہلاکو خان کی نسلیں شرما گئیں۔یہ حملہ اتنی بلندی اور اتنے خطرناک ہتھیاروں سے کیا گیا کہ طالبان کے پاس ان کا مقابلہ کرنے کی قوت بالکل نہیں تھی۔

نہتے عوام کو نشانہ بنایا گیا اور ہنستے بستے شہروں کو تورا بورا بنا دیا گیا۔ جب ان کی نظر میں کوئی افغانی سر اٹھانے کے قابل نہ رہا تو انہوں نے اپنی فتح کا اعلان کیا اور زمینی فوجیں لے کر افغانستان میں آگئے۔

طالبان حکومت کے خاتمے اور بون معاہدہ کے نتیجے میں حامد کرزئی کی حکومت وجود میں آئی۔ امریکہ اور اس کے اتحادیوں کا خیال تھا کہ اب افغانستان سے خانہ جنگی کا ہمیشہ کے لئے خاتمہ ہوگیا، امریکہ اپنے عزائم میں کامیاب ہو گیا لیکن یہ سارے خواب تھے اور خواب کی قسمت ہی بکھرنا ہے۔

طالبان کو اپنی قوت کا اندازہ تھا اس لئے انہوں نے گوریلا جنگ کا انتخاب کیا، امریکہ اور اتحادیوں کے خلاف حملے شروع ہو گئے، اور ہر گزرتے دن کے ساتھ مزاحمت میں شدت آتی گئی۔ پھر چشم فلک وہ منظر دیکھا کہ بدر و حنین کی یاد تازہ ہو گئی، نہتے طالبان، جن کے پاس نہ تو B-52طیارے تھے، نہ ڈیزی کٹر بم تھے اور نہ ہی مواصلات کا جدید نظام تھا۔ لیکن ہمت اور حوصلہ تھا، جرات و جوانمردی تھی ۔

اب جنگ تھی حوصلوں کی، پختہ ارادوں کی، اپنے موقف کی سچائی پر یقین کی، جن کے مقابلے میں کوئی ہتھیار کارگر نہیں ہو سکتا چاہے وہ کتنا ہی جدید کیوں نہ ہو۔ امریکہ بوکھلا گیا اور اس نے ایک بار پھر مست ہاتھی کی طرح کبھی جنازے پر اور کبھی شادی کی تقریبات پر حملے شروع کر دیئے۔ نہتے لوگوں کو خاک اور خون میں نہلانا شروع کر دیا لیکن طالبان کی طرف سے حملوں میں شدت آتی گئی۔

اب جب کہ آٹھ سال مکمل ہو گئے ہیں، امریکہ اپنے تمام وسائل اور تما م اتحادیوں کے تعاون کے باوجود ناکام ہو چکا ہے،اندرونی اور بیرونی طور پر نقصانات کا حجم بڑھتا جا رہا ہے اور اسے اس بات کا احساس ہو چکا ہے کہ اس جنگ کو طول دینا سراسر اس کے لئے خسارے کا سودا اور تباہی کا سامان ہے تو اس نے باعزت واپسی کے لئے کوششیں تیز کر دی ہیں۔

اس سلسلے میں ایک طرف طالبان سے مذاکرات کے لئے کوششیں جاری ہیں۔ سی آئی نے طالبان سے رابطہ کر لیا ہے۔ پاکستان اور سعودیہ سے مذاکرات میں معاونت کی درخواست بھی کی ہے۔

اور دوسری جانب وہ جاتے جاتے پاکستان کو دہشت گردی کا ایک تحفہ بھی دیئے جا رہا ہے۔ ہر طرف دہشت گردی، خود کش حملے، بلیک واٹر کی آزادنہ نکل و حرکت اور ایٹمی قوت کے لئے خطرات کی صورت میں۔ لیکن ہم تا حال اسی کی دوستی کا دم بھرتے ہیں اور اسے دشمن ماننے کے لئے تیار نہیں۔ اب دستبرداری کا بہت اہم وقت ہے، اگر پاکستان چاہے تو اپنا راستہ جدا کر کے اک نئے سفر کا آغاز کر سکتا ہے، ڈرون حملوں، خود کش حملوں، دھماکوں اور اس طرح کی تمام لعنتوں سے چھٹکارا حاصل کر کے امن کی جانب گامزن ہو سکتا ہے۔ لیکن یہ احساس کون دلائے ۔۔۔امریکہ بھاگ رہا ہے اور ہم چمٹ رہے ہیں۔

__________________
محتاج اصلاح و دعا