مقصدڈرانا یا دھمکانا نہیں، سمجھنا اور سمجھانا ہے کیونکہ آج بھی نہ سمجھے اور آج بھی نہ سدھرے تو خاکم بدہن پورے پاکستان کو وزیرستان بننے سے کوئی نہیں بچا سکے گا۔ پاکستان کے اندر اگر سازشی نظریات کی بھرمار ہے، یہاں اگر ریٹائرڈ جرنیل، سیاسی و مذہبی رہنما اور اپنے آپ کو امریکہ مخالف ثابت کرنے والے صحافی یا اینکرز غلط بیانی سے کام لے کر کبھی القاعدہ کے وجود سے انکار کررہے ہیں، کبھی پاکستانی طالبان سے متعلق افسانے تراش لیتے ہیں تو نتیجے میں قوم کنفیوز تو ہوسکتی ہے لیکن حقیقت مٹ نہیں سکتی اور حقیقت یہ ہے کہ القاعدہ اور پاکستان میں موجود اس کے حامی جن کو ہم پاکستانی طالبان کے نام سے یاد کرتے ہیں، اس وقت ایک ایسی قوت ہیں جو پاکستان کو ہلاسکتے ہیں۔ میریٹ بم دھماکے، جی ایچ کیو پر حملہ اور اب تازہ ترین پی این ایس مہران کی کارروائی صرف ٹریلرکے زمرے میں آتے ہیں۔ اس مسئلے کا اگرجامع اور ہمہ گیر حل نہ نکالا گیا تو یہ لوگ پورے پاکستان کو لرزانے کی صلاحیت رکھتے ہیں۔ یاد رکھئے کہ القاعدہ ایک نظریاتی اور قربانی دینے پر آمادہ لوگوں پر مشتمل عالمی تنظیم ہے ۔ اپنے منتخب کردہ راستے کو وہ عالم اسلام کی سربلندی اور کفر کی تباہی کا واحد راستہ سمجھتے ہیں ۔ پاکستان میں اس کا اثرورسوخ دنیا کے کسی بھی ملک بشمول افغانستان سے اس لئے زیادہ ہے کہ مقامی آبادی میں بھی ان جیسی سوچ رکھنے والے لوگوں کی ایک بڑی تعداد موجود ہے۔ امریکہ القاعدہ کا دشمن اور ٹارگٹ نمبر ون ہے اور پاکستان میں امریکہ مخالف جذبات عروج پر ہیں، اس لئے یہاں ان کو ہم نظر اور ہم فکر لوگوں کی دامے درمے سخنے مگر غیرمعمولی حمایت حاصل ہے۔ پاکستان کی جہادی اور فرقہ وارانہ تنظیمیں اب القاعدہ کے فرنچائزز کی حیثیت اختیار کرگئی ہیں اور یہ تنظیمیں چونکہ ملک کے گوشے گوشے میں پھیلی ہوئی ہیں، اس لئے القاعدہ بھی اب پاکستان کے ہر علاقے میں اثرورسوخ رکھتی ہے ۔ اس حوالے سے دیکھا جائے تو القاعدہ قبائلی علاقوں سے زیادہ ہمارے بڑے شہروں میں اپنی جڑیں پھیلاچکی ہے۔ القاعدہ کے کارکن اور اس کے پاکستانی وابستگان غیرمعمولی طور پر تربیت یافتہ ہیں۔ وہ پیسے کے لئے لڑرہے ہیں اور نہ کسی دنیاوی شہرت کے لئے ۔ مجھ کو یا آپ کو ان سے اختلاف ہوسکتا ہے لیکن وہ اس راستے کو دنیا اور آخرت کی کامیابی کا ذریعہ سمجھتے ہیں۔ ان کے ہاں انتقام کا عنصر بھی در آیا ہے۔ وہ سمجھتے ہیں کہ پاکستانی ریاست اور سیاسی و مذہبی رہنماؤں نے استعمال کرنے کے بعد ان سے بے وفائی کی ہے۔ وہ اپنے موقف کو دوسروں تک پہنچانے اور ان کے ذہنوں میں بٹھانے کے لئے ہر قسم کی ٹیکنالوجی کا بھرپور استعمال کرتے ہیں ۔ وہ مختلف ملکوں، مسالک اور پس منظر سے تعلق رکھنے والے ہیں لیکن چند مشترکات کی بنیاد پر وہ سب اکٹھے اور یکسو ہیں ۔شاید امریکہ اور مغرب میں القاعدہ کی کارروائیوں کی صلاحیت کمزور ہوگئی ہے لیکن پاکستان میں ان کی یہ صلاحیت پہلے سے کئی گنا بڑھ گئی ہے۔
میں ان لوگوں میں شامل ہوں جو ڈنڈے اور طاقت کی بجائے اس مسئلے کا سیاسی، سفارتی اور مفاہمتی حل تجویز کرتے ہیں۔کسی اور کو اس رائے سے اختلاف ہوسکتا ہے لیکن تشخیص تو صحیح ہونی چاہئے۔ اس وقت جو لوگ خوف سے یا پھر اپنے آپ کو جعلی طور پر امریکہ مخالف ثابت کرکے عوام کی ہمدردی سمیٹنے کے شوق میں کنفیوژن پھیلارہے ہیں،شاید یہ سمجھ رہے ہوں کہ اس طرح وہ اسلام اور پاکستان کی بڑی خدمت کررہے ہیں لیکن میرے نزدیک وہ اسلام اور پاکستان ہی نہیں بلکہ القاعدہ اور طالبان کے خلاف بھی ظلم عظیم کے مرتکب ہورہے ہیں۔ انکار نہیں صحیح تشخیص کے نتیجے میں حل کا راستہ نکلے گا اور صحیح تشخیص کے لئے ضروری ہے کہ القاعدہ اور طالبان کی حقیقت سے قوم کو آگاہ کیا جائے اور یہ بات اپنی حکومت اور عوام کو سمجھائی جائے کہ یہ لوگ کیوں اور کیسے یہ سب کچھ کررہے ہیں؟
اس وقت سیاست اور صحافت کے میدانوں میں جو عسکریت پسندی سے متعلق لوگ بات کررہے ہیں، ان کو تین گروپوں میں تقسیم کیاجاسکتا ہے۔ پہلا گروپ بعض سابق فوجی افسران، مذہبی سیاست دانوں اور ان کے ہمنوا دائیں بازو کے دانشوروں کا ہے جو حقیقت جانتے ہیں لیکن بعض مصلحتوں یا پھر اس خوف سے کہ خود ان کا نام بھی گناہ گاروں کی صف میں لکھ دیا جائے گا، سچ نہیں بول رہے ۔ ان کو ڈر ہے کہ سچ بولنے سے مقبولیت کم ہوگی۔ اسی طرح اس گروپ کے جو کالم نگار یا اینکرز ہیں، وہ قارئین اور ناظرین کی تعداد میں اضافے کی خاطر آئیں بائیں شائیں سے کام لے رہے ہیں ۔ دوسرا گروپ لبرل اور بائیں بازو کے سیاستدانوں اور دانشوروں پر مشتمل ہے ۔ یہ گروپ القاعدہ اور طالبان کو حقیقت تو مانتے ہیں لیکن ان کو سمجھنے کی کوشش نہیں کرتے۔ ان دونوں کے حوالے سے ان کی معلومات بہت ناقص اور کمزور ہیں ۔ وہ تجزیے اور تبصرے میں اعتدال سے کام لینے کی بجائے چند واقعات کو بنیاد بنا کر محض اپنا غصہ نکالتے رہتے ہیں اور ان کی اکثریت بھی تصویر کا صرف ایک رخ دکھاتی ہے۔
تیسرا طبقہ ان لوگوں کا ہے جو اس مسئلے کو سمجھتے ہیں اور انصاف کے ساتھ بیان بھی کرنا چاہتے ہیں لیکن انہیں خوف نے گھیرے میں لے رکھا ہے ۔ وہ حقیقت بولیں تو عسکریت پسند بھی ناراض، اسٹیبلشمنٹ بھی ناراض۔ دائیں بازو کے لوگ بھی غصہ اور بائیں بازو کے لوگ بھی برہم ۔ جان بھی خطرے میں اور ایمان بھی خطرے میں۔ دائیں بازو کے لوگ انہیں امریکی ایجنٹ، گمراہ، روشن خیال کے القابات سے نوازتے ہیں اور بائیں بازو کے لوگ انہیں رجعت پسند اور طالبان کا حامی گردانتے ہیں ۔ اس طبقے کے بعض لوگ ہمت کا مظاہرہ کر بھی رہے ہیں لیکن ظاہر ہے ان کی تعداد آٹے میں نمک کے برابر بھی نہیں۔
نتیجہ یہ نکلا کہ آج پاکستان میں القاعدہ اور طالبان سے متعلق جتنے منہ اتنی باتیں والا معاملہ ہے۔ کوئی کہتا ہے القاعدہ نامی تنظیم موجود ہے کوئی کہتا ہے اس کا سرے سے وجود ہی نہیں ہے۔ کوئی کہتا ہے پاکستانی طالبان حقیقت ہیں تو کوئی کہتا ہے کہ جو کچھ ہورہا ہے وہ غیرملکی ایجنسیاں کروارہی ہیں۔ کوئی کہتا ہے کہ اسامہ بن لادن زندہ ہے تو کوئی کہتا ہے وہ کئی سال پہلے مرچکے تھے۔ کوئی کہتا ہے کہ افغان اور پاکستانی طالبان ایک ہیں اور کوئی کہتا ہے کہ دونوں کا آپس میں کوئی تعلق نہیں۔ کوئی کہتا ہے کہ یہ لوگ پاکستان کے لئے زہرقاتل ہیں تو کوئی کہتا ہے کہ وہ پاکستان کا اثاثہ ہیں۔ جب تشخیص میں اس بڑے پیمانے پر کنفیوژن ہو تو علاج اور حل کیسے ممکن ہے؟ اس لئے ضرورت اس امرکی ہے کہ سیاسی، مذہبی اور عسکری قیادت اس موضوع سے دلچسپی رکھنے والے دانشوروں کو ساتھ بٹھائے، نمائشی کانفرنسز کی بجائے خاطر خواہ بحث و مباحثہ کے ذریعے صحیح تشخیص کرے۔ جس میں انٹیلی جنس ایجنسیاں اپنی معلومات سامنے رکھ دیں۔ ان لوگوں کی استعداد، نظریات اور مطالبات کے بارے میں آگاہی حاصل کی جائے۔ قومی سطح پر ایک پالیسی بنا کر اس کے حوالے سے قوم کو یک زبان کیا جائے اور پھر ایک ایسی پالیسی بنائی جائے جس کی پشت پر قوم کھڑی ہو، نہیں تو خاکم بدہن پورے پاکستان کے وزیرستان بننے کاانتظار کیجئے۔

__________________

میرا بلاگ۔ صدائےقلندرhttp://saifikhan011.blogspot.com/