امریکی دربار میں پہنچے توسبھی ایک ہوئے
وکی لیکس کی طرف سے خفیہ امریکی سفارتی مراسلوں کے نئے انکشافات سامنے آئے ہیں۔مثلاً کہا گیا ہے کہ صدر زرداری اور میاں نواز شریف چیف جسٹس افتخار محمد چودھری کو بحال نہ کرنے پر متفق تھے۔ روزنامہ ڈان نے انکشاف کیا ہے کہ صدر آصف علی زرداری اور سابق وزیر اعظم میاں نواز شریف اس بات پر متفق تھے کہ افتخار محمد چودھری کو بحال نہیں کیا جائے گا اور عبدالحمید ڈوگر کو نہیں ہٹایا جائے گا۔
بھوربن اعلامیے پر دستخط کے اگلے ہی روزپاکستان پیپلز پارٹی کے شریک چیئرمین آصف علی زرداری نے اس وقت کی امریکی سفیر این ڈبلیو پیٹرسن سے ملاقات کی جس میں انہوں نے امریکی سفیر کو مسلم لیگ ن کے سربراہ نواز شریف سے ہونے والے ملاقات کی تفصیلات سے آگاہ کیا اور کہا تھا کہ وہ اور نواز شریف اس بات پر متفق ہو ہیں کہ چیف جسٹس افتخار محمد چوہدری کو بحال نہیں کیاجائے گا۔آصف زرداری نے امریکی سفیر کو یہ بھی بتایا کہ انہوں نے عبدالحمید ڈوگر سے کہا ہے کہ انہیں بھوربن اعلامیے سے فکرمند ہونے کی ہرگز ضرورت نہیں۔ یاد رہے بھوربن اعلامیے پر فروری دوہزار آٹھ میں ہونے والے انتخابات میں سب سے زیادہ نشستیں جیتنے والی دونوں جماعتوں نے نو مارچ دو ہزار آٹھ کو دستخط کیے تھے جس میں اس بات پر اتفاق کیا گیا تھا کہ تین نومبر کو پرویز مشرف کی جانب سے ایمرجنسی کے نفاذ کے بعد ہٹائے جانے والے تمام جج تیس دن کے اندر بحال کردیے جائیں گے۔اس گفتگو کی تفصیل اس وقت کی امریکی سفیر این پیٹرسن نے دس مارچ دوہزار آٹھ کو واشنگٹن کو لکھے جانے والے خفیہ مراسلے میں تحریر کی۔این پیٹرسن نے لکھا کہ جب انہوں نے آصف زرداری سے تیس دن کے بارے میں دریافت کیا کہ اس کے بعد کیا ہوگا تو آصف زرداری ہنس پڑے اور کہا کہ سیاست میں تیس دن اسی نوے دن بن جاتے ہیں۔
این پیٹرسن کے مطابق آصف زرداری نے آئی ایس آئی کے سربراہ ندیم تاج اور قومی سلامتی کے مشیر طارق عزیز سے کہا تھا
کہ افتخار چودھری اور ان کے خاندان کو کوئٹہ منتقل کر دیا جائے مگر مشرف حکومت نے یہ بات تسلیم نہیں کی۔
٢٠٠٩ء کے اوائل میں ایک ایسے وقت جب مسلم لیگ (ن)کے رہنما نواز شریف غیر فعال چیف جسٹس افتخار محمدچودھری کی بحالی کے لیے احتجاجی مہم میں سرکردہ کردار ادا کر رہے تھے، اُن کی جماعت کے رہنما امریکی سفارت کاروں کو یقین دلارہے تھے کہ معزول جج کے مستقبل پر سمجھوتا ممکن ہے۔لاہور میں امریکی قونصل خانے کے اعلیٰ عہدے دار برائن ہنٹ نے ١٤مارچ ٢٠٠٩ء کو بھیجے گئے اپنے سفارتی مراسلے میں لکھا کہ شہباز (شریف)نے کہا کہ (چیف جسٹس کی) بحالی کے بعد مسلم لیگ (ن)اس معاملے کو ختم کرنے اور (افتخار محمد)چودھری کو ہمیشہ کے لیے (عہدے سے) ہٹانے پر تیار ہے۔آصف زرداری نے این پیٹرسن کو یقین دلایا تھا کہ وہ حالات کی تبدیلی کے لیے خود کچھ نہیں کریں گے۔ انہوں نے صدر مشرف اور خصوصاً طارق عزیز کے ساتھ کام کرنے کا یقین دلایا تھا جن کے ساتھ ان کے بقول وہ آسانی محسوس کرتے ہیں۔وہ چاہتے تھے کہ مشرف آرام کریں اور چیف جسٹس کے بارے میں فکر مند نہ ہوں۔ ان کے بقول وہ چاہتے ہیں کہ پیپلز پارٹی کو کاروبار کے لیے دوستانہ ماحول دینے کی ضرورت ہے اور وہ امریکی سرمایہ کاری کی حوصلہ افزائی کرنا چاہتے ہیں۔
دوہزار آٹھ کے عام انتخابات کے بعد بیس فروری دو ہزار آٹھ کو این پیٹرسن نے اپنے مراسلے میں لکھا کہ آصف زرداری مسلم لیگ قاف کے ساتھ بھی کام کرنے کے لیے تیار ہیں مگر وہ چودہریوں کو الگ کرنا چاہتے ہیں۔ این پیٹر سن کے مطابق زرداری نے کہا وہ چودہری پرویز الٰہی کے ساتھ نہیں کام کرنا چاہیں گے کیونکہ انہیں حال ہی میں انتخابات میں شرم ناک شکست ہوئی ہے اور پھر قاف لیگ کے بہت سے ارکان ان کے ساتھ ملنے کے لیے تیار ہیں۔این پیٹرسن نے اپنے تجزیے میں لکھا کہ آصف زرداری اپنی مرحومہ اہلیہ کی نسبت بہت کم جذباتی ہیں۔عملیت پسند ہونے کے ساتھ ساتھ وہ بہت سنگ دل بھی ہیں تاہم اُن کی سیاسی صلاحیتوں کا امتحان ابھی باقی ہے۔
وکی لیکس کی جانب سے جاری کردہ ایک خفیہ امریکی مراسلے میں یہ انکشاف بھی کیا گیا ہے امریکا نے پاکستان کو ایران سے دور رکھنے کے لیے اپنا اثرو رسوخ استعمال کیا تھا ۔اس سے پہلے ایران نے پاکستان کو سستے نرخ پر تیل فروخت کرنے کی پیش کش کی تھی ۔ مگرامریکا نہیں چاہتا تھا کہ ایران کو پاکستان میں قدم جمانے کا موقع ملے۔ اس نے پاکستان پر دباو ڈال کر اسے یہ پیش کش قبول کرنے سے باز رکھا ۔ایران پاکستان کے راستے بھارت تک گیس پائپ لائن بھی بچھانا چاہتا تھا لیکن امریکی دباو پر بھارت اس منصوبہ سے پیچھے ہٹ گیا۔
وکی لیکس کے تازہ انکشافات کے مطابق پاکستانی فوج کے سربراہ جنرل اشفاق پرویز کیانی نے قبائلی علاقوں میں سرگرم عمل''جنگ جوؤں'' کے خلاف اپنی افواج کی کارروائیوں میں امریکہ سے ڈرون یا بغیر پائلٹ کے طیاروں کی مدد مانگی تھی۔امریکی حکومت کے خفیہ سفارتی مراسلوں کی یہ تفصیلات پاکستان کے انگریزی روزنامے ڈان نے شائع کی ہیں ۔ان میں کہا گیا ہے کہ ٢٢ جنوری ٢٠٠٨ء میں امریکیCENTCOM کے سربراہ ایڈمرل ولیم فالن سے ملاقات میں جنرل کیانی نے درخواست کی کہ جنوبی وزیرستان کے جن علاقوں میں پاکستانی فوج جنگجوؤں کے خلاف برسر پیکار ہے وہاں اُنھیں ڈرون طیاروں کی مسلسل مدد درکار ہے۔ ٢٢ فروری ٢٠٠٨ء کو پاکستانی فوج کے سربراہ کی اس درخواست کے بارے میں امریکی سفیر این ڈبلیو پیٹرسن نے ایک خفیہ سفارتی مراسلے یا کیبل کے ذریعے واشنگٹن کو مطلع کیا تھا۔تاہم۔
امریکی سفیر کے خفیہ مراسلے کے مطابق ملاقات میں پاکستانی فوج کے سربراہ کی اس درخواست پر اپنے فوری ردعمل میں ایڈمرل فالن نے یہ کہہ کر معذرت کردی تھی کہ اُن کے پاس یہ ڈرون نہیں۔ البتہ اُنھوں نے یہ پیش کش ضرور کی تھی کہ اُن کی تربیت یافتہ میرین فورس(JTACs ) پاکستانی انفنٹری فورس کے ساتھ مل کر فضائی حملے کرسکتی ہے۔ایک اور مراسلے میں انکشاف کیا گیا کہ جنرل کیانی اور امریکی چیئرمین جوائنٹ چیفس آف سٹاف ایڈمرل مائیک ملن کے ساتھ تین اور چار مارچ ٢٠٠٨ء کی ہونے والی ایک ملاقات میں فاٹا کے اوپر امریکی طیاروں کی پروازوں کے لیے ایک تیسری ممنوعہ راہداری کی منظوری کے لیے پاکستانی فوج کے سربراہ سے مدد مانگی گئی۔ امریکی ایڈمرل کی درخواست سے پتہ چلتا ہے کہ دو راہداریوں کی پہلے ہی منظوری دی جا چکی تھی۔
١٩فروری٢٠٠٩ء کوپاکستانی فوج کے سربراہ کے دورئہ امریکہ سے ایک ہفتہ قبل کو امریکی سفیر این پیٹرسن نے واشنگٹن بھیجے جانے والے اپنے ایک سفارتی مراسلے میں ڈرون حملوں کا حوالہ دیتے ہوئے کہا تھا کہ (جنرل)کیانی اس بات سے مکمل طور پر آگاہ ہیں کہ وزیرستان میں کیے جانے والے یہ حملے ٹھیک نشانے پر غیر ملکیوں کو ہدف بنا رہے ہیں۔پاکستانی اخبار کے مطابق وکی لیکس کے ان تازہ انکشافات سے اس امر کی تصدیق ہوتی ہے کہ بظاہر ڈرون حملوں کی مخالفت اور مذمت کرنے والی پاکستانی فوج کی قیادت بھی سیاسی قیادت کی طرح درپردہ نہ صرف ان کی حمایت کرتی ہے بلکہ یہ کارروائیاں فوج کی منظوری سے کی جا رہی ہیں۔
افسوس اس بات کا ہے کہ ہمارے ادارے اب اپنے بارے میں لگنے والے اتنے بڑے بڑے الزامات کا نوٹس تک نہیں لیتے :
دھوئے گئے ہم ایسے کہ بس پاک ہو گئے