انتہا پسندی کے رنگ:

آج فرصت تھی تو ٹیلی ویژن کا ریموٹ ہاتھ میں پکڑ کر اپنے پسندیدہ مشغلے یعنی چینلز کو تبدیل کرنا شروع کر دیا۔ نہ جانے کس موڈ کے تحت پی ٹی وی کے چینل پر آ کر ہاتھ رک گیا جہاں کوئی مارننگ شو لگا ہوا تھا اور چار عورتیں بیٹھی ملکی حالات پر اپنے دکھ کا اظہار کر رہی تھیں اور مختلف باتوں پر قہقہے لگا رہی تھیں۔ میں نے سوچا کہ چلو عورتوں کے اس عجیب معاملے کو بھی سن کر دیکھتے ہیں۔ ©اسی اثنا میں اس مارننگ شو میں ایک ٹیلیفون کا ل آ گئی اسلام آباد سے اور کالر(بلال) نے تھوڑی سی تمہید کے بعد کہا کہ ایک عرض ہے وہ یہ کہ جب آپ کے مہمان آتے ہیں توآپ مرد مہمانوں سے بھی ہاتھ ملاتی ہیں ۔ ۔ ۔ تو براہ مہربانی اگر ہو سکے تو ایسا نہ کیا کریں کیونکہ نہ تو پاکستانی معاشرے میں ایسا چلن ہے اور نہ ہی اسلام اس کی اجازت دیتا ہے کہ کوئی عورت یا مرد اپنے نا محرم کے جسم کو بلا وجہ چھوئے۔ بیچارہ بار بار معذرت بھی کرتا رہا کہ اگر بات بُری لگی ہو تو معاف کر دینا لیکن سوچنا ضرور۔خیر سے فون کال بند کر دی گئی اور شو میں خاموشی چھا گئی۔ پھرایک مہمان خاتون تقریر جھاڑنا شروع ہو گئیں کہ میں ان باتوں سے اتفاق نہیں کرتی۔ شاید اس لیے کہ میری زندگی ہی باہر گزری ہے اور ویسے بھی اب کسی معاشرے میں ایسی سوچیں نہیں پائی جاتیں۔ ہم لوگوں کو اب ان دقیانوسی سوچوں سے اور خیالات سے جان چھڑوا لینی چاہیے۔ دنیا کہاں سے کہاں پہنچھ گئی ہے اور ہمارے خیالات ابھی تک وہی پرانے ہیں۔ دنیا کے ترقی یافتہ معاشروں میں ہاتھ ملانا تو کیا گلے بھی ملتے ہیں اور اس میں کوئی حرج نہیں۔ میں نہیں سمجھتی کہ عورت اگر کسی مرد سے ہاتھ ملا لے تو کوئی ایسا طوفان آ جاتا ہے ۔ ہاتھ ملانا چاہیے اعتماد بڑھتا ہے۔کب تک آپ سیکڑوں سال پرانی سوچوں اور خیالات میں پھنسے رہیں گے۔ اپنا ذہن وسیع کریں۔آگے بڑھیں اور دیکھیں دنیا میں کیا ہو رہا ہے۔ میں سمجھتی ہوں ہمارے مسائل کی وجہ ہی یہی دقیانوسی سوچ ہے۔

اس پر دوسرے عورت نے بھی کہا میں بھی اس بات کی تائید کرتی ہوں ہمارے معاشرے کو اب ایسی سوچوں سے آزادی حا ٓ صل کر لینی چاہیے۔پھر ایک اور کال آ گئی جس میں کسی اور مرد صاحب نے میزبان کے حسن کی بھی تعریف کی اور ساتھ ہی بیٹھی ایک اورخاتون کے حسن کی بھی تعریفیں کیں۔اس پر میزبان خاتون نے شرارتی لہجے میں کہا کیا بات ہے آج یہ تو سبھی کو اچھی لگ رہی ہیں ؛؛

میں ریموٹ کو ہاتھ میں پکڑے ششدر بیٹھا سوچتا رہا کہ آخر ہم کہاں جا رہے ہیں ۔ ہماری عقلیں کہاں گم ہو گئی ہیں ۔ کس آسانی سے ہم اسلامی شعار کا مذاق اڑا دیا کرتے ہیں ۔ میں یہ بھی سوچتا رہا کہ کہیں ہمارے آج کے حالات ہمارے ایسے ہی کرتوتوں کی سزا اور عذاب تو نہیں ۔پاکستانی طالبان کی جتنی بھی مذمت کر دیں وہ کم ہے۔ واقعی معاشرے میں انتہا پسندی کو پنپنے سے قبل ہی ختم کر دینا چاہیے۔ لیکن کیا انتہا پسند صرف وہی ہیں ۔ ۔ ۔ ؟ افواج کا کہنا درست ہے کہ پاکستانی طالبان اسلام کے دشمن ہیں مگر کیا محض وہی اسلام کے دشمن ہیں ؟کیا یہ لوگ جو ایک اسلامی مملکت کے چینل پر آ کر اسلامی شعار کا کھلم کھلا مذاق اڑا رہے ہیں یہ لوگ اسلام کے دشمن نہیں؟یہ بات تسلیم کہ طالبان مذہبی انتہا پسند ہیں ۔ ۔ ۔ مگر کیا یہ لوگ غیر مذہبی انتہا پسند نہیں؟ اگر مذہبی انتہا پسندوں کا قلع قمع کرنا ہے تو کیا ان کو کھلا چھوڑ دینا چاہیے؟ کیا ہم ایک برائی کا علاج دوسرے برائی سے نہیں کر رہے جو شاید اس برائی سے زیادہ خطرناک ہے؟

یہ انتہا پسندی نہیں تو کیا ہے کہ چند ہزار افراد اپنے غیر اسلامی اعتقادات/خیالات کی بنا پر کروڑوں لوگوں کے اعتقادات کو دقیانوسی کہہ دیں اور اس سے جان چھڑوانے کا مشورہ دے دیں۔ آج اگر کسی بیرونی معاشرے کی مثال دیتے ہوئے ہم سے کہا جا رہا ہے کہ ہاتھ ملانے میں کوئی حرج نہیں تو کل کو ہم سے کچھ اور بھی کہا جا سکتا ہے۔ یہ لوگ ہمارے معاشرے کو کس کھائی میں دھکیلنا چاہ رہے ہیں۔

مجھے حدیث کا درست ریفرنس یاد نہیں تاہم حدیث کا مفہوم ہے کہ اللہ کا غضب اس قوم پر جلدی نازل ہوتا ہے جو اللہ کے احکامات کا مذاق اڑانے میں جری ہوتی ہے۔ ہمارے اوپر طالبان کے نام کا جو عذاب نازل ہوا ہے بجائے اس کے کہ ہم اس سے سبق سیکھتے اور اللہ کی طرف رجوع کرتے ۔ ۔ ۔ ہم لوگوں نے الٹی راہ کیوں پکڑ لی ہے۔کیا ہم لوگوں نے مان لیا ہے کہ اس دنیا میں اللہ نام کی کوئی طاقت موجود نہیں ۔ کیا ہم نے تسلیم کر لیا ہے کہ ہم نے کسی روز آخرت میں اپنا حساب پیش نہیں کرنا۔اس معاشرے میں اسلامی شعار کا مذاق اڑانے والے اتنی جری کیوں ہوتے جا رہے ہیں ۔ اور ہم لوگ ان کے خلاف اتنے نامرد کیوں ہوتے جا رہے ہیں کہ آواز ہی بلند نہ کر سکیں۔

اگر یہ کہا جائے کہ ہمارے معاشرے میں مغربی معاشرت کی روایات باقاعدہ منصوبہ بندی کے تحت پھیلائی جا رہی ہیں تو اتنا غلط نہ ہوگا۔ ایک مرتبہ پیپلز پارٹی کی ایک وزیر کو کسی اسلامی قسم کے جلسے سے خطاب کرنا پڑ گیا۔ تو اخبارات میں انکا یہ بیان زینت بنا کہ نہ جانے کس طرح عورتیں دوپٹہ پہنتی ہیں ۔میرے لیے تو بہت مشکل ہے،۔مجھے یہ بھی یاد ہے کہ پیپلز پارٹی کے سابقہ دور میں بھی اسی طرح فحاشی و عریانی پر مشتمل پروگرام پی ٹی وی کی زینت بنا کرتے تھے۔ مجھے یہ بھی یاد ہے کہ مشرف کے روشن خیال اعتدال پسندی پر فریب نعرے کے پیچھے درحقیقت اعتدال پسندی نہیں بلکہ جدید انتہا پسندی کام کر رہی تھی۔ یہی وجہ تھی کہ اس کے دور میں قوم کو ناچ گانا، رنگ و نور کی محفلوں، فلموںمیں مصروف کرنے کی کوشش کی گئی۔ یہ کیسی اعتدال پسندی تھی کہ اسلام کا پروگرام تو کیا نام بھی سال میں ایک بار بھی نہیں لینا جبکہ قوم کو تقسیم کرنے والے اعمال روزانہ کرنے۔

اگر اس کو باقاعدہ منصوبہ بندی نہ کہا جائے تو اور کیا کہا جائے کہ اسی اسلامی مملکت میں طوائفوں کی جنکو سیکس ورکرز کا نام دے کر کوئی انڈسٹری ظاہر کرنے کی کوشش کی جاتی ہے ،ورکشاپس کروائی جاتی ہیں جس میں انکو محفوظ جنسی روابط کے طریقے سکھائے جاتے ہیں۔ حکومتی گماشتے ٹیلی ویژن چینلز کے سیاست پر مبنی پروگراموں پر تو تنقید کرتے ہیں اور انکو بند کرنے اور کروانے کی سعی کرتے ہیں مگر انہی چینلز پر نیم عریاں لباس میں ملبوس لڑکیوں کی نمائیش، عورتوں مردوں کے گلے ملنے ، ، واہیات کلمات کہنے ،غیر ملکی فحش پروگراموں کی نمائیش پر کوئی اعتراض نہیں کرتے۔

در حقیقت ہمارا معاشرہ دو قسم کی انتہا پسندوں کے درمیان پھنس گیا ہے۔ ایک طرف تو وہ شدت پسند ہیں جو لوگوں سے زبردستی داڑھیاں رکھواتے ہیں، نماز پڑھواتے ہیں،انکے پینٹ شرٹ پہننے پر اعتراض کرتے ہیں،عورتوں کے باہر نکلنے پر پابندیاں لگاتے ہیں ۔ ۔ ۔ دوسری طرف وہ شدت پسند بھی ہیں جو کھلم کھلا اسلامی شعار کا مذاق اڑاتے ہیں، عورتوں اور مردوں کی مخلوط محافل منعقد کرواتے ہیں، بوس و کنار کو عیاں کرتے ہیں۔ عورتوں کو شمع محفل بنا کر معاشرتی طوائف بنانے کی سعی کرتے ہیں۔

اسی معاشرے میں ہم جیسے منافق بھی پائے جاتے ہیںجوبرائی کو ہوتے دیکھ کر خاموش رہ جاتے ہیں ، جو ہوا کے رخ پرخس و خاشاک کی طرح بہہ جاتے ہیں ۔ ابھی اس گروہ میں ایمان کا آخری درجہ یعنی دل میں برائی کو برا جاننا کی رمق موجود ہے لیکن کفرو الحاد کی جو آندھیاں چل رہی ہیں خوف ہے کہ یہ رمق بھی جلد ہی بجھ جائے گی میرے اس دوست کی طرح کہ جو ایک مرتبہ مجھ سے بحث کر رہا تھا کہ مردوں اور عورتوں کاآپس میں ملنا جلنا، پڑھنا، گپ شپ کرنا، علحدہ بیٹھنا کوئی بُرا نہیں بلکہ اس سے یہ فائدہ حاصل ہوتا ہے وہ فائدہ حاصل ہوتا ہے۔

مجھے یہ کہنے میں کوئی باک نہیں کہ ہم جیسے منافق کہ جو معاشرے میں برائی ہوتے دیکھ کر بھی خاموش ہو جاتے ہیں وہ در حقیقت خیر و شر کے معرکے میں شر کی مدد کر رہے ہیں۔
میں یہ نہیں کہتا کہ جہاں برائی ہوتے دیکھو وہاں پر ڈنڈے لے کر، ہتھیار لے کر ٹوٹ پڑو۔میں یہ نہیں کہتا کہ جہاں برائی ہوتے دیکھو اس کے خلاف جنگ چھیڑ دو۔ میں تو یہ کہتا ہوں کہ جب برائی ہوتے دیکھو تو اس کے خلاف آواز بلند کرو۔ اس کے خلاف رائے عامہ ہموار کرو۔ اس کے خلاف بھاگ دوڑ کرو۔ اس کے خلاف احتجاجی خطوط لکھو، اس کے خلاف لوگوں سے اور متعلقہ لوگوں سے ملاقاتیں کرو۔ اور یہ ہر مسلمان کا کام ہے خواہ اس کا تعلق کسی دینی جماعت سے ہو یا لسانی جماعت سے، خواہ وہ ملازمت پیشہ ہو یا اپنا بزنس کرتا یا بیروزگار۔خواہ وہ مرد ہو یا خاتون۔یہ ہر کسی کی اپنی ذاتی ذمہ داری ہے۔ اگر ہم اسکو اپنا ذاتی مسئلہ سمجھیں گے تو اس کے لیے ویسے ہی بھاگ دوڑ کریں گے جیسے ہم اس وقت کرتے ہیں جب خود کسی مصیبت میں پھنس جاتے ہیں۔ یاد کیجیے کہ جب ہم میں سے کوئی کسی غلط کیس میں پھنس جاتا ہے تو کتنی بھاگ دوڑ کرتا ہے، کتنی میل ملاقاتیں کرتا ہے، دن رات اس مصیبت سے نکلنے کی کوشش کرتا ہے۔ جبکہ فتنے جو ہمارے سروں پر آ کھڑے ہوئے ہیں یہ ان دنیاوی مصیبتوں سے کہیں زیادہ ہولناک ہیں، یہ فتنے نہ صرف ہم کو نقصان پہنچائیں گے بلکہ ہمارے اہل وعیال بھی اس تباہی کی لپیٹ میں آ جائیں گے۔
حدیث مبارکہ ہے جسکا مفہوم ہے کہ اللہ تعالی تب تک کسی قوم کو اسکے گناہوں کی سزا نہیں دیتا جب تک اس کے خواص میں برپا گناہ اس کے عوام میں رائج نہ ہو جائیں۔