اگر عزم و حوصلے کو دیکھا جائے تو کسی پہاڑ سے بھی زیادہ مظبوط
کمزوری اور نا توانی کو دیکھا جائے تو کسی چیونٹی سے بھی زیادہ کمزور
سختی کو دیکھا جائے تو کسی چٹان سے بھی زیادہ سخت
نرمی کو دیکھا جائے تو روئی سے بھی زیادہ نرم

انسان کیا ہے؟

یہ وہ سوال ہے جو زندگی کے ہر نئے موڑ، ہر نئے راستے اور ہر نئے پہلو پر اُبھر کر میرے سامنے آ جاتا ہے۔

ایک معصوم بچہ جب اس دنیا میں آنکھ کھولتا ہے تو اُسے یہ دنیا بہت
حسین و جمیل معلوم ہوتی ہے۔ کیونکہ اُس کی آنکھوں کے سامنے اُس کی ماں کا چہرہ ہو تا ہے۔ اُسے اپنی ماں کے چہرے پر دنیا کے سارے رنگ بکھرے ہوئے نظر آتے ہیں۔ جوں جوں آگے بڑھتا ہے اور ماں کے چہرے سے نظر ہٹاتا ہے تو دکھوں اورغموں سے اُس کا پالا پڑتا ہے توزندگی کے معنوں پر غور خوض شروع کر دیتا ہے۔ جب وہ اپنی ماں سے کچھ دیر کےلئے دور جاتا ہے تو اُسے یہ احساس ہوتا کہ ماں کے بغیر زندگی کے کیا معنی ہیں۔ جب سکول جانے لگتا ہے تو واپس گھر آکر سب سے پہلے اپنی نظر ماں کے چہرے پر ڈالتا ہے تو یہ سمجھتا ہے کہ دنیا کی ساری خوشیاں اور سارے خوبصورت رنگ میری ماں کے چہرے پر ہی ہیں۔

انسان کیا ہے؟

جب کبھی بجلی جاتی ہے تو اپنے گھر کی کھڑکی کھول کر سامنے والی سڑک پر نظر دوڑاتا ہوں تو بہت سے چہروں پر خوف، پریشانی، دکھ، درد و کرب کے آثار نمایاں نظر آتے ہیں۔ کوئی بھاگ رہا ہے تو کوئی تیز تیز قدموں سے چل رہا ہے۔ کوئی پسینے میں شرابور ہے تو کوئی ماتھے سے بہتا ہوا پسینہ پونچھ رہا ہے۔ کوئی منچلا نوجوان سیلنسر نکال کر سڑک پرموٹر بائیک کو سر پٹ دوڑا رہا ہے جیسے اُس کا تعلق فائیر بریگیڈ والوں کے عملہ سے ہے لیکن اُسے یہ احساس ہی نہیں ہوتاکہ موٹر بائیک سے نکلنے والی انتہائی اونچی اور خوفناک آواز سے کتنے دکھی دلوں پر ایک قیامت ٹوٹ پڑتی ہے۔ پُر سکون ماحول میں اچانک اتنے اونچے شور سے خلل ڈالنا کہاں کی تہذیب و شائستگی ہے۔

انسان کیا ہے؟

کبھی یہ انسان آسمانوں کے سینے چیرتا ہوا سیاروں کو تسخیر کرتا ہوا نظر آتا ہے تو کہیں سمندروں کی لا محدود گہرائیوں میں پہنچنے کی تگ و دو میں مصروف نظر آتا ہے۔ کبھی یہ نمرود کی شکل میں خدائی دعوے کرتا نظرآتا ہے تو کبھی یہ انسان ناگا ساکی اور جاوا سماٹرا پر ایٹم بم پھینک کر لاکھوں انسانوں کوآن واحد میں جلا کر راکھ کا ڈھیر بنا دیتا ہے۔ طاقت کے نشے میں چور ہو جائے تو افغانسان اور ایراق پر چڑھائی کر کے بیگناہ انسانوں پر بم برسا کر دل کو تسکین پہنچانے کا سامان فراہم کرتا ہے۔ کبھی یہ انسان پیٹ کے ساتھ بم باندھ کر اپنے ساتھ بیسیوں بیگناہوں کے جسموں کے پرخچے اُڑا دیتا ہے۔

انسان کیا ہے؟

کیا وہ بھی انسان تھے؟ کیا اُن کے سینوں میں دھڑکنے والا دل بھی گوشت کا لوتھڑاہی تھا جنہوں نے آئیندہ آنے والی نسلوں کی خاطر اپنے کلیجے تک دشمنوں کو پیش کر دیے۔ وہ کتنےعّطیم لوگ تھے جو اُس وقت شاید اتنے نہ تڑپے ہوں گےجب ہندئووں اور سکھوں کے ایک ایک لفظ نے اُن کی روح کو پاش پاش کیا ہو گا یا دشمن کی تیز دھار تلواروں نے اُن کے جسم کے ٹکڑے ٹکڑے کئے ہوں گے جتنا آج اس دھرتی پر جا بجا بکھرے ہوئے انسانی اعضاء اور خون کو دیکھ کراُن کی روحیں تڑپتی ہوں گی۔
جب انسان کو دکھوں سے پالا پڑتا ہے تو ہر دکھ اُسے زندگی کا نیا رُخ سمجھاتا ہے۔ انسان کا اپنا دل جب دکھی ہوتا ہے تو اُس کی آنکھیں پھٹ جاتی ہیں۔ ان آنکھوں میں اُسے ساری خلق خدا کے دکھ دکھائی دینے لگتے ہیں-اُسے کسی کی آنکھ سے گرنے والے آنسو کا مطلب بھی سمجھ میں آنے لگتا ہے۔ ہر آہ کے پیچھے چُھپی فریاد کا مطلب بھی اُس کی سمجھ میں آجا تا ہے۔ شاید یہی کیفیت میرے ساتھ بھی ہے۔ جب کسی شخص کو دیوار کے ساتھ لگا دیکھتا ہوں تو سمجھ جاتا ہوں کہ اس پر ظلم کے کون کونسے پہاڑ ٹوٹے ہوں گے۔ کسی بچے کو روتا دیکھتا ہوں تو سمجھ جاتا ہوں کہ اس نے کچھ نہیں کھایا۔ سفید داڑھی والے کسی بزرگ کی آنکھ سے گرنے والے آنسو سے سمجھ جاتا ہوں کہ مغرب کی اندھا دھند تقلید میں اس کی عزت گھر کی دہلیز پار کر چکی ہے۔ کسی بوڑھی ماں کی آنکھوں میں خشک آنسو دیکھ کر سمجھ جاتا ہوں کہ اس کی بیٹی کے بالوں میں سفیدی آچکی ہے۔ کسی نوجوان عورت کو بچوں کی انگلی پکڑ کر سڑکوں کے کنارے بھیک مانگتے دیکھ کر سمجھ جاتا ہوں کہ کسی بم دھماکے میں اس کا سہاگ اُجڑ چکا ہے۔ کسی پریشان حال شخص کو عدالت کی دیوار کے ساتھ بیٹھے ہوئے دیکھ کر سمجھ جاتا ہوں کہ لاکھوں قربانیوں کے نتیجے میں ‌حاصل ہونے والے وطن عزیز میں غریب کےلئے انصاف کا حصول کتنا کٹھن اور صبر آزما مرحلہ ہے۔
انسان کیا ہے؟
وہ باپ، وہ ماں، وہ بیوی، وہ بہن اور وہ بیٹی بھی انسان ہی ہیں جو اپنے بیٹے۔ شوہر، بھائی اور بہن کے گھر سے نکلنے کے بعد سارا دن اُس کے لئے زندہ سلامت واپسی کی دعائیں مانگتی رہتی ہیں۔ وہ بچی بھی انسان ہی ہے جس کے پاپا نے واپسی پر اُس کے لئے چوڑیاں لانے کا وعدہ کیا تھا۔ اس نے سارا دن چوڑیوں کے انتظار میں گزار دیا لیکن شام کو اُسے چوڑیوں کی بجائے پاپا کی لاش کے ٹکڑے ملے۔ زمین پر انسانی زندگی کا کاروبار رواں دوں ہے۔۔۔۔۔ کوئی کسی کو دکھ پہنچا رہا ہے تو کوئی سکھ،

میں، آپ اور ہم سب ان دکھ کے ماروں کو کچھ نہیں دے سکتے لیکن۔۔۔۔۔۔۔۔ ایک چیز ہمارے پاس ہے جو ہم ان سب غمزدوں کو مفت دے سکتے ہیں اور وہ ہے فقط ایک مسکراہٹ۔۔۔۔۔۔۔۔۔۔۔۔۔ جی ہاں۔۔۔۔۔۔۔۔۔۔۔۔ ہم اپنی مسکراہٹ اُنہیں عطیہ میں دے سکتے ہیں۔ کہتے ہیں ہنسی غم کا علاج ہے۔ ہو سکتا ہے ہماری ایک مسکراہٹ سے وہ ایک نئے حوصلے، جوش اور ولولے کے ساتھ سارے غم بھول کر زندگی کی رنگینیوں میں شامل جائیں۔