(سائرہ غفار)
بھی آپ نے بس کا سفر کیا ہے؟ نہیں کیا تو آپ کر کے دیکھئے۔ اب ایک بار سہی کر کے ضرور دیکھئے گا۔ آپ کو پتہ چل جائے گا کہ ہم اسے عرفِ عام میں خواریوں کا سفر کیوں کہتے ہیں۔ عموماً بس میں سوار ہونے کے لئے اسٹاپ نام کی چیزیں بنائی گئیں ہیں، وہ بھی جگہ جگہ مگر غلط جگہ۔ کیونکہ عموماً مسافر حضرات اُن اسٹاپس سے تھوڑا آگے یا تھوڑا پیچھے ہی کھڑے بلکہ جمگھٹا لگائے بس کا انتظار کرتے ہیں۔ اب بس اسٹاپس کی جگہ کا تعین کرنے والے حضرات آئندہ یہ بات خصوصی طور پر نوٹ فرمالیں کہ وہ جہاں اسٹاپ ایستادہ کرنے کی سازش کرنے والے ہیں، وہاں سے مسافروں نے ضرور آگے کا پیچھے کھڑا ہونا ہے تو مہربانی فرما کر اپنا اسٹاپ درست جگہ پر نصب کریں۔

اپنی مطلوبہ بس کا انتظار کرنے کے لئے اور اُسے روکنے کے لئے آپ کو ٹریفک سے ڈرنا ختم کرنا ہو گا کیونکہ اگر آپ ہیوی ٹریفک سے ڈریں گے تو اپنی اکلوتی مطلوبہ بس جو ایک گھنٹے کے انتظار کے بعد آپ کو اپنا دیدار نصیب کروائے گی تو آپ اُس کو بیچ سڑک پر جا کر کیسے روکیں گے۔ اگر آپ یہ سمجھتے ہیں کہ بس اسٹاپ پر آکر رُکے گی تو یہ آپ کی غلط فہمی بلکہ خام خیالی ہے، کیونکہ بس کے سر پر سینگ نہیں نکلے ہوتے جو وہ آپ کہ احمقانہ اور بیوقوفانہ خواہش کو عملی جامہ پہنانے کے لئے اپنے اُصول توڑ دے۔

اکثر جگہوں پر تو بسیں رُکنے کی غلطی کرنا بھی ضروری نہیں سمجھتیں، کیونکہ ان کے خیال میں پیسہ کمانے سے زیادہ اہم ہے ریس۔ جی ریس۔ بسوں کے ڈرائیور حضرات بسوں کو ہوائی جہاز کی سے اسپیڈ سے اُڑاتے چلے جاتے ہیں۔ اکثر ایکسیڈنٹس کا باعث بنتے ہیں مگر اس پر بھی مجال ہے جو ان ڈرائیور حضرات کے ماتھے پر ایک بھی بَل آئے۔فوراً مُٹھی گرم کئے چلتے بنتے ہیں۔ اونچی آواز میں ٹیپ چلانا وہ بھی بیہودہ قسم کے گانے اُف توبہ۔اوپر سے لیڈیز کمپارٹمنٹ میں مردوں کا بیٹھنا لازمی سہے، چاہے جینٹس کمپارٹمنٹ خالی پڑا ہو،مگر وہ سیٹس شاید مرد حضرات کو آرام دہ نہیں لگتیں۔

بسوں کا ذکر ہو اور کنڈکٹر کا نہ ہو، ایسا کیسے ہو سکتا ہے۔ کنڈکٹر تو بس میں وہ واحد ہستی ہوتا ہے جو ڈرائیور سے شرطیں لگاتا پھرتا ہے، فلاں پسنجر سے ۲ بار کرایہ نکلوا کے دکھاﺅں تو؟ فلاں پسنجر سے ۳ بار کرایہ نکلوا کے دکھاﺅں تو؟ یقین نہ آئے تو بس کا سفر کر کے دیکھ لیں۔ ایک بار کرایہ لینے کے بعد دوبارہ کنڈکٹر اپنا دیدار کرواکے ڈھٹائی بلکہ غصے سے کہتا ہے،”باجی اب کرایہ دے بھی دو“۔ اور واقعی اُس کی شکل دیکھ کر ایسا ہی لگتا ہے کہ شاید ہم نے کرایہ نہ دیا ہو۔ کمزور دل حضرات تو ہر بار اُس کی فرمائش پر کرایہ شاید دے بھی دیتے ہوں۔

کنڈکٹر کو بس میں جگہ بنانے میں کمال حاصل ہوتا ہے۔ چاہے بس دروازے تک پوری بھری پڑی ہو،جب وہ اپنے آنے جانے کا راستہ بنا سکتا ہے تو پسنجر کے لئے جگی بناناتو اس کے بائیں ہاتھ کا کمال ہے۔ اسی لئے تو ہے یہ خواریوں کا سفر، کیونکہ اس قدر بھیڑ چال میں پتہ ہی نہیں چلتا کہ کیا ہو رہا ہے۔ جب اُترتے ہیں تو چیک کرتے ہیں،”ہائے میری ٹانگیں تو ٹھیک جگہ پر ہیں ناںاور میرے ہاتھ؟ شکر ہے کہ
ناک بھی اپنی جگہ پر ہے“،پھر تھوڑی دیر بعد یاد آتا ہے،”ہائے میرا پرس....؟؟؟ستیاناس ہو چوروں کا لُٹیروں کا....ہائے میرا پرس“۔بسوں کی بھیڑ چال سے عموماًہاتھ کی صفائی دکھانے والے آرام سے فائدہ اُٹھاتے ہیں۔ بسیں ان کو دعوتِ عام دیتی ہیں،آﺅ آﺅ سوہنیو ....!سنہری موقع سے فائدہ اُٹھاﺅ۔

ایک وقت آئے گا جب لوگ ایک دوسرے کو بد دُعا دیتے ہوئے کہیں گے،”اللہ کرے کہ تُجھے تین گھنٹے کے انتظار کر بعد تیری مطلوبہ بس ملے،اور ملے بھی تو ایسی کہ تِل دھرنے کو جگہ نہ ہواور تجھے ارجنٹ کہیں جانا ہو۔ اللہ کرے بس میں تو چڑھے تو ڈرائیور خر دماغ ہو،ہوائی جہاز کی اسپیڈ سے چلائے۔ اللہ کرے کہ بس ایسی شاندار ہو کہ اُس میں پکڑنے کو ڈنڈا بھی نہ ہو اور تو اِدھر اُدھر گیند کی طرح لُڑھکتا رہے“۔
ابھی بھی یقین نہیں تو ایک بار بس کا نہ نہ خواریوں کا سفر کر کے دیکھ لیجئے۔
ربط: کراچی اپڈیٹس ڈاٹ کام

__________________
اس دور میں تعلیم ہے امراضِ ملت کی دوا
ہے خونِ فاسد کے لیے تعلیم مثل نیشتر