پاکنیٹ کے تحریکی افراد کے لیے بطور خاص: بل گیٹس کا کہنا ہے کہ "آئیڈیا اور عمل کا درمیانی وقفہ زیادہ نہیں ہونا چاہیے ۔ورنہ وقت آئیڈیاز کو روند کر چلا جاتا ہے" اس مضمون سے یہ بھی معلوم ہوتا ہے کہ ابھی تک بُرائی نیکی کی قوتوں سے خوفزدہ ہے۔ اگر نیکی کی قوتیں کمر باندھ لیں تو بُرائی کی قوتیں خس و خاشاک کی طرح بہہ جاتی ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔


سیلانی ہاتھ منہ دھو کر تولیہ کاندھوں پر ڈالے کمرے میں داخل ہوا تو بیگم صاحبہ کو کمر ہاتھ پر رکھے، ابرو چڑھائے خاص انداز میں اپنی طرف گھورتے پایا۔ بیگم صاحبہ کا انداز خاصا جارحانہ تھا۔ سیلانی کُچھ نہ سمجھا اور یاد کرنے لگا کہ ہوم منسٹر کی کونسی ہدایت پر عمل نہیں ہو سکا۔ بلبلانے پر مجبور کر دینے والے بلوں کی ادائیگی سے لے کر سودا سلف تک وہ لا چُکا تھا، پھر باقی کیا رہ گیا؟ باوجود کوشش کے اُسے کُچھ یاد نہ آ سکا۔ تو خوش آمدانہ انداز میں مُسکراتے ہوئے بولا " خیریت تو ہے ناں؟"
بیگم صاحبہ نے کوئی جواب نہ دیا اور بس خاموشی سے کھڑی دیکھتی رہی۔
"بھئی ایسے کیا دیکھ رہی ہو کوئی مسئلہ وسئلہ ہے کیا؟" بیگم کی جارحانہ انداز کی تاب نہ لاتے ہوئے سیلانی نے عاجزانہ انداز اختیار کرتے ہوئے کہا
"مجھے نہیں معلوم تھا کہ آپ اب یہ حرکتیں بھی کرنے لگے ہیں"بیگم کے لہجے میں بلا کی کاٹ تھی
"کیسی حرکتیں۔۔۔۔؟" سیلانی کو اپنی تمام پوشیدہ حرکات یاد آ گئیں۔ لیکن پتا تو چلتا کہ بیگم صاحبہ نے ایسی کونسی چوری پکڑ لی ہے۔
"اب آپ نے آگ لگانا بھی شروع کر دی ہے؟" بیگم نے بدستور گھورتے ہوئے پوچھا
"اوہ لگتا ہے جیب سے سیگریٹ یا ماچس بر آمد ہو گئی ہے۔۔۔" سیلانی نے سوچا اور فوراً ہی ایوان صدر کے ترجمان کی طرح تردید کر دی "بھئی وہ میری نہیں ہے"
"کیا میری نہیں ہے"
"جو تم کہہ رہی ہو"
"میں کیا کہہ رہی ہوں"
"ہاتھی کا سر۔۔۔۔مجھے کیا پتا۔۔۔"سیلانی جز بز ہو گیا۔
"پھر کیسے کہہ دیا کہ میری نہیں ہے۔۔۔" بیگم آج بال کی کھال اُتارنے کے جارحانہ موڈ میں تھی۔
"بھئی میں تھکا ہوا ہوں۔ تفتیش نہیں ہو رہی۔ او کے !"
"ہاں ہاں آرام کیوں نہیں کریں گے۔ سینڈز پٹ پر آگ جو لگانی ہے"
"کیا اول فول بک رہی ہو؛'
"یہ دعوت نامہ آپ ہی کے نام آیا ہے ناں۔ پڑھ لیجیے ایس اایم ایس" بیگم نے سیلانی کا سیل فون اچھال دیا" ارے ارے۔ ۔ ۔۔ ۔ " سیلانی نے فضا میں چھلانگ لگائی اور سیل فون کو کیچ کرتے ہوئے دھڑام سے زمین پر آ گرا۔
"ہائے ہائے۔۔۔۔۔" سیلانی کراہا اور کندھا سہلاتے ہوئے بولا " پاگل ہو گئی ہو۔ اٹھائیس ہزار روپے کا فون ہے۔ ابھی ہو جاتا کام"
"ہو ہی جاتا تو اچھا تھا" بیگم بڑبڑاتے ہوئے پیر پٹخ کر کمرے سے باہر نکل گئیں۔ اور سیلانی وہ مشکوک ایس ایم ایس پرھنے لگا جس کی وجہ سے اُسے پکے فرش پر چھلانگ لگانی پڑی تھی۔ ایس ایم ایس اجنبی نمبر سے آیا تھا اور لکھا تھا :
"BURN THE BEACH
Dance Partuy bringing DJ Sabby
(Student Couples Only)
RSVP-0305-2176404
0334-3973893, 0322-2015272"

اوہ تو یہ تھی حرکت جس پر بیگم صاحبہ چراغ پا تھیں۔ اس نے ان باکس چیک کیا ، وہاں ڈانس پارٹی کے اور بھی ایس ایم ایس آئے ہوئے تھے، لیکن ان میں ڈانس پارٹی میں ٹھمکنے کے بجائے ، ان نمبروں پر مذمتی ایس ایم ایس کرنے کی درخواست کی گئی تھی۔ یہ ایس ائم ایس پڑھ کر سیلانی کو کراچی یونیورسٹی کے ایک نوجوان کی کال بھی یاد آ گئی، اُس طالب علم نے سیلانی کو بتایا تھا کہ سی بی ایم، اقرآ یونیورسٹی، اور ایسی ہی ایک دو مما پپا والے نجی تعلیمی اداروں کے طالب علم سینڈز پت پر دانس پارٹی کر رہے ہیں۔ دیفنس فیز 5 میں ہاٹ سپاٹ پر پارٹی کے ٹکٹ فروخت ہوں گے۔ ایک جوڑا دو ہزار روپے میں "تھرک" سکتا ہے۔
سیلانی نے ایس ایم ایس پڑھ کر بیگم کو آواز دی اور ساری بات سمجھانے کے بعد وہ ایس ایم ایس پڑھ کر بھی سُنا دیا جس میں دانس پارٹی کی مذمت کے لیے کہا گیا تھا "یہ شرکت کی نہیں۔۔۔مزمت کی دعوت تھی۔ ۔ ۔۔ " سیلانی کی ٹھنڈی سانس بھری "ہماری قسمت میں ایسی دعوتیں کہاں، ہمیں یا تو مولوی دعوت دیتے ہیں یا مولوی نما حضرات۔ اور وہاں بھی اکثر دعوت غور و فکر کی ہی ہوتی ہے۔۔۔۔۔ ویسے اگر میں پارٹی میں چلا جاؤں تو سبھی کو حیران کر دوں۔ آپ کے اشاروں پر ناچنے کی ایسی پریکٹس ہو چُکی ہے کہ بس۔۔۔۔"
"بس بس اب زیادہ نہیں۔ ۔ ۔۔ " بیگم صاحبہ کا موڈ اب بہتر ہو چُکا تھا۔ وہ کھانا لے آئیں۔ سیلانی نے جلدی جلدی کھانا کھایا اور اپنا سیل فون لے کر چھت پر چلا گیا۔جب اُسے ضروری فون کرنا ہوتے ہیں وہ چھت پر ہی آ جاتا ہے۔
اس نے دانس پارٹی کے آرگنائزروں میں سے ایک کو فون کیا
"ہیلو"
"دوست پارٹی کہاں ہو رہی ہے۔ جگہ تو بتا دیتے۔ اتنا بڑا ساحل ہے، میں کیمرا مین کے ساتھ کہاں ڈھونڈتا پھروں گا"
"کیسی کوریج، کیسا کیمرا ۔ آپ کہاں سے بات کر رہے ہیں؟"
سیلانی نے ایک ٹی وی چینل کا نام بتایا اور کہا کہ اُسے اس دانس پارٹی کی کوریج کا انویٹیشن ملا ہے۔ اور وہ ضرور آئے گا۔
"دوست- اس شہر میں ایسے جاندار پروگرام ہوتے ہی کہاں ہیں۔ میں کتنا ہی بزی ہوا، آؤں گا ضرور"
"سر ، سر ! مگر کوریج کے لیے کس نے کہا۔ کوریج کی اجازت نہیں ہے" دوسری طرف سے جواب ملا۔
"اتنا زبردست پروگرام کروا رہے ہو اور کوریج نہیں کروا رہے، یار کیا کر رہے ہو، ایسے پروگرام ہوتے ہی کہاں ہیں" سیلانی نے اصرار کیا
"نہیں سر میڈیا انوائیٹڈ نہیں ہے۔آپ سمجھتے ہیں ناں ، ایشو بن جائے گا"
"او کے اوکے، مگر یار ایک پاس تو مل جائے گا ناں؟"
"سوری سر تمام ٹکٹس سیل ہو چُکے ہیں۔ آپ پہلے کہاں تھے۔ اب تو بالکل گنجائش نہیں ہپے۔ نیکسٹ ٹائم اپ کو ضرور بلائیں گے۔ ویسے ایک بات تو بتائیں آپکو ہمارا نمبر کہاں سے ملا۔ کسی دوست نے دیا یا ہمارے خلاف مولویوں کا ایس ایم ایس ملا ہے؟"
"نہیں یار مجھے تو کراچی یونیورسٹی کے ندیم نے بتایا ہے"
"ندیم ، کون ندیم۔۔۔خیر کوئی ہو گا۔ آپ مائینڈ نہ کیجیے گا۔ او کے بائے"
سیلانی کو کنفرم ہو گیا کہ ساحل سمندر پر طوفان بد تمیزی برپا ہونے کو ہے۔اس دانس پارٹی میں کیا کیا ہو گا، اسکا اندازہ لگانے کے لیے کسی مراقبے کی ضرورت نہ تھی۔ وہ سوچنے لگا کہ کیا کیا جائے۔ اس نے میڈیا کی انٹری ڈال کر انہیں پریشان تو کر ہی دیا تھا۔اس نے مزید پریشان کرنے کے لیے چند بنیاد پرست صحافیوں کو بھی ایس ایم کر دیا کہ ان نمبروں پر کال ملا کر پوچھیں کہ کوریج کے لیے کہاں پہنچنا ہے۔
انہیں آرگنائزروں کے پیچھے لگا کر سیلانی نے اسلامی جمعیت طلبہ، جماعت اسلامی، اور جمعیت علمائے اسلام کے ساتھیوں کو بھی "Burn the Beach"کی اطلاع دے دی کہ اگ بجھانے کا انتطام تو ہونا چاہئیے۔تھوڑی ہی دیر بعد اسلامی جمعیت طلبہ اور جمعیت علمائے اسلام کے ساتھی متحرک ہو گئے۔ اطلاع جے یو ائی کے کراچی کے امیر قاری عثمان تک پہنچی تو انکا فون آ گیا۔ وہ معاملہ جاننا چاہ رہے تھے۔
سیلانی نے ساری بات بتائی تو انہوں نے ٹاؤن پولیس آفیسر کیماڑی اور کلفٹن بات کی اور کہا کہ ایسا واہیات پروگرام ہوا تو انتظامیہ کے لیے پریشانیہ ہو سکتی ہے۔ ٹی پی او کیماڑی نے ایس ایچ او ماری پور نصر اللہ کی ڈئیوٹی لگا فی کہ وہ دیکھے یہ اشو کیا ہے، کوئی مصیبت نہ ہو جائے۔
ایس ایم ایس سروس کا رزلٹ تھوڑی ہی دیر میں بر آمد ہو گیا۔پتہ چلا اب ساحل پر آگ نہیں لگے گی۔ دانس پارٹی کے آرگنائزرز نے کان پکڑ لیے ہین۔ سیلانی نے قاری عثمان کا شکریہ ادا کیا اور ان نامعلوم دوستوں کو دعا دیتے ہوئے سو گیا جنہوں نے ان ٹھمکوں کے خلاف ایس ایم ایس موومنت چلائی تھی۔ پتا نہیں وہ کون ہیں اور کن نیک ماں باپ کی اولاد ہیں۔
سیلانی کو ان سوالوں کے جواب القران نیٹ ورک کورسز کے الطاف موتی والا نے دیا۔۔ انہوں نے فون کر کے بتایا کہ یہ ایس ایم ایس تحریک القرآن نیٹ ورک سے وابستہ ساڑھے چھہ ہزار ساتھیوں نے چلائی تھی۔ مزمتی پیغام بھیج بھیج کر انکی ناک میں دم کر دیا تھا۔ الطاف بھائی نے بتایا کہ انہوں نے ایک طلاب علم سے فون کروا کر آرگنائزرز سے معلوم کروایا تھا کہ اب پارٹی ہو گی کہ نہیں۔ تو وہ کہہ رہے تھے کہ نہیں مولوی پیچھے پڑ گئے ہیں اس لیے ڈانس پارٹی نہیں ہو گی۔ کوئی مسلہ نہ ہو جائے۔

"الطاف بھائی اس کرپشن اور ماڈرنائزیشن کے حمام میں الفاظ بے اثر ہوتے جا رہے ہیں۔ لیکن اس ایس ایم ایس سروس نے تو کمال کر دکھایا۔۔۔" سیلانی نے الطاف بھائی کا شکریہ ادا کیا ۔ دعائیں دینے اور لینے کے بعد اللہ حافط کیا اور سوچنے لگا کہ جب ایک شہر کے ساڑھے چھہ ہزار سیل فون رکھنے والے بیٹھے بٹھائے ایک کھلی بُرائی کے آگے بند باندھ سکتے ہیں تو ملک بھر کے پانچ کروڑ سے زاید موبائل فون رکھنے والے کیا کُچھ نہیں کر سکتے؟
وہ یہ سوچتا ہوا میز پر پڑے موبائل فون کو مسکراتا ہوا دیکھنے لگا اور دیکھتا رہا، دیکھتا رہا اور دیکھتا چلا گیا