رات 12بجے کا وقت تھا۔ نیویارک میں بیس سال سے مقیم پاکستانی نژاد 47 سالہ محمد سہیل اپنا اسٹور بند کرنے کی تیاری کررہا تھا کہ اچانک ایک نقاب پوش امریکی ہاتھ میں بیس بال کا بلا پکڑے اسٹور میں داخل ہوا اور سہیل کو چیختے ہوئے کہا کہ تمہارے پاس جتنی بھی رقم ہے اسے میرے حوالے کردو ورنہ میں تمہیں مار ڈالوں گا۔ سہیل نے یہ دیکھتے ہی کاؤنٹر کے نیچے رکھی اپنا پستول نکالی ۔ سہیل کے ہاتھوں میں پستول دیکھ کر ڈکیت کو اپنی موت نظر آئی اور اس نے بلے کو فوراً پھینکتے ہوئے سہیل سے اپنی جان بخشی کی بھیک مانگی اور روتے ہوئے کہا کہ وہ بیروزگار ہے اور اس کے بچے پچھلے کئی دنوں سے بھوکے ہیں اور اس مجبوری کے تحت وہ ڈکیتی کرنے پر مجبور ہوا ۔ سہیل کا دل اس کے آنسو دیکھ کر پسیج گیا اور اس نے ڈکیت سے کہا کہ اگر وہ آئندہ ڈکیتی نہ کرنے کا وعدہ کرے تو وہ اسے معاف کرسکتا ہے ۔وعدے کے بعد سہیل نے اس کو کھانا کھلایا اور اپنی جیب سے چالیس ڈالر دیئے کہ وہ اپنے بچوں کے لئے کھانا لے جائے۔ امریکی ڈکیت کے لئے سہیل کا یہ رویہ حیران کن تھا ڈکیت نے سہیل سے کہا کہ اگر آپ چاہتے تو اپنی دکان میں ڈکیتی کی اس کوشش پر مجھے ہلاک یا پولیس کے حوالے کرسکتے تھے۔ آپ نے نہ صرف مجھے معاف کیا بلکہ میرے بھوکے بچوں پر ترس کھا کر ان کے کھانے کے لئے رقم بھی دی ۔ سہیل نے اس امریکی سے کہا کہ اس کا مذہب اسلام رحم دلی کی تعلیم دیتا ہے۔ امریکی سہیل کی عفوو درگذر سے اتنا متاثر ہوا کہ اس نے سہیل سے اس خواہش کا اظہار کیا کہ وہ بھی اسلام قبول کرنا چاہتا ہے ۔ سہیل نے اس سے کہا کہ اگر تم کسی دباؤ یا خوف کے بغیر دل سے مسلمان ہونا چاہتے ہو تو میں تمہیں کلمہ شہادت پڑھاتا ہوں اور اس طرح امریکی نے اپنے ہاتھ اُٹھا کر کہا کہ اللہ کے سوا کوئی معبود نہیں اور حضرت محمدﷺ اس کے رسول ہیں۔ سہیل نے اسے قبول اسلام کی سعادت حاصل کرنے پر گلے لگا کر مبارکباد دی اور اسے کہا کہ تم آج سے میرے مسلمان بھائی ہو اور تمہارا اسلامی نام نوازشریف زرداری ہے۔ سہیل نے یہ نام اس لئے تجویز کیا کہ اس واقعے سے قبل وہ ایک پاکستانی ٹی وی چینل پر خبریں دیکھ رہا تھا جس میں زرداری اور نوازشریف کا نام لیا جارہا تھا اور جلدی میں یہی نام اس کے ذہن میں آیا ۔
اس واقعے کی خبر نیویارک میں مقیم مسلمانوں اور امریکی میڈیا کو ہو گئی کہ کس طرح ایک پاکستانی نے رحم دلی کی ایک نادر مثال قائم کی۔ ایک دن پہلے اُوباما کی کی گئی اس تاریخی تقریر جس میں انہوں نے مسلمانوں کی طرف دوستی کا ہاتھ بڑھایا تھا نے امریکی میڈیا کو اپنا رویہ تبدیل کرنے پر مائل کیا اور اس کے نتیجے میں امریکی میڈیا جو ہمیشہ مسلمانوں کے خلاف منفی پروپیگنڈہ کرتا رہا ہے نے بھی اس خبر کی بھرپور تشہیر کی اور بین الاقوامی اداروں نے محمد سہیل کو انٹرویو کے لئے بلایا اور اس واقعے کی تفصیلات نشر کیں اور امریکیوں کو یہ باور کروایا کہ مسلمانوں سے خطاب کے بعد امریکیوں اور مسلمانوں کے رویّے میں مثبت تبدیلی آئی ہے۔ محمد سہیل کے کردار کو امریکہ سمیت پوری اسلامی دنیا نے سراہا اور محمد سہیل راتوں رات ایک ہیرو کے طور پر اُبھرا ۔
سہیل کا انٹرویو جب میں نے بین الاقوامی ٹی وی چینلز پر دیکھا تو مغربی میڈیا کی یہ تبدیلی میرے لئے حیرانی کا باعث بنی۔ کل تک امریکی میڈیا جو اسلام اور مسلمانوں کوغلط روپ میں پیش کرتا آیا تھا۔ شاید امریکی میڈیا نے بھی امریکی حکومت کی طرح اپنی غلطیوں پر نادم ہوکر اپنے رویّے میں تبدیلی لائی ہے۔9/11کے بعد امریکی میڈیا کے مسلمانوں بالخصوص پاکستانیوں کے بارے میں غلط پروپیگنڈے کا ایک لطیفہ جو امریکہ میں مقیم پاکستانیوں میں مشہور ہوا جو ازراہ مذاق مجھے میرے ایک کرم فرما نے ای میل کیا کہ نیویارک میں سڑک پر چلتے ہوئے ایک امریکی عورت پر ایک کتا حملہ آور ہوا، عورت زمین پر گر گئی ۔لگتا تھا کہ کتا عورت کی جان لے لے گا ۔ موقع پر موجود مجمع میں کسی کی ہمت نہ ہوئی کہ وہ اس خونخوار کتے سے اس عورت کی جان بچاتا ۔ مجمع میں موجود ایک پاکستانی نے عورت کی جان بچانے کیلئے آگے بڑھ کر کتے کی گردن کو اپنے بازوں میں دبوچ لیا ۔ اس طرح اس پاکستانی نے امریکی عورت کی جان بچا لی مگر کتا دم گھٹنے سے مر گیا۔ دوسرے دن امریکی اخبارات نے اس خبر کو شہ سرخیوں کے ساتھ شائع کیا کہ ایک بہادر امریکی ہیرو نے اپنی جان خطرے میں ڈال کر ایک امریکی خاتون کی خونخوار کتے سے جان بچا لی۔ حکومت کو اس امریکی کو انعام سے نوازنا چاہئے ۔پاکستانی نے اگلے روز اخبار کے دفتر فون کیا کہ میں ہی وہ شخص ہوں جس نے اس امریکی عورت کی جان بچائی مگر میں امریکی نہیں پاکستانی ہوں۔دوسرے دن انہی اخبارات نے اس خبر کو اس طرح شائع کیا کہ پاکستانی دہشت گرد نے ایک امریکی کتے کی جان لے لی ساتھ ہی یہ بھی لکھا کہ دہشت گرد کو امریکہ میں رہنے کا کوئی حق نہیں اور اسے ڈیپورٹ کیا جائے۔ اس لطیفے سے امریکی میڈیا کے مسلمانوں کے خلاف رویّے کا اندازہ لگایا جاسکتا ہے۔
ایک تحقیق کے مطابق یورپ اور امریکہ میں اسلام قبول کرنے والوں کی تعداد میں تیزی سے اضافہ ہو رہا ہے اور قرآن یورپ اور امریکہ میں سب سے زیادہ فروخت ہونے والی کتاب ہے۔ 11ستمبر کے بعد لوگوں کو یہ تجسس ہوا کہ یہ کیسا مذہب کہ جس کے نام لیوا اس پر پروانہ وار جانیں نچھاور کرنے سے گریز نہیں کرتے۔ اسی جستجو نے انہیں قرآن کے مطالعے کی طرف راغب کیا جس سے انہیں اسلام کو سمجھنے کا موقع ملا۔ انہیں یہ علم ہوا کہ اسلام ایک جامع مذہب ہے، انہیں قرآن کے مطالعے سے قلبی سکون بھی حاصل ہوا۔ انہیں یہ احساس ہو اکہ اسلام کے متعلق ان کے ذہنوں میں غلط فہمیاں پیدا کردی گئی تھیں اسلام ویسا مذہب نہیں جیسا مغربی میڈیا اسے پیش کرتا ہے۔ اپنی حالیہ تقریر میں امریکی صدر بارک حسین اُوباما بھی اسلام کی تعلیمات سے متاثر نظر آئے۔ مغرب ہمیشہ یہ تشہیر کرتا رہا ہے کہ اسلام بزور شمشیر پھیلا جبکہ حقیقت اس کے برعکس ہے آج امریکیوں کو بھی سہیل کے اس رحمدلانہ کردار سے اس کا اندازہ ہوگیا ہوگا کہ اسلام بروز تلوار نہیں بلکہ بزور کردار اور رحم دلی سے پھیلا ۔ اسلامی تاریخ اس طرح کے واقعات سے بھری پڑی ہے خود پیغمبر اسلام ﷺ کی رحم دلی کا اندازہ اس سے لگایا جاسکتا ہے کہ آپﷺ نے اس ہندہ نامی عورت کو بھی معاف کردیا جس نے میدان جنگ میں آپﷺ کے چچا حضرت حمزہ کا کلیجہ چبایا تھا۔ اسلام قبول کرنے کے بعد جب ہندہ حضور اکرم ﷺ کے سامنے پیش ہوئی تو حضور اکرمﷺ نے فرمایا کہ میں نے اسے معاف کیا مگر اسے کہہ دو کہ یہ میرے سامنے نہ آیا کرے کیونکہ اسے دیکھ کر مجھے میرے چچا  یاد آجاتے ہیں۔اسی رحم دلی کا مظاہرہ ڈیڑھ ہزار سال بعد آج ان کے ایک ادنیٰ امتی نے امریکہ میں کیا اور اس طرح ایک غیر مسلم امریکی نے اسلام قبول کیا اور مغرب کے اس پروپیگنڈے کو غلط ثابت کیا کہ اسلام بزور شمشیر پھیلا ہے۔ اگر قارئین اس واقعے کی ویڈیو دیکھنا چاہیں تواسے YOUTUBEپر دیکھا جاسکتا ہے۔
ربط: ایک امریکی کا قبول اسلام ,,,,آج کی دنیا…اشتیاق بیگ

__________________
اس دور میں تعلیم ہے امراضِ ملت کی دوا
ہے خونِ فاسد کے لیے تعلیم مثل نیشتر