اسلام علیکم !
درج زیل میں لوٹے اور لفافے ٹائپ جناب حسن نثار صاحب کا کالم بابت " عمران خان منعون " تحریک ِ انصاف اور میاں اظہر." پڑھیے اور سر دھنیے ۔۔۔
موصوف کی قلا بازی ملاحظہ فرمائیں کل تک جناب کا ہردوسرا جملہ خان صاحب کی بابت یہی ہوا کرتا تھا کہ شو مین ،ہی از ناٹ نون وہاٹ از پالیٹکس وغیرہ وغیرہ اور آج ایک دم سے کیسے کایا پلٹ گئی ۔۔۔۔۔۔۔۔لگتا ہے عمران کا جادو سر چرھ کر بول رہا ہے اب ایسے ایسے مخالفین بھی جو کہ طعنے دیاکرتے تھے لکھنے پر مجبور ہوگئے ہیں

تحریک ِ انصاف اور میاں اظہر....چوراہا …حسن نثار



کبھی دریا چڑھتا دیکھاہے؟
اگر نہیں دیکھا تو عمران خان کی تحریک ِانصاف کو چڑھتا دیکھ لیں جس کے ایک بھرپور، زبردست اور پرجوش اجتماع کو دیکھ کر مجھے شروع شروع کی پیپلزپارٹی کے سرفروش جیالے یاد آگئے جو سرہتھیلیوں پر رکھے جی جان کی بازی لگانے کے لئے ہمہ وقت تیار رہتے تھے۔ سود وزیاں سے بے نیاز پیپلزپارٹی جیسا ورکر نہ پہلے دیکھا نہ بعد میں۔بعد میں تو سیاسی ورکرز کا یہ ادارہ ہی ختم ہو گیا اوراس کی جگہ ننھے منے مفادپرست اور سمال سائز سوداگر آگئے۔ بانی ٴ پاکستان والی جینوئن مسلم لیگ کے ورکرز کی کہانی ہی کچھ اور کہ اول تو جناح جیسی انسپائرنگ قیادت اور اصل فیکٹر یہ کہ مقابلہ ہندوؤں اور فرنگیوں کے ساتھ تھا سو ان کامعاملہ ہی الگ تھا۔ پاکستان کی سیاسی تاریخ میں جتنی بڑی تعدادمیں جتنا جی دار ورکر پیپلزپارٹی نے پیدا کیا اور بالخصوص پنجاب میں، کسی اور کو نصیب نہیں ہوا کہ اس کے بعد سیاست ”نظریاتی“ نہیں ”تجارتی“ ہوگئی لیکن اب محسوس ہوتا ہے کہ شاید… شاید ایک بارپھر بالخصوص پنجاب میں وہی منظر دوبارہ دکھائی دے جو کبھی ذوالفقارعلی بھٹو کی قیادت نے دکھایا تھا یعنی کارکنوں کاایسا سیلاب جو بڑے بڑے برج اور برجیاں خس وخاشاک کی طرح بہا لے جائے اور لو گ ششد رہ جائیں۔
میں نے گزشتہ چند ماہ میں عمران خان کو دو چارمرتبہ ٹی وی پر یہ کہتے سنا کہ… ”سونامی آ رہا ہے“ سچ یہ ہے کہ مجھے ٹھیک سے سمجھ نہیں آئی لیکن گزشتہ سے پیوستہ روز سابق گورنر پنجاب کے گھر نہر کنارے تحریک انصاف کے ورکرز کی تعداد اور جوش و خروش دیکھ کر عمران کے اس دعویٰ کی سمجھ آگئی ہے کہ ”سونامی آ رہا ہے“ میاں اظہر خود بھی ایک محبوب سا آدمی ہے اس کے مداحوں کی موجودگی اپنی جگہ کہ ایک اہم ترین اور موثر ترین برادری کا ایک ایسا سرکردہ آدمی ہے کہ اس کے حریف بھی اس کی شرافت ، دیانت اور صلاحیت پرانگلی نہیں اٹھا سکتے۔ ہر قسم کے سکینڈلز سے پاک میاں اظہر ملک معراج خالد مرحوم و مغفور کے بعد پنجاب میں اکلوتاآدمی ہے جس کے لئے کوئی بڑے سے بڑا منصب بھی کوئی معنی نہیں رکھتا کہ درویش ہر منصب سے بالا اور ماورا ہوتے ہیں۔ معراج خالد صاحب چیف منسٹر ہوں یا سپیکر قومی اسمبلی یا وزیراعظم… صرف اور صرف معراج خالد ہی ہوتے تھے، کیاشان بے نیازی تھی… کر ّ و فر اور طمطراق سے متنفر، دھرتی پردھرتی کا بیٹا، لج پال، رکھ رکھاؤ، وضعداری و دلداری کا پیکر… میاں اظہر کو دیکھ کر ہمیشہ مجھے ملک معراج خالد یاد آتے ہیں کہ یہ بھی میئر ہو یا گورنر، اس کی صحت پرکوئی فرق نہیں پڑتا۔ … اعلیٰ ترین انتظامی صلاحیتوں سے مالا مال پبلسٹی سے بے نیاز، کام کرے گا تو ٹھوک کر اور آرام کرے گا تو سنت نگر کے انہی تھڑوں پر قدیم دوستوں کے ساتھ جہاں اس کا بچپن اور جوانی گزری۔
سنت نگر کامیاں اظہر سیاست کا سنت ہے اور یہ جنس نایاب نہ سہی کم یاب بہت ہے لیکن یہ اس سنت کی شخصیت کا صرف ایک پہلو ہے ورنہ ذہین اورجملے باز ایسا کہ بڑے بڑے توبہ توبہ کر اٹھیں۔
میاں اظہر کے لئے سیاست نہ صنعت نہ تجارت نہ رعونت… سو وہ عملاً اسے تج چکا تھا کہ”اوربھی غم ہیں زمانے میں سیاست کے سوا“ اپنا کاروبار دیکھو، فارم پر جا کر کام بھی کرو اور ریلیکس بھی اور ذاتی حیثیت میں آؤٹ آف دی وے جا کر کسی کے لئے کچھ کرسکو توخاموشی سے کر گزرو کہ عام لوگوں کے لئے دکھاوے کی تصویری نہیں حقیقی ہمدردی اور محبت اس کی فطرت میں شامل ہے۔
ہم جب بھی ملتے سیاست میں واپسی کے لئے کہتا تو میاں اظہر اپنی مخصوص خالص مسکراہٹ کے ساتھ کہتے… ”چھڈو شاہ جی! چوراں دے ٹولے نیں“ یہاں یہ وضاحت ضروری ہے کہ میں ’شاہ جی“ وغیرہ ہرگز نہیں ، میاں اظہر پیار سے ”شاہ جی “ کہتے ہیں ورنہ میری ”اوقات“ سے بخوبی واقف ہیں کہ میرا تعلق بھی جالندھر کی اسی بردری سے ہے جس کا سرخیل خود میاں اظہر ہے اویہ ”لیتھل کومبی نیشن“ تحریک ِانصاف کے لئے فیصلہ کن اثاثہ ثابت ہوگا بالخصوص پنجاب میں۔
عمران خان کو مبارک ہو… تحریک ِ انصاف میں میاں اظہر کی آمد عمران کا سیاسی چھکا ہے جس کے ”پنجابی سیاست“ پر گہرے اثرات مرتب ہوں گے۔ نیک نام ترین سیاسی ہیوی ویٹ کی مین سٹریم سیاست میں واپسی ایک بہت اچھا شگون ہے۔ اس حوالہ سے بھی کہ میاں اظہر کی آمد کے بعد بہت سے ایسے اہم لوگوں کے لئے عمرا ن خان کو جوائن کرنا بہت آسان ہوجائے گا جو اب تک گومگو کی کیفیت سے دوچار تھے۔

__________________
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔
پیکرِ دلرُبا بن کے‌ آیا ،روحِ ارض و سما بن کے آیا
سب رسولِ خُدا بن کے آئے ،وہ حبیبِ خُدا بن کے آٰیا