ہر عروج کو زوال ہے، اور جیسی کرنی ویسی بھرنی، یہ دو ایسی حقیقتیں ہیں جن سے انکار ممکن نہیں، تقریبا ہر زبان میں اس معنی و مفہوم کے حامل بے شمار محاورے، جملے اور قصے کہانیاں موجود ہیں۔ عروج و زوال کے فلسفے کو سمجھنے کے لئے اور اس سے عبرت حاصل کرنے کے لئے عاد و ثمود، فرعون و ہامان، قارون و نمرود، قیصر و کسریٰ ، عظیم سلطنت برطانیہ ، فرانس اور روس کی زندہ مثالیں کافی ہیں۔
جیسی کرنی ویسی بھرنی کی مثالیں خود پاکستانی تاریخ میں اتنی زیادہ ہیں کہ باہر جانے کی ضرورت نہیں، غلام محمد سے لے صدر مشرف تک بیشتر فرمانرواؤں نے اپنے پیشرووں کے ساتھ جو کچھ کیا وہی ان کے ساتھ بھی ہوا۔ جبری برطرفی، جیل اور پھانسی جیسے واقعات اسی سلسلے کے سنگل میل ہیں۔ اسی کھینچا تان نے پاکستان کو سنبھلنے اور ترقی کرنے کا موقع نہ دیا ، کرپشن ، بد عنوانی اور اقربا پروری جیسی لعنتیں پنپتی رہیں، ملکی معیشت، سیاست اور حتی کہ اخلاقیات تک ہر چیز بری طرح متاثر ہوئی۔دنیاوی جاہ کے لئے اچھے بھلے انسان کبھی لوٹے بنتے رہے اور کبھی گھوڑوں کی طرح بکتے رہے۔
سیاستدانوں کی اس کھینچا تان نے جو بے شمار تحفے پاکستان کو دئیے ان میں سے ایک قابل ذکر تحفہ آمریت کا ہے۔ جس کی آخری کڑی سابق صدر و چیف آف آرمی سٹاف جناب پرویز مشرف صاحب ہیں۔ انہوں نے بلا شرکت غیرے حکمرانی کے کم و بیش دس سال گزارے ، ان دس سالوں میں انہوں نے سب سے پہلے پاکستان کا نعرہ لگایا اور آخر تک اس پر ثابت قدم رہے۔نقصان کی کوئی قسم، رسوائی کا کوئی طریقہ، غلامی کا کوئی انداز، ہاتھ پھیلانے کا کوئی موقع، اندرونی و بیرانی سازشوں کی کوئی کوشش ایسی نہیں ہو گی جس میں انہوں نے سب سے پہلے پاکستان کو پیش نہ کیا ہو۔ کامیابیوں کی مالا جپنے والے اس صدر نے اپنے پیچھے ناکامیوں کی وہ لا زوال داستان چھوڑی ہے کہ دس بار باوردی صدر منتخب کرانے کے دعوے دار بھی اب پہچاننے سے گریزاں ہیں، ساتھ لے کر چلنا تو دور کی بات۔
آمریت کی تا حال آخری نشانی کو ختم کرنے اور مستقبل میں اس کا راستہ روکنے کے لئے عوام اور بعض حکمرانوں نے اصولی فیصلہ کیا، اس کا واحد اور بہترین حل صدر مشرف کے تمام غیر آئینی اقدامات کی عدالتی تحقیق اور قرار واقعی سزا ہی ہو سکتا تھا لہذا اس پر تمام فریق متفق ہوگئے۔ پاکستانی سیاست میں دوسری بڑی سیاسی پارٹی مسلم لیگ(ن) نے اس معرکے میں کمان سنبھالنے کا فیصلہ کیا، پارلیمنٹ میں قرار داد لانے کی کوشش کی گئی لیکن ضمیر فروشوں کی تعداد اس محفل میں زندہ ضمیر رکھنے والوں زیادہ ہے اس لئے کامیابی نہ مل سکی۔
لیکن نون لیگ اور دیگر کئی سیاسی جماعتیں جن میں جماعت اسلامی اور پاکستان تحریک انصاف نمایاںہیں اس کام میں پوری جانفشانی سے مصروف ہیں کہ مشرف کو اس کے گناہوں کی ایسی سزا دی جائے کہ آئندہ کسی طالع آزما کو مسند اقتدا پر شب خون مارنے کی جرات نہ ہو۔
آمریت سے سے سب سے زیادہ نفرت کا اظہار کرنے ولی اور یوم سیاہ منانے والی پی پی پی بظاہر دعوے کرتی ہے کہ مشرف کا احتساب ہونا چاہیے لیکن اندرون خانہ عدلیہ بحالی کی طرح اس مسئلے میں بھی وہ مجبور ہے۔این آر او اور اس طرح کے دیگر ایسے معاہدات ہیں جو” نہ صاف چھپنے دیتے ہیں اور نہ سامنے آنے دیتے ہیں“۔
دوسری جانب اگر رائے عامہ کو دیکھا جائے تو غیر جانبدار سروے کے مطابق 70%سے زائد پاکستانی مشرف کو سزا دینے کے حق میں ہیں، اور مزے کی بات یہ ہے کہ ان میں 50%سے زائد لوگ سخت اور عبرت ناک سزا کی خواہش رکھتے ہیں۔ کیوں کہ موصوف کے کارناموں میں لال مسجد، 12مئی، اکبر بگٹی کا قتل ، عافیہ صدیقی ، قبائلی علاقوں پر امریکی یلغار ، دہشت گردی کا تحفہ اور ہزاروں لا پتہ افراد جیسے کارہانے نمایاں موجود ہیں۔ اور ان کا پورا پورا حساب چکتا نہ کرنا کسی طور بھی عدل و انصاف کے تقاضوں کے مطابق نہ ہو گا۔
اسی لئے عوام اور بیشتر سیاسی جماعتیں اس فرض کفایہ کو ادا کرنے کے لئے خالص نیت کر کے ،پیچھے امام ”نواز شریف“ کے، منہ طرف پارلیمنٹ یا سپریم کورٹ۔۔ اللہ اکبر کا نعرہ بلند کر چکی ہیں۔ لیکن مشرف صاحب اور ان کے حواری جن پرمشرف صاحب کے احسانات کا اتنا بوجھ ہے کہ ان کے خلاف نہ بول سکتے ہیں اور نہ کسی کو بولتا سن سکتے ہیں یہ احسانات این آر او جیسے معاہدات ہیں جن سے سب واقف ہیں ۔ احسان مندوں میں سر فہرست ایم کیو ایم ہے اور دوسرا نمبر موجودہ حکمران جماعت پی پی پی کا ہے۔ اس کے علاوہ افواج پاکستان حالیہ و سابقہ کسی طرح اس حق میں نہیں ہو سکتیں کہ ان کے کسی آرمی چیف کا اس طرح پبلک ٹرائل ہو۔ اس لئے وہ بھی اس راہ میں لازمی رکاوٹ بنیں گے، ظاہرا یا حسب معمول غیر مرئی قوت کے طور پر۔اس سلسلے میں مختلف طرق ہائے بلیک میلنگ استعمال کئے جاسکتے ہیں، جن میں ایم کیو ایم مہارت رکھتی ہے اور اس سے بڑھ کر افواج اور خفیہ ایجنسیاں تو اپنا ثانی ہی نہیں رکھتیں۔
جناح پور کے قصہ پارینہ کی نشاط ثانیہ کے ذریعے سترہ سالہ مردے میں زبردستی جان ڈالنے کا حالیہ عمل اسی مشرف بچاؤتحریک کا حصہ ہے۔ خاص طور سے 1992ءاور اس کے بعد ہونے والے کراچی کے آپریشن کے تمام کرداروں کو نظر انداز کر کے صرف نون لیگ اور میاں نواز شریف کو نشانہ بنانا، برگیڈئیر امتیاز کا اچانک منظر عام پر آنا اور گڑھے مردے اکھاڑنا اسی سازش کے شاخسانے معلوم ہوتے ہیں۔ کیوں کہ اگر یہ سچ اگلنا اتنا ہی ضروری تھا تو ا گزشتہ سترہ سالوں میں کیوں نہیں اگلا گیا؟ اگر سچ بولنا ہے تو بعض لوگوں کو پردہ راز میں کیوں رکھا جا رہا ہے؟ ان تمام ناموں کو آشکار کیوں نہیں کیا جا رہا جو اس آپریشن میں ملوث رہے ہیں، بلکہ نمایاں کردار ادا کیا؟
اور سب سے اہم بات یہ کہ جو الزامات لگا رہا ہے خود اس کا دامن تار تار ہے۔ کتنے ہی ہم عصروں نے ان کے اعمال سیئہ کو ان کے سامنے پیش کیا ہے، لیکن ان کی اپنے مشن سے لگن مثالی ہے۔ تن تنہا سب کو ننگا کرنے پر تلا ہوا ہے، اپنے پرائے، سول اور باوردی سب اس کی زد میں ہیں سوائے ان کے جن کی سرپرستی حاصل ہے۔ بعض اوقات ان کو کسی ٹی وی شو میں دیکھ کر سیاسی مرحوم جناب ڈاکٹر شیر افگن کی یاد آجاتی ہے۔ انہوں نے بھی مشرف کے باطل کو حق قرار دینے کے لئے آئیں پاکستان کا بھرپور استعمال کیا لیکن وقت بڑا استاد ہے۔ اسی طرح برگیڈیئر صاحب بھی چار دن چمکنے کے بعد گرہن زدہ ہو جائیں گے اور عوام سرخرو ہوں گے۔
کیوں کہ اب کافی دیر ہو چکی ہے، نوشتہ دیوار لکھا جا چکا ہے اور مشرف صاحب کے دن گنے جا چکے ہیں ، اس لئے حکومت اور تما م وہ افراد جو پرویز مشرف صاحب کی پاکدامنی کے ثنا خوان ہیں کو چاہیے کہ وقت کے ماتھے پر لکھی ہوئی تحریر کو پڑھیں ورنہ ہو سکتا ہے کہ عوامی سیلاب اٹھے اور 16 مارچ کی طرح ایک بار پھر ہاتھ پاؤں پھولنا شروع ہو جائیں ، جان کے لالے پڑ جائیں اور پھر وہی کرنا پڑے جس سے انکار ہو۔ جیسا کہ عدلیہ بحالی کے حوالے سے ہو چکاہے۔

__________________
محتاج اصلاح و دعا