درجہ بندی: (2 votes - 5.00 average)

میں نے سُنا ہے کہ جب بنگالی زبان کے عظیم شاعر ٹیگور کو نوبل انعام سے نوازا گیا تو پورے برصغیر کے ادیب اور شاعر ایک پوری ٹرین بُک کروا کر کلکہت پہنچے۔ کہتے ہیں انہوں نے اسٹیج پر ایک شاہی تخت بنایا اور اس پر ٹیگور کو بٹھایا۔ ٹیگور کی تعریف میں زمین آسمان کو ملا دیا ۔ جب ٹیگور کو تقریر کے لیے بلایا گیا ، تب اُس نے صرف اتنا ہی کہا کہ " اپ لوگوں کی محبت میرے لیے شہد کا وہ پیالہ ہے جس کو میں صرف چکھ کر واپس رکھ رہا ہوں۔ مجھے ہمیشہ اس بات کا افسوس رہے گا کہ جب مغرب نے میری شاعری پر مجھے ادب کے عالمی انعام سے نوازا ، تب آپ نے کلکتہ آنے کا کشٹ کیا ہے۔ اور اگر مغرب مجھے عظیم شاعر نہ مانتا تو کیا آپ مجھ پر فخر نہ کرتے؟"

مگر ٹیگور کی طرح اس نے ایسا کُچھ نہ کہا۔ وہ اگر چاہتی تو ہمارے ضمیر کی چٹکی لے سکتی تھی۔ مگر وہ ہر بیتی کی طرح بہت اچھی اور بے حد مہذب تھی۔ جب نو برس کی عمر میں اسے دنیا کا سب سے کم عمر ترین مائیکر سافٹ پروفیشنل مانا گیا اور کمپیوٹر کی دنیا کے سب سے بڑے نام بل گیٹس نے اسے حیرت کے ساتھ MCPsکی سند دی تب اس نے اپنے ملک کے بارے میں برائیاں کرنے کے بجائے فخر سے کہا کہ " میں اس قوم کی بیٹی ہوں جو ترقی پذیر ہے اور انشا اللہ دنیا میں ایک دن میں اس ملک کے نام سے پہچانی جاؤں گی"۔ جب بین الاقوامی اسٹیج پر اس ملک کی بیتی ایسی باتیں کر رہی تھی تب پاکستان کے مظلوم محب وطنوں کے دلوں میں یہ گیت کسی پہاڑی ندی کی طرح بل کھاتا لہراتا جا رہا تھا کہ :
ہم مائیں
ہم بہنیں
ہم بیٹیاں
قوموں کی عزت ہم سے ہے"

وہ ہماری عزت تھی۔ ہمارے قومی مقدر کا روشن ستارہ ارفع کریم ! جو کئی دنوں سے اپنے ننھے وجود کے ساتھ موت کی جنگ کرتا رہا اور گزشتہ روز لاہور کی سخت سردی میں آخری سانس لے کر موت کے پراسرار اندھیرے میں ہمیسہ کے لے ڈوب گیا۔ اس میں کوئی شک نہں کہ اگر زندگی ارفع کریم کا ساتھ دیتی تو وہ بل گیٹس سے کہیں بڑی شخصیت بن جاتی۔ مگر ہماری قومی مقدر کی وہ جھولی جس میں ہمارے اعمال کے باعث بہت سارے چھید ہو چکے ہیں ، اس جھولی سے وہ کسی موتی کی طرح گری اور مٹی میں مل گئی۔ اب اس مٹی پر ہم ہزار قومی پرچموں کا سایہ بھی کریں تو کیا۔ تب بھی وہ پھول دوبارہ اس اجڑے چمن کی زینت نہیں بن سکتا۔ وہ ستارہ جو ہمارے قومی آسمان پر روشنی کی لکیر بناتا ہوا ڈوب گیا ، پھر سے فروزاں نہیں ہو سکتا۔

وہ لرکی جو حقیقی معنوں میں جینئس تھی۔ ۔ ایسی لڑکی جس کا جنم ہزاروں برسوں بعد بھی نہیں ہو سکتا۔ اس کی کامیابی کو ہم مرہم بنا کر اپنے قومی زخموں پر بھی نہ رکھ سکے اور وہ اس ملک سے چلی گئی۔ کیا مستقبل کا مورخ ارفع کریم کا تذکرہ کرتے ہوئے یہ نہیں لکھے گا کہ "خوش قسمتی کے ساتھ پاکستان کی سرزمین پر جنم لینے والی وہ جینئس بچی جب بدقسمتی سے بیمار پڑ گئی تب اس ملک کے حالات بہت بُرے تھے۔ یہ وہ دن تھے جب ملکی ادارے ایک دوسرے کے ساتھ دست و گریباں تھے۔ جب حکومت ، فوج اور عدلیہ کے ٹکراؤ کی خبریں نجی چیلنز پر بلند آواز بج رہی تھیں۔ اس وقت ایک موہوم سی آہٹ کے ساتھ علم اور صلاحیت کی وہ تتلی ہمیشہ کے لیے اس جھاڑی سے اُڑ گئی، جو اس ملک کے قومی دامن کے ساتھ الجھی ہوئی تھی۔ میں یہ نہین کہتا کہ ارفع کریم کی بیماری کی وجہ ہمارا بیمار نطام تھا۔ مگر کیا کوئی یقین سے کہہ سکتا ہے کہ ارفع کریم کی موت میں اس بے کار اور بیمار نظام کا ہاتھ نہیں تھا۔ ہمیں کیا معلوم؟ ہم جو جینئس کے جنم لینے اسباب سے نا آشنا ہیں ، انہیں کیا پتہ کہ ماحول ایک ایک جینئس کے دماغ پر کس طرح اثر انداز ہوتا ہے۔ہم جینئس نہیں اس لیے ہم نہیں جان سکتے کہ ایک جینئس کس طرح سوچتا اور محسوس کرتا ہے۔ اس لیے یہ بات بعید از امکان نہیں کہ اس بیمار نظام نے اپنی دھرتی کے ایک دانا اور دیدہ ور بیٹی کو بیمار کر کے رکھ دیا ہو۔ وہ لڑکی جو زندگی کا معصوم گیت تھی۔ جو انگریزی گانے کے بجائے اپنی مادری زبان پنجابی کے سادہ گیت بے حد پیار سے گنگناتی تھی۔ جس کی پلکوں میں اپنی آنکھوں سے زیادہ حسین خواب تھے اس ملک و قوم کے لیے،۔ کیا معلوم وہ ایسی بیل ہو جس پر درخت کی بدنصیبی اثر انداز ہو گئی ہے۔ ہر لڑکی وینا ملک کی طرح امر بیل تو نہیں ہوتی۔ وہ امر بیل جو درخت سے چمٹ کر اس کا سارہ رس چوس لیتی ہے۔ جو ہرے بھرے پیڑ میں اپنا زہر اتارکر اسے زرد بنا دیتی ہے۔ اسے سکھا دیتی ہے۔ موسم بہار میں بھی اسے خزاں رسیدہ بنا دیتی ہے۔ مگر اس نباتاتی دنیا میں ممکن ہے کوئی ایسی بیل بھی ہو جسے درخت بیمار بنا دے۔ اتنا بیمار کہ اس کے وجود سے زندگی چھوٹ جائے!

ارفع کریم بھی ایک معصوم بیل تھی۔ جسے اس ملک کے درخت سے والہانہ محبت تھی۔ اس لیے مائیکر وسافٹ کی ہر پرکشش پیشکش کو ٹھکرا کر اس پیڑ کے ساتھ چمٹی رہی جس کا نام پاکستان ہے۔ وہ پاکستان جو فطرت کے تحائف سے مالامال ہونے کے باوجود اپنے نظام کی وجہ سے بے توقیر بنا ہوا ہے۔ وہ پاکستان جس کے سبز پاسپورٹ کو دنیا کے ائیر پورٹس پر نفرت کی نگاہ سے دیکھا جاتا ہے۔ وہ پاکستان جس کے باشندے بیرون ملک بے حد افسوس سے اپنی شہریت چھپاتے ہیں۔ وہ پاکستان جس کے حکمران چند ڈالرز کے لیے اپنے ملک کی خود مختاری کو گروی رکھ دیتے ہیں۔ وہ پاکستان جو اپنے نظام کے باعظ رسوا بھی ہے اور بیمار بھی !

یہ ممکن کیوں نہیں کہ ارفع کریم کی جینئس پر اس ملک کا نظام حملہ آور ہوا ہو اور وہ ایک حساس محب وطن بچی اپنے ملک کے بارئے میں بُری بُری باتیں سُن کر علیل ہو گئی ہو۔ میں مانتا ہوں کہ اس خیال کا شک کے دائرے میں رکھا جا سکتا ہے کہ ارفع کریم کی بیماری کا باعث یہ نظام نہ ہو، مگر اس میں تو کویئ شک کی گنجائش نہیں کہ ارفع ایک گیر معمولی ہستی تھی،۔ وہ ارفع کریم جس کی بیماری پوری دنیا کے ڈاکٹرز کی سمجھ سے باہر تھی۔ اس کی تشخیص نہ ہو سکتے والے علالت پر اب سوچتا ہوں تو ترکی کے انقلابی شاعر ناظم حکمت کی وہ نظم یاد آ جاتی ہے جس کا عنوان ہے "میرے معالج"۔اس نظم میں ناظم حکمت نے لکھا ہے کہ :
"اے میرے معالج!
تو کیا سمجھتا ہے؟
کیا میری بیماری کی وجہ
سگریٹ اور بے خوابی ہے؟
میرے معالج ایسا نہیں ہے
جب آدھی رات کو استنبول کی فٹ پاتھ پر
ایک بھوکا بچہ روتا ہے
تب میری صحت اپنا توازن کھو دیتی ہے۔ "

ناظم حکمت ترکی کا جینئس تھا۔ اگر ایک جینئس کی علالت کا سبب ملک کے حالات ہو سکتے ہیں ارفع کریم پر پاکستان کے حالات کیوں اثر انداز نہیں ہو سکتے؟ ارفع کریم بھی تو جینئس تھی!

ارفع کریم اس ملک کے ہاتھ کا کنگن تھی ۔ وہ کنگن جو ٹوٹ گیا۔ ذہانت کی کانچ سے بنے ہوئے اس کنگن کے ٹکڑے چن کر ہم اسے جوڑ نہیں سکتے، مگر اس بیمار نظام کو تو تبدیل کر سکتے ہیں، جس کے باعث ہمارے جینئس بچوں کا مقدر ان پھولوں جیسا بن جاتا ہے جو بن کھلے مرجھا جاتے ہیں۔

ارفع کریم کو ایسا خاندان ملا جسے اس کی ذہانت نظر آئی اور اس خاندان نے ارفع کریم کی مدد بھی کی۔ مگر اس ملک میں کتنے ایسے بچے ہوں گے جو جینئس زہن لے کر اس دنیا میں آئے ہوں گے، مگر غربت کی وجہ سے انہیں کوئی کمپیوٹر ملنا تو درکنا ، انہیں کمپیوٹر دیکھنے کا حق بھی نہیں ملا ہوا گا۔ ہم ارفع کریم جیسی بچی کو تو نہ بچا سکے۔مگر ان بچوں کو تو بچا سکتے ہیں جو غریب ماحول میں ہیںا ور جینئس ہیں اور غربت ان کی ذہانت کے پیڑ سے امر بیل کی طرح چمٹی ہوئی ہے۔