آج وطن عزیز کا ہر باسی بے پناہ مشکلات اور پریشانیوں سے دوچارہے۔لیکن ایک افتاد جو ہر اہل وطن کے لئے قدر مشترک کی حیثیت اختیار کر گئی ہے وہ ہے خوف۔ یوں تو کوئی فرد اور کوئی ادارہ اس خوف سے مبرا نہیں، تاہم کچھ ادارے ایسے ہیں جن کے بارے میں اکثریت کی رائے تھی کہ ابھی حالات اتنے نہیں بگڑے کہ ان کو نشانہ بنانا اتنا آسان ہو گیا ہے۔ ان اداروں میں سب سے سر فہرست جی ۔ایچ ۔کیو تھا۔

لیکن بروز ہفتہ جی ۔ایچ۔کیو پر ہونے والے حملہ نے عدم تحفظ کے احساس کو مزید گہرا کر دیا۔ یہ جملہ زبان زد عام ہو گیا کہ ”اگر جنرل ہیڈ کوارٹر محفوظ نہیں تو دوسری جگہوں کا کیا بنے گا؟“ ۔ اور عوام اس تشویش میں حق بجانب بھی ہے۔ کیوں کہ محافظ اگر خود اپنے گھر میں عدم تحفظ کا شکار ہوں تو دوسروں کو کیا تحفظ فراہم کریں گے۔

حملہ ہوا، انتہائی قیمی جانیں ضائع ہوئیں، 48 گھنٹے کی اس کاروائی میں ایک کے سوا تمام حملہ آور مارے گئے۔ فوجی جوان اور عام شہری شہید ہوئے۔ اور کئی ایک واقعات کی طرح یہ بھی گزر گیا۔ لیکن یہ واقعہ اپنے پیچھے بہت سے سوالات چھوڑ گیا ہے جن کا جواب شاید ہی کوئی دے سکتا ہو۔

ابھی اس واقعے کا ”دسواں “بھی نہ ہوا تھا کہ ایک اور مرگ ہو گئی، بلکہ اجتماعی مرگ۔ لاہور میں بیک وقت تین جگہوں پر حملہ ہو گیا۔ اور یہ تینوں جگہیں معمولی نہیں تھیں، پولیس کے دو مراکز اور وفاقی تحقیقاتی ادارے کا صوبائی مرکزاس حملے کا نشانہ تھے۔ یہ واقعہ بھی اپنے پیچھے دو درجن سے زائد اموات، بیسیوں یتیم، کئی بیوائیں اور کتنے ہی بے سہارا بوڑھے والدین چھوڑ کر گزر گیا۔

واقعات تو اس کے علاوہ بھی اتنے ہیں کہ کئی کالم صرف ان کی تعداد بیان کرنے کے لئے ناکافی ہیں۔ شانگلہ میں افواج کے قافلے پر حملہ ہو یا کوہاٹ میں پولیس تھانے پر حملہ سب ہی قابل صد افسوس ، قابل مذمت اور باعث تشویش ہیں ہی۔ لیکن افواج پاکستان کے ہیڈ کوارٹر ، پولیس یا ایلیٹ فورس کے ٹریننگ سینٹر اور وفاقی تحقیقاتی ادارے کی عمارت پر براہ راست حملے حالات کو مزید تشویش ناک بنا دیتے ہیں، عدم تحفظ کا وہ احساس جو انتہائی حدود کو پہنچ چکا ہے وہ نفسیاتی مرض کی شکل اختیار رکر جاتا ہے۔

انسان کے اعضاءو جوارح کے ساتھ ساتھ اس کے اعصاب و احساسات بھی شل ہو جاتے ہیں۔ برائی اور اچھائی کا تصور تقریبا ختم ہو جاتا ہے اور ایسے لوگوں کو اپنے مقاصد کے لئے استعمال کرنا مشکل نہیں ہوتا۔ چنانچہ ایسے لوگ تخریب کار عناصر کا بہترین شکار ہوتے ہیں۔

اہم سوالات
پہلے تو صرف یہ تشویش تھی کہ جی ایچ کیو پر حملہ کس نے کیا؟ اس کے پیچھے خفیہ ہاتھ کس کا ہے؟ وہ ہاتھ بیرونی ہے یا اندرونی؟ اگر اندرونی ہے تو سیاسی ہے یا عسکری؟ اگر سیاسی ہے تو اس کے کیا مقاصد ہو سکتے ہیں؟ اگر بیرونی ہے ۔۔ تو یہ پیغام محبت پڑوس سے ہے یا سمندر پار بسنے والے پیا کی جانب سے ہے؟ پیامبر کون ہے؟ اس حملے میں بریگیڈئیر اور کرنل کی شہادت محض ایک اتفاق ہے یا اس کے پیچھے بھی کوئی غیر مرئی قوت کار فرما ہے۔ کیوں کہ گیٹ پر ان کا موجود ہونا سمجھ میں نہیں آتا؟

ان تمام سوالات کے تسلی بخش ابھی عوام کو نہیں ملے تھے کہ لاہور میں افتاد ٹوٹ پڑی۔ ایک بار پھر سوالات کی بوچھاڑ ہے جو ذہن میں موجزن ہے ، لیکن جواب کوئی نہیں۔

جی ایچ کیو پر حملے کے پیچھے کیا مقاصداور کون سے عناصر کار فرما ہو سکتے ہیں، اس سلسلے میں تو ”جتنے منہ انتی باتیں “کے مصداق کئی خدشات ظاہر کئے گئے۔ بعض کا خیال ہے کہ وزیرستان آپریشن کا جواز بنانے کے لئے یہ کھیل کھیلا گیا، لیکن یہ بات سمجھ میں نہیں آنے والی۔ کیوں کہ اس کاروانی کے جواز کے لئے فوج اتنی قیمتی جانوں کا ضیاع ہر گز نہیں کر سکتی۔ ایک خیال یہ بھی ہے کہ افواج پاکستان کی طرف سے کیری لوگر کی مخالفت پر یہ ”بگ باس “کی طرف سے یہ تنبیہ کرائی گئی ہے کہ” بڑوں کے سامنے نہیں بولتے“۔ اور اس پیغام رسانی کے لئے بلیک واٹر کی خدمات کا استعمال بعید از قیاس قرار نہیں دیا جا سکتا۔


لیکن ان تمام خدشات کے ساتھ ساتھ پڑوسی دوست کی طرف سے کسی قسم کی خوش فہمی ’احمقوں کی جنت ‘میں رہنے کے مترادف ہو گی۔ خاص طور پر لاہور میں ہونے والے حالیہ واقعات نے تو اس شک کو یقین میں بدل دیا ہے کہ ’را‘ پورے طریقے سے ممبنی حملوں کا بدلیہ لینے کے لئے سرگرم عمل ہے۔اگرچہ بھارت ان حملوں میں پاکستان کے ملوث ہونے کے شواہد تا حال پیش نہیں کر سکا۔

یک طرفہ دوستی میں ہم اتنے مخلص ہو چکے ہیں کہ بلوچستان، کراچی، سوات ، وزیر ستان، پنڈی ، اسلام آباد اور لاہور میں پے درپے ہونے والے حملوں میں واضح ثبوت پانے کے دعوے کرنے کے باوجود ہم صدائے احتجاج بلند نہیں کر سکتے۔ شرم الشیخ میں ذرا سا اشارہ دیا تھا تو منموہن سنگھ صاحب کی گھگی بندھ گئی تھی۔ ان کی معصوم صورت دیکھ کر ہمارے گیلانی صاحب کو ڈر لگا کہ کہیں یہ یک طرفہ دوستی خطرے میں نہ پڑ جائے۔ اس کے بعد بلوچستان سے اسلام آباد اور کراچی سے سوات اور وزیر ستان تک اودھم مچا رہا، حساس اداروں کی عمارتیں، قومی اور صوبانی مراکز، قانون نافذ کرنے والے ادارے سب کے سب خاک اور خون میں غلطاں ہوتے رہے لیکن ہم نے بے نام سا احتجاج بھی نہیں کیا۔

اس کے برعکس ممبئی حملوں کے فورا بعد بغیر تحقیق کے انڈیا نے جو لاوا اگلا تھا اس سے شاید ہی کوئی ناواقف ہو۔ ہم سے آئی ایس آئی کے ڈائیریکٹر جنرل کو انڈیا بھیجنے کا مطالبہ کیا گیا، اور ہم نے اتنے سارے واقعات کے بعد کسی سپاہی تک کا مطالبہ نہیں کیا۔

کیا یہ سارے واقعات ہماری آنکھیں کھولنے کے لئے کافی نہیں؟ کیا ان واقعات کی حکمت عملی اور طریقہ واردات دیکھ کر ہمارے ماہرین یہ اندازہ نہیں لگا سکتے کہ تربیت کہاں سے لی گئی ہے؟ کیا ہر واقعے کی ذمہ داری طالبان پر ڈال دینے سے معاملات حل ہو جائیں گے؟ کب تک ہم کبوتر کی طرح آنکھیں بند کیئے رہیں گے؟

اب وقت آگیا ہے کہ ہم اپنی ترجیحات کا تعین کریں، یک طرفہ دوستی اور تعاون کی پالیسی پر نظر ثانی کریں ، اوردوسروں کے بجائے ملکی مفاد کو مقدم رکھیں۔ ورنہ یہ آگ پھیلتی جائے گی اور ہم جلتے رہیں گے۔ خدارا مزید انتظار مت کریں اور بے نقاب کر دیں ان تمام کرداروں کو جو یہ آگ اور خون کی ہولی کھیل رہے ہیں۔

__________________
محتاج اصلاح و دعا