پاکستان اس وقت اپنی تاریخ کی بد ترین دہشت گردی کی لپیٹ میں آیا ہوا ہے۔ اب تک ہزاروں معصوم، بے گناہ افراد خؤد کش حملوں اور دھماکوں کی زد میں آ کر شہید ہو چکے ہیں ۔ لا تعداد افراد اپنے جسموں کے قیمتی حصوں سے محروم ہو چکے ہیں اور بے بسی و لاچاری کی زندگی گزارنے پر مجبور ہیں۔ ہر آنے والا دن ، ہر دن طلوع ہونے والا نیا سورج ایک نئے خون ریز واقعے کی اطلاع لاتا ہے۔ ہماری آنکھیں جو کبھی انسوؤں سے روتی تھیں ان سے پانی کے سوتے اب خشک ہو چلے۔ ایک عجیب سی بے حسی تاری ہوتی چلی جا رہی ہے۔ 15، 20 افراد کی ہلاکت تو معمول ہوتی جا رہی ہے۔ اور جب اتنے افراد ہلاک ہوتے ہیں تو دل کے کسی گوشے میں ایک خوشی کی لہر سی اٹھتی ہے کہ چلو شکر ہے تھوڑے بندے مرے ہیں۔ اگر کوئی خود کش حملے کی خبر آ جائے تو افسوس کے ساتھ ساتھ بیزاری سی ہوتی ہے اور اگر خبر نہ آئے تو حیرانگی سی۔

انہی حالات میں ہمارے محافظ ادارے شاید ہمارے تحفظ کے لیے کوشاں ہوں۔ اسکی ایک مثال گزشتہ ہفتے اسلام آباد پولیس کی طرف سے جاری ہونے ممکنہ خود کش حملہ آور کو پہچاننے کی نشانیاں تھیں۔ ان نشانیوں میں ایک خاص بات یہ تھی کہ "ممکنہ خؤد کش حملہ آور داڑھی والا ہوگا"

طالبان کے خلاف جاری نفرت کی لہر میں ۔ ۔ ۔ ہو سکتا ہے پاکستانیوں کی اکثریت اس بات پر ایمان لے آئی ہو۔ لیکن جو آنکھیں کھلی رکھتے ان کے لیے یہ "پہچان" حیران کن ہے۔ میں نے اس وقت بھی سوچا تھا کہ اس پر اپنا خیال ظاہر کر دوں لیکن بوجوہ نہ کر سکا۔

خؤد کش حملہ کی یہ "نشانی" اس لیے حیران کن ہے کیوں کہ میری نظر سے خؤد کش حملہ آوروں کی جتنی بھی تصاویر گزری ہیں ان میں اکثریت کلین شیوڈ ہے یا پھر بغیر داڑھی کے مونچھوں والوں کی۔ ایسے میں داڑھی کو بطور خاص نشانی میں شامل کیا جانا ۔ ۔ ۔ سادگی ہے یا کوئی خآص پرخاش؟ یہ بات سمجھ سے باہر ہے۔ میری ذاتی رائے میں ایک خآص طبقہ جان بوجھ کر ان سنگین حآلات میں مذہبی رائے رکھنے والے افراد کو دیوار کے ساتھ لگا رہا ہے۔ وگرنہ اس بات کی کوئی منطق سمجھ نہیں آتی کہ کیوں کر حالیہ دہشت گردی میں اسلام پسندوں کو شامل کیا جا رہا ہے۔ اس سلسلے میں مزید بات یہ بھی ہے کہ اگر وہ لوگ کہ جو حملوں میں ملوث تھے وہ مسلمان ہی تھے اور طالبان ہی تھے تو انہوں نے مساجد پر فائرنگ کیوں کی (وہ تو اسلام نافذ کرنے کا دوعوی کرتے ہیں غلط یا درست یہ الگ بحث ہے) وہ کلین شیوڈ کیوں ہیں جبکہ دوسروں سے زبردستی داڑھیاں رکھواتے ہیں۔ اسکی مثال بھارت میں اجمل قصاب کی گرفتاری بھی ہے۔ اسکا تعلق جس تنظیم جماعت الدعوہ سے بیان کیا جاتا ہے وہ تنظیم داڑھی کو اتنا لمبا کرتی ہے کہ سینے سے نیچے تک چلی جاتی ہے۔لیکن اجمل قصاب کلین شیوڈ تھا۔ جب وہ لوگ خؤاہ طالبان ہوں یا کوئی اور ۔ ۔ ۔ فدائی مشن کریں گے تو انکو اپنی شناخت چھپانے کی کیا ضرورت؟ اگر یہ کہا جائے کہ وہ اس لیے ایسا کرتے ہیں تاکہ پولیس انکو نہ روکے تو یہ ماننے والی بات نہیں ۔کیوں کہ پشاور میں تو ہر دوسرا بندہ داڑھی والا ہے۔ لاہور یا اسلام آباد میں بھیئ داڑھی رکھنے والے افراد کی کمی نہیں ۔ اور ویسے بھی جس دید دلیری سے طالبان ہر دہشت گردی کا واقعہ اپنے سر لے لیتے ہیں اس حساب سے تو انکو داڑھی والا بندہ ہی بھیجنا چاہیے تھا تاکہ اور زیادہ رعب پڑے۔

مجھے اس بات میں کوئی جان نظر نہیں آتی کہ خود کش حملہ آور محض داڑھی والا ہی ہوگا۔ بلکہ میری ذاتی معلومات کے مطابق جو کہ خود کش حملہ آوروں کی تصاویر دیکھ کر بنی ہے وہ یہ کہ حملہ آوروں کی اکثریت کلین شیوڈ ہوتی ہے۔اور یہ کہ داڑھی کو بنیاد بنا کر در حقیقت کسی نے اپنی ذاتی پرخاش نکالی ہے۔