دہشت گردی یا پارس کا پتھر

اكرام الحق

پارس کے پتھر کے حوالے سے مشہور ہے کہ دہ خود تو اگرچہ پتھر ہے لیکن اگر لوهے کو چھو لے تو اسے سونا بنا دیتا ہے۔اردو لغت میں اسکے بارے میں لکھا ہے کہ (ایک پتھر جس کی نسبت مشہور ہے کہ لوہے سے چھو جائے تو اسے سونا بنا دیتا ہے۔) کتنی حقیقت ہے اور کتنا فسانہ اس راز سے اہل علم ہی شناسا ہوں گے۔
دہشت گردی ایک لعنت ہے، کوئی مذہب تو کجا کوئی ہوشمند اور ذی شعور انسان اس کی اجازت نہیں دے سکتا۔ لیکن یہی دہشت گردی اپنی تمام تر خامیوں، تباہیوں اور نقصانات کے باوجود بعض ممالک کے لئے پارس کا پتھر ثابت ہوئی ہے۔
ان ممالک کی فہرست میں سب سے نمایاں نام تو امریکہ بہادر کا ہے۔ اس کو تو جادو کی چھڑی مل گئی ہے۔ بلکہ اگر یوں کہا جائے تو زیادہ بہتر ہو گا کہ اس کے ہاتھ میں تو عمرو عیار کی زنبیل آگئی ہے۔ جیسا کہ بچپن میں پڑھا کرتے تھے کہ عمرو عیار کی زنبیل ایسی حیرت انگیز تھی کہ اس میں جس چیز کا خیال دل میں لا کر ہاتھ ڈالا جائے وہ چیز نکل آتی تھی۔

پہلے دن سے ہی انتہائی مطالبے کے باوجود دہشت گردی کی بین الاقوامی اور جامع تعریف متعین نہیں کی گئی۔کیوں کہ اگر متعین ہو جاتی توامریکہ اور اس کے حواری اپنی مرضی سے اس پارس پتھر کا استعمال نہیں کر سکتے تھے۔
چونکہ دہشت گردی کی تعریف متعین نہیں ہے لہذا جو بات امریکہ سرکار کو اچھی نہ لگی وہ دہشت گردی ہے۔ کسی نے بات نہ مانی تو وہ دہشت گرد ہے ۔ غرضیکہ دہشت گردی اپنی تمام تر خامیوں کے باوجود امریکہ کے لئے پارس کا پتھر ثابت ہوئی۔ اب وہ جس انداز میں مرضی چاہیں اپنی خواہشات پوری کر سکتے ہیں ، اور اس کام میں ان کے حواری ان کے شانہ بشانہ ہیں۔
اسرائیل کو لیجئے۔ دہشت گردی اس کے لئے بھی ایک انعام سے کم نہیں۔ جب دل چاہا فلسطین پر حملہ کر دیا ۔۔ وجہ ؟؟ ”دہشت گردی “ کی روک تھام۔اس کے بعد اقوام متحدہ سمیت کوئی اسے روک نہیں سکتا۔
بھارت بھی اس دوڑ میں کسی سے پیچھے نہیں۔ اس کے لئے تو دہشت گردی نعمت غیر مترقبہ سے کم نہیں۔ کیوں کہ کئی بین الاقوامی معاہدوں کی خلاف ورزیوں کا مرتکب ہو جانے کی وجہ سے اسے اپنی خواہشات کی تکمیل میں بین الاقوامی تنقید کی وجہ سے کچھ دباﺅ تھا۔

مثال کے طور پر مسئلہ کشمیر کے حوالے سے حق خود ارادیت نہ دینے کا مجرم ہونے کی وجہ سے اسے مختلف اطراف سے تنقید کا سامنا تھا۔ اب پانی کے مسئلے پر سند ھ طاس معاہدہ کی خلاف ورزیاں زوروں پر ہیں ۔ پاکستان نے شور مچایا تو بھارت سرکار پر تنقید ہونے لگی۔

اس کے پاس مذاکرات کے علاوہ کوئی چارہ نہیں تھا جس میں لازما کچھ نہ کچھ تو ماننا پڑتا ہے۔ اسی اثناء میں بھارت کی لاٹری نکل آئی اور ممبئی حملے ہو گئے۔ ایک سوچے سمجھے منصوبے کے تحت بغیر تحقیق کئے پاکستان پر الزام لگا دیا گیا۔ بھارتی میڈیا نے بھی حکومت کے ساتھ کندھے سے کندھا ملا لیا اور پوری دنیا میں پاکستان کے خلاف لاوا اگلنا شروع کر دیا۔پاکستانی قیادت سیاسی نا پختگی کی وجہ سے بوکھلا گئی ۔
پاکستانیوں کی بوکھلاہٹ نے بھارت سرکار کے حوصلے اور بلند کر دئیے جس کے نتیجے میں انہوں نے پروپیگنڈا اور تیز کر دیا۔ پاکستان پر دباﺅ اتنا بڑھا کہ اس کو پرانے سارے مسائل بھول گئے ۔ یہ حملے کس نے کرائے، اس کے پیچھے کن عناصر کا ہاتھ تھا۔ خود اندرونی علیحدگی پسند اس میں ملوث ہیں یا بیرونی ہاتھ ہے۔ یہ ساری باتیں ابھی تک تشنہ جواب ہیں۔ ایک بڑی تعداد کا خیال ہے کہ یہ حملے خود بھارت سرکار کا کارنامہ ہے ۔
حقیقت جو بھی ہے بھارت کے لئے یہ دہشت گردی پارس کا پتھر ثابت ہوئی ۔ اب نہ تو کسی کو کشمیر کی فکر ہے اور نہ ہی پانی کا مسئلہ زیر بحث ہے۔ بس پاکستان پر دباﺅ ہے کہ ان حملوں میں ملوث عناصر کے خلاف کاروائی کی جائے۔
اگرچہ پاکستان دہشت گردی سے متاثر ہونے والے ملکوں میں سب سے اوپر ہے ۔ ایک طرف بیرونی مداخلت روکنے کے لئے اسے فوج کی بڑی تعداد اپنی سرحدوں پر لگانی پڑی تو دوسری طرف داخلی انتشار پر قابو پانے کے لئے بے پناہ وسائل خرچ کرنے پڑتے ہیں۔
لیکن اس کے باوجود پاکستانی حکمرانوں کے لئے دہشت گردی ”پارس “سے کم نہیں ہے۔کیوں کہ اس ضمن میں اب تک لاکھوں ڈالرز وصول کئے جا چکے ہیں۔ گزشتہ حکمرانوں نے اربوں روپے کمائے، جن کا حساب کتاب نہ ہونے کی وجہ سے خوب شاہ خرچیاں کی گئیں۔ اپنوں کو نوازنے اور مخالفوں کو چپ کرانے یا پچھاڑنے کے ”کار خیر“ میں استعمال کئے گئے۔

تو دہشت گردی اپنی تمام تر نقصانات کے علی الرغم بعض ممالک کے لئے ”پارس کا پتھر “ ثابت ہوئی ہے۔ ہر ملک اسے اپنے مفادات کے لئے استعمال کر رہا ہے جن میں پاکستان بھی شامل ہے۔ لیکن فرق صرف اتنا ہے کہ دیگر ممالک کے حکمران اس کے استعمال میں ذاتی اور سیاسی مفادات کے ساتھ ساتھ ملکی مفاد کوبھی مد نظر رکھتے ہیں ، جبکہ پاکستان میں یہ پتھر صرف حکمران طبقے کے ذاتی مفادات کے لئے استعمال ہوتا ہے۔

__________________
محتاج اصلاح و دعا