تحریر: راجہ اکرام الحق

عبادت ہر مذہب کی تعلیمات کا لازمی جزو ہے ۔ طریقہ کار کا اختلاف بجا لیکن نفس عبادت یا اس کی اہمیت سے انکار ممکن نہیں۔ ان عبادتوں میں بھی درجات ہیں ، بعض اجر و ثواب کے لحاظ سے دیگر سے افضل ہیں اور بعض کم تر۔ کسی بھی مذہب میں عبادات کا اصل مقصد انسان کو عملی مشق سے گزار کر ایسے افراد کار تیار کرنا ہوتا ہے جو انفرادی اور اجتماعی زندگی کو اس مذہب کو مطلوب ہو۔ لہذا عبادات کا انسان کے رویے اور طرز فکر پر اثر انداز ہونا فطری ہے۔ یہی وجہ ہے کہ مختلف مذاہب کے پیروکار مختلف طرز فکر، مختلف زاویہ نگاہ اور مختلف رویوں کے مالک ہوتے ہیں۔ ایک ہی مسئلے پر مختلف نقطہ ہائے نظر اور مختلف رد عمل کا سامنے آنا مذہبی وابسگتی کے تنوع کے باعث ہے ۔ اگرچہ دیگر عوامل بھی اپنا کردار ادا کرتے ہیں۔

اسلام ایک مکمل ضابطہ حیات ہے ۔ ایک مسلمان صرف کلمہ پڑھ لینے سے ہی مسلمان نہیں کہلاتا بلکہ عقائد کے ساتھ ساتھ عبادات بھی اسلام کا جزو لا ینفک ہیں جن کی ادائیگی ہر مسلمان سے مطلوب ہے۔ اسلامی نظریہ کائنات میں انسان چونکہ خلیفة اللہ فی الاراض ہے اس لئے عبادات ، معاملات اور اخلاقیات کا سارا نظام وہ مطلوبہ انسان تیار کرنے کی ایک عملی مشق ہے جو انسان کو بطور خلیفہ اپنے فرائض سر انجام دینے کے لئے تیار کر سکے۔

نماز، روزہ ، حج ، زکواة ، جہاد اور دیگر عبادتیں جہاں انسان کی روحانی تربیت اور ترقی کا فائدہ دیتی ہیں وہیں عملی زندگی میں انسان کے رویوں کی تشکیل میں بھی اہم کردار ادا کرتی ہیں۔ اخلاص، ایثار، جہد مسلسل، وقت کی پابندی، ایفائے عہد ، امانت و دیانت، نظم و ضبط، اطاعت امیر، خدمت خلق، کمزوروں کا احساس اور دیگر بے شمار صفات انسان میں پیدا ہوتی ہیں ، ان صفات سے متصف انسان جب جمع ہوں تو وہ حقیقی فلاحی معاشر تشکیل پاتا ہے جو مقصود شریعت ہے۔

ان تمام عبادات کے کچھ مشترک اثرات و فوائد ہیں، لیکن اس کے ساتھ ساتھ ہر عبادت کے کچھو روحانی اور جسمانی فوائد ایسے بھی ہوتے ہیں جو دیگر سے مختلف ہیں۔

یوں تو ارکان اسلام میں سے ہر ہر رکن اور ہر ہر عبادت اہم ہے لیکن تمام عبادتوں میں روزے کو ایک الگ ہی مقام حاصل ہے۔ ساری عبادتوں کا اجر فرشتوں کے ذریعے لکھوایا جاتا ہے اور روزے کا اجر اللہ نے اپنے ذمہ لیا ہوا ہے کہ "روزہ میرے لئے ہے اور اس کا اجر بھی میں دوں ہی دوں گا" ، کیوں کہ یہ ایسی عبادت ہے جس میں اخلاص اور خوف خدا کی اعلی ترین مثال ملتی ہے۔ مشکلات پر صبر کا تجربہ اور دوسرے کے حالات کو سمجھنے کا درس ملتا ہے۔ بھوک پیاس کے ان مراحل سے گزر کر انسان کے دل میں ان لوگوں کے لئے ہمدردی پیدا ہوتی ہے جو مفلوک الحال ہیں اور اس کے نتیجے میں انفاق اور خدمت خلق کا جذبہ پیدا ہوتا ہے۔

روزہ سال بھر میں صرف ماہ رمضان میں ہی فرض ہے۔ لہذا دیگر مہینوں کے مقابلے میں ماہ رمضان کا مقام و مرتبہ بھی خاص ہے۔ رحمتوں ، برکتوں اور مغفرتوں کا یہ مہینہ کئی لحاظ سے دیگر ماہ و ایام سے مختلف ہے۔ اس بابرکت مہینے کے بہت سے روحانی اور جسمانی مثبیت اثرات ہیں جو جا بجا دیکھے جا سکتے ہیں لیکن ان کے ساتھ ساتھ کچھ ایسے منفی دنیاوی اثرات بھی ہیں جوہمارے اعمال کے باعث ہمارے ہی ہم جنسوں کے لئے مشکلات پیدا کرتے ہیں۔

اس مہینے کا ایسا سرور اور راحت ہے کہ سال بھر ہر مسلمان اس کے انتظار میں رہتا ہے۔
اہل تقوی کا انتظار تو سمجھ میں آنے والی بات ہے۔ لیکن اہل ثروت سے لے کر مفلوک الحال انسان تک، سرمایہ داروں سے لے کر ریڑھی والوں تک ہر ہر انسان اس کے انتظار میں ہوتا ہے ۔ اور تو اور خود حکومت بھی اسی انتظار میں ہوتی ہے۔ لیکن یاد رہے انتظار کے اسباب و وجوہات ہر طبقہ کے لحاظ سے مختلف ہیں ۔

اہل ایمان اور اہل تقوی کا انتظار تو ظاہر ہے کہ نیکیوں کے اس موسم بہار میں جب ایک نیکی ستر کے برابر اور نفل عبادت کا ثواب فرض کے برابر ہوتا ہے تو ان کا انتظار مسابقت فی الخیرات کے ہو سکتا ہے۔ اہل ثروت بھی جو اہل خیر میں سے ہیں ، اس ماہ میں زکواة و صدقات ادا کر کے زیادہ ثواب کمانے کی لالچ میں اس کا انتظار کرتے ہیں، مفلوک الحال کا انتظار اس لئے کہ اس ماہ میں اہل خیر کے انفاق میں سے کچھ مل جائے گا جو ان کے اور خاندان کے گزر بسر میں آسانی پیدا کرے گا۔ یہ انتظار تو سعادت مندوں کو نصیب ہوتا ہے، اور اس کے اثرات سے معاشرہ مستفید ہوتا ہے۔

لیکن ایک انتطار اور ہے جو تاجروں، ریڑھی والوں اور حکومت کو رہتا ہے۔ اور جس کے منفی اثرات سے سارا معاشرہ متاثر ہوتا ہے۔ تاجر وں کا انتظار یوں کہ سحری و افطاری کے لئے لوگ مجبورا خرایداری کرتے ہیں، ان چیزوں کی بھی جن سے عام دنوں میں قناعت برتی جاتی ہے۔ تو ان کا مقصد ہوتا ہے کہ ان تیس دنوں میں پورے سال کے خسارے پورے کرو۔ ریڑھی والے بھی اپنا کردار ادا کرنے میں کسی تساہل سے کام نہیں لیتے۔

حکومت کا انتظار کثیر الجہت ہوتا ہے ایک یہ کہ بینکوں میں پڑے ہوئے مال سے زکواة لے کر خزانے بھرے جائیں۔ دوسرا اس کے ساتھ ساتھ اشیاء خورد ونوش کی قیمتوں میں ہوشربا اضافہ، چینی اور آٹے کی مصنوعی قلت پیدا کر کے عوام کو پریشان کرنا اور پھر من مانی قیمتیں مقرر کرنا ایسے کارنامے ہیں جن کے لئے رمضان کا وقت زیادہ موزوں رہتا ہے تا کہ لوگوں کی مجبوری سے بھرپور فائدہ اٹھایا جا سکے۔ اس بار بھی رمضان سے کچھ ہی دن پہلے وفاق کی جانب سے چینی کی قیمتیں بڑھا دی گئیں۔

حکمرانوں کے رویے سے لگتا ہے کہ وہ عوام میں روزے کی حقیقی روح بیدار کرنا چاہتے ہیں تا کہ اس عبادت کے مقرر کرنے کی جو حکمتیں اور مقاصد ہیں وہ بانداز احسن حاصل ہو سکیں۔

ایک اور افسوس ناک بات جو ہم میں اور دیگر اقوام میں مختلف ہے، وہ یہ کہ جب دیگر مذاہب کے تہوار ہوں، یا ان کے خاص ایام ہوں۔ مثلا: کرسمس ، مدر ڈے، فادر ڈے، یا اور کوئی ایسے ایام جن کی کوئی مذہبی یا تہذیبی و ثقافتی اہمیت ہو تو وہاں سیل لگتی ہے، سستے داموں اشیاء فروخت ہوتی ہے، ایک خریدنے پر ایک مفت دی جاتی ہے۔، تاکہ زیادہ سے زیادہ لو گ اس تہوار میں شرکت کر سکیں۔

لیکن ہمارے ہاں ایک ایسا رویہ بن چکا ہے کہ اس طرح کے ایام اور تہواروں کو اپنے پچھلے سارے خسارے پورے کرنے کا سنہری موقع تصور کیا جاتا ہے۔ مصنوعی قلت پیدا کر کے قیمیتوں میں ایسا اضافہ کیا جاتا ہے کہ الامان و الحفیظ۔۔ ایسا لگتا ہے کہ پاکستان میں رمضان کی آمد در اصل عوام کی شامت ہے۔ ایسے میں رمضان مبارک کی آمد جہاں اپنی برکتوں اور رحمتوں کے باعث مسرت ہے اس سے کہیں زیادہ عوام کی شامت کے حوالے قابل افسوس ہے ۔جو کہ نہ صرف حکمرانوں کے ہاتھوں بلکہ خود عوام کے ہاتھوں آتی ہے۔

آج جن حالات سے وطن عزیز گزر رہا ہے، جہاں پہلے سے مہنگائی آسمان چھو رہی تھی، پھر سیلاب نے رہی سہی کسر نکال دی۔ اور اب ایک بار پھر اشاء صرف کی قیمتوں میں ہونے والے اضافے نے عوام کے اندر وہ مطلوبہ صبر، برداشت اور ایثار کی حقیقی روح پیدا کرنا شروع کر دی ہے جو کہ مقصود شریعت ہے۔ ان حالات کو دیکھ کر اس کے علاوہ کیا کہا جا سکتا ہے کہ ہمارے ہاں رمضان کی آمد کو حکومت اور ہمارے ہم جنسوں نے مل کر اسے عوام کی شامت بنا دیا ہے۔ جس کا براہ راست شکار مزدور طبقہ اور نجی ملازمین زیادہ ہیں۔

نہ صرف حکومت وقت کو اس ماہ مقدس میں خصوصی ریلیف دینا چاہیئے بلکہ تاجروں کو بھی چاہیئے کہ اللہ کی رضا کے پیش نظر منافع کی شرح کو اتنا رکھیں کہ اشیاء کی خرید عوام کی دسترس میں رہے۔

__________________
محتاج اصلاح و دعا