وقت کرتا ہے پرورش برسوں ۔۔۔ حادثہ ایک دم نہیں ہوتا
ایسے واقعات جو تاریخ اور جغرافیہ تبدیل کر دیں اچانک رونما نہیں ہوتے ، بلکہ ان کے پیچھے برسوں سے پکنے والا لاوا، سینوں میں پلنے والی نفرت، احساس محرومی، اور ناانصافیوں کی ایک طویل داستان ہوتی ہے۔ تاریخ انسانی پر اگر ایک طائرانہ نگاہ ڈالی جائے تو اس کی بے شمار مثالیں مل جاتی ہیں۔

روز اول ہی سے ایسے واقعات ہوتے رہے جنہوں نے مشرقی اور مغربی پاکستان میں دوری کی بنیاد ڈال دی تھی، پھر ہر آنے والے دن اور ہر آنے والے حکمران سے ایسی غلطیاں دانستہ و نا دانستہ سرزد ہوتی رہیں جنہوں نے زخموں کو ناسور بنا دیا اور پھر ہم نے اس کا خمیازہ بھگتا۔

یہ درست ہے کہ اس پورے واقعے میں ایوب خان کا کردار مرکزی رہا ،یحیی خان اور بھٹو غلط وقت اور غلط جگہ پر آ گئے تھے۔ لیکن اس کے ساتھ ساتھ یہ بات بھی ضرور مد نظر رکھنی چاہیے کہ جناب ذو الفقار علی بھٹو کی انا اور ہٹ دھرمی نے اس تحریک میں نئی روح پھونکی، ورنہ ایک وقت ایسا آ گیا تھا کہ اگر جمہوریت کے دعوے کے ساتھ ساتھ جمہوری رویہ بھی اپناتے معاملات میں سلجھاؤ کی امید رکھی جا سکتی تھی۔

الیکشن میں شیخ مجیب اکثریت حاسل کر چکے تھے، لیکن ذو الفقار علی بھٹو نے نتائج کی بنیاد پر فیصلہ ماننے سے انکار کر دیا، جس نے محرومیوں اور نا انصافیوں کے احساس میں مزید اضافہ کیا ۔ بطور خاص بھٹو کا یہ نعرہ کہ ”ادھر تم ادھر ہم“ بڑا ہی کارگر ثابت ہوا۔

ورنہ اگر اس وقت جمہوری روایات، تقاضوں اور اصولوں کو زیر عمل لایا جاتا، شیخ مجیب کو حکومت دے دی جاتی تو اس احساس محرومی میں یقینی کمی آ سکتی تھی، اگرچہ اس کے نتیجے میں مشرقی پاکستان کو نظر انداز ہونے کا خطرہ کسی حد تک تھا لیکن کم از کم ان نا انصافیوں کو ازالہ ہو سکتا تھا جو پچھلے کئی سال سے ہو رہی تھیں۔

لیکن اسیا نہ ہو سکا، ایک سنہری موقع ضائع کر دیا گیا، وطن کی سالمیت ضد ، انا اور ہٹ دھرمی کی نذر کر دی گئی ۔ دشمن کے عزائم کو تقویت ملی اور وطن عزیز دو لخت ہو گیا۔

لیکن اس پورے کھیل میں بیرونی طاقتوں بطور خاص امریکہ کا ہاتھ نظر انداز نہیں کیا جا سکتا۔ یہ میں اس روایتی سوچ کا اظہار نہیں کر رہا جو ہر واقعے کے بعد کی جا سکتی ہے بلکہ حقائق یہی کہتے ہیں۔ کچھ عرصہ قبل اسٹیٹ ڈپارٹمنٹ امریکہ کی ایک دستاویز انٹر نیٹ پر آئی ہے اس واقعہ کے حوالہ سے اس کا مطالعہ اس حقیقت کے بارے میں آگاہی کے حوالہ سے مفید ہوگا۔
اور ساتھ ہی ساتھ اس ساتویں بحری بیٹرے کا ابھی تک نہ پہنچنا بھی کسی سازش کی غمازی کرتا دکھا ئی دیتا ہے۔

جب کسی بھی قوم کے افراد ذاتی مفاد کو قومی مفاد پر ترجیح دینا شروع کر دیں تو اس طرح کے سانحات کا رونما ہونا یقینی ہو جاتا ہے۔ لیکن عقل مند وہ ہے جو ٹھوکر کھا کر سنبھل جائے لیکن بد قسمتی سے ہم نے اس واقعے کو بھی روز مرہ کے عام واقعات کی طرح بھلا دیا ہے۔

بطور خاص 16دسمبر کو اس سلسلے میں جو کچھ ہونا چاہیے کہیں نظر نہیں آتا، کسی پاکستانی کا سر شرم سے جھکا ہو، کسی کے چہرے سے اتنے بڑے واقعے کی یاد میں ملال جھلکتا ہو، کسی کی آنکھ نم ہو، کسی نے وہی غلطیاں نہ دہرانے کا عزم کیا ہو۔۔۔ مجھے کہیں ایسا کچھ دکھائی نہیں دیا۔
اور ”خاکم بدہن“ جس قوم کا حافظہ اتنا کمزور ہو یا جو قوم ماضی کے واقعات سے سبق حاصل کرنے کے بجائے غفلت برتنا شروع کر دے تو اس کا مستقبل مخدوش ہو جاتا ہے۔

ہم نے نہ صرف اس واقعہ کو بھلا دیا بلکہ وہی غلطیاں ایک بار پھر دہرائی جا رہی ہیں، احساس محرومی اور نا انصافیاں ہر طرف عام ہیں، اپنوں کے خلاف فوج کشی کی وجہ سے جو صورتحال ہے اس سے بھی سب آگاہ ہیں، سند ھ اور بلوچستان میں علیحدگی کی تحریکیں سر اٹھا رہی ہیں۔ اور ہمارے حکمران بالکل وہی منظر پیش کر رہے ہیں جو اس وقت کے حکمرانوں کا تھا۔وہی چال بے ڈھنگی وہی ریت مستانی۔

ضرورت ہے کہ ہم اپنے حالات کا جائزہ لیں اپنے عوام سے احساس محرومی کا خاتمہ کریں، نا انصافیوں کے چلن کوبند کریں اپنی غلطیوں سے سبق سکیھیں تاکہ وقت کی سالمیت اور استحکام کے لئے کردار ادا کر سکیں۔
اللہ ہمیں عقل عطا فرمائے اور وطن عزیز کی حفاظت فرمائے ۔۔ آمین


(یہ ایک تبصرہ ہے جو کسی کے مضمون پر کیا تھا، میرا خیال ہے کہ اس کو یہاں لگانا مفید ہوگا۔ اس لئے پیش خدمت ہے۔)

__________________
محتاج اصلاح و دعا