درجہ بندی: (1 votes - 5.00 average)

شاخ نازک کا ۔۔۔ ناپائیدار آشیانہ

السلام علیکم !
زندگی اتنی مصروف یا شاید مصائب سے پُر ہے کہ انسان اپنے روزانہ کے معمولات میں سے کچھ لمحات سکون یا تفریح کے چاہتا ہے ۔ اور سرگرداں رہتا ہے کہ کسی طرح اپنے مشغولات کا بوجھ اُتار کر خوشی کے لمحات میسر آجائیں ۔ سکون کی تلاش اور تفریح کے یہ مواقع حاصل کرنا کچھ بُرا نہیں ، بلکہ انسان کی جائز خواہش بھی ہے لیکن اصل سوال یہ ہے کہ وہ ان لمحات کو کس طرح گزارتا ہے ؟ اس بات کا تعین کیسے ہو کہ وہ یہ اوقات گزار کر کچھ حاصل بھی کر رہا ہے یا محض وقتی سکون اور خوشی کی خاطر اپنا مستقبل داؤ پر لگا رہا ہے ؟
بحیثیت مسلمان ہمارا ایمان ہے کہ یہ زندگی اللہ کی امانت ہے جس کا حساب دینا ہوگا ۔ اب اس امانت میں خیانت کر کے کیا ہمارے شب و روز میں اطمینان اور قرار آسکتا ہے ؟ اگر ہم عارضی خوشی کے لیے اپنے رب کو ناراض کر دیں تو یہ خوشی بھی عارضی اور مستقبل ( آخرت ) کا عذاب بن جائے ۔
مسلمان کی شان یہ ہے کہ وہ اس طرح اپنے غم اور خوشی کے لمحات گزارے کہ ایک وقار جھلکتا ہو ۔ لیکن آج بحیثیت پاکستانی اور مسلمان ہمارا معاشرہ جو رنگ ڈھنگ اختیار کر گیا ہے اسے دیکھ کر وقار تو ایک طرف ، ہم مغربی اور ہندوؤانہ تہذیب کی نقالی کر کے کبھی ان کی برابری تک نہیں کر سکے یعنی کبھی بھی مغرب نے ہمیں اپنے ہم پلہ نہیں جانا ، بلکہ ہم ایک ایسی قوم بن گئے جو زمانے کی ٹھکرائی ہوئی قوم گردانی جاتی ہے اور ہم خوش ہیں کہ ترقی پا رہے ہیں ۔
ہم نے اپنی تہذیب کے سارے جامے اُتار پھنکے اس کشش کی خاطر جو خود اپنے وجود میں کھوکلی ہے جس کا خمیازہ ان کے عوام بھگت رہے ہیں ۔

نظر کو خیرہ کرتی ہے چمک تہذیب خاضر کی
یہ صناعی مگر جھوٹے نگوں کی ریزہ کاری ہے

ایسے ہی بے ڈھرک کچے ذہنوں کی پیداوار ، مغرب سے درآمد شدہ تہوار “ ویلینٹائن ڈے “ ہے جس کی تاریخ کیا ہے اس کی تفصیل میں جانے کی ضروت نہیں یا شاید تاریخ سے ہمیں کوئی سروکار نہیں ۔ بس شتر بے مہار کی طرح اس تہذیب کے پیچھے اندھوں کی طرح دوڑنا ہمیں آتا ہے کہ جیسے ہمیں کوئی راہ سجھانے والا ہی نہ ہو ۔
عشق و عاشی اور محبت و پیمان کا یہ تہوار جس کا ہمارے مذہب سے دور کا بھی کوئی واسطہ نہیں ایسے منایا جاتا اور مقبول عام ہو گیا ہے کہ جیسے اگر اپنی زندگی کے اطوار اس طرز پہ نہ گزارے تو شاید زمانے کی نظروں سے گر جائیں گے ۔
ہمیں تو وہ قوم بننا تھا جو زمانے کو اپنے پیچھے لے کر چلے نہ کی خود زمانے کی گندی تہذیب کے جال میں پھنس کر اپنی حیثیت اور منصب بھول جائیں ۔


افسوس ہماری اس ذہنیت پر بھی کہ بجائے اپنے آپ اور اپنی آئندہ نسل کو اس ڈے اور اس جیسے دوسرے ڈیز سے بچانے کے ، تاویلیں پیش کی جاتی ہیں کہ شوہر بیوی کو یا اولاد والدین کو اس دن پھول اور تحائف دے دیں تو کوئی بری بات نہیں ۔ جبکہ مذہب اسلام میں تمام رشتوں کے حقوق و فرائض کا خیال اس نزاکت سے رکھا گیا ہے کہ اگر ان پر چلیں تو کبھی کوئی ڈے منا کر جتلانا نہ پڑے کہ ہمیں اپنے پیاروں سے محبت ہے ۔
یہ کام تو وہ قومیں کرتی ہیں جس کا تمدنی نظام تباہی کے کنارے پر ہو اور دنیا کو محض دھوکہ دینے کے لیے وہ ان نام نہاد ایام کا اہتمام کرتی ہیں جس سے فحاشی کا دروازہ بھی کھلے اور دنیا کو یہ باور کرایا جاسکے کہ ہم مہذب قوم ہیں
مغرب جو کہ اسلام سے کلی طور پر متصادم ہے ایک تیر سے دو شکار کر رہا ہے اور افسوس آج کا مسلمان زبردست دھوکے میں نام نہاد ترقی کے نام پر ذلت کی اتہاہ گہرائیوں میں گرا جا رہا ہے ۔
مغرب نے تو اپنے معاشرے کا دیوالیہ پن دیکھ لیا ۔۔۔۔۔۔
وہ اب ہمیں بھی اس طرف لے جا رہا ہے جو ہم برضا و رغبت قبول کر رہے ہیں ۔
لیکن ۔۔۔۔ یاد رکھنا چاہیئے ۔۔۔۔۔۔
آج ہماری کمزوری ، پستی ۔ ذلت اور ضلالت کا کوئی سبب ہے تو یہی کہ ۔۔۔۔۔۔
ہم اپنے دین کی پاکیزہ اور معطر تعلیمات اور اسے دنیا میں لانے والے ( صلی اللہ علیہ وسلم ) کو بھول گئے ہیں ۔۔۔

__________________

دختراسلام ڈاکٹر عافیہ صدیقی اور ان کے اہل خانہ کی عظمتوں کو سلام۔
مدہوش حکمرانو! ہوش میں آؤ۔۔۔