الرحمن ، الرحیم ، العفو اور الغفور اللہ تبارک وتعالی کی صفات ہیں اور مومن کی یہ شان ہوتی ہے کہ اس میں اللہ کی صفات کا عکس جھلکتا ہے۔ اور اللہ تبارک و تعالی کو معافی کا یہ عمل اتنا زیادہ پسند ہے کہ انسان اس کا اندازہ نہیں کر سکتا۔ جہاں اللہ تبارک و تعالی کو بندے کا اپنے رب سے توبہ کرنا معافی مانگنا پسند ہے وہیں اسے یہ بات بھی بے حد پسند ہے کہ کوئی انسان اپنے بھائی سے عفو و درگزر کا معاملہ فرمائے ۔ چاہے زیادتی اور غلطی کتنی ہی سنگین کیوں نہ ہو۔

دیگر مذاہب کی تعلیمات میں اگرچہ یہ ملتا ہے کہ اگر ایک گال پر تھپڑ پڑے تو دوسرا آگے کر دو، حالانکہ یہ محال اور غیر فطری ہے اسی لئے ان مذاہب کے پیروکار خود عمل پیرا نہیں ہیں ۔ لیکن اسلام جو کہ دین فطرت ہے اس نے انسانی فطرت کے عین مطابق احکامات دیئے ہیں۔ یہ ایک فطری بات ہے کہ عفو و درگزر کا معاملہ کرنا بطور خاص جب انسان بدلہ لینے کی طاقت بھی رکھتا ہو انتہائی مشکل امر ہے اسی لیے اسلام نے عدل کے ساتھ بدلہ لینے کی اجازت دی لیکن عفو درگزر کو افضل نہ صرف افضل قرار دیا بلکہ اس کی ترغیب بھی دی۔ جس کی تعلیمات قرآن کریم اور سنت صحیحہ میں جا بجا ملتی ہیں ۔


قرآن کریم میں ارشا د ہوا کہ ”فان عاقبتم فعاقبوا بمثل ما عوقبتم بہ“۔۔ اگر بدلہ لینا چاہو تو اتنا ہی لو جتنی تمہیں تکلیف دی گئی ہے۔ انسانی جبلت کے پیش نظر بدلہ لینے کی اجازت دی لیکن ساتھ ہی افضل عمل کی طرف اشارہ کرتے ہوئے فرمایا کہ ”ولئن صبرتم لھو خیر للصابرین“ کہ اگر صبر کرو تو یقینا اہل صبر کے لئے بہتر ہے۔ اسی طرح ایک اور جگہ فرمایا کہ ”جزاءسیئہ سیئة مثلھا “۔ برائی کا بدلہ اتنی ہی برائی ہے ۔۔۔۔۔۔ پھر آگے فرمایا کہ ”فمن عفا و اصلح فاجرہ علی اللہ“ کہ جس نے درگزر کیا اور صلح کر لی تو اس کا اجر اللہ پر ہے۔

اس سے اندازہ ہوتا ہے کہ بدلہ لینے کی اجازت دینے کے بعد صبر اور عفو و درگزر کی اہمیت و فضیلت بیان کر کے یہ واضح کر دیا گیا کہ اللہ کے ہاں یہ کتنا مقبول و محبوب ہے کہ انسان اجازت اور طاقت کے باوجود بدلہ نہ لے بلکہ عفو و درگزر کا معاملہ فرمائے ۔

تعلیمات نبوی اور عمل بنوی علی صاحبھا افضل التسلیمات کا مطالعہ بتاتا ہے کہ عفو ودرگزر کا کیا مقام ہے۔ فرمایا ”قوی وہ نہیں جو اپنے مقابل کو بچھاڑ دے بلکہ قوی ہو ہے جو اپنے غصے پر قابو پا لے“

اور جو شخص باوجود طاقت کے اپنے غصے پر قابو پا لے اس کی فضیلت میں ارشاد ہوا کہ ”من کظم غیظا و ھو قادر علی ان ینفذہ دعا ہ اللہ علی روس الخلائق حتی یخیرہ من ای الحور شاء“
کہ جس نے قوت نافذہ کے باوجود اپنے غصے پر قابو پایا اللہ تبارک و تعالی روز قیامت اسے تمام مخلوقات کے سامنے بلائیں گے اور اختیار دیں گے کہ جس حور کا چاہے انتخاب کرے۔

قرآن کریم اور سنت بنویہ علی صاحبھا افضل التسلیمات سے عفو و درگزر کی چند مثالیں

سیدنا یوسف علیہ السلام کا قصہ دیکھئے۔ آپ کے ساتھ آپ کے بھائیوں نے کیا سلوک روا رکھا اس سے سب واقف ہیں۔ پھر حالات بدلتے ہیں، یوسف علیہ السلام عزیز مصر بن جاتے ہیں، آپ کے بھائی آپ کے سامنے آتے ہیں ، تو آپ علیہ السلام بجائے اس کے کہ ان سے انتقام لیں ۔۔ فرمایا کہ ”لاتثریب علیکم الیوم“۔۔ آج تم پر کوئی پکڑ نہیں۔ اور یہ واقعہ درس دیتا ہے کہ سخت سے سخت تکالیف سہنے کے بعد بھی انبیاءکا طریقہ عفو و درگزر ہے نہ کہ انتقام لینا۔

نبی کریم صلی اللہ علیہ و سلم کی حیات طیبہ کا اگر مطالعہ کیا جائے تو ایسے بے شمار واقعات ملتے ہیں جن میں اپنے جانی دشمنوں کے ساتھ بھی درگزر کا ایسا معاملہ فرمایا کہ چشم فلک حیرت سے پھٹی کی پھٹی رہ گئی ۔
طائف کا واقعہ کون نہیں جانتا، وہاں کے سرداروں کے حکم پر شہر کے اوباش لڑکوں نے اتنے پتھر مارے کہ آپ صلی اللہ علیہ و سلم کو لہو لہان کر دیا، پہاڑوں پر مامور فرشتہ حاضر ہوا کہ اگر حکم کریں تو دونوں پہاڑوں کو ملا کر اس کے درمیان بسنے والوں کو کچل دیا جائے، لیکن رحمة للعالمین صلی اللہ علیہ و سلم نے فرمایا ’نہیں ، ہو سکتا ہے ان کی اولاد میں سے کوئی ایمان لے آئے۔
فتح مکہ کا موقع ہے، وہ تمام افراد سر جھکائے کھڑے ہیں جنہوں نے ظلم کے ایسے پہاڑ توڑے تھے کہ مسلمانوں کو مجبورا مکہ چھوڑ کر جانا پڑا، مسلمانوں پر وہ مظالم ڈھائے کہ سن کر رونگٹے کھڑے ہو جاتے ہیں، خود آپ صلی اللہ علیہ و سلم پر حالت سجدہ میں اونٹ کی اوجھڑی رکھ دی، مسلمانوں کے ساتھ معاشی و سماجی مقاطعہ کر کے شعب ابی طالب میں بند کر دیا جہاں لوگ ایک گھونٹ پانی کو ترس گئے ، ایمان لانے والوں کو زندہ چیر دیا گیا، مکہ کی شدید گرمی میںتپتی ریت پرلٹا کر سینے پر بھاری پتھر رکھے ۔۔ اور آخر کار نبی رحمت صلی اللہ علیہ وسلم کو جان سے مارنے کا پروگرام بنا کر اسے حتمی شکل دے کر آپ علیہ السلام کے گھر کا محاصرہ کر لیا۔۔۔۔۔۔ یہ اور اس طرح کے دیگر بے شمار ہولناک مظالم ڈھانے والے آپ کے سامنے ہیں، مکہ فتح ہو چکا ہے۔ آپ صلی اللہ علیہ و سلم چاہتے تو تمام زیادیتوںکا بدلہ لے سکتے تھے لیکن آپ صلی اللہ علیہ و سلم نے فرمایا ”اذھبوا و انتم الطلقائ“ ۔۔ جاو تم سب آزاد ہو۔۔۔سبحان اللہ

حضرت ابو سفیان رضی اللہ عنہ، کی اسلام قبول کرنے سے پہلے اسلام دشمنی سے سب واقف ہیں لیکن فتح مکہ کے موقع پر فرمایا کہ جو ابو سفیان کے گھر میں چلا گیا وہ امان میں ہے۔ سبحان اللہ

حبشی، جس نے سیدنا حمزہ رضی اللہ کو شہید کیا، ہندہ جس نے آپ رضی اللہ عنہ کا کلیجہ چبایا۔۔۔۔۔۔۔۔ آپ صلی اللہ علیہ و سلم نے انہیں بھی معاف کر دیا
سراقہ بن جعشم ہجرت مدینہ کے موقع پرآپ علیہ السلام کو زندہ یا مردہ پکڑنے کے لئے آپ کے تعاقب میں تھا۔۔۔ اسے بھی معاف کر دیا اور قیصر و کسریٰ کے گنگن پہننے کی بشارت دی ۔۔ سبحان اللہ

اس کے علاوہ بے شمار واقعات ہیں، آپ صلی اللہ علیہ و سلم کو قتل کرنے کی سازش ہوتی ہے، زہر دیا جاتا ہے لیکن آپ بجائے بدلہ لینے کے درگزر سے کام لیتے ہیں۔

واقعہ افک اسلامی تاریخ کا ایک عجیب واقعہ جس سے اندازہ ہوتا ہے کہ اللہ تبارک و تعالی کو یہ عمل کتنا پسند ہے اور اس نے مسلمانوں کو کس قدر تلقین کی ہے معاف کرنے کی۔
ام المومنین سیدہ عائشہ صدیقہ رضی اللہ عنھا پر منافقین کی طرف سے جھوٹی اور بے بنیاد تہمت لگائی گئی (نعوذ باللہ من ذالک) اس میں کچھ صحابہ بھی شامل ہو گئے جن میں حضرت مسطح رضی اللہ بھی تھے۔ یہ مسطح وہی تھے جن کی غربت کی وجہ سے ان کے اخراجات کی ذمہ داری سیدنا ابو بکر رضی اللہ عنہ نے اپنے ذمہ لی ہوئی تھی۔

جب آپ رضی اللہ عنہ کی بیٹی اور ام المومینین پر انہوں نے تہمت لگائی تو یقنیا یہ بہت بڑاصدمہ تھا، اور ابو بکر رضی اللہ عنہ کو شدید دکھ پہنچا ۔ اورانہوں نے مسطح کو صدقات دینے سے منع کر دیا۔بظاہر اگر دیکھا جائے تو ایک تو یہ ابو بکر رضی اللہ عنہ کی ذمہ داری نہیں تھی بلکہ آپ اپنے طور پر انہیں اخراجات دیا کرتے تھے۔ پھر ان کی لاڈلی بیٹی ، عفیفہ کائنات سیدہ عائشة صدیقہ رضی اللہ عنھا پر تہمت لگانے والوں میں ان کا نام آیا تو آپ کے پاس جواز تھا کہ ان کے اخراجات بند کر دیں۔ اور آپ نے اسی غم و غصے میں ان کا وظیفہ بند کرنے کا اعلان کر دیا۔
فورا اللہ تبارک و تعالی کی طرف سے آیت نازل ہوئی ’وَلاَ يَأْتَلِ أُوْلُوا الفَضْلِ مِنكُمْ وَالسَّعَةِ أَن يُؤْتُوا۔۔۔۔۔۔۔۔۔۔و لعیفوا و لیصفحوا ۔ الا یحبون ان یغفر اللہ لہم ‘ کہ تم میں سے جو لوگ اچھی مالی حالت رکھتے ہیں وہ اس بات کی قسم نہ کھائیں کہ وہ اپنے رشتہ داروں ، محتاجوں اور اللہ کی راہ میں وطن چھوڑنے والوں کی مدد نہ کریں گے۔ ان کو معاف کردینا چاہیئے اور درگزر کرنا چاہیئے ۔ کیا تم نہیں چاہتے کہ اللہ تم معاف کر دے اور اللہ معاف کرنے والا مہربان ہے۔
اندازہ کیجئے کہ کتنے سخت حالات ہیں لیکن پھر بھی عفو و درگزر کا معاملہ کرنے کا حکم ہے۔ سیدنا ابو بکرصدیق رضی اللہ عنہ نے فورا اپنے قول سے رجوع کیا ۔

یہ مختصر اشارات کافی ہیں اس بات کو واضح کرنے کے لئے کہ وہ رب جو خود رحیم ہے وہ یہ چاہتا ہے کہ اس کے بندے بھی آپس میں عفو و درگزر کا معاملہ فرمائیں۔


آئیے آج سے عہد کرتے ہیں کہ انشاءاللہ قرآنی تعلیمات، سنت نبوی اور عمل صحابہ کو مشعل راہ بناتے ہوئے باوجود طاقت ہونے کے عفو و درگزر سے کا لیں گے، تا کہ اللہ کے ہاں سرخرو ہو سکیں اور ایک امن معاشرے کے قیام کی طرف قدم بڑھا سکیں۔

__________________
محتاج اصلاح و دعا