بھائیو اور بہنو
اسلام و علیکم
پاک ۔ نیٹ پر ایک بحث چل رہی ہے کہ عالم کون ہے ۔ یعنی کہ کیا دنیاوی علوم کے حامل مسلمانوں کو اسلامی نقطہ نظر سے عالم کہا جا سکتا ہے یا نہیں ۔
کیا علم صرف دینی حوالے سے علم کہلائے گا اور کیا عالم ، اسلام کی روشنی میں صرف وہی ہو گا جو کہ دینی علوم کا حامل ہو؟
انہی سوالوں کے جواب جاننے کے لیئے اس تھریڈ کا آغاز کیا گیا ہے ۔
سب سے پہلے تو ہم یہ دیکھیں گے کہ علم کی تعریف کیا ہے ۔

قالَ رَبّی يَعْلَمُ الْقَوْلَ فِی السَّماء ِ وَ الأَرْضِ وَ هُوَ السَّميعُ الْعَليمُ.

"(انھوں نے) کہا: جو بات آسمان اور زمین میں ہے، میرا پروردگار اُسے جانتا ہے اور وہ سننے والا، جاننے والا ہے۔"
قرآن کریم (سورۂ۲۱/انبیا، آیت۴)

عالِمُ الْغَيْبِ وَالشَّهادَةِ الْكَبِيرُ الْمُتَعالِ.

"وہ غیب و شہود کا جاننے والا ہے، بزرگ اور بلند ہے۔"
قرآن کریم (سورۂ۱۳/الرعد، آیت۹)
قرآن کریم کی ان دو آیات سے ہی علم کے معنی اور عالم کی حقیقت واضح ہو جاتی ہے ۔
يَعْلَمُ الْقَوْلَ فِی السَّماء ِ وَ الأَرْضِ
یعنی وہ بات جو آسمانوں اور زمینوں میں ہے اللہ اسے جانتا ہے
گویا کہ علم کے معنی ہیں جاننا ، کس بات کا جاننا؟
اس بات کا جو کہ آسمانوں اور زمینوں میں ہے چاہے وہ غیب ہو یا ظاہر
اس کی مزید وضاحت ان آیات مبارکہ سے ہو جاتی ہے۔

عالِمِ الْغَيْبِ لا يَعْزُبُ عَنْهُ مِثْقالُ ذَرَّةٍ فِی السَّماواتِ وَ لا فِی الْأَرْضِ وَ لا أَصْغَرُ مِن ذَلِكَ وَ لا أَكْبَرُ إِلّا فِی كِتابٍ مُبيـنٍ.

"(وہ خداوند) غیب کا جاننے والا (ہے)، زمین و آسمان کا کوئی ذرّہ بھی اُس سے پوشیدہ نہیں اور نہ اُس (ذرّے) سے چھوٹی اور نہ بڑی کوئی چیز (اُس سے پوشیدہ ہے)، مگر یہ کہ وہ واضح کتاب میں موجود ہے۔" قرآنِ کریم (سورۂ۳۴/سبا، آیت۳)

زمین و آسمان میں جو کچھ بھی ہے اس کا علم اللہ تعالی کو ہے اور وہ زات پاک اس علم کی عالم ہے ۔
اس آیت مبارکہ سے تو جو بات سامنے آتی ہے وہ یہ کہ
علم ال بدن یعنی
anatomy of brain
anatomy of nervous system
جو کہ میڈیکل کی فیلڈ ہے ۔
علم الطبیات
یعنی physics جس میں رفتار کی حقیقت سے لے کر کشش ثقل تک زیر بحث آتی ہیں یہ بھی علم کی ایک شاخ ہے۔
اسی طرح جملہ مروجہ سو کالڈ دنیاوی علوم اس ذیل میں آتے ہیں
تو ہماری مجبوری ہے کہ جو مسلمان ان میں سے کسی بھی علم کا حامل ہو اسے نہ صرف عالم مانا جائے بلکہ کہا جائے ۔
اب آتے ہیں اس حقیقت کی جانب جس سے آج ہم مسلمان نظریں چرا نہیں سکتے ۔
اللہ نے تمام علوم قرآن پاک میں واضح کر دئیے اور کہا کہ ان پر تفکر کرو
اللہ نے سات آسمانوں اور سات زمینوں کا زکر کیا
اللہ نے درختوں اور پودوں کی افزائش نسل کا زکر کیا
اللہ نے انسان کی اصل کا زکر کیا ۔
یہ سب کیا ہے ، اللہ نے کہ دیا کہ اس میں نشانیاں ہی ان کے لیئے جو کہ ایمان لانے والوں میں ہیں
قرآن کا بنظر عمیق مطالعہ کیا جائے تو ہمیں پتا چلتا ہے کہ یہ کتاب دنیا کے تمام علوم کا احاطہ کرتی ہے ۔
شاید یہی وجہ ہے کہ آج جو کچھ سائنس صدیوں بعد ثابت کر رہی ہے میرے پاک رب نے احکامات ، اور نشانیوں کے ذریعے ہمیں 1400 سال پہلے بتا دیا
مثال کے طور پر سائنس دان اب ثابت کرتے ہیں کہ برقی آلات سے انسان میں منفی چارج پیدا ہو جاتا ہے جس کی وجہ سے مزاج پریشان اور چڑچڑا ہو جاتا ہے، اس کا علاج تحقیق سے یہ پتا چلا کہ قبلہ رخ ہو کر ماتھے کو زمین سے لگایا جائے تویہ منفی چارج ماتھے کے راستے زمین میں منتقل ہو جاتا ہے جس سے انسان کو ٹینشن سے نجات مل جاتی ہے۔
لیکن افسوس تو یہ ہے کہ یہ تحقیقات غیر مسلم کر رہے ہیں ۔
اور مسلمان قرآن میں دئیے گئے احکامات میں سے صرف حقوق اللہ حقوق العباد ، فقہ وغیرہ تک محدود ہو کر رہ گئے ہیں ، اور ظم کی انتہا یہ کہ ان موضوعات سے ہٹ کر کسی علم کو قرآن و حدیث کی روشنی میں علم مانا ہی نہیں جاتا کبھی اسے معلومات کہا جاتا ہے اور کبھی فنون ۔
لیکن یہ صورت حال اسلام کے ابتدائی دور میں یا وسطی دور تک پیدا نہیں ہوئی تھی۔ اس وقت تک قرآن کی اصل دعوت یعنی تفکر پر لبیک کہا جاتا تھا ۔ شاید یہی وجہ تھی کہ مسلمان سائنسدانوں کی لکھی کوئی کتابیں اہل مغرب کے نصاب میں داخل رہیں اور مسلمانوں کی کی گئی تحقیقات ان کے لیئے مشعل راہ ثابت ہوئیں ۔
لیکن آہستہ آہستہ مسلمانوں نے مجموعی طور پر تفکر کی راہ کو اور تحقیق کے چلن کو چھوڑ دیا ۔ اور چند دینی احکامات و تعلیمات جن کا اوپر زکر آیا ہے ان کو اپنا کر بیٹھ گئے ۔ یہاں ہمارا مقصود ہر گز یہ نہیں کہ آج کے "دینی علوم" کے عالم جو کچھ پڑھ اور پڑھا رہے ہیں وہ غلط ہے ، نہیں ہر گز نہیں بلا شک و شبہ ان کا نصاب قرآن و حدیث سے ہی ہے ، لیکن جہاں بات دینی اور دنیاوی علوم کی تقسیم کی آتی ہے وہاں سے اختلاف کی بنیاد پڑ جاتی ہے ۔
اوپر ہم نے ثابت کیا کہ کوئی میڈیکل کے کسی شعبے میں تحقیق کرتا ہے یا سائکالوجی کی کسی شاخ میں ، یا وہ فزکس کے کسی شعبے میں کوئی نئی بات دنیا کے سامنے لاتا ہے اگر وہ مسلمان ہے تو عین اللہ کے حکم کے مطابق علم حاصل کر رہا ہے اور پھیلا رہا ہے ، وہ عالم کہلانے کا مستحق ہے اور اسی قدر منزلت کا بھی جو کہ دین اسلام میں ایک عالم کے لیئے مقرر کی گئی ہے ۔
اب دور جدید کی اس ضرورت کی جانب آئیے جہاں ہر میدان میں سپیشلائزیشن کی ضرورت محسوس کی جا رہی ہے ۔ یہاں ظاہر ہے کہ دیگر کسی بھی شعبے کی طرح ہمیں قرآن ، حدیث اور فقہ کے ماہرین کی ضرورت ہمہ وقت رہتی ہے۔ لیکن اس کے ساتھ ساتھ ہمیں سائنس اور ٹیکنالوجی کے میدان میں ماہرین کی شدید تر ضرورت ہے ۔ تا کہ ہم اللہ کے دین کی سرفرازی کے لیئے مسلم امہ کی مضبوطی کے لیئے کوشش کر سکیں اور یہود و ہنود کا مقابلہ بہتر طریقہ سے کر سکیں " جو کہ ہمہ وقت اسلام کو نقصان پہنچانے کی کوششوں میں مصروف رہتے ہیں ۔
چونکہ قرآن کریم کے مطابق علم کا مطلب ہے جاننا اور عالم ہے جاننے والا
تو قرآن کریم میں چونکہ دنیا کے تمام علوم کا احاطہ کیا گیا ہے ، لہذا ان علوم میں سے کسی بھی علم کا حامل عالم کہلائے گا لیکن یاد رہے کہ اللہ نے قرآن میں بعض علوم سے اجتناب کا حکم بھی فرما دیا مثال کے طور پر پیشن گوئی یا علم نجوم دست شناسی وغیرہ ، تو ایسے علوم کے حامل افراد ظاہر ہے کہ نہ تو عالم کے درجہ پر فائز ہوں گے اور نہ ہی ان کی وہ فضیلت تصور کی جائے گی جو کہ عالم کا حصہ ہے ۔ ایسے افراد کو تو اللہ کے احکامات کا منکر ہی کہا جا سکتا ہے۔
وقت کے ساتھ ساتھ ہم مسلمانوں میں درجاتی حساسیت یا سٹیٹس کانشیئس نیس بھی پیدا ہو چکی ہے جو کہ ہمیں مجبور کرتی ہے کہ ہم اپنے علاوہ کسی کی بھی اہمیت تسلیم کرنے سے انکار کر دیں ۔
یاد رکھئیے یہ اسلام کی بنیادی تعلیمات کے خلاف ہے ۔ یہی وجہ ہے کہ اسلامی نظام میں کوئی بھی فرد جو اپنے آپ کو کسی بھی انتظامی عہدے کے لیئے خود پیش کرے اس کو اس عہدے کے لیئے نا اہل تصور کیا جائے گا مثال کے طور پر قاضی گورنر، یا خلیفہ وقت کا عہدہ ، کیوں کہ ان عہدوں پر فائز لوگوں کا منصف اور غیر جانبدار ہونا پہلی شرط ہے اور ظاہر ہے کہ اپنی اغراض کے حصول کے لیئے ہی کسی عہدے کی لالچ اپنے دل میں پیدا کرے گا ۔
لیکن آج ہم دیکھتے ہیں کہ مساجد کی امامت پر جھگڑے ہو رہے ہوتے ہیں ۔
مسجد کمیٹی کی صدارت پر گھمسان کی جنگ "زبانی زبانی " عام بات ہے ۔
شاید اسی احساس کی کرشمہ سازی ہے کہ آج ہم میں سے جو بھی کسی علم کا ماہر یا عالم ہے وہ دیگر ماہرین یا علما کو عالم یا ماہر تسلیم کرنے سے انکار کر دیتا ہے ، ایک بنیادی تفریق تو دینی و دنیاوی علوم کی صورت میں سامنے آتی ہی رہتی ہے ، یہاں تو ڈاکٹر ڈاکٹر کو پرو فیسر پروفیسر کی جاہل قرار دے رہا ہوتا ہے۔ لیکن ایک بڑا اختلاف علمائے دین یعنی عالم قرآن ، محدث اور فقیہہ حضرات اور علمائے سائنس و دیگر انتھروپالوجیکل علوم کے عالموں کے درمیان نظر آتا ہے ۔ یونیورسٹی سے فارغ التحصیل کوئی پروفیسر علمائے دین کو عالم ماننے کو تیار نہیں بلکہ وہ انہیں طنز اور تشنیع کے قابل گردانتا ہے اور علمائے دین کے نزدیک جواباً وہ پروفیسر حضرات لعین بنے ہوتے ہیں حتی کہ ان کی عالم کی حیثیت کو ہی تسلیم نہیں کیا جاتا ۔
اس جھگڑے میں ہمارا بحیثیت مسلمان قوم بڑا نقصان ہو رہا ہے ۔
چونکہ ہم میں دین پر کٹ مرنے کا جذبہ الحمدللہ آج بھی موجود ہے لہذا ہم عام آدمی سے زیادہ علمائے دین کی بات توجہ سے سننا اور اس پر عمل کرنا پسند کرتے ہیں ۔ اور علمائے دین کا چلن یہ بن چکا ہے کہ وہ سائنسی و دیگر معاشرتی علوم کو علم ماننے پر ہی تیار نہیں " حالانکہ اللہ تعالی خود اس بات کو علم قرار دے رہا ہے جو کچھ کہ زمینوں اور آسمانوں میں ہے " تو اس صورت میں تحقیق جو کہ ہر شعبہ میں آج کے مسلمان کی بنیادی ضرورت ہے اس کا کام کھٹائی میں نظر آتا ہے ۔
ضرورت اس امر کی ہے کہ علم دین کے ساتھ ساتھ دیگر علوم کو بھی علم تسلیم کیا جائے ، اور ان کے عالموں کو بھی وہی توقیر دی جائے جو کہ ان کا حق ہے ، قرآن پاک تفکر اور تدبر پر زور دیتا ہے ، تو کوئی حرج نہیں کہ ایک مدرسے کا طالب علم اگر سافٹ وئیر انجنئیر بننا چاہے اور اس کے میلان طبع کو دیکھتے ہوے اندازہ ہوتا ہو کہ یہ اس شعبے میں ایک نابغے کی صورت سامنے آ سکتا ہے تو اس کو سافٹ ویئر انجنئیر بنا دیا جائے ، اسی طرح گورنمنٹ سائنس کالج کا کوئی طالب علم محسوس کرے کہ علم حدیث میں وہ زیادہ بہتر طریقہ سے کام کر سکتا ہے تو کوئی گناہ نہیں کہ اسے اس علم کے حصول کے لیئے کسی مدرسہ میں موجود محدث تک رسائی دی جائے نہ کہ اس کے راستے میں اس کے والدین اور اساتذہ تلواریں سونت کر کھڑے ہو جائیں ۔
مولانا طارق جمیل صاحب کی مثال ہمارے سامنے ہے ۔ وہ میڈیکل کی تعلیم کو ادھورا چھوڑ کر عالم دین بنے تھے ، وہ بہت اچھے عالم دین ہیں ممکن ہے ایک اچھے ڈاکٹر ثابت نہ ہوتے کیوں کہ یہ تو میلان طبع کی بات ہے ۔
اگر ہم نے بحیثیت مسلمان اپنی حیثیت کو بچانا ہے اور اہل مغرب سے مزید تمانچے کھانے سے بچنا چاہتے ہیں‌تو ہمیں وسیع النظری کا ثبوت دیتے ہوے اپنے طلبا پر چاہے وہ سکول میں پڑھتے ہوں یا مدرسے میں تحقیق کے در وا کرنے پڑیں گے ۔ اور یہ اسی صورت میں ممکن ہے جب ہم تمام علوم کی برابر اہمیت کو تسلیم کریں گے اور دینی علوم کے ساتھ ساتھ سائنسی و معاشرتی علوم کے حصول کو بھی حکم ربی جان کر بجا لانے کی کوشش کریں گے۔
رب زدنی علما
اے اللہ میرے علم میں اضافہ فرما