مغرب سے نہیں ، اسلام کو مسلمانوں سے خطرہ ہے۔ ریاکار ملّا اور مقلّد سیکولر سے۔ تقلید سے، عقیدت سے، جہالت سے۔ مجھ سے اور اس سے۔
پندرہ برس ہوتے ہیں، سیّد فاروق گیلانی نے جب یہ پوچھا کہ کیا امریکی باشندے مسلمانوں سے نفرت کرتے ہیں تو پروفیسر نے کہا کہ وہ اس سوال کا جواب کل دے گا۔ دوسرے دن اس نے بتایا، اپنے بارہ سالہ فرزند سے میں نے پوچھاکہ ایک مسلمان کے بارے میں اس کا تاثر کیا ہے۔ لڑکے نے کہا، گھوڑے پر سوار ایک آدمی جس کے ہاتھ میں ننگی تلوار ہے اور جو میرے خون کا پیاسا ہے۔ امریکی پروفیسر ٹال دیتا مگر علمی دیانت نے گوارا نہ کیا۔ فاروق گیلانی سے پانچ سال قبل ، ساٹھ سال کی عمر میں ایم اے انگریزی کا امتحان پاس کرنے والے ان کے والد سیّد اسعد گیلانی امریکہ گئے ۔ ان کا تاثر یہ تھا، دوسرے مغربیوں کے مقابلے میں امریکی غیر متعصب ہیں۔ یہ براعظم اسلام کے لئے کھلاہے۔ نائن الیون کا خونی حادثہ گزرنے کے باوجود امریکی اب بھی کم متعصب ہیں۔ ٹائم کے تازہ سروے کے مطابق 31فیصد امریکی شہری اوباما کو مسلمان سمجھتے ہیں (اور کچھ تھوڑے سے ابراہم لنکن کو بھی)۔ کیا پاکستان میں ایسے کسی شخص کو گوارا کیا جا سکتا؟ قائد اعظم نے احمدی ظفر اللہ خاں کو وزیر خارجہ مقرر کیا تھا اور مولانا شبیر احمد عثمانی نے گوارا کیا لیکن کتنے اور مسلمان ایسے کسی فیصلے کی تاب لا سکتے ہیں؟ انصاف چاہئے۔
دوسروں سے انصاف کا مطالبہ کرنے والے کو خود بھی انصاف کرنا چاہئے۔ امریکی ہم سے نفرت کرتے ہیں تو کیا ہم ان سے نفرت نہیں کرتے؟ 11ستمبر 2001ء کو بے گناہ امریکی شہریوں کے قتلِ عام پر ہم نے جشن منایا ۔ جب مصیبت گلے پڑ گئی تو احمقانہ "تجزیوں" پر ہم یقین کرنے لگے کہ جڑواں میناروں کو خود امریکیوں نے تباہ کیا "تاکہ مسلمانوں کا خون بہائیں" مجھ سمیت ،ہم میں سے اکثر نے اسامہ بن لادن پر فخر کیا تھا۔ اپنی غلطی ہم مان کیوں نہیں لیتے۔پھر ایک صاف ضمیر کے ساتھ ہی ہم مغرب سے عدل کا مطالبہ کر سکتے ہیں۔ ہوسِ ملک گیری کا شکار، جس کے حکمران طبقات سفاک اور خونخوار ہیں۔ یہاں پھر ایک اور سوال ہے۔کیا ہندو، احمدی اور عیسائی اقلیتوں کے ساتھ ہمارا سلوک انصاف کے اسلامی اصولوں کے مطابق ہے؟ میاں محمد نواز شریف نے جب لاہور میں قادیانیوں کے قتلِ عام پر احتجاج کیا تو زبان کی ذرا سی لغزش کو ہم نے مسئلہ بنالیا۔یہ جاننے کے باوجود کہ احمدیوں سے ان کی راہ و رسم کبھی نہ رہی۔ صرف ذوالفقار علی بھٹو کی رہی ۔ بھٹو نے لیکن تلافی کر دی تھی، انہیں کافر قرار دیا تھا۔
جب میں نے میاں نواز شریف اور فوزیہ وہاب کا دفاع کیا تو مجھے گالیاں دی گئیں۔ ہمارے مذہبی طبقات کے پاس اس کے سوا کوئی اندوختہ ہی نہیں۔ ان علماء سے ملنا جلنا اب میں نے ترک کر دیا جو شیعوں کو واجب القتل سمجھتے ہیں اور قائد اعظم کو انگریزوں کا ایجنٹ لیکن برسوں میں نے انہیں بھگتا ہے۔ قائد اعظم سے اختلاف گناہِ کبیرہ نہیں لیکن کیا وہ انگریزوں کے ایجنٹ تھے؟ قاری جانتا ہے کہ شیعہ مکتبِ فکر سے میرا دور کا تعلق بھی نہیں۔ میری زندگی کا ایک بڑا حصہ سیرت اور اصحابِ رسول کے مطالعے میں گزرا ہے۔ سیدہ عائشہ صدیقہ  ، سیدنا ابوبکر صدیق اور سیدنا فاروقِ اعظم کے بارے میں، میرے احساسات اتنے ہی شدید ہیں جتنے کسی بھی سنی العقیدہ کے ہو سکتے ہیں لیکن قتل ؟ قتل کیا فتنہ گری نہیں اور کیا قرآن کریم میں یہ نہیں لکھا" فتنہ قتل سے بڑھ کر ہے" مغل بادشاہ جہانگیر کے عہد میں مجدد الف ثانی نے قتل کا فتویٰ دیا لیکن سب جانتے ہیں کہ یہ فتویٰ انہوں نے جلد ہی واپس لے لیا تھا۔ اسی ادراک پر کہ فتنہ پھیلنے لگا۔ اصلاً یہ مہابت خاں کی قیادت میں سنی شہسواروں اور ایرانی امرا کی سیاسی جنگ تھی، ملکہ نورجہاں جن کی سرپرست تھی۔ جس کا سگا بھائی، سب سے امیر صوبے بنگال کا گورنر اور باپ وزیر خزانہ تھا۔ مہابت خان کو اسی لئے بنگال بھیجا گیا لیکن پھر مغل پچھتائے اور نورجہاں بھی۔ سری نگر میں دریائے جہلم کے کنارے، ابر و باراں کی ایک شام اسے مہابت خاں کا خیر مقدم کرتے دیکھا گیا ۔ہیرلڈیم کے بقول جو اسے ڈانٹ رہا تھا۔ شاہجہاں نے بغاوت کردی تھی اور مغل اقتدار خطرے میں تھا ۔ مہابت خاں کے سوا کوئی نہ تھا جو بادشاہ کا دفاع کر سکے۔ 1857ء کی جنگ آزادی کے ہنگام مسلمان علماء نے شیعہ اکثریت کے شہر لکھنو پر قبضہ کر لیا اور المناک داستانیں رقم کیں۔ تعصبات کی زہریلی فصل ہم سینچتے رہتے ہیں۔ شاخوں پر جب آگ کے پھول کھلتے ہیں تو خود ترحمی کا شکار ہو کر گریہ کرتے ہیں۔ کوئی اس سوال کا جواب دے کہ اسامہ بن لادن کو بے گناہ امریکی شہریوں کے قتل کا حق کس نے دیا تھا۔ کیا اللہ کے آخری رسول نے معصوم عورتوں، بچوں اور بوڑھوں، کارخانے میں مزدور اور کھیت میں کام کرتے کسان کو ہمیشہ ہمیشہ کے لیے امان نہ دی تھی؟
جہاں تک قرآن کریم کے اوراق جلانے کی ناپاک جسارت کا تعلق ہے، اگر کسی کا دل نہیں دکھتا تو وہ مسلمان ہی نہیں۔ روزِ جزا محمد جب شفاعت کریں گے تو دو بار ان کی شفاعت قبول کی جائے گی ۔ تیسری بار لیکن یہ فرمان صادر ہوگا، ان (جہنم میں پڑی مسلمانوں کی اولادوں) کے اور جنت کے درمیان کتاب حائل ہے۔ کتاب فیصلہ کن ہے، قرآن سے جس کا تعلق نہیں، اسلام سے بھی ہرگزاس کا کوئی تعلق نہیں لیکن پھر ایک سوال اٹھتا ہے اور یہ سوال بہت خوفناک ہے۔ کیا ہم، نام نہاد مسلمان واقعی قرآن کے پیروکار ہیں؟ قرآن کا مطالبہ تو یہ ہے "کسی قوم کی دشمنی تمہیں زیادتی پر آمادہ نہ کرے" قرآن تو یہ کہتا ہے کہ (سوچ سمجھ کر) ایمان لانے کے بعد زندگی کی ساری ترجیحات اس کی روشنی میں طے کی جائیں۔ حیات و کائنات کی تخلیق میں فقط اسی سے رہنمائی طلب کی جائے۔ اولین زمانوں کے بعد ، ہر عہد میں شاید بہت تھوڑے تھے جو قرآن پر پورا ایمان رکھتے تھے۔ مسلمان سائنس دان اگر واقعی مسلمان تھے تو مغرب سے پہلے کیوں واضح نہ کرسکے کہ ہر زندہ چیز کو اللہ نے پانی سے پیدا کیا۔قرآن میں تو یہ صاف لکھا تھا۔ کیوں انہیں ادراک نہ ہوا تھا کہ کائنات Big bangسے وجود میں آئی ہے؟ " سب کچھ ایک ہی تھا، پھر ہم نے اسے پھاڑ کر جدا کردیا"۔۔۔کیوں نہ سمجھ سکے کہ تمام ستارے اور سیارے، زمین، چاند اور سورج ، سب اپنے مدار میں حرکت کرتے ہیں جب کہ قرآن میں یہ آشکار تھا "کیا تم سمجھتے ہو کہ پہاڑ کھڑے ہیں، وہ تو سرمئی بادلوں کی طرح اڑتے پھرتے ہیں" اولین خلا نورد نے یہی کہا لیکن ہم اس سے پہلے کیوں نہ جان سکے؟ بہت سے اور حقائق بھی ہیں لیکن وہ بھی مغرب پہ کھل رہے ہیں، ہم پر نہیں مثلاً یہ کہ اور زمینیں اور آسمان اور آفتاب بھی ہیں۔ ابھی پچھلے ہفتے خبر آئی کہ امریکی سائنس دانوں نے ایک اور کائنات کے امکان پر واضح شواہد پیش کردیئے ہیں۔ حقیقی جمہوری اداروں کی تشکیل، کھری عدالتوں کاقیام، آسمانوں اور زمینوں کو تسخیر کرتی ٹیکنالوجی اور سوشل سیکیورٹی سسٹم کا فروغ، سبھی کچھ مغرب میں ہے، ہمارے پاس کیا ہے؟ کٹھ ملّا اور کٹھ سیکولر؟
رہا قرآن کریم کی حفاظت کا سوال تو ابوطالب یاد آئے ۔ ہاتھیوں والے ابراہہ سے انہوں نے کہا تھا، میرے اونٹ واپس کر دیجیے ، اپنے گھر کی حفاظت وہ خود کرے گا۔ کتاب میں لکھا ہے" إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ" ہم نے اسے نازل کیا اور ہم ہی اس کی حفاظت کریں گے۔ جنگ حنین کے بعد مالِ غنیمت بٹنے لگا تو ایک شخص رحمة للعالمین کے مقابل آیا اور اس نے کہا"محمد! انصاف کرو" فرطِ رنج سے آپ کا چہرہ سرخ ہوگیا۔ کہا"محمد انصاف نہ کرے گا تو کون کرے گا" اصحاب سے پھر یہ کہا، اس کی اولاد میں سے وہ لوگ پیدا ہوں گے جو اتنا قرآن اور اتنی نمازیں پڑھیں گے کہ تم نہیں پڑھتے لیکن قرآن ان کے حلق سے نیچے نہ اترے گا" بخدا ہم ہیں وہ فاسق اورریاکار۔ مشرکین میں سے جو مسلمان ہو جاتے ہیں، وہ تو قرآن کو اپنی اولاد سے زیادہ عزیزرکھتے ہیں۔ ہمیں تو کچھ بھی عزیز نہیں ، ہم تو خود اپنے وفادار بھی نہیں۔ مغرب سے زیادہ، اسلام کو مسلمانوں سے خطرہ ہے۔ کٹھ ملّا اورکٹھ سیکولر سے۔ مجھ سے اور اس دوسرے انشا پرداز سے۔سورة سحر کی پہلی آیت یہ ہے"کتنے زمانے گزرے کہ انسان کوئی چیز ہی نہ تھا" کتنے سیکولر اورکتنے ملّا اس آیت کو مانتے ہیں؟بہت کم ، سوچ سمجھ کر بہت ہی کم۔ دونوں اس کے باوجود ، اپنی علمی فضیلتوں پر فدا ہیں۔ اللہ ان پر رحم کرے۔

__________________
جاویداسد