درجہ بندی: (1 votes - 5.00 average)

محرم الحرام چل رہا ہے ۔
اپنے بچپن کی یادوں کو کھنگالوں تو اس ماہ سے متعلق کچھ دلچسپ باتیں یاد آتیں ہیں!!!

کورنگی کے جس علاقے میں ہم رہتے تھے ، وہاں شیعہ ، سُنی ، وہابی سمیت دیگر مشہور فقہ کے لوگ آباد تھے۔ عام طور پر قریبی گھروں میں آنے جانے پر کوئی پابندی نہیں ہوتی تھی، البتہ دروازہ کھٹکھٹا کر جاناضروری خیال کیا جاتا تھا۔ ہمارے پڑوس میں صادق بھائی رہتے تھے۔ صادق بھائی کی کئی بہنیں تھیں شہلا، صائمہ وغیرہ اب تو کچھ کے نام بھی یاد نہیں۔ یہ گھرانہ اہل تشیع تھا۔ پڑوسی ہونے کے ناتے اُن کے گھر میں ہمارا آزادانہ آنا جانا تھا۔ صادق بھائی اور اُن کے گھر والے بہت خوبصورت تھے۔ اُن کی بہنیں ہمارا خیال رکھتی تھیں۔
اُس زمانے میں گھر میں کسی اچھی چیز کے پکنے پر پڑوسی کے یہاں بھیجنے کی درینہ رورایت کی بڑی سختی سے پابندی کی جاتی تھی۔ اماں کے ہاتھ کے پائے سارے جہاں میں مشہور تھے۔ چناچہ جب بھی پایوں کا اہتمام کیا جاتا تو محلے میں سبھی کو خصوصا صادق بھائی کے یہاں ضرور بھیجا جاتا۔ اسی طرح اکثر اُن کے یہاں سے بھی کچھ نا کچھ آجاتا تھا۔

محرم کا مہینہ شروع ہوتے ہی نا صرف علاقے بلکے محلے کا ماحول بھی تبدیل ہوجاتا تھا۔ سُنی گھرانوں کے بچے تقریبا گھروں میں مقید ہوجاتے تھے۔ بلا اجازت گھروں سے نکلنا ممنوع ہوجاتا تھا۔ شام کو کھیلے جانے والے کھیل بھی ختم ہوجاتے تھے یوں بھی شیعہ گھرانوں کے بچے کھیل کود میں حصہ لینا چھوڑد دیتے تھے۔ اُن گھرانوں کے افراد سیاہ رنگ کے کپڑے زیب تن کرتے تھے۔ بعضوں کے گھروں پر علم یا سیاہ جھنڈے لہرانے لگتے تھے۔

محرم سے متعلق جو معلومات اُس وقت ہمارے ننھے ذہنوں میں ادھر اُدھر کی باتیں سُن کی بھری ہوئی تھی وہ کچھ اس طرح کی تھیں۔ دوپہر میں نکلنے والے بچوں کو شیعہ پکڑ کے لے جاتے ہیں۔ وہ اُس بچے کو چاولوں کے ایک ڈھیر کے درمیان میں کھڑا کردیتے ہیں اور پھر چاروں طرف سے تیر برساتے ہیں۔ یہان تک کے وہ چاول خون سے رنگین ہوجاتے ہیں۔

دوسری روایت کے مطابق ان دنوں میں شیعہ حضرات دوسروں کو پینے کی جو بھی چیز دیتے ہیں اُس میں تھوک دیتے ہیں لہذا اُن کی دی ہوئی کوئی بھی چیز نا کھائی جائے اور ناہی اُن کی لگائی ہوئی سبیل سے پانی یا شربت پیا جائے۔

تو اس قسم کے خیالات کو اپنے ننھے ذہنوں میں لیئے ہم دس محرم تک ایک خوف کی حالت میں رہتے تھے۔
(اب اس قسم کی باتیں یاد کرکے ہنسی آتی ہے)

محرم کے شروع ہوتے ہیں اہل تشیع گھرانوں میں مجالس شروع ہوجاتی تھیں۔ قناعتوں کے پار کیا ہوتا ہے، کیا کہا اور سُنا جاتا ہے ہم اس بارے میں تقریبا لاعلم ہوتے تھے۔ البتہ ایسے بڑے بچے جن کے شام کو باہر جانے پر پابندی نہیں تھی بتاتے تھے کہ وہ لوگ قناعتوں کے پیچھے کچھ دیر تو چیخ چیخ کر بولتے ہیں پھر آخر میں رونے لگ جاتے ہیں۔

کیا وہ بچوں کو قتل کرنے کے بعد روتے ہیں! میں دل ہی دل میں سوچتا تھا۔

یکم محرم کی آمد کا علم "میراثیوں" جو خود کو (میر عالم کہتے ہیں)‌ کے علاقے میں بجنے والے ڈھول تاشے کی آواز سے از خود ہوجاتا تھا۔ یہاں ڈھول بجانے کا مقابلہ بھی ہوتا تھا اور دور دور سے ڈھول بجانے والے اپنے فن کا مظاہر کرتے تھے۔ اُس پرہجوم جگہ میں مجھے جانے کی اجازت تو نہیں تھی لیکن بھائی وہاں پر ہونے والے واقعات کو خوب مزے لے لے کر سُناتے تھے۔

محرم کا اہتمام سُنی گھرانوں میں بھی بڑے زور و شور سے کیا جاتا تھا۔ اکثر گھرانوں میں بچوں کو کلاوے (ایک زرد اور سرخ رنگ کا موٹا سا دھاگہ) پہنائے جاتے تھے۔ کچھ لوگوں نے اپنے بچوں کو امام حسین کا فقیر بنانے کے منت مانی ہوئی ہوتی تھی۔ ایسے بچوں کو ہر سال ہرے رنگ کا فقیروں سے لباس پہنا کر امام حسین فقیر بنایا جاتا تھا ۔ یہ بچے گلے میں‌جھولی ڈال کر گھر گھر جاتے تھے اور امام حسین کی بھیک مانتے تھے۔ اُن کے جمع کیئے ہوئے پیسے امام حسین کی نیاز میں استعمال ہوتےتھے۔

چند سُنی گھرانوں میں سبیل بنانے کی بھی رسم تھی۔ اکثر بچے بالے اپنے گھروں سے باہر چند بانسوں کو باندھ کر ایک سبیل بناتے تھے اور پھر مٹکوں میں پانی بھر کر اُن سبیلوں پر رکھتے تھے۔ آنے جانے والے راہ گیر اُن سے پانی پیتے تھے۔ یہ بچے سبیل بنانے کے لیئے ہاتھ میں نیڈو کے دودھھ کے خالی ڈبے لیئے راہ گیروں سے یا محلے کے گھروں سے چندہ مانگتے تھے۔ مجھے یاد ہے کہ سب سے بلند آواز بچہ صدا لگاتا تھا سبیل کا چندہ، سبیل کا چندہ، سبیل کا چندہ!

بعض مشہور سبیلیں تو سالہا سال سے باقاعدہ لگتیں آ رہی تھی اور انہیں بنانے میں کافی محنت اور پیسہ درکار ہوتا تھا۔ ہر سال انہیں بڑی محنت سے سجایا جاتا تھا۔ اور شام کو برقی قمقموں اور جھالروں سے سجایا جاتا تھا۔ اس قسم کی سبیلوں پر دودھ کا شربت بھی بانٹا جاتا تھا۔

بدقسمتی یا خوش قسمتی سے میں اس قسم کی کسی تحریک میں حصہ نہیں لیا کرتا تھا۔ امی مجھے گھر سے باہر بھیجنے کو راضی نہیں ہوتی تھیں، میں باہر دادی کا ہاتھ پکڑے اردگرد ہونے والے ہنگاموں کو دور ہی سے دیکھتا رہتا تھا، البتہ میرے بڑے بھائی اپنے دوستوں کے ساتھ جا کر سبیلوں کو دیکھ کر اور اُن سے شربت یا پانی پی کر آتے اور مجھے پیش آنے والے واقعات سُناتے تھے۔

کورنگی نمبر ایک میں ایس ایریا میں اپنی نوعیت کی ایک عجیب سبیل لگتی تھی (اُسے شاید سبیل کہنا مُناسب نہ ہو) بچے اُسے "کھلونے والی سبیل" کے نام سے پکارتے تھے۔ یکم سے نو محمر تک لگنے والے اس سبیل میں طرح طرح کے کھلونے جمع کیئے جاتے تھے۔ اکثریت باہر ممالک سے لائے ہوئے کھلونوں کی ہوتی تھی۔ریموٹ سے چلنے والی کار ، بولنے والی گُڑیا، جلتی بھجتی اور سائرن بجاتی پولیس کار، ڈھول بجانے والے بندر، طرح طرح کے روبوٹ، ریل گاڑی، اور ناجانے کیا کیا۔
رسیاں باندھ کر ایک احاطہ بنایا ہوا ہوتا تھا۔ اس احاطے کے اند مصنوعی پہاڑ، دریا، جھیل اور کربلا کے مناظر بنائے ہوئے ہوتے تھے۔ تمام زائرین (ناظرین) احاطے سے باہر کھڑے ہو کربڑی دلچسپی سے ان کھلونوں کوچلتا ہوا دیکھتے تھے۔ احاطے کے اندر دو یا تین لوگ ہوتے تھے جو لوگوں کی فرمائش پر باری باری مختلف کھلونوں کو چلا کر دیکھاتے تھے۔ میں اپنی دادی کا ہاتھ تھامے اپنے بہن بھائیوں اور دوستوں کے ہمراہ ہر روز اُس سبیل کو دیکھنے کے لیے جایا کرتا تھا۔

ایک اور بڑی عجیب و غیریب یاد "پیگ" ہیں۔ قریبی محلے میں ایک کمیونٹی آباد تھی جنھیں "کُھمرے" کہا جاتا تھا۔ یہ لوگ خود کو کسی بزرگ حضرت قمبر سے منسوب کرتے تھے۔ اس کمیونٹی کے کچھ لوگ محرم میں "پیگ" بنتے تھے۔ پیگوں کے بارے میں بڑی عجیب و غریب باتیں مشہور تھیں۔ مثلا یہ کہ یہ لوگ یکم محرم سے دس محرم تک عام کپڑے نہیں پہن سکتے، محض جھولے نما کپڑوں کو اپنے جسم سے لپیٹے دن رات ادھر سے اُدھر بھاگتے پھرتے تھے۔ ایک پیگ ہاتھ میں ایک بڑا سابانس تھامے ہوئے ہوتا تھا جس کے آخری سے پر چاندی سے بنا ہوا ایک ہاتھ لگا ہوتا تھا ، اس ہاتھ کو حضرت عباس رضی اللہ عنہ سے منسوب کیا جاتا تھا۔ یہ لوگ گلی گلی بھاگتے تھے اور کہیں کہیں رُک کو بڑی پرسوز آواز میں کچھ پڑھتے تھے کچھ ایسا کے کسی کی بھی سمجھ میں نہیں آتا تھا۔
یہ مرثیہ تو ہرگز نہیں تھا!
اکثر گھرانے پیگوں کوکھانے پینے کی چیزیں دیتے تھے اور وہ اُسے زمین پر بیٹھے بیٹھے کھاتے تھے۔

اگر کوئی پیگ ان دس دنوں میں چارپائی پر بیٹھ گیا تو "بندر" بن جائے گا!
میرے ایک دوست نے جس کا تعلق کھمروں سے تھا، میرے کان میں شرگوشی کی تھی۔

کورنگی میں دیگر علاقوں کی طرح تعزیئے بنانے کی بھی روایت تھی اور کئی گھرانے نس در نسل ایسا کرتے آرہے تھے۔ تاج المساجد کے سامنے کونے والے گھر میں ایک صاحب رہتے تھے اُن کا تعلق بھی کھمروں سے تھا۔ اُنیں‌کبوتر پالنے کا شوق تھا، کچھ لوگ اُنہیں کبوتر والے بابا کے نام سے جانتے تھے۔ اُس گھر میں تعزیہ بنانے کی روایت تھی۔ اسکول سے واپسی پر میں جان بوجھ کر اُس راستے سے آتا اور اُن لوگوں کو تعزیہ بناتے ہوئے دیکھتے۔ کبھی وہ گنبد بنا رہے ہوتے تھے، کبھی ستون پر سُنہری ورق چپکا رہے ہوتے تھے اور پھرکسی دن اُن تمام حصوں کو ایک ٹھئلے پر ٹھونکا جا رہا ہوتا تھا۔

آٹھ محرم کی آمد ہوتے ہی گلیوں سے طرح طرح کے تعزئیے گزرنا شروع ہوجاتے تھے۔ یہ تعزئیے مختلف رنگوں اور ڈیزائن کے ہوتے تھے لیکن ایک چیز جو ہر تعزئیے میں پائی جاتی جاتی تھی وہ ایک بڑے سے گنبد کا ہونا تھا۔ ان تعزئیوں کی آمد کا پتہ ہمیں ان کے ساتھ بجتے ہوئے بلند آواز ڈھول کی آواز سُن کرہوتا تھا۔ ڈھول کو واز سُن کر گلے محلے کے بچے "تعزیہ تعزیہ" کرتے اپنے اپنے گھروں کے دروازے پر جمع ہوجاتے تھے۔ اتفاق سے ہمارا گھر ایک سہ راہے پر تھا اس لیئے تقریا ہر تعزیہ گھر کے سامنے سے گزرتا تھا۔ ڈھول کی پرزور آواز کے ساتھ ان رنگ برنگے تعزئیوں اور ان کے ساتھ گزرتے ہجوم اور اُس ہجوم میں بلند علم کو تھامے چند منچلے نوجوانوں کو دیکھنا بڑا دلچسپ نطارہ ہوتا تھا۔

ہماری نانی کا گھر کورنگی ساڑھے پانچ نمبر پر تھا۔ محرم کی نو اور دس تارییخوں کی شامیں اپنے ماموؤں اور خالاؤں کے ساتھ کورنگی چھ نمبر پر بننے والے مشہور "پھولوں والے" تعزیوں کے پاس ہی گزرتیں تھی۔
یہ دونوں تعزیئے پھولوں سے بنے ہوئے ہوتے تھے اور کم از کم تین یاچار منزل اُونچے ہوتے تھے۔ ایک خلقت ان کو دیکھنے اور منتیں مانگنے کے لیئے جمع ہوتی تھی۔ میں نے اپنی امی کو کبھی کچھ مانگتے ہوئے نہیں دیکھا، البتہ خالاؤں کو دوسری خواتین کے ہمراہ تعزئیے کے نیچے سے گزرتے اور اور منت مانگتے بارہا دیکھا۔
ان تعزیوں کے پاس میلے کا سا سماں ہوتا تھا۔ اس میلے میں بندر نچانے والے مداری، ہاتھ کی صفائی دیکھانے والے جادوگر، کھانے پینے کی چیزوں کے ٹھیلے سمیت ایک بہت دلچسپ چیز بھی ہوتی تھی اور شاید اب تک ہوتی ہے "لکڑی کی بنی ہوئی تیز کمان اور تلواریں"!!!

مجھے ان تلواروں سے جنگ لڑنا بہت پسند تھا ہم سب بہن بھائی ضد کرکے ان تیر کمانوں اور تلواروں کو خریدتے تھے اور پھر گھر میں گمسان کا رَن پڑتا تھا۔
یہ "ہتھیار"دس محرم کے بعد گلی میں دیگر ساتھیوں کے ساتھ "کربلا کربلا " کھیلنے میں بھی کام آتے تھے۔

نو اور دس محرم کو لنگر دینے کا بھی رواج تھا ۔ مختلف صاحب حیثیت لوگ دیگوں کی دیگیں بانٹتے تھے۔ ہجوم کے اژدھام کی وجہ سے بیٹھا کر کھلانا ممکن نہیں تھا لہذا اس کھانے کو "لٹا" دیا جاتا تھا۔ بچے بڑے سب اُن سوزکیوں اور گھوڑا گاڑیوں کے پیجھے پیجھے بھاگتے تھے اور لنگر لوٹ کر اپنے گھر والوں کر لا لا کر دیتے تھے۔مجھے یاد ہے اُس دال اور روٹی کا مزہ بڑے سے بڑے قورمے میں بھی نا آتا تھا۔ لنگر کے کھانے زمین پر گرنے سے بچایا جاتا تھا اور بطور تبرک سب تھوڑا تھوڑا چکھتے تھے۔

دس محرم کے شام کو تمام تعزئیوں کو "ٹھنڈا" کرنے کے لیئے "کربلا" لے جایا جاتا تھا۔ کورنگی ڈھائی نمبر پر ابراھیم گوٹھ کے پاس ایک مقام کو کربلا کہا جاتا تھا۔

وہاں کیا ہوتا ہے بھائی؟؟؟؟ ایک دن میں نے اپنے بڑے بھائی سے پوچھا تھا۔
کچھ نہیں یار وہ لوگ سارے تعزیوں کی "چمک" نوچ نوچ کر اُتارتے ہیں، سارا میوہ جمع کرلیتے ہیں اور پھر تعزئیوں کو توڑ توڑ کر نیچے سمندر میں پھینک دیتے ہیں، بھائی نے بڑی لاپرواہی سے جواب دیا تھا!

وہ زمانہ بہت اچھا تھا!!!
میں نے کبھی اپنے اسکول یا مسجد کے باتھ روم میں "کافر کافر۔۔۔۔۔ کافر جو نا مانے وہ بھی کافر" کا مطالبہ لکھا ہوا نہیں دیکھا تھا!!!

میری یادوں‌پر مشتمل میری دیگر تحاریر مندرجہ ذیل لنکس پر پڑھی جاسکتی ہیں:

1۔ پنجتن کا ٹولہ!

2۔ وہ کاغذ کی کشتی!

3۔ وہ کاغذ کی کشتی! "دوسرا حصہ"

4۔ وہ کاغذ کی کشتی! "تیسرا حصہ"

5۔ وہ کاغذ کی کشتی! "چوتھا حصہ"

6۔ وہ کاغذ کی کشتی! "پانچواں حصہ"

7۔ وہ کاغذ کی کشتی! "چھٹا حصہ"

__________________
میں‌تمھارے اس حق کے لیئے کہ تم مجھ سے "اختلاف" کرسکو، آخری وقت تک لڑوں‌گا!