اکرام الحق
ہر قوم اور علاقے کی کچھ خصوصیات ہوتی ہیں جو اس کی پہچان ہوا کرتی ہیں ۔ تاریخ اسے ان خصوصیات سے یاد رکھتی ہے۔ پاکستان بالعموم اور صوبہ سند ھ بالخصوص دیگر بے شمار خصوصیات کے ساتھ ساتھ مہمان نوازی کی خوبی سے مشہور تھا۔ تقسیم بر صغیر، جہاد افغانستان اور جہاد کشمیر کے وقت اس خطے کی عوام نے مہمانوازی کی وہ درخشاں مثالیں قائم کیں کہ ہجرت مدینہ کے بعد سے تا دم تحریر ایسی مثال کہیں نہیں ملتی۔ شاید یہی خوبی اور ان مہاجرین کی دعاو ¿ں ہی کا نتیجہ ہے جس کے باعث وطن عزیز ہزار ہا سازشوں کے باوجود نہ صرف قائم ہے بلکہ تمام تر کمزوریوں کے باوجود دشمن کی آنکھوں میں کانٹے کی طرح کھٹکتا ہے۔
مگر وقت اور حالات جہاں اور بہت سی چیزوں کو بدل دیتے ہیں وہیں عادات و اطوار اور رسم و رواج پر بھی اثر انداز ہوتے ہیں۔ یہی حال اس خطے کے باسیوں کا بھی ہوا۔ ایک طرف کرپشن، لالچ ، بے ایمانی اور فرقہ واریت جیسی بیماریاں در آئی ہیں تو دوسری طرف اخلاص ، ایثار اور مہمان نوازی جیسی خصوصیات رخصت ہو گئیں۔
ایسی تبدیلیاں اگرچہ انتہائی غیر محسوس انداز میں ہوتی ہیں لیکن کچھ واقعات ایسے رونما ہو جاتے ہیں کہ دودھ کا دودھ اور پانی کا پانی ہو جاتا ہے۔ اللہ تعالی ستار العیوب ہے، مہلت دیتا ہے کہ شاید لوٹ آئیں لیکن جب بات حد سے گزر جائے، واپسی کی امید ختم ہو جائے تو حالات پلٹا کھاتے ہیں اور امتحان شروع ہوتا ہے جو سفید اور سیاہ کو الگ کر دیتا ہے۔
یہی کچھ پاکستان میں ہوا۔ جب خوبیاں بتدریج خامیوں میں بدلنے لگیں تو پھر امتحان پیش آیا اور انتہائی سخت امتحان۔۔۔ بیک وقت تیس لاکھ سے زائد افراد اپنے ہی ملک میں مہاجر ہو گئے۔ لیکن بد قسمتی سے ہم اس امتحان میں بری طرح سے ناکام ہو گئے۔اپنے ہی لوگوں کو سہارا دینے سے کنارہ کرنے لگے، مصیبت اور پریشانی کے اس عالم میں ہم نے بے سرو سامان خاندانوں کو قسمت کے سپر د کر دیا۔ اخوت و مروت عنقا ہو گئی۔ مکانوں کے کرائے، اشیاءخو ردو نوش ، اور حمل و نقل کے کرائے آسمان سے باتیں کرنے لگے۔
ان سب باتوں کو تو کسی حد تک نظر انداز کیا جا سکتا ہے کیوں کہ اپنے ہم جنسوں کی مجبوری سے بھرپور فائدہ اٹھانا انسان کی فطرت ثانیہ بن چکی ہے۔
لیکن جو کچھ کراچی اور سند ھ میں ہوا وہ اتنا شرمناک ہے کہ اس کی جتنی مذمت کی جائے کم ہے۔ اگرہم اخلاقی پستی میں اس حد تک گر چکے ہیں کہ ہم اپنے بھائیوں کی مدد نہیں کر سکتے، انہیں سہارا نہیں دے سکتے ، تو کم از کم انہیں اتنا تو آزاد چھوڑ سکتے ہیں کہ خود اپنے لیے کچھ کر سکیں۔ تلاش معاش کے لئے آزاد وطن کے آزاد شہریوں کو اتنی تو آزادی ہو کہ وہ جہاں چاہیں محنت کر کے اپنی اور خاندان کی باعزت روزی روٹی کا انتظام و انصرام کر سکیں۔
ان حالات میں بے گھر ہونے والے خاندانوں کی طرف سے اپنی مدد آپ کے تحت مختلف علاقوں میں جا کر آباد ہونا بجائے خود ایک مستحسن اقدام ہے۔ کیوں کہ مہاجر کیمپوں میں نہ تو اتنے وسائل ہیں اور نہ ہی انتظامات کہ بیک وقت اتنی بڑی تعداد کوسنبھالا دے سکیں۔
حکومت کو چاہیے کہ اس طرح کی خود دار افراد اور خاندانوں کی مشکلات کو حل کرے تاکہ حالت نزع میں پہنچی ہوئی ملکی معیشت اور افلاس زدہ قومی خزانے پر مزید بوجھ نہ پڑے۔
صرف سند ھ یا کراچی ہی نہیں بلکہ ملک بھر کے کسی بھی شہر یا دیہات میں اگر یہ مصیبت کے مارے، جو اپنا آج ہمارے کل پر قربان کر چکے ہیں، آئیں تو انکا بھرپور ساتھ دینا چاہئے۔ اور اس کے اجر کی امید اللہ رب العزت سے کرنی چاہئے۔
اللہ سے دعا ہے وطن عزیز اور اہل وطن کو تمام مشکلات اور آزمائشوں سے نجات دلائے۔ ایک بار پھر وطن عزیز امن و آشتی کا گہوارا ہو۔ آمین

__________________
محتاج اصلاح و دعا