اقوام متحدہ کے سیکریٹری جنرل بان کی مون نے مقبوضہ فلسطینی علاقے غزہ پر اسرائیلی حملے کا ایک برس پورا ہونے پر کہا ہے کہ اس فوج کشی سے ہونے والے نقصان کے ازالے کے لیے لازماً بہت کچھ کیا جانا چاہیے۔

انہوں نے کہا کہ اہلیان غزہ کو انتہائی بنیادی حقوق سے بھی محروم کیا جارہا ہے ۔ بان کی مون نے اسرائیل پر زور دیا کہ وہ اس فلسطینی علاقے کا قطعی ناقابل قبول اور ایسا محاصرہ ختم کردے جس کے منفی نتائج پیدا ہورہے ہیں۔

مقبوضہ فلسطینی علاقے غزہ کی پٹی پر اسرائیلی فوج کشی کا ایک برس پورا ہونے پر اس علاقے میں ریلیاں منعقد کی گئیں۔

اسرائیلی کی بائیس روز کی اس فوجی کارروائی میں چودہ سو سے زائد فلسطینی مارے گئے تھے جن میں سینکڑوں کی تعداد میں بچے اور خواتین بھی شامل تھیں۔

گو گزشتہ ایک برس میں تشدد کم ہوا ہے لیکن اسرائیلی فوج کشی کے بعد کوئی پائیدار جنگ بندی نہیں ہوئی اور غزہ کے لوگوں کو انتہائی بنیادی انسانی حقوق سے بھی محروم رکھا جارہا ہے۔

سیکریٹری جنرل کا کہنا تھا کہ غزہ میں بنیادی انسانی ضروریات کی اشیاء کی فراہمی مقدار اور معیار دونوں میں بہت کم ہے اور معاشی اور تعمیر نو کی سرگرمیاں مفلوج ہیں۔
اقوام متحدہ کے امدادی اور تعمیراتی کاموں کے ادارے ’یونائیٹڈ نیشنز ریلیف اینڈ ورکس ایجنسی‘ کے مطابق غزہ کے اسرائیلی محاصرے سے وہاں پانی کی فراہمی ناکافی اور مضر ہے جس سے صحت عامہ متاثر ہورہی ہے جبکہ بچوں کی اموات میں بھی اضافہ ہورہا ہے۔

غزہ پر اسرائیلی فوج کشی کا ایک برس پورا ہونے پر دو سو گاڑیوں پر مشتمل ایک امدادی قافلے کو بھی امید ہے کہ غزہ میں داخلے کی اجازت مل جائے گی۔

بان کی مون نے اسرائیل پر زور دیا کہ وہ غزہ کا محاصرہ ختم کردے کیونکہ اسرائیلی کی بہتری بھی غزہ کے حالات سے ہی جڑی ہوئی ہے۔

بشکریہ بی بی سی