بچپن کی باتیں سب بیان کرتے ہیں اور فخر کرتے ہیں لیکن یقین کریں کہ مجھے اپنا بچپن بہت بکواس لگتا ہے۔ بچپن کی اس سے زیادہ خرابی اور کیا ہو سکتی ہے کہ جس لڑکی کو آپ پسند کرتے ہوں وہ آپ کو گود میں اٹھا کر پوچھے”منے تمہارے بڑے بھائی گھر کب آتے ہیں؟"میرا بچپن مجھے اس لیے بھی اچھا نہیں لگتا کہ ان دنوں ہر دومنٹ بعد مجھے کپڑے بدلناپڑتے تھے۔ عید پر جو کپڑا بچ جاتا، اس سے میرا سوٹ سل جاتا۔ بچپن کا یہ نقصان کیا کم ہے کہ آپ اپنی مرضی سے نہا بھی نہیں سکتے۔ میرا بچپن مجھے بالکل بالکل بھی اچھا نہیں لگتا۔ مجھے یاد ہے بچپن میں جب میں نکڑ والی مسجد کے مولوی صاحب سے سیپارہ پڑھنے جاتا تھا تو ایک آٹھ سال کی ”جوان“ لڑکی مجھے روزانہ کھڑکی میں سے دیکھ کر ہنسا کرتی تھی۔ مجھے اس کا ہنسنا بہت اچھا لگتا تھا، لہذا میں بہت کم چھٹی کرتا۔ اگرچہ میں اس کے قریب سے گزرتے ہوئے لاپرواہی اختیار کرلیتا تھا لیکن کن اکھیوں سے اسی کی طرف دیکھ رہا ہوتا تھا .... وہ برابر مسکرائے جاتی.... ایک روز میری حیرت کی انتہا نہ رہی جب میں نے اس کے ساتھ ایک اور ”جوان“ لڑکی دیکھی۔ وہ بھی میری طرف دیکھ کر مسکرا رہی تھی۔ چھ سات دنوں میں لڑکیوں کی تعداد 12ہوگئی۔ مت پوچھئے کہ یہ ”ایک درجن “ مسکراہٹیں میرے لیے کیا حیثیت اختیار کرگئیں۔ مجھے یقین ہوگیا کہ میں ”بڑا“ ہوگیا ہوں اور جب میں نے ایک روز ان ایک درجن دوشیزاؤں کے جھرمٹ میں چند ”باقاعدہ“ لڑکوں کو بھی مسکراتے دیکھا.... اس روز مجھ پر کھلا کہ بڑے بھائی کی جو پینٹ مجھے مناسب قطع و برید کے بعد عرصہ دو ماہ سے پہنائی جا رہی ہے....اس کی زپ محترمہ اب ”پابند سلاسل“ نہیں رہی۔
بچپن کی صرف ایک بات مجھے اچھی لگتی ہے کہ اس وقت کبھی مجھے بازو پر انجکشن نہیں لگتا تھا.... لوگ کہتے ہیں کہ بچپن کبھی واپس نہیں آتا.... غلط کہتے ہیں....آتا ہے.... لیکن پچپن(55)کے روپ میں۔
بچپن میں سکول کی مار کا سب سے بڑا نقصان یہ ہوتا ہے کہ بچہ سکول جانے لگتا ہے.... جب میں سکول میں پڑھتاتھا تو اتنا نکما ہوتا تھا کہ اگر کبھی غلطی سے ہوم ورک مکمل بھی کرکے چلا جاتا تو ماسٹر جی عادتاً چھ سات ڈنڈے لگادیا کرتے تھے۔ تختی لکھنے کا بہت شوق تھا۔ تختی پر ”گاچی“ لگا کر سارے بچے دھوپ میں کھڑے ہو کر کورس کی شکل میں تختیاں لہرا لہرا کر گاتے تھے....
”گاچی نی گاچی میری تختی سکھا دے“
”گاچی “ سوکھ جاتی تو ماسٹر صاحب قلم دوات پکڑنے کا حکم دیتے اور پہلا آرڈر یہی ہوتا ”بسمہ اللہ لکھو!“.... ماسٹر صاحب خوشخطی کے بہت مداح تھے لہذا اگر کسی کی ”بسم اللہ“ خوشخط نہ ہوتی تو ”بسم اللہ“ کہتے ہوئے اسے میز پر”جہاز“ بنا لیتے“۔
قارئین سائیں! بچپن اتنا بھی اچھا نہیں ہوتا جتنا لوگوں نے مشہور کر رکھا ہے۔ میں چونکہ گھر میں سب سے چھوٹا تھا اس لیے بڑے بھائیوں کی تنقیدی نشست مجھ ہی سے شروع ہوتی ۔ بڑے بھائیوں کا رویہ تو ایسا ہوتا کہ بعض اوقات مجھے لگتا کہ وہ میرے سگے بھائی نہیں بلکہ میں ”سگ بھائی “ ہوں۔ ابا جی کی مار کا تو جواب نہیں.... طبیعت کی پاکیزگی کا اندازہ لگائیے کہ ہمیشہ باوضو ہو کر میری ٹھکائی کیا کرتے تھے.... حالانکہ انہیں بعد میں وضو کرنا چاہیے تھا۔
اب بتائیے....بچپن کیسے اچھا ہوگیا.... میں تو کہتا ہوں کہ نہ بچپن اچھا .نہ جوانی. اگر اچھا ہے تو صرف بڑھاپا....جب آپ ضد بھی کریں تو کوئی آپ پر ہاتھ اٹھانے کی جرات نہیں کرتا.... آپ لاکھ گلاس توڑیں، گند پھیلائیں.... زیادہ سے زیادہ کوئی طعنہ ہی مار دے گا ناں. ا سکی خیر ہے....بندہ ڈھیٹ ہونا چاہیے۔۔۔

نوخیزاختر

__________________