نظام عدل کے نفاذ کی مخالفت کیوں؟

امن کی خواہش کسے نہیں؟ ہر انسان پر امن زندگی گزارنے کے لئے تگ و دو کرتا ہے۔ دنیا کے نقشے پر ایک سرسری نظر دوڑائی جائے تو لاکھوں انسان اس کوشش میں ہمہ تن مصروف نظر آئیں گے۔بعض خوش نصیبوں کو یہ نعمت مل جاتی ہے اور بعض اس کے حصول کی کوشش میں جان جانِ آفریں کے سپرد کر دیتے ہیں۔
دنیا میں شاید ہی کوئی کم عقل ایسا ہو جو اس نعمت کے حصول کے لئے کوشاں نہ ہو۔ بعض دفعہ اس کے لئے بڑی قیمت بھی چکانی پڑتی ہے۔ لیکن امن سے بڑھ کر اور کیا ہو سکتا ہے۔
یہی وہ امن ہے جس کی تلاش اہل سوات کو ایک عرصہ سے تھی ۔ طالبان اور فوج کے درمیان مسلح جھڑپوں نے سوات کو کھنڈرات میں تبدیل کر دیا تھا، بازار بے رونق، سکول ویران، گلیاں سنان ، انسان حیران اور تفریحی مقامات آثار قدیمہ کا منظر پیش کر رہے تھے۔ ہنستے بستے ہزاروں لوگ اپنے ہی وطن میںاجنبی اور کیمپوں میں انتہائی کسم پرسی اور مہاجرت کی زندگی گزارنے پر مجبور ہو گئے ۔
ایسے میں ان کی اگر کوئی خواہش، تمنا اور آرزو ہو سکتی ہے تو وہ امن تھی اور یقینا وہ اس کے لئے ہر قیمت چکانے پر تیار ہوں گے۔
اسی دوران طالبان اور حکومت میں مذاکرات ہوئے جس کے نتیجے میں نظام عدل کے نفاذ پر فریقین نے رضا مندی ظاہر کر دی۔ معاہدہ ہوا، ڈرافٹ تیار ہوا، اور بالآخر قومی اسمبلی سے منظوری کے بعد صدر پاکستان نے دستخط کر دئیے۔ اہل سوات کا خواب شرمندہ تعبیر ہوا اور امن قائم ہو گیا۔
لیکن پاکستان کے دشمنوں ( اندرانی اور بیرونی) کو یہ ہضم نہیں ہوا۔ اسے سبوتاژ کرنے لئے تمام اوچھے ہتھکنڈے استعمال کئے گئے۔ اہل مغرب بطور خاص امریکہ کی مخالفت تو سمجھ میں آنے والی بات ہے لیکن ، اہل وطن کی جانب سے اس کی مخالفت پر حیرانی ہی نہیں پریشانی بھی ہوتی ہے۔
جن کے منہ امن ، مفاہمت، صلح اور اس جیسے کئی الفاظ کا ورد کرتے نہیں تھکتے وہ مخالفت میں سب سے آگے ہیں۔پاکستان کا لبرل، آزاد خیال اور مغرب نواز میڈیا بھی اس دوڑ میں کسی سے پیچھے نہیں۔
امن کی اہمیت کو یہ سب لوگ تسلیم کرتے ہیں اور اس کے حصول کے لئے کسی بھی حد سے گزر سکتے ہیں اور گزرتے رہے ہیں۔ امریکہ کی نام نہاد ”دہشت گردی کے خلاف جنگ“ کا بنیادی مقصد ہی دہشت گردی کو ختم کرنا اور امن قائم کرنا ہے۔ بالخصوص امریکہ خطرات سے محفوظ کرنا ہے۔ لیکن کیا امن صرف سب مخالفین کو مار کر حاصل کیا جاتا ہے یا مفاہمت اور صلح کے ذریعے بھی کیا جا سکتا ہے؟
پاکستان میں اس معاہدے سے جس کو سب سے زیادہ تکلیف ہے وہ متحدہ قومی موومنٹ ہے۔ جنہوں نے نام نہاد ”امن “ کے لئے نہ جانے کتنے نامور پاکستانیوں کو موت کی نیند سلا دیا۔ اور جو عام لوگ مارے گئے، جتنی بوری نبد لاشیں ملیں، جتنے سہاگ اجڑے ان کا تو شمار ہیں نہیں۔
جہاںتک ہمارے میڈیا کا تعلق ہے تو اس کا کردار تو انتہائی دوغلا ہے۔ اس معاہدے کے خلاف تمام توانائیاں صرف کردیں، بطور خاص مشہور زمانہ ”جیو“ جن کا نعرہ ہی جیو اور جینے دوہے انہوں نے سب کا جینا دو بھر کر رکھا ہے۔
جب کچھ نہ بن پڑا تو ایک غیر مصدقہ وڈیو، بغیر کسی تحقیق کے اس اشتعال انگیز انداز میں نشر کی کہ ہر انسان سوات معاہدے کے خلاف ہو جائے، یہ تو بھلا ہو ان اہل دل کا جنہوں نے عوام کو اس حقیقت سے بر وقت آگاہ کر دیا۔ اس بے نبیاد وڈیو کو ایک دن میں اتنی بار نشر کیا گیا شاید ہی کسی اور چیز کو اتنی کوریج ملی ہو۔دوسری جانب ہزاروں لوگ مر رہے ہیں ان کی انہیں بالکل پروا نہیں۔
جہاں تک میرا خیال ہے اس معاہدے کی مخالفت کرنے والے تمام کرداروں میں ایک قدر مشترک ہے اور وہ ہے ”اسلام دشمنی“۔
مغرب سے لیکر پاکستانی میڈیا تک تمام مخالفین کے لسٹ دیکھ لیں سب کے ”بدکنے “کی وجہ اسلام ہے۔ اسلام کے نفاذ سے نہ جانے انہیں کیا دشمنی ہے۔ حالانکہ اسلام تو سراسرامن کا دین ہے۔
لیکن غلط کاروں کے لئے یقیناً خوف کی علامت ہے اور ہونا بھی چاہیے۔ کیوں کہ برائی، نا انصافی اور ظلم کو ختم کئے بغیر امن کا قیام ممکن ہی نہیں۔
لیکن یہ فیصلہ درست ہے یا غلط اس فیصلہ نہ میں نے کرنا ہے اور نہ آپ نے۔۔ اس کا فیصلہ کرنے کا حق صرف ان اہل سوات کو ہے جنہوں نے جیتے جی قیامت کی ہولناکیاں دیکھی ہی نہیں بلکہ برداشت بھی کی ہیں۔اگر وہ لوگ خوشی سے جھومتے ہیں، مٹھائیاں تقسیم کرتے ہیں تو ہم اور آپ کون ہوتے ہیں اس کی مخالفت کرنے والے۔
میری ناقص رائے میں ہمیں دیکھنا اور انتظار کرنا چاہیے کہ اس معاہدے کے کیا نتائج برآمد ہوتے ہیں ۔ جس طرح ہم نے فوج کشی کر کے تجربہ کیا جو کہ ناکام ہو گیا اسی طرح اس تجربے کو آزمانے میں ہمیں کوئی پریشانی نہیں ہونی چاہیے۔
لیکن اندرونی اور بیرونی دشمنوں سے ہوشیار رہنا چاہیے۔ وہ اس معاہدے کو سبو تاژ کرنے کے لئے کسی حد تک بھی جا سکتے ہیں۔ کیوں کہ اس معاہدے کی کامیابی سے جہاں اسلام کے نظام عدل کو تقویت ملے گی وہیں پاکستانی فوج اور ملکی وسائل کی حفاظت بھی ہوگی اور یہ چیز یقینا دشمنوں سے ہضم نہیں ہو گی۔