ریاست ہوگی
ماں کے جیسی
جو ہر شہری کا
خیال کرے گی
ریاست ماں ہوتی ہے ہر شہری کی۔ جس طرح ہماری ماں ہماری کوتاہیوں سے در گزر کرتی ہے، ہماری تنگی مصیبت میں ہمارا ساتھ دیتی ہے اور حوصلہ برھاتی ہے،اپنا پیٹ کاٹ کر ہمارے منہ میں لقمہ ڈالتی ہے، خود گیلی جگہ پر سوتی ہے لیکن ہم کو بہتر سے بہتر جگہ فراہم کرتی ہے،ہماری خاطر ہمارے باپ اور معاشرے سے لڑتی ہے، بعینہ یہی کام ریاست بھی کرتی ہے۔ روٹی ،کپڑا اور مکان یہ کم از کم ذمہ داری ہے ریاست کی جو اسکو ادا کرنی ہوتی ہے ۔اس کے ساتھ کے دیگر لوازم ہیں کہ اپنے شہریوں کو خوف سے امن دلوائے، خواہ یہ خوف چور ڈاکوؤں سے ہو یا کہ سرحد پار کے جنگجوؤں سے۔اسکی یہ بھی ذمہ داری ہے کہ اپنے شہریوں کے ساتھ برابر کا سلوک کرے اور کسی مسئلہ میں انصاف سے کام لے۔ اسکی ذمہ داریوں میں یہ ذمہ داری بھی موجود ہے کہ اپنے شہریوں کو ترقی کرنے کے برابر مواقع فراہم کرے۔

جب امریکی کہتے ہیں کہ پاکستان ایک ناکام ریاست ہے تو ہمیں اکثر آگ لگ جایا کرتی ہے اور ہم چلا چلا کر امریکہ کو گالیاں دیتے ہیں۔ لیکن کیا گالیاں دینے سے حقائق بدل جاتے ہیں؟ کیا امریکہ کو بُرا بھلا کہنے سے یہ حقیقت بدل جائے گی کہ پاکستان اپنے شہریوں کے منہ میں نوالہ ڈالنا تو کُجا جو کچھ ان کے منہ میں ہے وہ بھی نکلوا رہا ہے، کیا اس حقیقت سے انکار کیا جا سکتا ہے کہ چور ڈاکو جس جگہ اور جیسے چاہتے ہیں وہاں پر پاکستان کے شہریوں کی زندگی کی کمائی لوٹ کر لے جاتے ہیں۔ درجنوں پولیس ویڈیوز، سیکڑوں ایسی خبروں جن میں طاقور لوگوں کی طرف سے غریبوں کی عزت خاک میں ملائے جانے کی خبریں ہوتی ہیں کوئی دعوے سے کہہ سکتا ہے کہ اسکی عزت اس ملک میں محفوظ ہے۔ کیا کوئی عام شہری دعوے سے کہہ سکتا ہے کسی مشکل میں پولیس لٹیروں کے بجائے اسکی پشت پر کھڑی ہوگی؟وہ تمام شہری جن کی عزت پولیس کے ہاتھوں سر راہ مٹی میں مل گئی، وہ تمام لوگ جن کو پولیس نے نکیل دال کر بازاروں میں گھمایا، وہ تمام لوگ جنکی بیتیوں کی عزتیں پولیس نے اجتماعی طور پر لوٹیں، وہ تمام لوگ جنکی گھرانوں کی عصمتیں سر عام طاقتور لوگوں نے اچھالیں کیا ہم ہی جیسے اس ملک کے شہری نہ تھے؟
کیا کوئی دعوے سے کہہ سکتا ہے کہ اس ملک کے محافظ ہماری جان و مال و عزت کی نگہبانی کر رہے ہیں؟ اگر ہاں تو کیوں کر ایسا ہوتا ہے کہ کراچی جیسے بڑے شہر میں ایک ہی دن میں درجنوں لاشے پھڑک رہے ہوتے ہیں؟ اگر یہ ہمارے محافظ ہیں تو کیوں کر پنجاب کے دیہات میں غریبوں کی بیٹیوں کی عصمتیں لٹ جاتی ہیں؟
دہشت گرد جہاں چاہتے ہیں وہاں کاروائی کر جاتے ہیں ۔۔۔جہاں قتل و خون کی ہولی کھیلنا چاہتے ہیں ۔ ۔ ۔وہان خون کے رنگ بکھیر جاتے ہیں۔۔۔۔۔
پھر بھی ہم انکار کرتے ہیں کہ پاکستان ناکام ریاست نہیں ہے۔۔۔۔۔۔۔۔
کیا ہمارا یہ استدلال خطرے کے وقت شترمرغ کی طرح ریت میں سر چھپانے کی طرح نہیں ہے؟
ہاں میں ببانگ دہل کہتا ہوں کہ پاکستان ایک ناکام ریاست ہے۔ مجھے اس ملک میں اب تک خوف سے نجات نہیں مل سکی۔ مجھے اس ملک میں نہ صرف چورؤں ڈکیتوں کا خوف ہے بلکہ مجھے اس ملک میں اس ملک کے محافظؤں سے بھی خوف ہے کہ نہ جانے کب یہ لوگ مجھے کس الزام میں ساری عمر کے لیے غائب کر دیں۔