پہچان

کسی چیز کو سمجھنے کے لیے اس کی پہچان بہت ضروری ہے۔ یہ ایک بہت عام سی بات ہے جو کہ ہر ایک کو معلوم ہے۔ مثال کے طور پر جانور کی کیا پہچان ہے؟ جانور کی پہچان سے انسان بخوبی واقف ہیں۔ جانور صرف ایک محدود حد تک عقل استعمال کرنے کے اہل ہوتے ہیں۔ ان کی سوچ، فکر اور توجہ صرف چند ضروریات زندگی تک محدود ہوتی ہیں۔ جانوروں کی حساسیت محض کچھ خاص اشیاء کے لیے وقف ہوتی ہے۔ ان میں اچھے اور برے کی بہت کم تمیز ہوتی ہے۔ اگر کوئی غذا ان کے شایان شان ہوتی ہے تو وہ ذیادہ سے ذیادہ اس کے لیے باگ دوڑ کرتے ہیں۔ اپنی غذا کے لیے وہ چیرپھاڑ بھی کر سکتے ہیں۔ لیکن ایک بات طے ہے کہ ان کی یہ وحشت صرف غزا یا کچھ مخصوص ضروریات زندگی کے لیے ہوتی ہے۔
اس سے پہلے میں اور تمہید باندھوں، انسانوں کی بات کرتے ہیں۔ انسان جس کا ذکر قرآن مجید میں کئی مرتبہ آیا ہے اور اس اشرف المخلوقات کو فرشتوں اور جنوں نے بھی سجدہ کیا ہے۔ حضرت انسان عاقل بھی ہے، عارف و عابد بھی ہے لیکن کیا عاجز بھی ہے؟ انسان جس کی روز اوّل سے ابلیس سے جنگ چلی آ رہی ہے کیا وہ نغوذ باللہ من ذالک کہیں ابلیس کی فتح میں تو بدل نہیں گئی ہے؟ انسان جو اس سیارے کا ایک اہم رکن ہے، اس نے اپنی ایجادات، دریافت اور کاوشوں سے اس سیارے کر کرّے سے نکل کر اور جہاں میں بھی اپنے نقش گاڑ دئیے ہیں۔ انسان نے فاصلوں کو مٹا کر ایک دوسرے سے اسقدر قریب کر دیا ہے کہ سات سمندر پار کیا ہوتا ہے، پل بھر میں آپ کی انگلیاں ان معلومات کو حاصل کرنے کے لیے کبھی فون پر تو کبھی کمپیوٹر پر ناچ رہی ہوتی ہیں۔ انسان خدا کا بنایا ہوا ایک ایسا شاہکار ہے، جو جہاں بھی نظر اٹھائیں ملتا ہے۔ انسانوں کی کئی تقسیم ہیں۔ کہیں رنگ کے حساب سے ہے تو کہیں سرحد کے حساب سے۔ کہیں زبان کے لحاظ سے ہے تو کہیں ذات کے لحاظ سے ہے۔ ان سب کے لیے ان گروہوں کی پہچان بنا دی گئی۔ ہر ایک کے حصے میں پہچان اس گروہ کے کردار کو ملحوظ خاطر رکھ کر کی گئی۔ کچھ گروہ فاتح کہلائے، کچھ گروہ حاکم ہوئے، تو کچھ محکوم۔ کچھ غلام تو کچھ آقا۔ ان ہی گروہوں میں سے انسانوں کی ایک اور پہچان رکھی گئی جو خدوخال سے انسان ہی معلوم ہوتے ہیں لیکن ان کے جسم اور جاں صرف اور صرف چلتی ہوئی موت ہیں جو دوسری پہچان والے انسانوں کو پلک جھپکتے ہی موت کا نوالہ بنا دیتے ہیں۔ ان کی پہچان کیا ہے؟؟؟ یہ شہر کی گلیوں میں چلتے پھرتے انسانوں کو پل بھر میں دھماکوں سے بغیر کسی مقصد کے مار دیتے ہیں۔ جیسا کہ میں نے کہا ہے کہ جانور بھی غذا کے مقصد کے لیے وحشت دکھاتا ہے تو پھر یہ انسان کس مقصد کے تحت اپنی پہچان کراتے ہیں۔

__________________