ہم ہر 5فروری کو بڑے جوش جذبے کے ساتھ یوم کشمیر مناتے ہیں ۔کہ کشمیر بنے گا پاکستان۔بڑے پرجوش نعرے ہوتے ہیں ۔ رات گئی بات گئی ۔ صبح ہم بھول جاتے ہیں کہ مقبوضہ کشمیر میں بھارتی مسلمانوں پر کیا ظلم ڈھا رہے ہیں۔اور اب تو
مقبوضہ کشمیر میں بھارتی مظالم کا سلسلہ طویل ہوتا جارہا ہے ۔ عیدالفطر کے دن لاکھوں کشمیریوں نے بھارتی مظالم کے خلاف مظاہرے کئے' کشمیریوں کے پرامن مظاہروں پر بھارتی فوجوں نے گولیوں کی بوچھاڑ کی جس سے کئی کشمیری شہید اور کئی زخمی ہوئے۔ عیدالفطر کا مقدس تہوار بھی کشمیریوں نے کرفیو کی وحشتوں میں گزارا' کشمیر کے اکثر اضلاع میں غیر معینہ مدت کے لئے کرفیو کا نفاذ کر دیا گیا ہے لیکن کرفیو اور بھارتی مظالم کے باوجود کشمیری اپنی جدوجہد جاری رکھے ہوئے ہیں۔ حریت کانفرنس کے چیئرمین کے خلاف مقامی تھانے میں ایف آئی آر حکومت کی طرف سے درج کرائی گئی ہے۔ میرواعظ عمر فاروق نے کہا کہ ہمیں مذہبی تہوار عیدالفطر منانے بھی نہیں دیا جارہا ہے انہوں نے کہا کہ بھارت اپنے اوچھے ہتھکنڈوں سے کشمیریوں کی آزادی غصب کرنے میں ہرگز کامیاب نہیں ہوسکتا ۔
عید کے دوسرے اور تیسرے دن تک بھی کشمیر کے اکثر اضلاع میں کرفیو نافذ رہا جس کا سلسلہ تاحال جاری ہے۔
یوں محسوس ہو رہا ہے کہ پوری دنیا کے مسلمان رب العزت کی طرف سے ایک آزمائش کے دور سے گزر رہے ہیں اور اگر مسلمان اس آزمائش سے نکل گئے تو کامیابی اور کامرانی ان کا مقدر بننے والی ہے۔ فلسطین سے افغانستان تک اور عراق سے کشمیر تک مسلمانوں پر ظلم و ستم کے پہاڑ توڑے جارہے ہیں' غیر مسلم طاقتیں اسلام اور مسلمانوں کے حوصلے پست کرنے کے لئے ایک طرف عسکری اور نظریاتی وار کر رہی ہیں تو دوسری طرف چند بدبخت پیغمبر اسلامۖ اور قرآن پاک کی تضحیک کے ذریعے اپنے خبث باطن کا اظہار کرنا چاہتے ہیں' ان بدبختوں کو خبر نہیں کہ اسلام سچا دین ہے اس کو جتنا دبائیں گے اتنا ہی ابھرے گا' اس کو جس قدر بدنام کریں گے اتنا ہی اپنی روشنیوں سے دنیا کو منور کرے گا۔
مقبوضہ کشمیر کے حالیہ واقعات اور حالات کا باریک بینی سے جائزہ لیا جائے تو واضح نظر آئے گا کہ بھارت مقبوضہ کشمیر میں بری طرح پھنس چکا ہے اور سری نگر پہ دہلی کی گرفت کمزور پڑ رہی ہے' بھارت کی سات لاکھ افواج کے مظالم بھی کشمیریوں کے دلوں سے آزادی کے جذبے کو سرد نہیں کر سکے اور کشمیری اپنی منزل آزادی کی جانب رواں دواں ہیں۔ اگر چہ ان کے لئے رستے پرخطر ہیں لیکن منزل زیادہ دور نہیں' منزل کی یہی قربت کشمیریوں کو اس بات پہ اکسا رہی ہے کہ گرتی ہوئی دیوار کو ایک دھکا اور دو' اس دفعہ اٹھنے والی تحریک کا خاصہ یہ ہے کہ اس میں نوجوان نسل کے جواں جذبوں اور گرم گرم لہو کی خوشبو غالب ہے اور تاریخ گواہ ہے کہ جس قوم کے نوجوان اپنی آزادی کے لئے اٹھ کھڑے ہوں پھر ان کے جذبوں کو دنیا کی بڑی سی بڑی طاقت اور بڑے سے بڑا ظلم بھی سرد نہیں کر سکتا اور نوجوانوں کی جدوجہد اور قربانیوں سے آزادی کا سور ج پوری آب و تاب سے روشن ہوتا ہے۔
مقبوضہ کشمیر میں گزشتہ چھ عشروں سے کئی تحریکیں چلی ہیں لیکن حالیہ تحریک کے بارے میں بھارت کی صاحب الرائے اور دانشور شخصیات کا کہنا ہے کہ موجودہ تحریک وہ نہیں کہ جسے بھارت طاقت سے دبا سکے اور کہا جارہا ہے کہ موجودہ تحریک سے بھارت کو جان چھڑانا ہرگز آسان نہیں ہوگا' بھارت گزشتہ 63برسوں سے کشمیریوں کے ساتھ ''مذاق'' اور مذاکرات کرتا آیا ہے بھارت نے 63برسوں مذاکرات کی لیپا پوتی کرتے ہوئے گزار دئیے ہیں لیکن اب واضح نظر آرہا ہے کہ کشمیری بھارت کی شاطرانہ چالوں اور مذاکرات کے پس پردہ ناپاک عزائم سے پوری طرح آگاہ ہوچکے ہیں اور وہ ہرگز مذاکرات کے چنگل میں اپنے آپ کو پھنسا کر وقت ضائع نہیں کرنا چاہ رہے ہیں۔
اس دفعہ کشمیر میں تحریک نے جو رخ اختیار کیا ہے اس کو دیکھتے ہوئے یہ کہا جاسکتا ہے کہ بھارت اور عالمی دنیا کو نوشتہ دیوار پڑھ کر یہ فیصلہ کرنا ہوگا کہ کشمیر کے آتش فشاں کو سرد کرنے کے لئے کشمیریوں کو آزادی دینی ہے یا اس طرح طاقت کے زور پر تحریک آزادی کو دبانے کے ماضی کے روئیے اپنا کر عالمی امن کو بھی خطرے سے دوچار کرنا ہے۔ موجودہ تحریک کی ایک خاص بات یہ بھی ہے کہ اگر اس تحریک کو کشمیری قائدین بھارت کی کسی شاطرانہ چال کا شکار ہو کر ختم بھی کرنا چاہیں تو ممکن نہیں کیونکہ تحریک کا مکمل کنٹرول نوجوانوں کے ہاتھ میں جاتا ہوا نظر آرہا ہے اور نوجوان ابھی تک تو اپنے قائدین کے احکامات کو لبیک کہتے ہوئے آئے ہیں اور اگر قیادت نے تحریک سے ہٹنے کا کوئی حکم دیا تو نوجوان تحریک کو اپنے ہاتھوں میں لے کر بھارت کے لئے ایسی مشکلات پید اکر سکتے ہیں کہ جس کا بھارت نے کبھی سوچا نہیں ہوگا اس صورتحال کو دیکھ کر نہ صرف بھارت بلکہ عالمی برادری کو بھی فیصلہ کرنا ہوگا کہ کشمیریوں کو آزادی دی جائے۔ اب مذاکرات کا ڈھونگ رچا کر بھارت وقت ضائع کرنے کی کوشش کرنا چاہتا ہے تو یقیناً یہ اس کے لئے نقصان دہ ہوگا۔ کیونکہ کشمیری اب آزادی سے کم کسی بات کے لئے راضی نہیں۔
کشمیری اب اس فیصلہ کن معرکے کا ارادہ کر چکے ہیں جس کے ذریعے قوموں کو غلامی کی زنجیروں سے آزادی نصیب ہوتی ہے۔ کشمیری نوجوان اب ماضی کے تمام مظالم اور شہداء کی قربانیوں کا قرض چکانے کے لئے ایک ہوچکے ہیں کشمیریوں کے اجتماعی شعور نے یہ فیصلہ دے دیا ہے کہ ''ابھی نہیں تو کبھی نہیں'' کے مصداق کشمیری جس اتحاد و یک جہتی کا مظاہرہ کر رہے ہیں اس کو دیکھتے ہوئے پاکستان کو بھی اپنے سرد مہری والے روئیے اور جنرل پرویز مشرف کی اپنائی گئی پالیسیوں میں تبدیلی لاتے ہوئے ایک ایسی جدوجہد کا آغاز کرنا ہوگا کہ کشمیر کے اندر پاکستان کے حوالے سے جو مایوسیاں پھیلائی گئیں ان کا خاتمہ ہو تاکہ کشمیری اپنے آپ کو تنہا ہرگز محسوس نہ کریں اس حوالے سے حکومت کو چاہیے کہ کشمیر کے مقدمے کو عالمی سطح پر اجاگر کرنے کے لئے ایک مضبوط اور منظم پالیسی اپنائے اور عالمی برادری کی توجہ کشمیر میں بھارتی مظالم کی طرف دلانے کے لئے دنیا بھر میں اپنے سفارت خانوں کو ہدایت دے کہ پاکستان کے سفیر اپنی اپنی ذمہ داریاں ادا کرتے ہوئے ان ملکوں کے عوام اور حکومتوں کو بھارت کا اصل چہرہ دکھائیں جائے۔ اب تو ذوالفقار علی بھٹو کی پارٹی پاکستان پیپلزپارٹی کی حکومت ہے جنہوں نے کہا تھا کہ ہم کشمیر کے لئے ہزار سال تک لڑیں گے۔
ضرورت اس امر کی ہے کہ ذوالفقار علی بھٹو کے نظریاتی وارث ہونے کے دعویدار حکمران کشمیریوں کی اخلاقی اور سفارتی مدد کے لئے مضبوط حکمت عملی اپنائیں اور ماضی کی ان پالیسیوں کا یکسر خاتمہ کیا جائے جس کے نتیجے میں بھارت نے نہ صرف کشمیر میں مظالم میں تیزی لائی ہے بلکہ وہ اب تو بلوچستان اور قبائلی علاقوں تک اپنی سازشوں اور کارروائیوں کے ذریعے پاکستان کو عدم استحکام کا شکار کرنے کے خواب دیکھ رہا ہے۔
ہم سمجھتے ہیں کہ انشاء اللہ کشمیریوں کی تحریک کی منزل آزادی زیادہ دور نہیں اور پاکستان کے حکمران اور عوام کشمیریوں کی اخلاقی' سفارتی اور ہر سطح پر مدد کے لئے تیار ہیں اور کشمیر بنے گا پاکستان کے نعرے کو سچا ثابت کرنے کے لئے کشمیریوں کے ہاتھ مضبوط کریںگے۔
اب اس نعرے کو عملی شکل دینے کےلئے ہمیں تہیہ کرنا ہوگا کہ ہم ہر پلیٹ فارم پر اپنے مسلمان بھائیوں کی اخلاقی مدد کریں گے

__________________
جاویداسد