یہ کہانی ہے جنگ آزادی 1857 کے بعد کے حالات کی:
دو صدیوں پہلے جب دو صدیوں کا پیہم انحطاط ایک خوفناک سیاسی انقلاب پر منتج ہوا تھا۔ اس وقت مسلمانوں کی ڈوبتے ہوئے بیڑے کو سنبھالنے کے لیے پردہ غیب سے چند ناخدا پیدا ہو گئے تھے۔ وہ وقت زیادہ غور و خوض کا نہ تھا ۔ یہ سوچنے کی مہلت کہاں تھی کہ اس شکستہ جہاز کے بجائے ایک نیا اور پائیدار جہاز کس نقشے پر بنایا جائے۔ اس وقت تو صرف یہ سوال در پیش تھا کہ یہ قوم جو ڈوب رہی ہے اس کو ہلاکت سے کیوں کر بچایا جائے؟نا خداؤں میں سے ایک گروہ نے فورا اپنے اسی پرانے جہاز کی مرمت شروع کر دی، انہی پرانے تختوں کو جوڑا، ان کے رخنوں کو بھرا اور پھٹے ہوئے بادبانوں کو رفو کر کے جیسے تیسے بن پڑا چلنے کے قابل بنا لیا۔
دوسرے گروہ نے لپک کر ایک نیا دخانی جہاز کرائے پر لے لیا اور ڈوبنے والوں کی اچھی خاصی تعداد کو اس پر سوار کر دیا۔اس طریقہ سے دونوں گروہ اس اچانک مصیبت کو ٹالنے میں کامیاب ہو گئے۔ مگر یہ دونوں تدبیریں صرف اس حیثیت سے کامیاب تھیں کہ انہوں نے فوری ضرورت کے لحاظ سے چارہ سازی کر دی، اور ڈوبتوں کا ہلاکت سے بچا لیا۔ان میں حکمت اور دانشمندی جو کچھ بھی تھی صرف اسی حد تک تھی۔اب جو لوگ اس وقت کے ٹل جانے کے بعد انہی دونوں تدبیروں کو ٹھیک ٹھیک انہی دونوں شکلوں پر قائم رکھنا چاہتے ہیں ان کا طرز عمل عقل و دانش کے خلاف ہے۔ نہ تو پرانا بادبانی جہاز اس قابل ہے کہ مسلمان صرف اسی پر بیٹھ کر ان قوموں سے مسابقت کریں جن کے پاس اس سے ہزار گنا تیز رفتار چلنے والے مشینی جہاز ہیں اور نہ ہی کرایہ پر لیاہوا جہاز اس لائق ہے کہ مسلمان اس کے ذریعے سے اپنی منزل مقصود تک پہنچھ سکیں۔ کیونکہ اس کا ساز و سامان ضرور نیا ہے اور اس کی رفتار تییز بھی ہے۔ مگر وہ دوسروں کا جہاز ہے۔اس کا ڈئزائن ان ہی کے مقاصد اور ان ہی کی ضروریات کے لیے موزوں ہے۔اس کے رہنما اور ناخدا بھی وہی ہیں۔ لہٰذا اس جہاز سے بھی ہم یہ امید نہیں کر سکتے کہ ہمیں اپنی منزل مقصود کی طرف لے جائے۔بلکہ اس تیز رفتاری سے الٹا خطرہ یہ ہے کہ وہ ہمیں زیادہ سرعت کے ساتھ تو مخالف سمت میں لے جائے گا اور روز بروز اپنی منزل مقصود سے دور کرتا جائے گا۔ فوری ضرورت کے وقت تو وہ لوگ بھی حق بجانب تھے جنہوں نے پرانے جہاز کی مرمت کی اور وہ بھی غلطی پر نہ تھے جنہوں نے کرایہ کے جہاز پر سوار ہو کر جان بچائی۔ مگر اب وہ بھی غلطی پر ہیں جو پرانے جہاز پر ڈٹے ہوئے ہیں اور وہ لوگ بھی غلطی پر ہیں جو کرایہ کے جہاز پر ڈٹے ہوئےہیں۔

"اصلی رہنما اور حقیقی مصلح کی تعریف یہ ہے کہ وہ اجتہاد فکر سے کام لیتا ہے اور وقت اور موقع کے لحاظ سے جو مناسب ترین تدبیر ہوتی ہے اسے اختیار کرتا ہے،اس کے بعد جو لوگ اس کی اتباع کرتے ہیں وہ اندھے مقلد کہلاتے ہیں ۔ جس طریقہ اور تدبیر کو مجتہد نے وقت کے لحاظ سے اختیار کیا ہوتا ہے ،اسی طریقہ پر وہ مقلد وقت گزر جانے کے بعد بھی آنکھیں بند کر کے عمل کیے جاتے ہیں "

بد قسمتی سے ہم کو ان دونوں گروہوں میں ایک بھی مجتہد نظر نہیں آتا۔ انتہائی جرآت کر کے پرانے جہاز والوں میں سے کوئی اگر اجتہاد کر بھی لیتا ہےتو بس اتنا کہ اپنے اسی پرانے جہاز میں چند بجلی کے بلب لگا لیتا ہے، کچھ نئے طرز کا فرنیچر خرید لیتا ہے اور ایک چھوٹی سی دخانی مشین خرید لاتا ہے جس کا کام اس کے سوا کچھ نہیں کہ سیٹی بجا بجا کر لوگوں کو دھوکا دیتی رہے کہ اب پرانا جہاز نیا ہو گیا ہے۔
اس کے مقابلے میں نئے جہاز والے اگرچہ دوسروں کے جہاز میں بیٹھے ہیں اور تیزی کے ساتھ مخالف سمت میں بہے جا رہے ہیں، مگر دو چار پرانے بادبان لے کر بیسیوں صدی کے اس اپ ٹو ڈیٹ جہاز میں لگائے ہوئےہیں تاکہ خود کو اور مسلمانوں کو یہ دھوکا دے سکیں کہ یہ جہاز بھی "اسلامی جہاز" ہے اور لندن کے راستہ حج کعبہ کو چلا جا رہا ہے۔

اندھی تقلید اور اس کے اجتہاد کی یہ جھوٹی نمائش
ایک طوفان گزر گیا (1857 سے بعد)۔اب دوسرا طوفان بہت قریب ہے (جنگ عظیم دوم کے بعد کے حالات کی طرف اشارہ)۔ہندوستان میں ایک دوسرے سیاسی انقلاب کی بنا پر رہی ہے (یہ مضمون 1936میں لکھا گیا)۔ممالک عالم میں ایک اور بہت بڑے تصادم کا سامان ہو رہا ہے۔مسلمانوں کو نت نئے طوفانوں کا سامنا کرنا پڑ سکتا ہے۔ اس وقت مسلمانوں کی ایمانی و اعتقادی اور اخلاقی وعملی حالت جیسی کچھہ ہے اس کو دیکھتے ہوئے ہم نہیں سمجھتے کہ ان آنے والے طوفانوں کی ایک ٹکر بھی خیریت کے ساتھ سہہ سکیں گے۔ ان کا پرانا جہاز دور جدید کے کسی ہولناک طوفان کا مقابلہ نہیں کو سکتا۔شاید ایک ہی تھپیڑے میں اس کے تختے بکھر جائیں اور اس کے بادبانوں کا تار تار الگ ہو جائے۔ کرائے کا جہاز تو پرانے جہاز سے بھی زیادہ خطرناک ہے۔ جو لوگ اس پر سوار ہیں ،ہمیں خوف ہے کہ طوفانی دور کا پہلا تھپیڑا ہی ان کو ملت اسلامیہ سے جدا کر دے گا۔
پس اب یہی وقت ہے کہ مسلمان پرانے جہاز سے بھی نکلیں اور کرایے کے جہاز سے بھی اتریں اور خود اپنا ایک جہاز بنائیں۔ جس کے الات اور کل پرزے جدید ترین ہوں۔ مشین موجودہ دور کے تیز سے تیز جہاز کے برابر ہو مگر نقشہ ٹھیٹھ اسلامی جہاز کاہو اور اسکے انجینیر اور کپتان اور دیدبان سب وہ ہوں جو منزل کعبہ کی راہ و رسم سے با خبر ہوں۔
(ماخذ: تعلیمات ازسید ابوالاعلیٰ مودودی)