کوئی مذہبی اسکالر یا مولانا کسی ٹیلی ویژن چینل پر مارننگ پروگرام کا میزبان ہو اور وہ سالگرہ،ویلنٹائن ڈے، فرینڈ شپ ڈے ناظرین کے ساتھ جوش و خروش سے مناتا نظرآئے تو بہت عجیب لگے گا اور اس پر تنقید بھی بے شمار ہوگی مگر شوبز کی شخصیات جب رمضان المبارک کے پروگرامات کی میزبانی کرے اور ناظرین کو روزے کی خصوصیات،اثرات اورفضیلت بیان کرے تو عجیب کیوں نہیں لگتا۔۔؟؟
رمضان کا بابرکت مہینہ جاری ہے اور ٹیلی ویژن چینلز سے لے کر ٹوتھ پیسٹ تک سب رمضان کے مختلف برانڈ پیش کر کے اپنی دکان چلا رہے ہیں۔حیرانی کی بات تو یہ کہ رمضان المبارک کے پروگرامات دیکھ کر یہ گمان ہونے لگتا ہے کہ شاید اس ملک میں علمائے کرام کا قحط ہے اور وہ عوام کی رہنمائی کے لیے دستیاب نہیں لہذا مجبوراً ریما،عمر شریف، معمر رانا، علی حیدر،شائستہ واحدی، ساحر لودھی جیسے لوگ عوام کو دینی مسائل بتاتے ہیں ۔ جب شوبز کے یہ روشن ستارے اپنی بھرپور چکا چوند ،لائف اسٹائل کے ساتھ عوام کو رمضان سے آگاہ کریں گے کہ رمضان کیسے گزارا جائے تو اندازہ کیا جاسکتا ہے کہ رمضان کیسا گزرے گا۔
حال ہی میں پاکستان کے ایک سیاسی رہنما کی جانب سے نظریہ پاکستان پر بات کی گئی تو ٹاک شوز کے اینکرز نے اس کو اپنے پروگرامات کا موضوع بنایا اور لگے اس پر بحث کرنے ۔یہ تو پاکستان کے میڈیا کی عادت ہی ہے کہ بس کسی سے کوئی غلظی سرزد ہو تو میڈیا اس کے پیچھے پڑ جاتا ہے مگر دکھ اس بات کا ہے کہ میڈیا تنقید برائے اصلاح کے بجائے تنقید برائے تنقید میں مصروف ہے اور سر تو جب چکرایا کہ جب ایک نجی ٹیلی ویژن چینل کی خاتون میزبان جو مغربی روایات سے متاثر معلوم ہوتی ہیں اور ان کا حلیہ اس بات کی عکاسی بھی کررہا تھا وہ نظریہ پاکستان پر اپنی رائے دے رہی تھیں اور صرف حب علی اور بغض معاویہ کے مترادف وہ پاکستا ن کو اسلامی ریاست اور نظریہ پاکستان سے انحراف کو غداری قرار دے رہی تھی ورنہ وہ خاتون خود اس قبیلے سے تعلق رکھتی ہیں جو پاکستان کو سیکولر ریاست گردانتے ہیں۔
اسی قسم کے بے شمار پروگرامات ہیں جن میں خود کو عقل کُل سمجھنے والے میزبان عوام کو گمراہ کرنے، اپنے کسی مخالف کو بدنام کرنے یا خاص ایجنڈے پر میں مصروف عمل ہیں اور ان پروگرامات کو دیکھ کر مجھے ایک دانشور و معروف کالم نگار کی یہ بات یاد آجاتی ہے کہ بدقسمتی سے پاکستان کے ٹاک شوز علم فہم کی آگاہی فراہم کرنے کے بجائے مرغوں کی لڑائی سے زیادہ کچھ نہیں۔
مگر ان سب کے باوجود خوش آئند بات یہ ہے کہ چند دانشور اور صحافی اب کھلے لفظوں اس بات کا اظہار کرتے ہیں کہ میڈیا احتساب سے بالاتر نہیں۔عوام کا میڈیا سے اعتماد دن بہ دن کم ہوتا جارہا ہے اور یہ سب اس وجہ سے ہے کہ چند نام نہاد دانشوروں کو مختلف پروگرامات کی میزبانی کے فرائض سونپ دیے ہیں جن کا غلط استعمال ہورہا ہے اور پروگرامات کے میزبان واضح طور پر جانبداری کا مظاہرہ کررہے ہیں۔
موضوع اور میزبان کی تمیز ختم کی جارہی ہے ایک ہی شخص ایک وقت میں اداکار بھی ہے اور مذہبی اسکالر بھی۔ میزبان حقیقت میں کچھ ہیں اور ٹاک شوز میں عوام کو وہ مشورے دیتے نظر آتے ہیں جن پر وہ خود بھی عمل نہیں کرتے اور جانبداری کا مظاہرہ بھی عروج پر ہے۔
پاکستان میں میڈیا آزاد ہے اور اسےعوام کا اعتماد بھی حاصل ہے مگر بدقسمتی سے میڈیا وہ نہیں دکھا رہا جو لوگ دیکھنا چاہتے ہیں بلکہ عوام وہ دیکھنے پر مجبور ہیں جو میڈیا دکھا رہا ہے۔
خرد کا نام جنوں رکھ دیا جنوں کا خرد
جو چاہے آپ کا حسن کرشمہ ساز کرے!
تحریر راناجاوید
راناجاوید ابلاغ عامہ کے طالب علم ،پیشہ کےلحاظ سےصحافی ہونے کے ساتھ ساتھ عمدہ بلا گر بھی ہیں۔
The News Tribe

__________________
فیس بک پہ پاک نیٹ کا حلقہ احباب

https://www.facebook.com/groups/pak.net

دوستوں سے گزارش ہے کہ اپنے شائع کردہ موضوع کو یہاں بھی شئیر کردیا کریں تاکہ زیادہ سے زیادہ لوگوں کو پاک نیٹ کی فیملی کا حصہ بنایا جاسکے۔