روس میں شامل ری پبلک یاکوتیا سائبریا کے شمال مشرقی علاقے میں واقع ہے۔ یاکوتیا سخت موسمی حالات اور ہیروں کے بڑے قدرتی وسائل کے لیے مشہور ہے۔ یہاں موسم گرما بہت مختصر جبکہ موسم سرما طویل ہوتا ہے۔ سردیوں میں درجہ حرارت منفی ساٹھ سے ستر ڈگری سینٹی گریڈ ہوتا ہے، بارہ مہنیوں میں سے سات ماہ زمین برف سے ڈھکی ہوئی ہوتی ہے۔ ایسے مقامات بھی ہیں جہاں برف کبھی نہیں پگھلتی۔

یاکوتیا دنیا کے ان گنے چنے علاقوں میں سے ایک ہے جہاں انسانی سرگرمیوں سے فطرت پر کم سے کم اثر پڑا ہے۔ یاکوتیا کے نائب صدر Dmitriy Glushko نے بتایا: ہمارے ہاں لوگ فطرت کے بارے میں جو رویہ رکھتے ہیں اس کا موازنہ فلم "اوتار" میں دکھائے گئے فطرت کے بارے میں احتیاط کے رویے سے کیا جا سکتا ہے۔ ہمارے ہاں لوگوں کو ان علاقوں کی سیر کرائی جاتی ہے جہاں سے ہیرے نکالے جانتے ہیں، جبکہ ان صنعتی علاقوں کے عین قریب ایسے علاقے ہیں جہاں وہ کوہان دار بیل یعنی bison پالے جاتے ہیں جو برفانی دور میں دنیا میں پائے جاتے تھے۔ یہ بات قابل ذکر ہے کہ قدیم جانور میموتھوں کے لاشے دریافت کئے جانے کے بیشتر واقعات یاکوتیا میں ہی پیش آئے۔

یاکوتیا کے قابل دید مقامات میں سے ایک "Lenskiye stolby " (یعنی "دریائے لینا کے کنارے پر ستون") نامی نیشنل پارک ہے جو بہت جلد عالمی ورثہ کی یونیسکو کی فہرست میں درج کئے جانے کا منصوبہ ہے۔ قدیم زمانے میں بارش، دریا کی لہروں اور ہوا کے زیر اثر یہاں کے چٹانوں کی سطح غیرمعمولی شکل اختیار کر گئی تھی۔ اس کے علاوہ اس نیشنل پارک میں ٹائگا جنگل کے عین بیچ صحرائی علاقہ بھی ہے۔ اس کا مطلب یہ ہے کہ کروڑوں سال پہلے یاکوتیا میں موسم بہت گرم تھا۔

بہر حال آج یاکوتیا میں شمالی نصف کرہ کا سرد ترین مقام واقع ہے جو بستی Oymiakon میں ہے۔ موسم سرما میں یہاں درجہ حرارات منفی اکہتر ڈگری سینٹی گریڈ تک گر جاتا ہے۔ تاہم اس انتہائی سرد علاقے میں بھی انسان بستے ہیں۔ مقامی باشندوں کو ایوینکی کہا جاتا ہے۔ وہ بہت ہی ملنسار ہیں، سیاحوں کا ہمیشہ پرتپاک استقبال کرتے ہیں، انیہں اپنے طرز زندگی اور رسم و رواج کے بارے میں بتاتے ہیں، مچھلی اور قطبی ہرنوں کے گوشت سے بنائے جانے والے قومی کھانا کھلاتے ہیں۔ اس کے علاوہ سیاحوں کو قومی تقریبات میں بھی حصہ لینے کا موقع مل سکتا ہے۔

سیاح یاکوتیا سے بہت زیادہ دلچسپ یادگاری اشیاء لے جا سکتے ہیں جن میں قطبی ہرن کے سمور اور میموتھ کی ہڈیوں سے بنائی گئی چیزیں اور قطبی ہرنوں کے سنگوں سے تیار کردہ ادویہ شامل ہیں۔ یہ ادویہ نظام اعصاب، رگوں اور غذائی نالی کی بیماروں کے علاج کے لیے استعمال کئے جاتے ہیں۔ یادگار کے طور پر یاکوتیا کے مشہور ہیرے بھی لے جائے جا سکتے ہیں۔ یاکوتیا کا سفر کرنے والے سیاح نہ صرف ہیرے خرید سکتے ہیں بلکہ ہیرے نکالے جانے اور تراشے جانے کے بارے میں معلومات حاصل کر سکتے ہیں۔

__________________