لبیک الھم لبیک، لبیک لا شریک لک لبیک کا ورد کرتے 30 لاکھ سے زائد فرزندان توحید مکۃ المکرمہ کی مقدس وادی میں حج جیسے اہم فریضے کو سر انجام دے چُکے۔ مناسک حج میں سے عام مسلمانوں کو کوئی سنت یاد ہو نہ ہو قربانی کی سنت سبھی کو ازبر یاد ہوتی ہے۔اور اسی وجہ سے اس عید کو عید قربان بھی کہا جاتا ہے۔

قربانی کرنے کے شاید لاتعداد وجوہات پیش کی جا سکیں ۔ تاہم ایک سادہ سی منطق جو ہم اس میں سے نکال سکیں وہ یہ کہ اس کی وجہ سے اس دن لاتعداد غربا کو'کہ جو ویسے گوشت نہیں خرید سکتے' گوشت وافر میسر آ جاتا ہے اور اللہ انکی یہ خواہش ایسے پوری کر دیتا ہے کہ وہ "ھل من مزید" کہنا ہی بھول جاتا ہیں۔

یہ بات تسلیم کہ قربانی کی ایک اہم بات یہ بھی ہے کہ اللہ تعالیٰ اچھی چیز کی قربانی پسند کرتا ہے بعینہ اس طرح کہ جس میں حضرت ابراہیم نے اپنی سب سے پسندیدہ چیز یعنی اولاد کی قربانی کی تھی۔ یہ بات بھی تسلیم کہ صاحب حیثیت افراد کو زیادہ سے زیادہ قربانی کرنی چاہیے۔

لیکن گزشتہ دنوں مختلف چینلز اور اخبارات پر قربانی کے جانوروں کے نرخ سن کر اور پڑھ کر حیران و پریشان ہو گیا۔ 20 من کے ایک بیل کی قیمت 15 لاکھ روپے۔اسی طرح چند اور جانوروں کی قیمتیں بھی لاکھوں میں بیان کی جا رہی تھیں۔ جب میں نے حساب کتاب لگایا تو معلوم پڑا کہ اس طرح گوشت کی فی من (چالیس کلو)قیمت کوئی 70 ہزار روپے تک پہنچ جاتی ہے اور اگر اس کو فی کلو میں دیکھیں تو فی کلو قیمت 2000 روپے تقریباََ ہو گی۔جبکہ بازار میں یہی گوشت ڈیڑھ سو روپے کلو تک بھی دستیاب ہے۔
کیا یہ مہنگا سودا نہیں؟ گوشت تو دوسروں میں ہی تقسیم ہونا ہے۔ یہ 15 لاکھ روپے محض چند درجن گھرانوں میں تقسیم ہو جائیں گے۔ اس کے بجائے اگر اسی 15 لاکھ روپے کے بیل خریدے جاتے تو ھبی کم از کم 20 بیل (ہمارے شہر میں 30 سے زائد بیل) آ جانے تھے جس سے سیکڑوں گھرانے مستفید ہوتے اور میرا ذاتی خیال ہے اللہ بھی زیادہ خوش ہوتا۔
اگر تو یہ لاکھوں روپے لٹانے کا مقصد محض نمود و نمائش ہے تو خیر سے کوئیفائدہ ہی نہ ہوا لیکن اگر اللہ کی رضا بھی ہو تو بھی میرا خیال ہے اس رقم کو فضول میں "لٹایا" گیا ہے ۔اس سے کہیں زیادہ فائدہ بھی اٹھایا جا سکتا تھا۔
واللہ عالم